Athu avula abembele gale guya mu ikombelelo yawo mukunda anaheta ndo gueteya gua mihu ya monyo wawo nga guakolesa. Mukunda natshi udi naye guya mu ibungishilo ya Mathemua a Yehowa? Ndaga jitshi wajiya gumona guene?

Gusuanguluga gua gukhala mukatshi dia athu adizumba nu adi gudikuatesa. Gu ngima dia gufua gua Yesu, aklisto adilondegele mu mahungu, enji akhalele gudibungisa ha gukombelela Nzambi, gulonguga Biblia enji gudikolesa. (Hebelu 10:24, 25) Mu gudibungisa guene akhalele mumonesa guzumba, akhalele gudivua egi adi mu katshi dia mafuta a matshidia, aphangi awo a mu nyuma. (2 Tesalonike 1:3; 3 Yone 14) Tuana kabula gifezekeselo giawo nu guvua gusuanguluga luholo lungoshi.

Gukuatesa ha gukalegela shigu jia Biblia. Gifua mu tangua dikulu, mala, akhetu nu ana anagudibungisa hangoshi. Alongeshi a tema anukitshila Biblia ha gutukuatesa ha gujiya luholo lutshi ha gukalegela shigu jiene lusugu nu lusugu. (Mikhuala 31:12; Nehemiya 8:8) Muthu wagasue wajiya guzuelela gutshigina nu gudifelela guenji ha guhana gueteya nu guyimba.—Hebelu 10:23.

Gusuanguluga ha gukhala nu gutshigina guakola. Mupostolo Phaula wazuelele gu hungu dingoshi dia tangua dienji egi: “Ngudi nu uhote wavula ha gumimona . . . ha esue tudikolese n’enu hangoshi, ame mu gutshigina guenu, enue mu guami.” (Lomo 1:11, 12) Gudibungisa tangua diagasue nu Mathemua a Yehowa ako guana kolesa gutshigina nu guditshipha guetu ha gulandula shigu jia Biblia.

Watshiginyile ndo guza gudibungisa mu hungu dietu ha gumona ndaga jiene hakhaye ba? Mba aguyamba nu gusuanguluga guavula. Gudibungisa guetu gua gasue guanakhala gua ofele​—ana toga falanga go.

• Gudibungisa guetu guanahata gudibungisa gutshi?

• Gudibungisa guetu guana gutukuatesa guitshi?

Tuanuya mu gudibungisa guetu ata yatoga gubalega gishitu, guwenda ha muanya wabala nga mvula. Ikhale malamba a monyo nga guhuila gua muila gu ngima dia mudimo, mukunda natshi Mathemua a Yehowa tuanakalagala yagasue ha gudibungisa?

Guana gutukuatesa ha gununga malamba. Mukunda nu anetu tuana kudibungisa nawo mu hungu dietu, mupostolo Phaula wasonegele egi: “Tudiwungulugienu.” (Hebelu 10:24) Zuelelo edi “tudiwungulugienu” didi mudijiga “gutangiza muabonga,” ngando gudijiya muabonga nu anetu. Hene, mbimbi jia mupostolo jidi gutukolesa ha gutangiza athu ako. Gula tuajiya fami jiko jia aklisto, mba tumona egi nu’ene nji anungile malamba gifua etu, enji ajiya gutukuatesa esue nji ha gununga.

Guanakolesa ufuta wetu. Mu gudibungisa guetu, athu tuanu gudibungisa nawo adi mafuta etu a diago, uvi ashi ndo athu tuanajiya holuholu. Mu makumbi ako, tuanubalegesa tangua hamoshi ha gukena nga gudia mu luholo luabonga. Gudibungisa guene guanu gutukuatesa gu itshi? Tuana longuga ha gudinemesa enji guanakolesa guzumba guetu. Ngenyi, gula phangi mungoshi udi nu malamba, tuanumona lamba ndo ha gumukuatesa, mukunda tuakuata ufuta wakola. (Ishima 17:17) Gula tudi gudibungisa nu anetu agasue a hungu dietu, tudi mumonegese egi tuana ‘guditangijila nawo hamoshi.’​—1 Kolinto 12:25, 26.

Tuagutoga ha gutomba mafuta mu katshi di’athu anukalagala gutshigina gua Nzambi. Mafuta a luholo elu adi mu katshi dia Mathemua a Yehowa. Gubemba ndo gima gingoshi gigukange njila ha gudibungisa nu esue.

