LONGO DIA 38
LUNGIMBO 25 Athu aye Watombele
Malongo Atshi Tuajiya Guzula mu Ifezegeselo Yahanele Yesu?
“Mbaazangula mumoshi, muko mbaamubemba.”—MAT. 24:40.
NDAGA JIDI MU LONGO EDI
Mu longo edi tuza muzuelela ifezegeselo thathu yahanele Yesu, tuza nji mumona luholo ifezegeselo yene idi gudivua nu tangua dia usopheshi mbawukalegewa gu gisugishilo gia mavu awa.
1. Gualeha ndo Yesu mbawukalagala itshi?
TUDI mujinga mu sungi imoshi usombegeshi wakoma mbawukalegewa! Gualeha ndo, Yesu mbawusophesa muthu wagasue ha mavu. Yesu wamonesele ndaga jidi naye gubua gutuama dia usopheshi wene. Wahanele alandudi enji “gijiyishilo” mbagimonesa tangua dia guvutuga guenji nu dia “gisugishilo gia mavu awa.” (Mat. 24:3) Profesi yene idi mu mukanda wa Matayo mukhapho 24 nu 25 nu mu mukanda wa Mako mukhapho 13 nu mu Luka mukhapho 21.
2. Ndaga jitshi tuza muzuelela mu longo edi? Mukunda natshi jiajiya gutukuatesa?
2 Yesu wahanele ifezegeselo thathu yajiya gutukuatesa ha gudilondega mukunda nu usopheshi wene. Ifezegeselo yene idi ya imeme nu khombo, ya tundongo tuatema nu tuaheya nu ya talanta. Ifezegeselo yene yagasue idi gutukuatesa ha gukotelesa egi Yesu mbawusophesa muthu wagasue ha gutadila midimo yenji. Mu longo edi tuza muzuelela ifezegeselo yene nu malongo yajiya gutuhana. Thomo, tuza muzuelela gifezegeselo gia imeme nu khombo.
IMEME NU KHOMBO
3. Tangua ditshi Yesu mbawusophesa athu?
3 Mu gifezegeselo gia imeme nu khombo, Yesu wazuelele egi mbawusophesa athu ha gutadila luholo atshiginyile lukuma luabonga nu luholo akuatesele Aklisto ambiwe maji mu nyuma. (Mat. 25:31-46) Tangua diazonda gutuama egi ita ya Alemagedona isendese, mu tangua dia “lamba diakola,” Yesu mbawumonesa gula adi imeme nga khombo. (Mat. 24:21) Yesu mbawukhaphumuna athu ana kuatesa Aklisto ambiwe maji mu nyuma nu athu anago guyitshita, gifua luholo mubambi wa imeme wana khaphumuna imeme nu khombo.
4. Hagutadila Yeshaya 11:3, 4, mukunda natshi tuajiya gusha mutshima egi Yesu mbawusophesa athu mu luholo luabonga? (Tala nji gidi holu dia gizula.)
4 Profesi ya Biblia yana monesa egi Yesu mbawusophesa mu luholo luabonga handaga Yehowa wamutombele ha gusophesa. (Tanga Yeshaya 11:3, 4.) Mbawusophesa athu ha gutadila ndaga ana tshita nu ndaga ana zuela nu luholo ana kalegela Aklisto ambiwe maji mu nyuma ndaga. (Mat. 12:36, 37; 25:40) Yesu mbawujiya athu akuatesele Aklisto ambiwe maji mu nyuma.a Luholo luabalega ndando lua gukuatesa Aklisto ambiwe maji mu nyuma ludi gudihana mu mudimo wa gulongesa lukuma luabonga. Athu ana guakuatesa mbaasophesewa gifua “athu abonga” nu mbaheta “monyo wa mayilago” ha mavu. (Mat. 25:46; Gumo. 7:16, 17) Mbayikhala diago gishimbigo mukunda nu athu ana landula gukhala yagujinginyina gudi Yehowa! Gula alandula gusala yagujinginyina mu tangua dia lamba diakola nu gungima dia lamba diene, majina awo mbaasala “mu mukanda wa monyo.”—Gumo. 20:15.
