Wana Khala nu Gutshigina Ba?

Ha gusuanguluisa Yehowa, tudi naye gukhala nu gutshigina. Uvi Biblia idi muzuela egi “ishigo athu agasue ana monesa gutshigina.” (2 Tes. 3:2) Tangua mupostolo Phaula wasonegele mbimbi eji wakhalele muzuelela “athu abola nu enya khuta” akhalele gumusagesa. Uvi ndaga jiazuelele muene mukunda nu gutshigina jidi nji mutadila athu ako. Athu ako anago gutshigina malongo ana monesa egi Nzambi wafugile ima yagasue. (Roma 1:20) Athu ako nji ajiya guzuela egi ana gusha gutshigina gu gima nga gudi muthu mumoshi udi nu ngolo jiavula. Uvi gutshigina gua luholo elu gushigo phamba guene guana suanguluisa Yehowa.

Tudi naye gutshigina egi Yehowa wana khala guene nu wana shimbiga athu ana khala nu gutshigina guakola. (Heb. 11:6) Gutshigina gudi mukatshi dia mabundu a nyuma ya Nzambi. Gula tudi mutshita gisambu, Yehowa mbawutuhana nyuma yenji. (Luka 11:9, 10, 13) Ndaga iko yabalega ndando tudi naye gutshita ha guheta nyuma ya Nzambi idi gutanga Mbimbi yenji. Gungima tuajiya gutangigiza mu ndaga tuatangi nu gutshita ngolo ha gukalegela ndaga jiene. Ngenyi, nyuma ya Nzambi mbayitukuatesa ha gukalagala ndaga jidi mumonesa egi tudi nu gutshigina guana gusuanguluisa Yehowa.