“Ngakhalele Mutshigina Gukalegela Yehowa”

Ngumuza gumiwambela ndaga jiabuile gungima, uvi bembenu ngumitele thomo, luholo ngasendesele mudimo wa tangua diagasue.

Ngavualewe mu 1942 mu gifutshi gia Curaçao, gidi mukatshi dia mahongo Caraïbes. Tata wakhalele muenya mu gifutshi gia Suriname, uvi wayile gu Curaçao mukunda nu mudimo. Ivo mbadi gutuama egi nguvualewe, tata wakhalele mukatshi dia athu a thomo abatijiwe gu Curaçao ha gubua Matemue a Yehowa.a Matangua ako, tuakhalelego mutshigina gulonguga Biblia, uvi tata wakhalele mutshita yagasue ha gutulongesa nayo phoso nu phoso. Tangua ngakhalele nu ivo 14, fami yetu yagasue yayile gu Suriname, handaga tata wakhalele naye gukuatesa gin’enji wakhalele muthu wa gukola.

MAFUTA ABONGA ANGUKUATESELE

Tangua tuahetele gu Suriname, ngakuatele ufuta nu mavuala a mu hungu dietu anyi akhalele mukalegela Yehowa nu gikhesa giagasue. Akhalele alenge ami, uvi akhalele avundji a njila a tangua diagasue. Akhalele nu gusuanguluga guavula, tangua akhalele muzuelela ndaga jiabonga akhalele mutagana najio mu mudimo wa gulongesa. Tangua tuakhalele muzoga mu gudibungisa gua mu hungu, ame nu mafut’ami tuakhalele muya hanze ha gutala themua nu guta maga a Biblia. Mafuta ene angukuatesele diago ha gukalegela Yehowa, yene ndaga ngakhalele mutshigina mu monyo wami. Tangua ngakhalele nu ivo 16 ngabatijiwe. Ha ngatagenesele ivo 18, ngabuile muvundji wa njila wa tangua diagasue.

NGAZUDILE MALONGO AVULA A NDANDO

Tangua ngakhalele muvundji wa njila wa tangua diagasue, ngalongugile ndaga jiavula jiangukuatesele mu mudimo wa tangua diagasue. Ha gufezegesa, ngalongugile egi idi nu ndando ha guhana athu ako formasio. Tangua ngasendesele mudimo wa muvundji wa njiIa, misionere mumoshi mu jina dia Willem van Seijl wangukuatesele muavula diago.b Wangulongesele luholo lua gutagenesa inemo yavula mu hungu. Thomo, ngakhalelego mukotelesa egi, ngudi naye gulonguga ndaga jiavula. Mu givo gialanduile ngabuile pionye spesiale, ngasendesele guya mukuatesa mahunji azonda-zonda akhalele mu gishitu mu gifutshi gia Suriname. Ngasuangulugile muavula nu formasio aphangi anguhanele! Sendese mu tangua diene, ngana landula gifezegeselo giawo, ngana hana athu ako formasio.

Ngalongugile nji egi idi nu ndando ha gukhala nu lujingu lualeba nu gulondega ndaga jiagasue muabonga. Mu gisendeselo gia mbeji yagasue, ame nu phangi tuakhalele mutshita n’enji mudimo wa muvundji wa njila, tuakhalele muzuelela ima ya gudia nu ima iko mbatukhala nayo funu mu phoso jidi muza. Gungima muthu mumoshi mukatshi dietu wakhalele mutshita vuayage ha guya musumba ima yene. Tuakhalele mukalegela mbongo organizasio wakhalele gutuhana mukunda nu ba depanse nu ima tuakhalele musumba nu gutema guagasue hagula yajiya gutukuatesa mbeji ya mudidi. Handaga fundo tuakhalele mu gishitu gula tushigo nu gima, guakhalelego nga muthu wajiya gutukuatesa. Ngakotelesele nji egi ndaga ngalongugile tangua ngakhalele muvuala, ha gukhala nu lujingu lualeba nu ha gulondega ndaga muabonga, jia ngukuatesele muavula ha gukalagala mudimo wa Yehowa.