• Mukunda natshi tudi nu funu ya gukhala mu gudibungisa guetu?

• Tangua ditshi mba uza mumona hungu dietu?

Gudibungisa gua aklisto a thomo guakhalele muavula jingimbo, gutoga, gutanga enji gukotelesa ndaga jia fundjiwe mu Mukanda wa Nzambi, uvi ishigo mishambo. (1 Kolinto 14:26) Wajiya gumona egi gudibungisa guetu gudi gifua luholo lungoshi.

Malongi anagatuga mu Biblia enji anagutukuatesa. Mu poso nga mu lumingu, mahungu agasue anugudibungisa ha gubalegesa minuta 30 ha guva Lumene lua mu Biblia ludi mumonegesa funu ya Mukanda wa Nzambi mukunda nu monyo wetu nu mu masugu etu. Mukuta agasue tuanukolesewa ha gulandula mu Biblia yetu baverse amutangewa. Gungima dia lumene, hungu dianukita Gulonguga gua “Mutaledi.” Gulonguga guene guanubalegesa minuta 60, enji guanukitshiwa mu lumene lumoshi lua zulunalo Inzo ya Leha ya Mutaledi ya gulonguga. Gulonguga guene guana gutukuatesa ha gukalegela malongi a Biblia mu monyo wetu. Lumene luene luanulongugiwa mu katshi dia mahungu etu gubalega 110 000 ha mavu agasue.

Guana gutukuatesa ha gujiya gulonga muabonga. Tuana gudibungisa luko mu nguenze mu katshi dia poso mukunda nu malongi a itshinyi itatu. Anusendesa nu Gulonguga gua Biblia gua Hungu, mu minuta 30. Yanukitshiwa mu mihu-nu-gueteya, enji guanagutukuatesa ha gujiya muabongamuabonga shiku nu gutendelela gua Biblia. Ya ngiadi, Khalasa dia Mudimo wa Teyokrasi mu minuta 30. Dianuyandiga nu gutalela gitshinyi gimoshi gia Biblia ginyi hungu diatangele gu tuama. Gungima dienji, anakhalasa a khalasa diene anakalagala mene jia hihia a ahuile. Muhanyi wa matangi mungoshi wanahana matangi ha gukuatesa anakhalasa ha gulondega luholo luawo lua gutanga nu guzuela. (1 Timote 4:13) Ya suga, yanakhala Gudibungisa gua Mudimo mu minuta 30. Mu njila ya mene nu gidijigilo enji nu mene jia mihu, tuana longuga luholo lutshi lua gulonga athu Biblia.

Gula weza mu gudibungisa guetu, udi na ye guyituga ha gumona luholo malongi etu a Biblia anakhala abonga.​—Yeshaya 54:13.

• Itshi wajiya guvua mu gudibungisa gua Mathemua a Yehowa?

• Gudibungisa guetu gutshi wajiya gutshigina guza ha thomo?

Wamona mu foto jia gamukanda gaga luholo Mathemua a Yehowa anusudiga muabonga tangua adi mu gudibungisa guawo? Mukunda natshi tuana mona funu ya gulondega muila nu gusudiga guetu ngenyi?

Mukunda nu gutumagela Nzambi wetu. Idi ya diago egi Nzambi wanatala mu katshi dia mitshima yetu gubalega kutala phala. (1 Samuele 16:7) Uvi, tangua tuana gudibungisa ha gumukombelela, tuana tshigina diago gu mutumagela muene nu athu tuana gudibungisa nawo. Gula tumuya gu tuama dia Fumu, tuana talela muabonga gusudiga guetu mukunda nu gumunesa. Luholo lungoshi, sudigilo dietu dianumonesa gunemesa gua “Fumu ya ifutshi yagasue,” Yehowa Nzambi, enji nu fundo tuana gumukombelela.​—Yelemiya 10:7.

Mukunda nu gumonegesa egi tuanakalegela malongi etu. Biblia yanakolesa aklisto ha gusudiga nu ‘gudibulumuisa nu matangi abonga’ gifua athu “ananemesa Nzambi.” (1 Timote 2:9, 10) Gusudiga “nu gudibulumuisa” guakotelesa gusudiga ndo milele yidi muyitugisa athu, nga idi guhana nzala jia muila, nga mudijiga muila haphelo. Gukhala nu “matangi abonga” guana gutukuatesa ha gutomba milele yabonga, ikhadigo yadikuata nu muila nga yakoma. Shigu jiene jiana gutubembela njila ha gutomba milele ya luholo nu luholo. Ata tuazuelelego gu kano, tuajiya ‘gutumbuisa malongi a Muhuluishi wetu’ nu ‘gutumbuisa Nzambi’ mu gusudiga gua bonga. (Tito 2:10; 1 Phetelo 2:12) Gula tudimusudiga muabonga mu gudibungisa guetu, tuajiya gutuma athu ako ha gusuanguluga gukombelela Yehowa.

