Yehowa Mbawugukuatesa ha Gukolesela mu Tangua dia Lamba

1. Itshi esue Matemue a Yehowa tuana jiya?

ESUE Matemue a Yehowa tuana jiya egi Yehowa wana gutuzumba nu wana tshigina egi tukhale nu gusuanguluga. (Roma 8:35-39) Tuana jiya nji egi gula tudi mutumagela malongo a Biblia mbatuheta gubonga guavula. (Yesh. 48:17, 18) Uvi itshi tuajiya gutshita gula tuatagana nu lamba dinyi tuakhalelego mutangiza egi diajiya gutubuila?

2. Malamba atshi tuajiya gutagana nawo? Malamba ene ajiya gututuma ha gudihula mihu itshi?

² Akombeledi a Yehowa agasue ana tagana nu malamba. Ha gufezegesa, muenya fami yetu mumoshi wajiya gutshita ndaga yajiya gutusagesa. Tuajiya nji gukata misongo yakola yajiya gutukanga njila ha gudihana muavula mu mudimo wa Yehowa. Tuajiya gutagana nu usageshi nga malamba ako. Gula tuatagana nu malamba a luholo elu, tuajiya gudihula egi: ‘Mukunda natshi ndaga jia luholo elu jidi gungubuila? Ndaga tshi yabola giwa ngatshitshi? Idi mukotelesa egi Yehowa gashigo gungukuatesa ba?’ Aye nji wadivile gale luholo elu ba? Gula idi ngenyi, ulebigo muila. Akombeledi a Yehowa avula ataganele gale nji nu malamba ene.​—Ngi. 22:1, 2; Hab. 1:2, 3.

3. Mukanda wa Ngimbo 34:19 udi gutulongesa itshi?

³ Tanga Ngimbo 34:19. Verse eyi idi muzuelela ndaga mbadi jia ndando: Ya thomo, athu abonga ana tagana nu malamba. Ya mbadi, Yehowa wana gutuhuluisa mu malamba ene. Luholo lutshi Yehowa wana gutuhuluisa? Wana gutukuatesa ha gutadila ndaga mu luholo luabonga ha mavu awa a Satana. Yehowa watulayele egi gula tuamukombelela mbatukhala nu gusuanguluga, uvi gatulayelego egi mbatushigo mutagana nu malamba. (Yesh. 66:14) Wana tshigina egi tuhage matangi etu phamba mu gubonga mbatuheta mu masugu adi muza, tangua mbatuheta monyo wa ivo nu ivo. (2 Kol. 4:16-18) Uvi mangino, wana gutukuatesa ha gulandula gumukombelela.​—Is. 3:22-24.

4. Itshi tuza muzuelela mu longo edi?

⁴ Tutadilenu malongo tuajiya guzula mu ifezegeselo ya akombeledi a Yehowa a mu tangua dikulu nu a mu tangua dietu. Gifua luholo tuza guyimona, tuajiya gutagana nu malamba anyi tuatangijilego egi ajiya gutubuila. Uvi gula tuasha mutshima gudi Yehowa, muene mbagashigo gutubemba nga hazonda. (Ngi. 55:22) Tangua tudi mutadila ifezegeselo yene, dihule egi: ‘Gula nga ame ngataganele nu lamba diene itshi ngakhalele naye gutshita? Luholo lutshi ifezegeselo yene yajiya gungukuatesa ha gulandula gushila Yehowa mutshima? Malongo atshi ngajiya guzula mu ifezegeselo yawo?’

MU TANGUA DIKULU

5. Malamba atshi Labana wamonesele Yakoba? (Tala gifuanesa holu dia gizula.)

⁵ Akombeledi a Yehowa a mu tangua dikulu ataganele nu malamba anyi akhalelego mutangiza egi ajiya guabuila. Tutadilenu gifezegeselo gia Yakoba. Sh’enji wamuwambelele egi udi naye guya muzula mukhetu gumbo dia lemba dienji Labana, handaga Labana wakhalele mukombelela Nzambi. Wamuwambelele egi gula watshita ngenyi Yehowa mbawumukuatesa. (Gis. 28:1-4) Yakoba watumagele ndaga ya muwambelele sh’enji. Wakatugile gu Kanana wayile gumbo dia Labana. Labana wakhalele nu ana akhetu mbadi, Lea nu Rashele. Yakoba wasendesele guzumba Rashele muavula. Adivile nu Labana egi udi naye gumutshitshila mudimo ivo 7 gutuama dia guzula Rashele mu ulo. (Gis. 29:18) Uvi ndaga jiakalegewego gifua luholo Yakoba wakhalele gudifelela. Labana wamuhuigile, wamuhanele Lea ha gudizula n’enji mu ulo. Labana wawambelele luko Yakoba egi, gula watshigina gungukalegela luko mudimo ivo 7, mbanguguhana Rashele mu phoso idi muza ha gula udizule n’enji mu ulo. (Gis. 29:25-27) Labana wakhalele nji muhuiga Yakoba mu midimo akhalele mukalagala n’enji. Labana wakalegele Yakoba ndaga mu luholo luabola ivo 20!​—Gis. 31:41, 42.

