‘Izenu Gudi Ame, . . . Mbangumihana Ngolo’

1. Ha gutadila Matayo 11:28-30, laji ditshi diahanele Yesu?

YESU wahanele laji diabonga gudi athu akhalele gumutegelela. Wazuelele egi: ‘Izenu gudi ame, mbangumihana ngolo.’ (Tanga Matayo 11:28-30.) Mbimbi eji jiakhalelego phamba mbimbi jia gituhu. Tangigiza gale luholo Yesu gakuatesele mukhethu wakhalele nu misongo yakola.

2. Itshi yakalegele Yesu mukunda nu mukhetu wakhalele nu misongo?

² Mukhetu owu wakambele ukuateshi ivo yavula. Wayile mumona minganga ya maluholo avula hagula yajiya gumusaga. Wakatele ivo 12, uvi guakhalelego nga muthu wajiya gumukuatesa. Ha gutadila Mukuala wa Moize, mukhetu owu wakhalele diago nu usala. (Levi 15:25) Gungima, mukhetu muene wavuile egi Yesu wakhalele musaga athu akhalele nu misongo. Hene, wayile gumumona. Tangua gayile, wakuatele songi ya mulele wa Yesu. Mu tangua diene, misongo yenji yahuile! Uvi Yesu gamusagelego phamba gusaga. Wamunemesele nu wamuzumbile. Luholo lutshi? Tangua akhalele muta nenji maga, Yesu wamutamegele egi “munami’a mukhetu.” Yadiago mukhetu owu wahetele lume ngolo!—Luka 8:43-48.

3. Mihu itshi tuza mutadila?

³ Jiya egi mukhetu owu muene hakhenji wayile gudi Yesu. Watshitshile ngolo ha guya gudi Yesu. Luholo lumoshi nji mangino, tudi naye gutshita ngolo ha “guya gudi” Yesu. Uvi mangino, Yesu ganago gutshita ndaga jia gushimana gifua, gusaga misongo ya athu adi “muya gudi” muene. Ikhale ngenyi, muene udi gututamega egi: ‘Izenu gudi ame, . . . mbangumihana ngolo.’ Mu longo edi, tuza muhana mvutu gu mihu eyi thano: Luholo lutshi tuajiya “guya gudi” Yesu? Tangua diazuelele Yesu egi: ‘Zangulenu muhitu [muphando] wami ha phanga,’ itshi atshiginyile guzuela? Gifezegeselo gia Yesu giajiya gutulongesa itshi? Mukunda natshi mudimo watuhanele Yesu wana gutuhana ngolo? Luholo lutshi tuajiya gulandula guheta ngolo nu muhitu wa Yesu?

‘IZENU GUDI AME’

4-5. Itshi tudi naye gukalagala ha “guya gudi” Yesu?

⁴ Luholo lumoshi tuajiya “guya gudi” Yesu ludi: gulonguga ndaga jiazuelele nu jiatshitshile muene. (Luka 1:1-4) Gushigo nga muthu muko wajiya guloguga ha fundo dietu. Gidi ginemo gietu gia gujiya itshi Biblia yana guzuela mukunda nu Yesu. Tuana “guya gudi” Yesu tangua tuana guzula desizio dia gubatshijiwa nu gubua mulandudi wa Klisto.

⁵ Luholo luko tuajiya “guya gudi” Yesu ludi: guya gudi akulu a mu hungu gula tudi nu funu ya ukuateshi. Yesu wana gubamba imeme yenji mu njila ya ‘akulu.’ (Ef. 4:7, 8, 11; Yone 21:16; 1 Phet. 5:1-3) Uvi, tudi naye gutshita ngolo ha gutoga ukuateshi gudi akulu. Tushigo naye gunengena egi akulu ajiye ndaga jidi mu mitshima yetu ha gujiya ima tudi nayo funu. Phangi Julian udi muzuela egi: “Ngabembele mudimo wami gu Betele handaga ngakhelele mukata. Mu tangua diene, futa diami mumoshi wanguwambelele ha gutamega akulu hagula aze angutale ha gunguhana ngolo. Thomo, ngatangijilego egi ngakhalele nu funu ya ukuateshi wa akulu. Uvi gungima, ngatamegela akulu ha guza gungukuatesa. Ngamonele diago egi guza guawo guakhalele kado ga ndando gadi khenji ngahetelegalego.” Luholo lumoshi nu akulu mbadi awa ayile mutala Julian, akulu ajiya gutukuatesa ha gujiya ‘matangi a Klisto.’ Yakotelesa egi gutegelela Klisto nu gutshita ndaga gifua muene. (1 Kol. 2:16; 1 Phet. 2:21) Ukuateshi wa akulu udi kado gabalega gubonga ajiya gutuhana.

