Mihu Yana Guhula Athu Ana Gutanga Mikanda Yetu

Gula Muklisto washiya ulo uvi mukaji’enji gakalegelego uthambi gungima wazula mukhetu muko, luholo lutshi aphangi mu hungu adi naye gutadila ulo wa thomo nu ulo uhe-uhe?

Mu ndaga ya luholo elu, gula muthu muene wazula mukhetu muko mu gudivua nu mikhuala ya leta ngenyi aphangi mu hungu ajiya giwa guzuela egi ulo wenji wa thomo wafui. Ha gukotelesa mukunda natshi tudi muzuela ngenyi, tutadilenu ndaga Yesu wazuelele mu ndaga yatadila gushiya ulo nu gudizula luko mu ulo nu muthu muko.

Mu mukanda wa Matayo 19:9, Yesu wamonesele ndaga phamba imoshi idi naye gutshita egi muthu ashiye ulo. Wazuelele egi: “Muthu wagasue washiya ulo nu mukaji’enji uvi mukhetu muene gakalegelego uthambi, gula muene wazula mukhetu muko, wakalagala uthambi.” Mbimbi eji jia Yesu jidi gutukuatesa haguzula malongo mbadi (1) ndaga idi naye gutshita egi muthu ashiye ulo idi phamba uthambi (2) gula yala washiya ulo nu mukaji’enji uvi mukhetu muene gakalegelego uthambi, gula muene wazula mukhetu muko, wakalagala uthambi.a

Mbimbi jia Yesu jidi mukotelesa egi yala wakalagala uthambi nu washiya ulo, Biblia idi gumuhana njila ya guhaga mukhetu muko? Ishigo diago ngenyi. Gula yala wakalagala uthambi, mukaji’enji wajiya guzula desizio dia gumutotesela nga ndo. Gula watuna gumutotesela nu ashiya ulo mugudivua nu mikhuala ya leta gungima aahana mukanda wa gushiya ulo, Biblia idi guahana njila ha guzula yala muko nga mukhetu muko.

Uvi, mukhetu watshitshilego gubola wajiya gutshigina egi ulo wawo ufuigo ngenyi wajiya guwambela mulumi’enji egi wamutotesela. Itshi yajiya gukalegewa gula yala watshitshi uthambi watuna genji pardo ya mukaji’enji nu waya mushiya ulo hakhenji? Biblia ishigo gumuhana njila ha guzula mukhetu muko mu ulo, handaga mukaji’enji wamutotesela hagula ulo wawo ufuigo. Gula yala muene watuna gutumagela mukhuala wa Biblia nu waya muzula mukhetu muko mu ulo wakalagala luko uthambi, ngenyi akulu mbaamunginyisa mu komite ya gusambesa ha gutadila mulonga wenji.—1 Kol. 5:1, 2; 6:9, 10.

Gula yala muene watunyi gutumagela mikhuala ya Biblia waya muzula mukhetu muko, luholo lutshi aphangi mu hungu adi naye gutadila ulo wenji wa thomo nu ulo uhe-uhe? Mu gudivua nu Biblia, tuajiya guzuela egi ulo wenji wa thomo wuwu genji ba? Mukhetu munu gatshitshilego gubola yowu genji nu desizio dia gutotesela mulumi’enji nga ndo? Aphangi a mu hungu adi naye gutangiza egi yala nu mukhetu adizudi mu ulo uhe-uhe adi mulandula gukalagala uthambi?

Mu ivo yabalega, aphangi mu hungu akhalele mumona egi gula mukhetu wa thomo udi nu monyo, khenji gazudiwego mu ulo nu gakalegelego uthambi, mulumi’enji wazula mukhetu muko mu ulo adi mulandula gukalagala uthambi. Yesu gazuelelego mukunda nu mukhetu nga yala watshitshilego gubola tangua diazuelele muene ndaga ya gushiya ulo nu gudizula luko mu ulo. Uvi wazuelele egi gula yala washiya ulo nu mukaji’enji uvi mukhetu muene gakalegelego uthambi, gula muene wazula mukhetu muko, wakalagala uthambi. Ndaya yazuelele Yesu idi mumonesa egi gula muthu washiya ulo nu wazula mukhetu muko ngenyi watshitshi uthambi, hananyi ulo wenji wa thomo wafui.

Gula yala washiya ulo nu mukaji’enji gungima wazula mukhetu muko, mukhetu wa thomo gashigo luko nu ginemo giazula desizio dia gutotesela mulumi’enji nga ndo. Ikhale mukhetu wa thomo wafua nga wazudiwa mu ulo nga ndo wakalagala uthambi, yajiyilego gusombegesa luholo aphangi adi mutadila ulo uhe-uhe wa yala muene.b

Tuazuelela ndaga yatadila yala wakalagala uthambi gungima ashiya ulo wawo. Uvi, itshi yajiya gukalegewa gula yala gatshitshilego uthambi uvi muene washiya ulo nu waya muzula mukhetu muko? Nga ndo, itshi yajiya gutshitshiwa gula yala gatshitshilego uthambi gutuama dia gushiya ulo, uvi gungima watshita uthambi nu wadizula mu ulo nu mukhetu muko ngatshima mukaji’enji wamutotesela? Mu ndaga eji jiagasue, gushiya ulo nu gudizula luko mu ulo nu mukhetu muko idi gutshita uthambi ngenyi ulo wa thomo wafui. Ulo uhe-uhe wene udi mujiyiwa gumeso a leta. Gifua luholo adi guyimonesa mu Inzo Yaleha ya Mutaledi ya 15 Fevrier 1980 diyiji 31 nu 32 ya Français, “ngenyi yala muene wasendesa ulo uhe-uhe hene gajiyilego guvutuga luko mu ulo wenji wa thomo, ulo wene wa thomo wafui handaga watshitshi uthambi nu wadizudi gale mu ulo nu mukhetu muko.”

Usombegeshi wuwu ushigo mukotelesa egi Aklisto adi naye gutangiza egi ulo ushigo luko wa gijila nga gumona egi uthambi ishigo gubola guakoma. Gula yala washiya ulo nu mukaji’enji uvi mukhetu muene gatshitshilego uthambi gungima yala waya muzula mukhetu muko mu ulo, akulu adi naye gulondega komite ya gusambesa handaga watshitshi uthambi. (Gula mukhetu wazudiwa udi Muklisto akulu adi naye gumunginyisa mukomite ya gusambesa handaga watshitshi uthambi.) Aphangi mu hungu ashigo naye gutadila yala muene nu mukhetu adizudi mu ulo gifua adi mulandula gutshita uthambi, ikhale ngenyi yala muene gajiyilego guheta inemo mu hungu ivo yavula uu nu tangua athu agasue mbaabemba guvua khabu nga guzuelela luko ndaga yatshitshile muene. Gutuama dia guhana yala muene ginemo akulu adi naye gutadila luko ndaga jidi mutagana najio mukhetu wa thomo nu ana azonda anyi abembele yala muene.—Mal. 2:14-16.

Idi nu ndando egi Aklisto alandule gifezegeselo gia Yehowa nu gujiya egi ulo udi wa gijila handaga gula muthu washiya ulo mu ndaga ishigo gudivua nu Biblia nu wazula yala nga mukhetu muko mu ulo yanabata malamba avula.—Mulo. 5:4, 5; Heb. 13:4.