6. Malamba atshi ako Yakoba wataganele nawo?

⁶ Yakoba wataganele nji nu malamba ako. Wakhalele nu fami yakoma, uvi an’enji akhalelego gudivua muabonga. Gishina giene adigile phangi’awo Yozefe mu uhiga. An’enji a mala mbadi Simeona nu Levi, akalegele ndaga yabola yahanele fami yawo musonyi nu yashingishile jina dia Yehowa. Yakoba wakhalele muzumba Rashele muavula, uvi wafile hakhalele muene muvuala mun’awo wa mbadi. Yakoba wayile gu Ejipitu tangua diakhalele muene muthu wa gukola, mukunda nu nzala yakola yanginyile.​—Gis. 34:30; 35:16-19; 37:28; 45:9-11, 28.

7. Luholo lutshi Yehowa wamonesele egi wakhalele musuanguluga nu Yakoba?

⁷ Ngatshima Yakoba wataganele nu malamba awa agasue, uvi wakhalele nu gutshigina guakola gudi Yehowa. Wakhalele nji musha mutshima mu ndaga jialayele Nzambi. Yehowa wamonesele egi wakhalele musuanguluga nu Yakoba. Ha gufezegesa, ikhale Labana wakalegele Yakoba ndaga mu luholo luabola, uvi Yehowa wakuatesele Yakoba ha guheta ima yavula. Yakoba wakhalele mutangiza egi mun’enji Yozefe wafile gale. Tangiza luholo luahanele muene Yehowa mersi avula tangua adimonele luko nu Yozefe! Yakoba wakolesele mu malamba ene agasue handaga wakhalele nu ufuta wakola nu Yehowa. (Gis. 30:43; 32:9, 10; 46:28-30) Gula esue nji tudi nu ufuta wakola nu Yehowa, tuajiya gukolesela mu malamba agasue tuajiya gutagana nawo.

8. Itshi Fumu Davidi wakhalele mutshigina gukalagala?

⁸ Fumu Davidi gataganeselego ndaga jiagasue jiakhalele gudifelela muene ha gutshita mu mudimo wa Yehowa. Ha gufezegesa, Davidi wakhalele mutshigina gutungila Yehowa Nzambi wenji tempelo. Wawambelele profete Natana ndaga yene. Natana wamuwambelele egi: “Tshita ndaga yagasue udi mutshigina gutshita, handaga Nzambi wa giamatshidia udi nu aye.” (1 Gudi. 17:1, 2) Idi naye gukhala egi mbimbi eji jiahanele diago Davidi gikhesa. Yajiya gukhala egi Davidi wasendesele gudilondega mbala imoshi ha gukalagala mudimo wene wakoma.

9. Itshi Davidi atshitshile tangua Yehowa wazuelele egi ishigo muene udi naye gumutungila tempelo?

⁹ Uvi “mu phipha yene” Yehowa wawambelele Natana egi ishigo Davidi mbawungutungila tempelo, uvi mun’enji mbawungutungila. (1 Gudi. 17:3, 4, 11, 12) Gungima profete Natana wayile luko gudi Davidi ha gusombegesa ndaga jiazuelele muene. Itshi Davidi atshitshile havile muene ndaga yene? Watshiginyile desizio diene. Hene wasendesele gulondega makuta nu ima iko Salomo wakhalele naye funu ha gutshita mudimo wene.​—1 Gudi. 29:1-5.

10. Luholo lutshi Yehowa wakuatesele Davidi?

¹⁰ Tangua Yehowa wawambelele Davidi egi ishigo muene mbawutunga tempelo, gungima wakotele n’enji gikotelo. Walayele Davidi egi mujigulu wenji mbawuhinyina mayilago. (2 Sam. 7:16) Mu Uhinyinyi wa Ivo 1 000 wa Yesu, Davidi mbawukhala nu gusuanguluga guavula tangua mbadijiya muene egi, Fumu Yesu udi mujigulu wenji! Ndaga yene idi gutulongesa egi ikhale tuajiyilego gukalagala ndaga jiagasue tuakhalele gudifelela mu mudimo wa Yehowa, muene wajiya gutuhana ima iko yabonga inyi tuatangijilego nga hazonda.