Mu masugu adi muza, Yesu mbawusophesa athu agasue ikhale anyi adi gifua imeme nga khombo (Tala paragrafe 4)
5. Longo ditshi tuajiya guzula mu gifezegeselo gia imeme nu khombo? Akuatshi ana heta gubonga mu gifezegeselo giene?
5 Khala yagujinginyina. Gifezegeselo gia imeme nu khombo giazuelele Yesu gidi mutadila thomo athu anyi adi nu felela dia gujinga ha mavu. Ana monesa gutshigina guene tangua ana kuatesa Aklisto ambiwe maji mu nyuma mu mudimo wagulongesa nu tangua ana tumagela nu mutshima umoshi utuameji wa muhiga wafubidila nu watema munu Yesu watombele. (Mat. 24:45) Uvi gifezegeselo giene gidi nji mutadila Aklisto ambiwe maji mu nyuma. Mukunda natshi? Handaga Yesu wana mona makalegelo awo nu ndaga ana zuela. Ene nji adi naye gusala yagujinginyina. Yesu wakalegele ifezegeselo iko mbadi idi mumonesa luholo Aklisto ambiwe maji mu nyuma adi naye gumonesa gutema. Ifezegeselo yene idi nji mu mukanda wa Matayo mukhapho 25. Henyaha tuzuelelenu gifezegeselo gia tundongo tuatema nu tuaheya.
TUNDONGO TUATEMA NU TUAHEYA
6. Luholo lutshi tundongo 5 tuamonesele egi tudi tuatema? (Matayo 25:6-10)
6 Mu gifezegeselo gia tundongo, Yesu wazuelele tundongo 10 tuayile mutagana nu yala wakhalele naye guzula mukhetu mu ulo. (Mat. 25:1-4) Mukut’awo agasue akhalele mutshigina guya nu yala wakhalele mutshigina guzula mukhetu mu ulo gu wano wa ulo wenji. Yesu wazuelele egi tundongo 5 tuakhalele “tuatema” uvi tuko 5 tuakhalele “tuaheya.” Tundongo tuatema tuadiangele gudilondega nu tuakhalele gikolekole. Tundongo tuene tuakhalele hehi ha gunengena yala wakhalele naye guzula mukhetu mu ulo uu nu tangua diza muene, ikhale waza mukatshi dia phipha. Hene asumbile minda ya maji ha guakuatesa mu phipha. Asumbile maji avula hagula ngatshima yala muene washipha, uvi tshuya tujimigo. Hene alondele minda yawo hagula ilandule gulema. (Tanga Matayo 25:6-10.) Tangua yala wahetele, tundongo tuatema tuayile nenji gu wano wenji. Luholo lumoshi nji, Aklisto ambiwe maji mu nyuma anyi ana khala gikolekole nu ana sala yagujinginyina uu nu tangua mbadiza Klisto, mbaadibungisa nu yala udi muzula mukhetu mu ulo yakotelesa egi Yesu mu Ufumu wenji wa mu dilu.b (Gumo. 7:1-3) Uvi ndaga itshi mbayibuila tundongo tuaheya?
7. Ndaga itshi yabuidile tundongo 5 tuaheya? Mukunda natshi?
7 Mu gudisha nu tundongo tuatema, tundongo 5 tuaheya tuakhalelego yagudilondega tangua yala wahetele. Minda yawo yakhalele mujima handaga asumbilego majila avula. Tangua ajiyile egi yala udi hehi ha guheta, ayile musumba maji. Uvi tangua yala wahetele gaasangelego. Mu tangua diene, “tundongo tuakhalele hehi tuanginyile n’enji mu wano wa ulo, gungima akangele mufulo.” (Mat. 25:10) Tangua tundongo tuaheya tuajile muvutuga, akhalele nu funu ya gungina uvi yala muene wawambelele egi: “Ngushigo gumijiya.” (Mat. 25:11, 12) Tundongo tuene tuakhalelego yagudilondega ha gunengenena yala uu nu tangua diakhalele naye guheta muene. Longo ditshi Aklisto ambiwe maji mu nyuma ajiya guzula?
8-9. Longo ditshi Aklisto ambiwe maji mu nyuma ajiya guzula mu gifezegeselo gia tundongo? (Tala nji gifuanesa.)
8 Khala yagudilondega nu monesa gutema. Yesu gakhalelego muzuela egi Aklisto ambiwe maji mu nyuma mbaakhala thundu mbadi, yakotelesa egi ako mbaakhala agudilondega uu nu gugisugishilo gia mavu awa uvi ako ndo. Uvi wamonesele egi gula Aklisto ene adilondelego nu asalelego yagujinginyina uu nu gugisugishilo, mbaashigo muheta gishimbigo. (Yone 14:3, 4) Idi diago nu ndando ha gujiya ndaga yene! Handaga ikhale felela dietu didi dia guya mu dilu nga dia gujinga ha mavu, tudi naye guzula longo mu gifezegeselo gia tundongo. Muthu wagasue mukatshi dietu udi naye gukhala yagudilondega nu gumonesa gutema. Udi naye nji gukhala hehi ha gukolesela uu nu gugisugishilo.—Mat. 24:13.