‘ZANGULENU MUHITU WAMI HA PHANGA’

6. Tangua diazuelele Yesu egi: ‘Zangulenu muhitu wami ha phanga,’ itshi atshiginyile guzuela?

⁶ Tangua diazuelele Yesu egi: ‘Zangulenu muhitu wami ha phanga,’ yajiya gukhala watshiginyine guzuela egi “Tshiginyenu Ufumu wami.” Yajiya luko gukotelesa egi “Nginyenu nu ame goshi’a muhitu hagula tutshite mudimo wa Yehowa hamoshi.” Yadiago, guzangula muhitu guana gutoga egi tutshite mudimo.

7. Ha gutadila Matayo 28:18-20, mudimo utshi tuahetele ha gutshita? Itshi tushigo naye gubuita mutshima?

⁷ Tangua tuana gudihana gudi Yehowa mu gisambu nu tuana gubatijiwa, tuana gumonesa egi tuatshigina guzangula muhitu wa Yesu. Muthu wagasue wajiya guya gudi Yesu. Muene mbagatunyigo nga muthu watshigina nu mutshima umoshi ha gukombelela Nzambi. (Yone 6:37, 38) Alandudi agasue a Klisto akhala nu luendu lua gukalagala mudimo Yehowa atogele Yesu ha gutshita. Tudi naye gusha mutshima egi Yesu mbawukhala nu esue tangua diagasue ha gutukuatesa mu mudimo wene.—Tanga Matayo 28:18-20.

‘LONGUGIENU GUDI AME’

8-9. Mukunda natshi athu avula akhalele muya gudi Yesu? Mihu itshi tudi naye gudihula?

⁸ Athu a gudibulumuisa akhalele muya gudi Yesu. (Mat. 19:13, 14; Luka 7:37, 38) Mukunda natshi? Tangiza gale gudisha guakhalele mukatshi dia Yesu nu Afalese. Afalese akhalelego nu guzumba, nu akhalele enya lulendo. (Mat. 12:9-14) Uvi Yesu wakhalele nu guzumba, wakhalele nji muthu wa gudibulumuisa. Luko, Afalese akhalele nu khadilo dia gudikanduisa, nu akhalele gudimona egi abalega athu ako. Uvi Yesu wazuelele egi gudikanduisa gushigo ndaga yabonga. Walongesele alandudi enji ha gukhala nu gudibulumuisa nu gukuatesa athu ako. (Mat. 23:2, 6-11) Afalese akhalele muvuisa athu ako woma ha guaahinyina. (Yone 9:13, 22) Uvi Yesu wakhalele mutulula mitshima ya athu nu ndaga jia guzumba nu mbimbi jia gisemo.

⁹ Khadilo dia Yesu didi gugulongesa itshi? Dihule egi: ‘Athu ana gungumona gifua muthu wahuiminyina nu wa gudibulumuisa ba? Ngana gutshigina gukalagala midimo athu avula ana gusegulula, ha gukuatesa athu ako ba? Ngana guwambela athu mbimbi jia gisemo ba?’

10. Luholo lutshi Yesu gakuatesele alandudi enji mukunda nu mudimo?

¹⁰ Yesu wakuatesele alandudi enji ha gutshita mudimo muabonga nu guhuima guagasue, wahanele nji formasio. (Luka 10:1, 19-21) Walezele alandudi enji ha gumuhula mihu, nu ha guhana matangi’awo. (Mat. 16:13-16) Alandudi a Yesu akhalele gifua mitshi yana gubambewa hagula ibolesewago ha gukula muabonga. Alandudi atumagele malongo a alongesele Yesu, abutshile nji mabundu mu midimo yawo yabonga.