11. Gubonga gutshi Aklisto a mu siekle ya thomo ahetele ngatshima Ufumu wa Nzambi wajilego gifua luholo akhalele gudifelela? (Makalegelo 6:7)

¹¹ Aklisto a mu tangua dia thomo ataganele nji nu malamba anyi atangijilego egi ajiya guabuila. Ha gufezegesa, akhalele munengenena nu mutshima zagu zagu egi Ufumu wa Nzambi uze, uvi akhalelego mujiya tangua Ufumu wene wakhalele naye guza. (Makal. 1:6, 7) Itshi akalegele giwa? Alanduile gukalagala mudimo wa gulongesa. Tangua akhalele mulongesa lukuma luabonga mu mafundo avula, amonele diago luholo Yehowa wakhalele guakuatesa mu mudimo wawo.​—Tanga Makalegelo 6:7.

12. Itshi Aklisto a mu siekle ya thomo atshitshile tangua nzala yakola yanginyile ha mavu agasue?

¹² Mu tangua dimoshi ngenyi, nzala yakola yanginyile “ha mavu agasue.” (Makal. 11:28) Lamba diene diabuidile nji Aklisto a mu siekle ya thomo. Amonele diago lamba diavula mukunda nu nzala yene. Idi naye gukhala egi mvuaji jiakhalele gudisagesa ha gujiya luholo ajiya guheta ima ya gudia mukunda nu enya fami jiawo. Luholo lutshi mavuala anyi akhalele mutshigina gudihana muavula mu mudimo wa gulongesa adivile mukunda nu ndaga yene? Anengenene uu nu tangua nzala mbayihua ha gukalagala mudimo wene ba? Ikhale Aklisto a mu siekle ya thomo ataganele nu lamba diene, uvi akolesele. Alanduile gulongesa lukuma luabonga nu gikhesa, akhalele mukhapha ima akhalele nayo nu aphangi a gu Yudea nu gusuanguluga guagasue.​—Makal. 11:29, 30.

13. Gubonga gutshi Aklisto a mu siekle ya thomo ahetele mu tangua dia nzala?

¹³ Gubonga gutshi Aklisto a mu siekle ya thomo ahetele mu tangua dia nzala? Aphangi anyi ahetele ima ya gudia mu tangua dia nzala, amonele diago egi Yehowa wakhalele guakuatesa. (Mat. 6:31-33) Idi naye gukhala egi akolesele luko ufuta wawo nu aphangi anyi ajile guakuatesa. Aphangi anyi atumile ima nu anyi ayile mukhaphela aphangi ima yene, akhalele nu gusuanguluga guavula mukunda nu khadilo diawo dia guhana. (Makal. 20:35) Yehowa waakuatesele mukut’awo agasue handaga akolesele mu malamba.

14. Ndaga itshi yabuidile Barnabase nu Phaula? Itshi yakalegewe gungima? (Makalegelo 14:21, 22)

¹⁴ Aklisto a mu siekle ya thomo akhalele mutagana nu usageshi wavula, ikhale mu tangua dinyi akhalelego mutangiza egi ajiya gutagana nu usageshi. Tutadilenu ndaga jiabuidile Barnabase nu Phaula tangua akhalele mulongesa gu Liseta. Thomo athu a ayambele muabonga nu a ategelele. Uvi gungima mbalagaji “jiashinjigile athu” ene ha gusonona Phaula maseso, amubembele zembembe. (Makal. 14:19) Gungima Barnabase nu Phaula akatugile ayile mulongesa fundo diko. Itshi yakalegewe gungima? Abuishile “athu avula alandudi.” Mbimbi jiawo nu gifezegeselo giawo giakolesele aphangi’awo Aklisto. (Tanga Makalegelo 14:21, 22.) Aklisto avula ahetele gikhesa, handaga Barnabase nu Phaula abembelego gulongesa ngatshima ataganele nu usageshi. Esue nji gula tuabembelego gukalagala mudimo wa Yehowa, muene mbawutukuatesa.