9 Gungima dia guhana gifezegeselo gia tundongo ha gumonesa egi idi nu ndando ha gukhala ya gudilondega nu gumonesa gutema, Yesu wahanele nji gifezegeselo gia talanta. Gifezegeselo giene gidi mumonesa egi tudi naye gudihana muavula mu mudimo wa Yehowa.
Muthu wagasue mukatshi dietu udi naye gutshita ngolo ha guzula malongo mu gifezegeselo giahanele Yesu gia tundongo; tudi naye gudilondega, gumonesa gutema nu gukolesela uu nu gu gisugishilo (Tala paragrafe 8-9)
TALANTA
10. Luholo lutshi enya mudimo mbadi amonesele egi akhalele agujinginyina? (Matayo 25:19-23)
10 Mu gifezegeselo gia talanta, Yesu wazuelele enya mudimo mbadi akhalele agujinginyina gudi fumu wawo nu mumoshi munu gakhalelego yagujinginyina. (Mat. 25:14-18) Enya mudimo ene amonesele egi akhalele agujinginyina gudi fumu wawo luholo atshitshile mudimo wakola ha guvudisa mbongo jiaahanele muene. Gutuama dia guya mu vuayaje, waahanele talanta yakotelesa egi mbongo jiavula. Enya mudimo mbadi akhalele agujinginyina, atshitshile mudimo wakola nu akalegele mbongo jiene nu gutema guagasue. Gubonga gutshi ahetele? Tangua fumu wawo wavutugile, waasangele avudisa gale mbongo mbala jiyadi. Waashimanele nu waalezele egi ‘izenu musuanguluge hamoshi nu fumu wenu.’ (Tanga Matayo 25:19-23.) Uvi ndaga itshi yabuidile muenya mudimo wa thathu? Ndaga itshi yatshitshile muene nu mbongo jiamuhanele fumu wenji?
11. Ndaga itshi yabuidile muenya mudimo wa “gimonya”? Mukunda natshi?
11 Fumu wahanele muenya mudimo wa thathu talanta imoshi uvi muthu muene wakhalele “gimonya.” Fumu wenji wakhalele mutshigina egi akalegele talanta yene nu gutema guagasue. Uvi muene wavumbigile genji talanta yene mu mavu. Tangua fumu wenji wajile muvutuga, gakhalelego nga nu gima gia gumuhana holu. Muenya mudimo muene gakhalelego nu makalegelo abonga. Ha fundo dia gububila fumu wenji, uvi wasendesele guzuela egi udi “muenya ndaga jiakola.” Fumu muene gasuangulugilego nu muenya mudimo muene. Ndaga iko ya lamba idi egi, wamutambudile talanta yene nu wamukatudile gu mudimo.—Mat. 25:24, 26-30.
12. Mangino enya mudimo mbadi agujinginyina adi mumonesa akuatshi?
12 Enya mudimo mbadi akhalele agujinginyina adi mumonesa Aklisto ambiwe maji mu nyuma. Fumu wawo Yesu udi guatamega ha ‘gusuanguluga nawo hamoshi.’ Ana heta gishimbigo giawo ha guya mujinga mu dilu yakotelesa egi, gufuzumuga gua thomo. (Mat. 25:21, 23; Gumo. 20:5b) Mu guzuela guko, gifezegeselo giabola gia muenya mudimo wa gimonya gidi mutemesa Aklisto ambiwe maji mu nyuma. Luholo lutshi?
13-14. Longo ditshi Aklisto ambiwe maji mu nyuma ajiya guzula mu gifezegeselo gia talanta? (Tala nji gifuanesa.)
13 Khalenu gudihana muavula mu mudimo wa Yehowa. Mu gifezegeselo gia talanta nu gia tundongo, Yesu gakhalelego muzuela egi Aklisto ambiwe maji mu nyuma mbaabua imonya. Uvi wamonesele ndaga mbayaabuila gula ashigo mutshita mudimo waahanewe nu gikhesa. Gula ndo ajiya gutotesa ‘gutamegewa guaatamegewe nu gutombewa guaatombewe,’ ngenyi mbaashigo muheta luendu lua gungina mu Ufumu wa mu dilu.—2 Phet. 1:10.
14 Gifezegeselo gia Yesu giatadila tundongo nu talanta, gidi mumonesa haphelo egi Aklisto agasue ambiwe maji mu nyuma adi naye gukhala yagudilondega nu gumonesa gutema, adi naye nji gudihana muavula mu mudimo wa Yehowa. Yesu wazuelele ndaga iko yajiya gutemesa Aklisto ene ba? Ayi! Mbimbi jia Yesu jidi mu mukanda wa Matayo 24:40, 41 jidi nji mumonesa luholo usopheshi wa gisugishilo wa Aklisto ambiwe maji mu nyuma mbawukhala.