11. Mihu itshi tudi naye gudihula?

¹¹ Wakhala nu ufumu wa gutuameza athu ako ba? Gula idi ngenyi, dihule egi: ‘Luholo lutshi ngana gukalegela athu ako ndaga gu mudimo nga gu inzo? Ngana gukamba guhuima nu athu ako, ikhale gu mudimo nga gu inzo ba? Ngana guhana athu ako njila ya guhula mihu ba? Ngana gukhala hehi ha gutegelela matangi’awo ba?’ Tukhadigo gifua Afalese. Ene akhalele muvua khabu gula muthu watuna ndaga jiakhalele ene muzuela. Luko, gula muthu wamonesa matangi a gudisha nu awo, akhalele gumumonesa lamba.—Mako 3:1-6; Yone 9:29-34.

‘MBAMUHETA NGOLO’

12-14. Mukunda natshi mudimo watuhuile Yesu wana gutuhana ngolo?

¹² Mukunda natshi gutshita mudimo watuhanele Yesu guana gutuhana ngolo? Gudi nu ishina yavula idi gutumonesa egi guana gutuhana ngolo. Uvi tutadilenu phamba yazonda.

¹³ Tudi nu atuameji abonga diago. Yehowa, Mutuameji wetu Wakoma, gashigo fumu wa shidi munu ganago guhana mersi gudi athu enji. Muene wana guzula mudimo wetu nu ndando. (Heb. 6:10) Luko, wana gutuhana ngolo jiajiya gutukuatesa ha gukalagala mudimo watuhanele muene. (2 Kol. 4:7; Gal. 6:5, mbimbi goshi’a diyiji) Fumi’etu Yesu, watumonesele luholo luatagana tudi naye gukalegela athu ndaga. (Yone 13:15) Akulu ana gututuameza, ana gulandula gifezegeselo gia Yesu, “mubambi wakoma wa imeme.” (Heb. 13:20; 1 Phet. 5:2) Ene ana gukalagala ngolo ha gutumonesela gisemo, nu ha gutuhana ngolo, nu ha gutudisa mu nyuma nu ha gutubamba.

¹⁴ Tudi nu mafuta abonga lume. Gushigo nga athu ha mavu awa adi nu mafuta ana guaazumba, nu adi nu mudimo wabonga gifua esue. Tangiza gale: Tudi nu luendu lua gutshita mudimo hamoshi nu aphangi’etu adi nu makalegelo abonga, nu anago gudimona egi abalega athu ako. Aphangi’etu Aklisto ajiya gale gutshita ima yavula, uvi anago gudikanduisa. Gumeso awo, tushigo phamba atshitshi a mudimo n’ako, uvi tudi lume mafut’awo. Guzumba guawo mukunda nu esue guakhala guakola handaga ana gutshigina nji gufua mukunda nu esue!

15. Luholo lutshi tudi naye gudivua mukunda nu mudimo tudi mukalagala?

¹⁵ Tudi nu mudimo wawaha lume. Tuana gulongesa athu giamatshidia giatadila Yehowa, nu tuana gumonesa mambo a Diabulu haphelo. (Yone 8:44) Satana wana gusagesa athu luholo gana guahuiga, mambo enji ana guakatula felela. Satana wana gutuma athu ha gutangiza egi Yehowa gajiyilego gututotesela gubola, nu gajiyilego gutuzumba. Adi diago mambo akola ana gulebesa athu muila! Uvi, gula ‘tuaya gudi’ Klisto, gubola guetu guana gutotesewa. Luko, giamatshidia gidi egi, Yehowa wana gutuzumba mukut’etu agasue mangololo. (Lomo 8:32, 38, 39) Gukuatesa athu ako ha guzegemena gudi Yehowa, nu gumona luholo adi mulondega mionyo yawo, guana gusuanguluisa muavula lume!

