Mihu Yana Guhula Athu Ana Gutanga Mikanda Yetu
Mukunda natshi muthu munu Boaze watamegele egi “Yala” wazuelele egi “mbawubua phutu” gula wadizula mu ulo nu Luta? (Luta 4:1, 6)
Mu tangua dikulu, enya Isalele akhalele gudihula mihu yavula gula yala wafua uvi nu guvuala mona ndo. Gifua: Ima yenji mbayisala nu nanyi? Jina dienji mbaditota mayilago ba? Mukhuala wa Moize wakhalele muhana mvutu gu mihu eyi.
Itshi akhalele mutshita gula muthu wafua wabemba ima yenji nga gula muthu mumoshi wadiga ima yenji mukunda nu uphutu? Phangi’a muthu muene nga muenya fami yenji wakhalele muzula ima yene nga guyisumba. Gutshita ngenyi guakhalele mukuatesa hagula ima yene isale mu fami.—Levi 25:23-28; Lutang. 27:8-11.
Itshi akhalele mutshita hagula jina dia muthu wafui ditotshigo? Akhalele muhana mukaji’a muthu wafui gudi phangi’a mulumi’enji ha guvuala n’enji. Gula avuala mona wa yala akhalele naye guhana mona muene jina dia muthu wafui nu ima yenji. Mukhuala wene wakhalele nji mukuatesa akhetu a gafunda.—Mikh. 25:5-7; Mat. 22:23-28.
Tuzuelelenu gifezegeselo gia Naomi. Mulumi’enji jina dienji diakhalele Elimeleke. Tangua Elimeleke nu an’enji mbadi a mala afuile, guakhalelego nu yala muko mu fami ha gutukuatesa Naomi. (Luta 1:1-5) Tangua Naomi nu Luta avutugile gu Yuda, Naomi wawambelele Luta ha gutoga Boaze egi asumbe mavu awo. Boaze wakhalele fami imoshi nu Elimeleke. (Luta 2:1, 19, 20; 3:1-4) Uvi Boaze wakhalele mujiya egi guakhalele nu “Yala” mumoshi wakhalele phangi’a Elimeleke. Yala muene, muene wakhalele muthu wa thomo wakhalele nu ginemo gia gusumba mavu ene.—Luta 3:9, 12, 13.
Thomo, “Yala” muene wakhalele mutshigina gukuatesa Naomi. (Luta 4:1-4) Wajiyile egi udi naye guzola mbongo jiavula ha gusumba mavu ene. Uvi wakhalele mujiya nji egi luholo Naomi udi gale muthu wa gukola, gajiyilego guvuala mona ha guzula ima ya Elimeleke. Gula yala muene wasumba mavu ene, akhalele naye gubua enji. Ndaga yene yakhalele naye gumusuanguluisa.
Uvi yala muene watunyile gusumba mavu ene, tangua diajiyile muene egi gula waasumba udi naye nji guzula Luta mu ulo. Wazuelele egi: “Ngajiyilego guasumba luko, gula ndo ngajiya gubua phutu.” (Luta 4:5, 6) Mukunda natshi yala muene watunyile gusumba mavu ene?
Gula yala muene nga muthu muko wadizula mu ulo nu Luta avuala mona yala, mona muene wakhalele naye guzula ima ya Elimeleke. Luholo lutshi ndaga yene yakhalele naye ‘gubuisa yala muene phutu’? Biblia yana zuelela ndo ndaga yene. Uvi ndaga eji jialandula jidi mumonesa luholo ndaga yene yajiya gubuisa yala muene phutu.
Thomo, mbongo jiakhalele naye guzola yala muene ha gusumba ima ya Elimeleke jiakhalele naye gudiyila jia githuhu, handaga mavu ene akhalele naye gubua a mun’a Luta.
Ya mbadi, wakhalele naye guzula ginemo gia gudisa Naomi nu Luta nu gua abamba.
Ya thathu, gula yala muene wakhalele wavalele gale ana nu mukhetu muko, ana akhalele naye guvuala muene nu Luta akhalele naye gukhapha umonyi wenji nu ana a mukhetu wa thomo.
Ya nguana, gula Yala muene gakhalelego nu ana, mona akhalele naye guvuala nu Luta muene wakhalele naye guzula ima yenji nu ya Elimeleke. Gula yala muene wafua ima yenji yakhalele naye gusala nu mun’enji. Uvi mona muene akhalele naye gumuhana jina dia Elimeleke. Jina dia yala muene diakhalele naye gutota. Yala muene gatshiginyilego gutotesa ima yenji ha gukuatesa Naomi. Watogele egi egi Boaze, azule ginemo gia gusumba mavu ene handaga wakhalele nji mu fami yawo. Boaze watshiginyile ginemo giene handaga watshiginyile egi “ima ya muthu wafile ilandule gukhala ya an’enji.”—Luta 4:10.
Idi naye gukhala egi, yala muene wakhalele gudisagesa muavula mu luholo luakhalele naye muene gubamba jina dienji nu ima yenji. Wakhalele mukamba phamba gubonga guenji hakhenji. Ikhale yala muene watshitshile ngolo ha gubamba jina dienji, uvi mangino tuana jiya ndo gula jina dia yala muene diakhalele nanyi. Yala muene gahetelego luendu luakoma luahetele Boaze. Boaze udi mutangewa mukatshi dia akhakha a Masiya, Yesu Klisto. (Mat. 1:5; Luka 3:23, 32) Yala muene gahetelego luendu luene, handaga wakhalele nu khadilo diabola dia gukamba phamba gubonga guenji ha fundo dia gukuatesa athu ako.