MU TANGUA DIETU

15. Longo ditshi wazula mu gifezegeselo gia phangi Macmillan?

¹⁵ Ivo yavula gutuama, akombeledi a Yehowa akhalele mutangiza egi ndaga imoshi ya ndando mbayikalegewa mu 1914. Ha gufezegesa, tutadilenu ndaga yazuelele phangi Macmillan. Phangi Macmillan wakhalele mutangiza egi udi naye guya mu dilu gualeha ndo. Aphangi avula nji akhalele mutangiza ngenyi. Tangua diatshitshile muene diskur mu Septembre 1914, wazuelele egi: “Yajiya gukhala egi didi diskur diami dia gisugishilo ngudi mutshita.” Uvi yakhalelego diskur dienji dia gisugishilo. Gungima phangi Macmillan wasonegele egi: “Yajiya gukhala egi athu ako mukatshi dietu atangijilego muabonga luholo azuelele muphushi egi, gualeha ndo tudi muya mu dilu. Ndaga ya ndando tudi naye gutshita idi gulandula gudihana muavula mu mudimo wa Fumu.” Phangi Macmillan walanduile gudihana mudimo wa Fumu. Wakhalele mulongesa lukuma luabonga nu gikhesa giagasue. Wahanele aphangi avula akhalele mu bologo gikhesa anyi atunyile gudinginyisa mu mudimo wa gisuta. Gabembelego guya mu gudibungisa gua mu hungu nga tangua diabuile muene muthu wa gukola. Gubonga gutshi phangi Macmillan wahetele luholo luakalegele muene tangua dienji muabonga mu mudimo wa Yehowa hakhalele muene munengenena ha guya mu dilu? Gutuama egi afue mu 1966, wasonegele egi: “Mangino gutshigina guami gudi diago guakola gubalega ha thomo.” Gifezegeselo gia phangi Macmillan gidi giabonga diago. Mukut’etu agasue tuajiya gulandula gifezegeselo giene gula malamba etu ashigo muhua gifua luholo tuakhalele gudifelela!​—Heb. 13:7.

16. Lamba ditshi phangi Herbert Jennings nu mukaji’enji ataganele nadio? (Yakoba 4:14)

¹⁶ Akombeledi a Yehowa avula ana kata misongo yakola inyi atangijilego egi yajiya guakuata. Ha gufezegesa, phangi Herbert Jenningsb wazuelele luholo muene nu mukaji’enji akhalele nu gusuanguluga tangua akhalele mutshita mudimo wa gimisionere gu Ghana. Uvi gungima wakatele misongo imoshi yakola (trouble de l’humeur). Phangi Jennings wakotelesele egi lamba gakhalele mutagana nadio didi gudivua nu ndaga jidi mu Yakoba 4:14, idi muzuela egi: “Tushigo mujiya ndaga mbajitubuila hamene.” (Tanga.) Phangi muene wasonegele egi: “Tuakatugile gu Ghana tuabembele mafuta etu akola, tuayile gu Canada [ha guya musagewa].” Yehowa wakuatesele phangi Jennings nu mukaji’enji ha gulandula gumukalegela nu gikhesa ngatshima ataganele nu lamba.

17. Luholo lutshi gifezegeselo gia phangi Jennings giahanele aphangi ako gikhesa?

¹⁷ Ndaga jiazuelele phangi Jennings mu lumene luenji jiakuatesele diago aphangi ako muavula. Phangi mumoshi wa mukhetu wasonegele egi: “Ngahetele gikhesa giavula tangua ngatangele lumene lua phangi Jennings. . . . Luholo phangi Jennings wabembele mudimo wenji mukunda nu misongo, ya ngukuatesele ha gutadila mulonga wami mu luholo luabonga.” Phangi mumoshi wa yala wasonegele nji egi: “Ngakhalele mukulu ivo 10, uvi gungima ngakhalele naye gubemba ginemo giene handaga ngakatele misongo ya muto. Ndaga yene yakhalele gungusagesa muavula, hene ngakhalelego mutshigina gutanga mene jia aphangi jiana zoga mu Inzo Yaleha ya Mutaledi. . . . Uvi gifezegeselo gia phangi Jennings giangukuatesele muavula diago.” Ndaga yene idi gutulongesa egi tuajiya nji guhana athu ako gikhesa ikhale tuatagana nu lamba dinyi tuatangijilego. Gula tuasala ya gujinginyina nu tuakolesela tangua tudi mutagana nu malamba, mbatuhana athu ako gifezegeselo giabonga.​—1 Phet. 5:9.