LANDULA GUHETA NGOLO NU MUHITU WA YESU

16. Luholo lutshi ginemo giatuhanele Yesu giakhala gia gudisha nu inemo iko tuana gubata?

¹⁶ Ginemo gidi gututoga Yesu ha gubata gidi gia gudisha nu inemo iko tudi naye gubata. Tufezegese gale: Athu avula gula akatuga gu mudimo mu ngueze, ana gukhala aguhuila, nu anakhalago nu gusuanguluga. Uvi, gula tuakatuga gu mudimo wa Yehowa nu Yesu, tuana gukhala nu gusuanguluga guavula sha. Gula tuakatuga gu mudimo mu ngueze, tuana gukhala aguhuila, nu tuana gutshita ngolo ha guya mu gudibungisa gua mu hungu mu ngueze yene. Uvi tangua tuana gukatuga mu gudibungisa gua mu hungu, tuana guvutuga nu ngolo jiavula. Idi luholo lumoshi nji nu ngolo tuana gukalagala ha gulongesa nu gulonguga Biblia hakhetu. Gubonga tuana guheta guakhala guavula gubalega ngolo tuana gukalagala!

17. Itshi tudi naye gujiya, nu luholo lutshi tuajiya gumonesa gutema?

¹⁷ Tudi naye gujiya egi mukut’etu agasue Nzambi watuhanele ndambo ya ngolo. Hene, tudi naye gukalegela ngolo jietu nu gutema guagasue mu ndaga tudi mutshita. Tufezegese gale. Tuajiya gubolesa ngolo jietu gula tudi gudihana muavula ha gukamba falanga nu ima ya ha mavu awa. Tala ndaga Yesu gawambelele muvuala mumoshi wakhalele nu umonyi. Muvuala muene wahudile Yesu egi: ‘Itshi ngudi naye gutshita ha guheta monyo wa ivo nu ivo?’ Muvuala muene wakhalele mutumagela Mukhuala wa Moize. Idi naye gukhala egi muvuala muene wakhalele muthu wabonga, handaga mukanda wa Mako udi muzuela egi Yesu wamutalele nu “wamuzumbile.” Yesu watamegele muvuala muene. Wamulezele egi, “Nda, sumbisa ima udi nayo. Hangima, iza ungulandule.” Muvuala muene wakhalele genji nu matangi a gulandula Yesu. Uvi, gakhalelego mutshigina gubemba ‘umonyi wenji wavula.’ (Mako 10:17-22, NWT) Ngenyi, watunyile genji muhitu wa Yesu, walanduile gukhala muhiga wa “umonyi.” (Mat. 6:24) Gula nga aye wakhalele ha fundo dienji, itshi wakhalele naye gutshita?

18. Itshi tudi naye gutshita tangua diagasue? Mukunda natshi?

¹⁸ Tangua diagasue, idi ndaga yabonga ha gutangiza ima itshi tudi muhaga ha fundo dia thomo mu monyo wetu. Mukunda natshi? Hagula tujiye gula tudi mukalagela ngolo jietu nu gutema guagasue. Phangi mumoshi wa muvuala, mu jina dia Mark wazuelele egi: “Ivo yavula, ngakhalele mutangiza egi ngakhalelego gami mukamba gukhala nu ima yavula-vula. Ngakhalele muvundji wa muhola, uvi tangua diagasue ngakhalele mukalegela tangua nu ngolo jiami jiavula ha gukamba falanga nu gulondega lujingu luami. Ngakhalele gudihula mukunda natshi lujingu luami luakhalele lua lamba. Hangima, ngakotelesele egi ngakhalele mukamba thomo gubonga guami, uvi Yehowa ngakhalele gumuhana tangua nu ngolo jiazonda.” Phangi Mark wasombegesele matangi’enji nu lujingu luenji hagula wajiya gudihana muavula mu mudimo wa Yehowa. Udi muzuela gamba: “Matangua ako ngana gudisagesa mukunda nu falanga. Uvi Yehowa nu Yesu ana gungukuatesa ha gubinga malamba ami.”