Ata milele yaye ishigo ya ndando, wajiya guza mugudibungisa mu Inzo ya Ufumu. Milele yetu yajiyilego gukhala phamba ya ndando nga ya gubalega gubonga, uvi idinaye gukhala ya guweva enji imonege ya ginemo gu meso a athu.

• Mukunda natshi gusudiga gua bonga gudi nu funu tangua tumukombelela Nzambi?

• Shigu jitshi jianu gututuameza ha gutomba sudigilo dietu?

Gula wana longuga Biblia nu Themua wa Yehowa, wanagudilondega gutuama dia gulonguga. Ha guheta gubonga mu gudibungisa guetu, idi yabonga gudilondega gutuama. Yidi ya gubalega gubonga gula udi nu programa.

Tomba tangua nu fundo dia gulonguga. Tangua ditshi wajiya gukhala muabonga ha gulonguga? Mu gimenegena, gutuama dia gusendesa midimo, nga ndo mu phipha, gula ana aya mubanda? Ata wajiyile go gulonguga tangua diavula, talela matangua gutshi wajiya gulonguga, enji gubemba ndo ata gima gingoshi gigukoke gulonguga guaye. Kamba fundo dishigo nu matululu, kanga gima giagasue giajiya gusha matululu, gifua radio, televizyo, nga telefone. Toga Nzambi gutuama dia gulonguga ha gukatula susi jia monyo, ngenyi wajiya gudihana mu Mbimbi ya Nzambi.​—Filiphi 4:6, 7.

Tenda gueteya guaye, enji dilondege ha guhana gueteya. Kamba gujiya ndaga itshi lumene luene lumuzuelela. Tangiza titre ya dilongi nga ya mukhapho, talela luholo lutshi batitre a zonda adi gudivua nu titre ya koma, enji tala jifoto nu mihu ya guvutugila matangi idi muzola matangi a funu. Gungima, tanga gitshinyi giagasue, kamba gueteya gua muhu wasonegewa. Kamba enji tanga baverse anyi azolewego matangi enji, enji tangiza luholo lutshi adi gudivua nu lumene. (Makalegelo 17:11) Gula wamona gueteya gua muhu, yitende nga ndo shia njimbu gu Mbimbi jia funu wajiya gumona gueteya guaye mu phushi. Gungima, wajiya guleza koko ha guhana gueteya gua hihia mu mbimbi jiaye hakhaye tangua udi mu gudibungisa.

Gula udi mutalela mene jia gudisha tuana longuga phoso nu phoso mu gudibungisa, udi mulunda ima iko mu “ima ya ndando” ya gujiya guaye gua Biblia.​—Matayo 13:51, 52.

• Programa yitshi wajiya gusha ha gulondega gudibungisa?

• Luholo lutshi wajiya gudilondega ha guhana gueteya mu gudibungisa?

Sendesa mu tangua dikulu, Yehowa wanatshigina egi fami yagasue ibalegese tangua hamoshi mukunda nu gukolesa gudivua guawo n’enji nu gukolesa gudivua guawo hakhawo. (Mikhuala 6:6, 7) Hene phoso yagasue, Mathemua a Yehowa anasha lusugu mu fami ha gukombelela hamoshi: gusolula ndaga ya Nzambi ha fundo dia guhuima gudi gudivua nu nzala ya fami yawo. Ikhale wanakhala aye hakhaye, gubalegesa tangua luholo lununu hamoshi nu Nzambi ha gulonguga lumene watomba mu Biblia idi yabonga.

Gudi tangua dia gusuena hehi nu Nzambi. “Musuene hehi nu Nzambi, nu muene mbawusuena hehi nu enue.” (Yakoba 4:8) Tuanajiya Yehowa muabonga tangua tudi mulonguga ndaga jiavula jiatalela gimuthu gienji nu midimo yenji idi yagusonegewa mu katshi dia Mbimbi yenji. Njila ya leba ya gusendesa gukombelela mu fami idi ya guzangula minuta yazonda ha gutanga Biblia hamoshi mu dijui diakoma, nga guhata programa ya Khalasa dia Mudimo wa Teyokrasi. Muajiya guhana muthu mungoshi gitshinyi gia gutanga, gungima athu agasue ajiya guzuelela ndaga muamona mu Biblia.