18. Gifua luholo tudi guyimona gu ifuanesa, longo ditshi wazula mu gifezegeselo gia mukhetu mumoshi wa gafunda gu Nigeria?

¹⁸ Misongo ya coronavirus yabatele akombeledi a Yehowa avula malamba. Ha gufezegesa, phangi mumoshi wa mukhetu wa gafunda gu Nigeria wakhalele nu ima yazonda ya gudia, uvi gakhalelego nu makuta. Lusugu lumoshi mu gimenegena mun’enji wa mukhetu wa muhudile egi, gula tuatelega khopho dia loso diasadi itshi tuza mudia gungima. Phangi muene wawambelele mun’enji egi, tushigo nu makuta nga nu ima iko ya gudia. Uvi tulandule gifezegeselo gia mukhetu wa gafunda wa gu Salephata. Atelegele ndambo ya ima yasalele, gungima ashile mutshima egi Yehowa udi guakuatesa. (1 Maf. 17:8-16) Gutuama egi asendese gudisagesa mukunda nu ima aza mudia mu ngueze ya lusugu luene, aphangi a atumile ima yavula. Mukatshi dia ima yene guakhalele nu ima yavula ya gudia yakhalele naye guakuatesa phoso mbadi nu ndambo. Phangi muene wa mukhetu wazuelele egi, ngakotelesele diago egi Yehowa wakhalele mutegelela ndaga ngakhalele muwambela mun’ami wa mukhetu. Yadiago, gula tudi mushila Yehowa mutshima tangua tudi mutagana nu malamba anyi tuangijilego, mbayitukuatesa ha gukolesa ufuta wetu n’enji.​—1 Phet. 5:6, 7.

19. Ndaga itshi ya lamba phangi Aleksey Yershov wataganele nawo?

¹⁹ Mu ivo yabalega, aphangi avula a mala nu a akhetu ataganele nu usageshi. Tutadilenu gifezegeselo gia phangi Aleksey Yershov gu Russie. Habatijiwe phangi Yershov mu 1994, Matemue a Yehowa a gu Russie akhalelego diago mutagana nu usageshi wavula. Uvi gungima dia ivo, ndaga jiasombegesele diago. Mu 2020, masuta anginyile mu inzo ya phangi Yershov atambuile ima yenji yavula. Gungima dia mbeji jiavula mafumu a leta azuelele egi udi mbundudi. Azuelele ngenyi mukunda nu video jiakhalele mufilme muthu mumoshi wakhalele mumba mambo egi udi mulonguga Biblia nu Matemue a Yehowa givo gimoshi nu ndambo, uvi muthu muene gakhalelego musuanguluga nu giamatshidia. Yakhalele diago ndaga ya khuta!

20. Itshi yana kuatesa phangi Yershov ha gukolesa ufuta wenji nu Yehowa?

²⁰ Ndaga yene ya lamba yana kuatesa phangi Yershov ha gukolesa ufuta wenji nu Yehowa. Udi muzuela egi: “Ame nu mukaji’ami tuana kombelela muavula hamoshi. Ngana kotelesa egi Yehowa wana gungukuatesa ha gukolesela mu lamba diene. Gulonguga guami hakhami guana gungukuatesa muavula gula ngaleba muila. Ngana tangigiza ifezegeselo ya akombeledi a Yehowa a mu tangua dikulu. Biblia idi nu mene jiavula jiana monesa egi idi nu ndando ha guhena tedie nu ha gushila Yehowa mutshima gula tuatagana nu malamba.”

21. Ndaga itshi tualonguga mu longo edi?

²¹ Ndaga itshi tualonguga mu longo edi? Tuamonyi egi ha mavu awa a Satana, tuajiya gutagana nu malamba anyi tuatangijilego nga hazonda. Uvi Yehowa wana kuatesa akombeledi enji tangua ana gumushila mutshima. Verse yakuata muto wa lumene wa longo edi idi muzuela egi: “Muthu wabonga wana tagana nu malamba avula, uvi Yehowa wana gumuhuluisa mu malamba ene agasue.” (Ngi. 34:19) Tukhadigo mutala phamba malamba tudi mutagana nawo, uvi tulandulenu gushila Yehowa mutshima handaga udi nu ngolo jia gutukuatesa. Ngenyi mbatuzuela gifua muazuelele mupostolo Phaula egi: “Ngudi nu ngolo jia gukolesela mu ndaga jiagasue handaga Nzambi wana gunguhana ngolo.”​—Fili. 4:13.