19. Mukunda natshi gutshigina ndaga luholo jidi gudi mulonga wawaha?

¹⁹ Mbatulandula guheta ngolo nu muhitu wa Yesu gula tudi mukalagala ndaga thathu. Thomo, tudi naye gutshigina ndaga luholo jidi. Tudi mutshita mudimo wa Yehowa. Hene, tudi naye guwukalagala mu luholo ludi muene mutshigina. Esue tudi enya mudimo, uvi Yehowa udi Fumi’a mudimo. (Luka 17:10) Gula tudi mutshita mudimo wenji mu luholo tuatshigina, mbatudihana esue hakhetu lamba ha guwutshita. Mu mafundo ako, athu ana gukanda ngombe mbadi mutshi ha shingo ha gudima mahia. Uvi gula ngombe imoshi yakamba guya gu khanda yatshigina, nu gula idi mulua nu mutshi udi mutuameza fumi’ayo, yajiya guhuila muavula nga gudinamenesa. Uvi, gula tualandula utuameji wa Yehowa, tuajiya gutshita ndaga jia gushimana nu tuajiya gubinga malamba a maluholo agasue. Jiya egi gushigo nga muthu mumoshi wajiya gukanga Yehowa njila ha gutagenesa felela dienji!—Lomo 8:31; 1 Yone 4:4.

20. Matangi atshi tudi naye gukhala nawo tangua tudi muzangula muhitu wa Yesu?

²⁰ Ndaga ya mbadi idi egi, tudi naye gukalagala mudimo nu matangi abonga. Felela dietu didi dia gutumbuisa Yehowa, Sh’etu wa guzumba. Mu siekle ya thomo, athu anyi akhalele mulandula Yesu mukunda nu gudia, akhalelego luko nu gusuanguluga, abembele muhitu wa Yesu. (Yone 6:25-27, 51, 60, 66; Fili. 3:18, 19) Uvi, athu anyi akhalele nu guzumba gua Nzambi nu gua athu ako, atshiginyile muhitu wa Yesu monyo wawo wagasue ha mavu. Akhalele nji nu felela dia guhinyina nu Klisto mu dilu. Esue nji, gula tuabata muhitu wa Yesu nu matangi abonga, mbatukhala nu gusuanguluga.

21. Ha gutadila Matayo 6:31-33, felela ditshi tudi naye gukhala nadio?

²¹ Ndaga ya thathu idi egi, tudi naye gukhala nu mafelela abonga. Tuatshiginyile mudimo wakola nu lujingu lua gudihana. Yesu wadiangele guzuela egi mbatumonesewa lamba. Uvi tudi nu felela egi Yehowa mbawutuhana ngolo jia gukolesela mu malamba agasue. Gula tualandula gukolesela, mbatuheta ngolo jiavula. (Yak. 1:2-4) Tudi nu gutshigina egi Yehowa mbawutuhana ima tudi nayo funu, Yesu mbawututuameza, enji aphangi’etu a mala nu a akhetu mbatuhana ngolo. (Tanga Matayo 6:31-33; Yone 10:14; 1 Tes. 5:11) Tudi nu ima yagasue tudi nayo funu ha gukolesela malamba agasue tuajiya gutagana nawo.

22. Mukunda natshi tudi naye gukhala nu gusuanguluga?

²² Mukhetu wasagewe gudi Yesu wahetele ngolo mu lusugu luasagewe muene. Uvi ha guheta ngolo jia ivo nu ivo, wakhalele naye phamba gubua mulandudi wa Klisto. Watangiza egi mukhetu muene wakalegele itshi? Tangiza gale gubonga gakhalele naye guheta gula wabuile mulandudi wa Yesu. Wakhalele naye guhinyina hamoshi nu Yesu mu dilu! Gubonga guahetele muene guabalega ima yagasue gabembele ha gulandula Yesu. Tudi nu gusuanguluga guavula luholo tuatshiginyile mbimbi jiazuelele Yesu egi: ‘Izenu gudi ame!’ Gutamega guenji guatuhanele felela dia gujinga mayilago mu dilu nga ha mavu.