Gudi tangua dia gusuena hehi mu fami. Gudivua gua mala nu akhetu, mvuaji nu ana guana kola gula adi nu gulonguga gua Biblia mu katshi dia fami. Yidi naye gukhala tangua dia gusuanguluga, guhuima enji tangua dinyi muthu wagasue wana nengenena nu gusuanguluga phoso nu phoso. Mvuaji jiajiya gutomba mene jiabonga ha gutalela ivuo ya anawo, gifua mene jidi mu zulunalo Inzo ya Leha ya Mutaledi nu Tugumuga! nga mu site yetu, jw.org. Muajiya guzuelela ndaga yingoshi ana enu ataganele na yo mu khalasa enji luholo lua guyinunga. Muajiya gulonguga ngimbo mbajiyimbiwa lusugu lua gudibungisa, enji gudia ndambo jia ima gungima dia gukombelela mu fami.

Tangua mudi mubalegesa phoso nu phoso mukunda nu gukombelela Yehowa hamoshi mba dikuatesa muthu agasue mu fami ha gusuanguluga nu Mbimbi ya Nzambi, enji Nzambi mba usagumuna muavula ngolo jienu.​—Lungimbo 1:1-3.

• Mukunda natshi tuana gudibambela tangua ha gukombelela mu fami?

• Luholo lutshi mvuaji jiajiya gukalagala mukunda tangua diene dikhale dia gusuanguluga mu fami?

Mukunda natshi phala jia athu wawa jidi jia gusuanguluga? Mukunda adi mu katshi dia asamblé etu amoshi. Gifua akombeledi a Nzambi mu tangua dikulu atumiwe ha gudibungisa mbala thatu mu givuo, esue nji tuana nengenena nu mutshima wa gusuanguluga gukalagala asamblé. (Mikhuala 16:16) Givuo giagasue tuana khala nu baasamblé thatu: asamblé a njunga mbadi a lusugu lungoshi, nu asamblé a rejio a masugu athatu. Ndaga jitshi jia bonga tuanaheta mu gudimbugisa guene?

Yanakolesa muavula uphangi wetu wa aklisto. Kaka luholo ana Isalele akhalele musuanguluga ha gutumbuisa Yehowa mu katshi dia “gudibungisa gu’athu,” esue nji tuana suanguluga ha gukombelela hamoshi mu katshi dia baasamblé etu. (Ngimbo 26:12; 111:1) Mu baasamblé ene, tuanaheta tangua dia gutagana nu aphangi etu anakatuga mu mahungu ako nga mu ifutshi iko. Mu midi, tangua dia guhululuga, tuana dia ndambu jia yima nu aklisto ako ha fundo diene, enji yene yanagutubuisa mafuta gubalega. (Makalegelo 2:42) Guene tuanamona gu meso guzumba guana bungisa ‘aphangi etu a mu ndaga ya Nzambi.’​—1 Phetelo 2:17.

Yanagutukuatesa ha gukula mu nyuma. Athu a Isalele akhalele muheta gubonga mu gudibungisa guawo mukunda “akotelesele jindaga” jia Mukanda wa Nzambi jia wambelewe. (Nehemiya 8:8, 12) Esue nji tuanasuanguluga nu malongi a Biblia tuanazangulu gu baasamblé etu. Asamblé agasue anakhala nu muto wa ndaga wakatuga mu Biblia. Mu njila ya mene jiabonga, mene jia itshinyi ya vula nu guvutukila ndaga yabuile, tuana longuga luholo lua gukalegela gutshigina gua Nzambi mu monyo wetu. Enji, tuana kolesewa tangua tuanategelela mene jia aphangi anungile malamba ataganele nawo mukunda adi aklisto mu tangua didi dia lamba. Mu baasamblé a rejio, badrame anagutukuatesa ha gumona luholo mene jia Biblia adi amatshidia mukunda nu esue, enji ha guzula malongi a funu. Mu asamblé agasue, batisimo yanuhanewa gua athu atshigina gudihana gudi Nzambi.

• Mukunda natshi baasamblé anakhala tangua dia gusuanguluga?

• Asamblé ajiya gugukuatesa luholo lutshi?