Ndaga iko ya thathu ngalongugile yakhalele gulongesa athu muzuelelo diawo. Ngakhalele mujiya guzuela Néerlandais, Anglais, Papiamento nu Sranantongo, zuelelo diana zuelewa muavula gu Suriname (diana tamegewa nji egi Sranan). Uvi fundo tuakhalele mu gishitu, ngakotelesele egi athu akhalele musuanguluga nu lukuma luabonga gula tualongesa mu zuelelo diawo. Yakhalele lamba gudi ame ha gujiya mazuelelo ene, gifua zuelelo dia Saramaccan diakhalele diago diakola. Uvi ngudi nu gusuanguluga guavula luholo ngatshitshile yagasue ha gulonguga zuelelo diene. Ndaga yene yangukuatesele ha gulongesa athu avula giamatshidia handaga ngakhalele muzuela muzuelelo diawo.

Lusugu lumoshi ngataganele nu ndaga imoshi yanguhanele diago musonyi. Ngakhalele mutshigina guhula mukhetu mumoshi wakhalele mu longuga Biblia, wakhalele mujiya guzuela Saramaccan gula udi gikhuatshi, handaga vumo diakhalele gumusagesa. Uvi ngajimbidile, ngamuhudile egi udi guvumo? Mukhetu muene wavile diago musonyi. Ngatshima ngajimbidile, uvi ngakhalele mutshita yagasue ha gulongesa athu mu zuelelo diene.

NGAHETELE INEMO IKO

Mu 1970, ngabuile mutadi muwendji. Mu givo giene ngatalesele video “Une visite au siège mondial des Témoins de Jéhovah” mu tumahunji tuavula tuakhalele mu gishitu fundo tuakhalele. Ame nu aphangi ako, tuakhalele mutshita vuayage yaleha mu wato ha guya mutala aphangi a mu mahunji ene. Tuakhalele muya nu moteur nu essence, nu mienda ya pétrole nu ba apareyi akhalele gutukuatesa ha gutalesa video. Tangua tuakhalele muheta ha fundo tuakhalele muya, tuakhalele mubata ima yene ha fundo tuakhalele naye gutalesa video. Ndaga ya ndando ngudi muwunguluga mu ba vuayage tuakhalele mutshita idi egi, athu avula a mu membo ene, akhalele musuanguluga nu programe jiene. Ngakhalele nu gusuanguluga guavula ha gukuatesa athu ha gujiya Yehowa nu gitshinyi gia ulondegi wenji udi ha mavu. Ngana suanguluga muavula mukunda nu mudimo wakola ngakalegele mukunda nu Yehowa, handaga wakuatesele athu avula ha gubua mafut’enji.

TUABUILE SHINGA THATHU JIAKOLA

Ngakhalele mujiya egi gula ngasala undumbu mbayingukuatesa ha gudihana muavula mu mudimo wa Yehowa, uvi ngakhalele nu funu ya guzula mukhetu. Hene, ngakombelele Yehowa ha gungukuatesa ha guheta mukhetu mbawungukuatesa ha gutshita mudimo wa tangua diagasue fundo ngakhalele mu gishitu. Gungima dia givo gimoshi nu ndambo, ngasendesele gusuanguluga nu phangi mumoshi wa mukhetu. Jina dienji Ethel, wakhalele pionye spesiale. Wakhalele gudihana muavula mu mudimo wa Yehowa. Tangua Ethel wakhalele mona wa zonda, wakhalele musuanguluga muavula nu mupostolo Phaula. Wakhalele nji mutshigina gutshita mudimo wa gulongesa gifua muene. Mu Septembre 1971 tuadizudile n’enji mu ulo. Tualanduile gukalagala n’enji mudimo wa mutadi muwendji.

