Eksperianse
Khala Muvuila Athu a Maluholo Agasue Khenda
Lusugu lumoshi phangi mumoshi wa mukhetu wa gu Nouvelle-Zélande, wakhalele mutala video idi nu muto wa lumene egi: “Soucions-nous les uns des autres” yakhalele mumonesa egi Yehowa wana guvuila akombeledi enji khenda nu wana gudihaga ha fundo diawo. (Yesh. 63:7-9) Phangi muene wakhalele mukamba luholo lua gukuatesa muthu ha gukalegela ndaga jiatalele muene mu video. Mu lusugu luene, hakhalele muene muya fundo diana digiwa ima ya gudia, watagenele nu mukhetu mumoshi gakhalelego nu inzo. Wamuhudile gula wajiya gumusumbila ima ya gudia. Mukhetu muene watshiginyile. Tangua phangi wa mukhetu wavutugile gudi mukhetu muene, wamuhanele ima ya gudia. Gungima wakalegele trakte Gudi nu Lusugu Malamba Mbaahua ba? ha gumulongesa lukuma luabonga.
Mukhetu muene wasendesele gudila. Wawambelele phangi wa mukhetu egi, muene nji wakudile mu fami ya Matemue a Yehowa uvi wabembele genji giamatshidia sendese mualeha. Uvi mu masugu abalega wakatuga gutshita gisambu gudi Yehowa hagula amukuatese ha gusendesa luko gumukombelela. Phangi wamukhetu wahanele mukhetu muene Biblia, adivuile nji ha gusendesa gulonguga.a
Tuajiya gulandula gifezegeselo gia Yehowa gia guvuila athu khenda. Tuajiya guyikalagala gudi enya fami yetu nu aphangi’etu mu hungu. Tuajiya gumonesa khenda jiene gula tudi mukamba ba okazio a gulongesa atshu ako lukuma luabonga.
a Hagujiya luholo lua gukuatesa athu alebele gale mu nyuma, tala longo “Vutugienu Gudi Ame” mu Inzo Yaleha ya Mutaledi ya Juin 2020.