Hehi nu gufua guenji, Yesu wazuelele egi: “Lukuma olu luabonga lua Ufumu mbalulongesewa gu songi jiagasue jia mavu gifua ulondodi gudi ifutshi yagasue. Mu hugo dinyi gisugishilo mbagiza.” (Matayo 24:14) Uvi, luholo lutshi mudimo wa gulonga mu mavu agasue mba gutagenesewa? Gula tuahata luholo Yesu akalegele tangua akhalele ha mavu.—Luka 8:1.

Tuana kamba kutala athu mu jinzo jiawo. Yesu walongele alandudi enji luholo lua gujiyisa lukuma lua bonga inzo nu inzo. (Matayo 10:11-13; Makalegelo 5:42; 20:20) Aklisto a thomo akhalele nu itshinyi ya terituare ya ahuiwe aye mujiyisa. (Matayo 10:5, 6; 2 Kolinto 10:13) Luholo lungoshi mangino, mudimo wetu wa kujiyisa lukuma luabonga udi wa gulondega muabonga, enji hungu diagasue dianahuiwa gitshinyi gia terituare ha gujiyisa lukuma luabonga. Luholo lununu, tuana lungisa mukhuala Yesu wahanele egi ‘tulongese athu nu tulondolole’ muabonga muabonga.​—Makalegelo 10:42.

Tuanakalagala ngolo ha gumona athu mafundo agasue tuajiya guamona. Yesu wadijigile njila luholo akhalele mujiyisa athu lukuma mu mafundo a mahundji a athu, gifua mu mabungu a mita nga mu wina dia meya dia athu agasue. (Mako 4:1; Yone 4:5-15) Esue nji tuana solula nu athu Biblia mafundo anakhala, ikhale mu mabalabala, mu isalo enji mu telefone. Tuana londolola nji gua athu anajinga hehi nu esue, mafuta a mudimo, mafuta a khalasa nu aphangi etu gula tangua diamonega. Ngolo jiagasue jiene jiahuile bamilio a athu a mavu agasue njila ya guva “mene jiabonga egi muene udi Muhuluishi.”​—Lungimbo 96:2.

Wajiya muthu mungoshi wajiya gumutela lukuma luabonga lua Ufumu wa Nzambi nu gudijiga gubonga mba lutubatela masugu amuza? Gusuega ndo lumene lua felela lulu mukunda nu aye hakhaye. Aleze mu phushi gula luholo ludi guene.

• “Lukuma luabonga” lutshi ludi naye gulongewa?

• Luholo lutshi Mathemua a Yehowa adi mulandula gifezekeselo gia Yesu mu mudimo wa gujiyisa lukuma luabonga?

Mbimbi “muvundi wa njila” yana kalegewa muavula ha guleza muthu wa thomo waya mutala mavu a gihegihe enji wakangula njila mukunda nu athu ako alandule. Tuajiya guzuela egi Yesu wakhalele muvundi wa njila, mukunda watumiwe ha mavu ha gukalagala mudimo wa guhana athu monyo enji gukangula njila ya guhuluisa athu. (Matayo 20:28) Mangino, alandudi enji anahata gifezekeselo gienji luholo anabalegesa matangua avula ha gubuisa athu ako alandudi. (Matayo 28:19, 20) Ako mu katshi diawo akitshile mudimo tumutamega mudimo wa muvundi wa njila.

Muvundi wa njila wanajiyisa lukuma tangua diagasue. Mathemua a Yehowa agasue anamuanga lukuma luabonga. Uvi, ako mu katshi diawo adi londega ha gukhala avundi a njila a tangua diagasue, idi mudijiga egi anubalegesa matangua 70 mu mbeji mu mudimo wa gumuanga lukuma luabonga. Ha gununga mudimo wene, avula anatshigina gukalagala mudimo wa tangua diazonda. Ako adi mutombewa avundi a njila a koma mu mafundo adi nu nzala yavula ya alongeshi a Ufumu; anabalegesa matangua 130 nga gubalega mu mbeji mu mudimo wawo. Avundi a njila anasuanguluga gukhala nu monyo wa gukonda gukamba ima yavula, anutshigina egi Yehowa mba wahana ima ya gujingila. (Matayo 6:31-33; 1 Timote 6:6-8) Athu anyi ajiyilego gukhala avundi a njila a tangua diagasue ajiya gukhala avundi a njila a tangua diazonda. Hene ajiya gubalegesa mudimo wa gujiyisa lukuma lua bonga matangua 30 nga 50 mu mbeji.