Ethel wakudile mu fami inyi akhalelego nu ima yavula, hene yakhalelego lamba gudi muene ha gujidila mu mudimo wa mutadi muwendji mu gishitu. Ha gufezegesa, tangua tuakhalele muya mutala mahungu akhalele mukatshi na katshi dia gishitu, tuakhalelego muya nu ima avula. Tuakhalele muya muweva milele nu guzua meya mu muta. Tukhalele mudia ima yagasue yakhalele gutuhana aphangi, gifua jishui, iguanes, nu ima yagasue akhalele mukuata mu gishitu nu mu muta. Gula tushigo nu malonga a gudila, tuakhalele mudia holu dia mayiji a makhondo. Gula tushigo nu somo nga lutu, tuakhalele mudia nu mago. Luholo ame nu mukaji’ami tuakhalele mukolesela mu malamba a luholo elu mudimo wa Yehowa, yatukuatesele ha gukolesa ufuta wetu gifua shinga thathu. (Mulo. 4:12) Ndaga jiagasue tuakhalele mukalagala jiakhalelego jia githuhu!

Ndaga ngazuelela mu gisendeselo gia lumene luami, jiatubuidile tangua tuakatugile mu gishitu, guma tuayile mutala aphangi ha guvutuga fundo tuakhalele. Tangua wato wahetele fundo meya akhalele muya muphushi washuwugile, uvi wazogele mbala imoshi holu dia meya. Ndaga yabonga idi egi, tuakhalele ya gusudiga ba gilets de sauvetage, hene tuasalele mukatshi dia wato. Uvi wato wazalele pha nu meya. Tuabishidile ima ya gudia tuakhalele nayo mu muta, tuazudile malonga tuasendesele gukuwa meya mu wato.

Luholo tuabishidile ima yetu yagasue ya gudia, tuasendesele guya nu gulowa holu dia muta tangua tuakhalele muya. Uvi tuakuatelego nga ishui imoshi. Hene tuatogele Yehowa mu gisambu, ha gutuhana ima ya gudia mu lusugu luene. Tangua tuamanesele gutshita gisambu, phangi mumoshi wambile ndobo mu muta, wakuatele ishui imoshi yakoma diago, mukut’etu agasue thano tuadile, tuakutshile.

YALA, TATA, MUTADI MUWENDJI

Tuatshitshile ivo 5 mu mudimo wa tangua diagasue hamoshi nu mukaji’ami Ethel. Gungima wamitshile vumo, tuakhalele naye gubua mvuaji. Ngakhalele nu gusuanguluga guavula tangua ngavile ndaga yene, uvi ngakhalelego mujiya ndaga mbajitubuila gutuama. Ame nu mukaji’ami tuakhalele mutshigina gusala mu mudimo wa tangua diagasue. Mu 1976 mun’etu wa somi wavualewe, tuamuhanele jina egi Ethniël. Gungima dia ivo mbadi nu ndambo tuavualele mona muko wa yala, tuamuhanele jina egi Giovanni.

Luholo aphangi a gu Suriname akhalele nu funu ya ukuateshi mu tangua diene, Betele yazudile desizio egi, ngulandule gukalagala mudimo wa mutadi muwendji ikhale ngakhalele musansa ana. Tangua an’etu akhalele ana azonda, ngakhalele muya mutala phamba mahungu azonda. Mu mbeji imoshi ngakhalele mubalegesa phoso mbadi ya guya mutala mahungu, phoso jiko ngakhalele mutshita gifua muvundji wa njila mu hungu. Tangua ngakhalele muya mutala mahungu a hehi ngakhalele muya nu mukaji’ami nu an’etu. Uvi tangua ngakhalele muya mutala mahungu nu guya gu ba asamble a gualeha mu gishitu, ngakhalele muya hakhami.

Ngakhalele mulondega ndaga muabonga ha gutagenesa inemo yami yagasue. Ngakhalele mutshita yagasue ha gutshita gukombelela gua mu fami phoso nu phoso. Tangua ngakhalele muya mutala mahungu a gualeha mu gishitu, mukaji’ami wakhalele mutuameza gukombelela gua mu fami. Uvi matangua avula gula luholo ludi guene, tuakhalele mukalagala ndaga hamoshi mu fami. Ame nu mukaji’ami nu an’etu tuakhalele mubalegesa tangua hamoshi gula luholo ludi guene. Tuakhalele mutshita saga nu guya mutala mafundo abonga akhalele hehi nu inzo yetu. Matangua avula ngakhalele mubanda mu phipha, handaga ngakhalele gudilondega mukunda nu inemo ngakhalele naye gutagenesa mu ulondegi wa Yehowa. Mukaji’ami Ethel udi gifua mukhetu watema adi muzuelela mu mukanda wa Ishima 31:15, wakhalele muzuga nu gimenegena giagasue ha gula tutshite mukhapho wa lusugu nu gulondega ima ya gudia hagula tudie hamoshi gutuama egi an’etu aye gu khalasa. Ngudi nu gusuanguluga guavula luholo ngahetele mukhetu wana gudihana muavula ha gungukuatesa ha gutagenesa inemo yagasue ya nguhanele Yehowa!

Tuakhalele nji mutshita yagasue, ha gukuatesa an’etu a mala ha guzumba Yehowa nu mudimo wa gulongesa. Tuakhalele mutshigina egi an’etu azule desizio dia gutshita mudimo wa tangua diagasue ene hakhawo. Tuakhalelego mutshigina egi awukalagale ha gutusuanguluisa. Matangua avula tuakhalele guawambela egi mbaakhala nu gusuanguluga gula atshita mudimo wa tangua diagasue. Uvi tuakhalele nji guawambela malamba tuatagenele nawo. Tuakhalele nji mutshita yagasue hagula an’etu akhale mubalegesa tangua nu Matemue a Yehowa anyi ana haga Yehowa ha fundo dia thomo mu monyo wawo.

Yehowa watukuatesele nu ima yagasue tuakhalele nayo funu ha gusansa an’etu. Ngakhalele nji mutshita yagasue ha gutagenesa nzala jia enya fami yami. Ndaga ngatagenele najio, tangua ngakhalele undumbu mu mudimo wa muvundji wa njila, jiangukuatesele ha gujiya egi ngudi naye gubamba mbongo gutuama ha gusumba ima ngakhalele nayo funu. Uvi ngatshima tuakhalele mutshita ngenyi, matangua ako tuakhalelego muheta ima yagasue tuakhalele nayo funu. Mu matangua ene, ngakhalele musha mutshima egi Yehowa mbawutukuatesa. Ha gufezegesa, mu givo 1980 uu nu mu 1990 ita yakhalele gu Suriname. Mu ivo yene yakhalele lamba ha guheta ima tuakhalele nayo funu, uvi Yehowa wakhalele gutukuatesa.​—Mat. 6:32.

TANGUA NGANA WUNGULUGA NDAGA NGATAGANELE NAJIO MU MONYO WAMI

Yehowa watukuatesele muavula mu monyo wetu ha gukhala nu gusuanguluga. An’etu ana gutusuanguluisa muavula diago. Tudi nu gusuanguluga guavula luholo tuakuatesele ha gukombelela Yehowa. Tudi nji nu gusuanguluga guavula luholo azudile desizio dia gukalagala mudimo wa tangua diagasue. An’etu a mala Ethniël nu Giovanni anginyile khalasa diana tamegewa mangino egi, Khalasa dia Alongeshi a Ufumu. Mangino adi mukalagala hamoshi nu akaji’awo gu Betele ya gu Suriname.

Ame nu Ethel tuabuile gale athu a gukola, uvi esue getu mukalegela Yehowa mu mudimo wa tangua diagasue. Tudi ba pionye spesiale. Tuana khala diago nu ndaga jiavula jia gukalagala, hene uu nu mangino khenji ngulongugile gale ndo luholo lua guzua mu muta! Uvi ngana gudisagesa ndo mukunda nu ndaga yene. Gula ngatangiza ndaga ngatagenele najio mu monyo wami, ngudi muzuela nu giamatshidia giagasue egi, desizio ngazudile dia gukalegela Yehowa mu mudimo wa tangua diagasue tangua ngakhalele muvuala diakhalele desizio diabonga gubalega.