Muvundi wanakalagala mudimo wene mukunda wazumba Nzambi nu athu. Gifua Yesu, tudi mumona egi athu avula adi nu nzala yavula ya gujiya Nzambi nu gutshigina guenji. (Mako 6:34) Uvi, tudi nu ujiyi wajiya guakuatesa mangino enji guhana felela diakola mukunda nu masuku adi muza. Guzumba gua athu guanatuma muvundi wa njila ha guhana nu gusuanguluga tangua nu ngolo jienji ha gukuatesa athu ha gujiya lukuma luabonga. (Matayo 22:39; 1 Tesalonike 2:8) Ngenyi, gutshigina guenji guana kola, wana suena hehi nu Nzambi enji wanasuanguluga muavula.​—Makalegelo 20:35.

• Luholo lutshi wajiya gukotelesa muvundi wa njila?

• Itshi yana tuma athu ha gukalagala mudimo wa muvundi wa njila?

Malongi a ndaga ya teyokrasi yidi mulonga wakoma wa Mathemua a Yehowa sendese tangua dikulu. Anahana athu adihanele tangua diagasue gu mudimo wa gujiyisa Ufumu malongo adi nawo funu, mukunda ajiye ‘gumanesela mudimo wawo wagasue wa Nzambi.’​—2 Timote 4:5.

Khalasa Dia Avundi a Njila. Gula muvundi a njila watagenesa givuo gienji gia thomo mu mudimo wa tangua diagasue, wanatamegewa mu khalasa dia masugu asambano dinyi dianakalegewa, tangua diko, mu Inzo ya Ufumu yidi hehi. Gikuma gia khalasa diene yidi ya gukuatesa muvundi a njila ha gusuena hehi nu Yehowa, ajiye gukalagala mudimo wenji muabongamuabonga, enji ajinginyine mu mudimo wenji.

Khalasa dia Biblia dia Ajiyishi a Lokuma Luabonga lua Ufumu. Khalasa diene dia mbeji jiyadi yana hana formasyo gudi avundi a njila adi agutema mu mudimo wawo anyi atshigina gubemba membo awo ha guya mu kalagala mu fundo diagasue mba akhala nu funu yawo. Anazuela luholo lulu: “Am’you! Ngutume!” luholo lua zuelele Yesu Klisto, mwene wakhalele Mulondolodi wa koma wabalega alondolodi agasue ha mavu. (Yeshaya 6:8; Yone 7:29) Guya mujinga gua leha mu dimbo dia ye yajiya gugutoga ha gujinga monyo wa gudisha nu monyo waye wa thomo. Fundo diene diajiya gukhala nu makalegelo ako, nu muanya nga guhuma gua vula gubalega mu dimbo di’enu, enji nu yima ya gudia ya gudisha mangololo nu ya dimbo di’enu. Yajiya gugutoga gulonguga zuelelo diko. Khalasa diene diana kuatesa aphangi akhetu nu amala adi ndumbu, enji nu aphangi adi mu wulo, adi nu ivuo 23 tii 65, akudise makhalegelo awo a aklisto yajiya guakuatesa mu mudimo adi guahana enji yinyi yidi nu funu ha gula Yehowa nga ulondegi wenji wajiya guakalegela muavula.

Gileyade, Khalasa dia Watchtower ha gulongesa Biblia. Mu Hebelu, mbimbi Gileyade imudigiga githemua. Sendese akalegele Gileyade mu 1943, athu gubalega 8 000 alongewe mu khalasa diene atumiwe gifua amishionere ha guta githemua tii nu “gusongi jiagasue jia mavu,” enji yabata gubonga. (Makalegelo 13:47) Tangua bamishionere ahetele mbala ya thomo gu Perou, guakhalele ata hungu dietu dimoshi ndo. Uvi mangino, tudi nu mahungu gubalega 1 000. Tangua bamishionere etu asendesele gukita mudimo gu Japon, Mathemua akhalele ata 10 ndo guene; mangino, tuabalega 200 000. Malongo ene a Gileyade anakalagala mbeji jitano; analongoga Biblia muabongamuabonga. Mu khalasa diene, anatamega athu anakalegala gifua avundi a njila akoma, amishionere, athu anakalagala mu bilo ya bafiliyale, nga atadi a wendji. Anahuiwa formasyo ya bonga ha gukuatesa enji gukolesa mudimo ha mavu agasue.

• Khalasa ya avundi a njila didi nu funu itshi?

• Akuatshi ajiya gukobela mu Khalasa dia Ajiyishi a Lokuma Luabonga lua Ufumu?