Yesu wana khala nu gusuanguluga ha gumona luholo Aklisto ambiwe maji mu nyuma ana gudihana mu mudimo wa gulongesa (Tala paragrafe 13-14)d
AKUATSHI ‘MBAAZANGUDIWA’?
15-16. Luholo lutshi mbimbi jidi mu Matayo 24:40, 41 jidi mukuatesa Aklisto ambiwe gale maji mu nyuma ha gulandula gumonesa gutema?
15 Gutuama dia guhana ifezegeselo thathu, Yesu wazuelediele usopheshi wa gisugishilo wa Aklisto ambiwe maji mu nyuma anyi mbaatshiginyiwa. Yesu wahanele gifezegeselo gia mala mbadi akhalele mu dihia nu akhetu mbadi akhalele mukhukha mbuto. Mala nu akhetu ene mbaamonega gifua adi mukalagala mudimo umoshi uvi Yesu wazuelele egi “mbaazangula mumoshi, muko mbaamubemba.” (Tanga Matayo 24:40, 41.) Gungima wawambelele alandudi enji egi: “Temienu, handaga mushigo mujiya lusugu mbaluza Fumi’enu.” (Mat. 24:42) Yesu wazuelele ndaga ya luholo lumoshi gungima dia guzuelela gifezegeselo gia tundongo. (Mat. 25:13) Mbimbi jiene jia Yesu jidi diago gudivua ba? Idi mumonega ngenyi. Phamba Aklisto ambiwe diago maji mu nyuma nu adi agujinginyina “mbaazanguwa” nu mbaaheta Ufumu wa mu dilu nu Yesu.—Yone 14:3.
16 Monesenu gutema. Muklisto wagasue wambiwe gale maji mu nyuma munu gashigo mumonesa gutema, mbagashigo mubungishiwa hamoshi nu Aklisto anyi “atombewe.” (Mat. 24:31) Ndaga eyi idi mutadila nji akombeledi a Nzambi agasue anyi adi nu felela dia guheta monyo wa mayilago ha mavu; adi naye gumonesa gutema nu gusala agujinginyina tangua diagasue ha gutumagela mbimbi jia Yesu.
17. Mukunda natshi tushigo naye gudisagesa luholo Yehowa udi mulandula gumba Aklisto maji mu nyuma mu masugu awa?
17 Luholo tuana jiya Yehowa muabonga, tuana sha mutshima egi ndaga jiagasue jiana kalagala muene jidi jiatagana. Hene, tuana gudisagesa ndo ha gumona luholo Yehowa wana landula gumba Aklisto avula maji mu masugu awa.c Esue mujiya muabonga gifezegeselo giahanele Yesu giatadila enya mudimo a dihia dia vinyo anyi asendesele mudimo mu tangua dia thano gungima dia midi. (Mat. 20:1-16) Athu anyi asendesele mudimo mu ngueze afutshiwe luholo lumoshi nu athu anyi asendesele mudimo mu gimenegena. Luholo lumoshi nji, Aklisto anyi ambiwe gale maji mu nyuma sendese mualeha mbaaheta lufuto luholo lumoshi nu anyi adi mumbiwa maji mu nyuma mu masugu etu gula mukut’awo agasue asala agujinginyina.
TEGELELA MUABONGA MALONGO ADI GUGUHANEWA
18-19. Malongo atshi tuazula mu ifezegeselo tuamona mu longo edi?
18 Ndaga jitshi tualonguga mu longo didi? Gifezegeselo gia imeme nu khombo gidi mumonesa egi athu adi nu felela dia gujinga mayilago ha mavu adi naye gusala yagujinginyina gudi Yehowa sendese mangino uu nu mu tangua dia lamba diakola. Mu tangua diene, Yesu mbawusophesa athu agasue, anyi mbaakhala agujinginyina gudi Nzambi mbaaheta “monyo wa mayilago.”—Mat. 25:46.
19 Tuazuelela nji ifezegeselo mbadi idi mumonesa egi Aklisto anyi ambiwe maji mu nyuma adi naye gumonesa gutema. Mu gifezegeselo giahanele Yesu giatadila tundongo tuatema nu tuaheya, Yesu wamonesele egi tundongo thano tuakhalele tuatema. Tundongo tuene tuadilondegele muabonga, tuamonesele nji gutema ha gunengena uu nu tangua diakhalele naye guza yala munu wakhalele muzula mukhetu mu ulo. Uvi tundongo tuaheya tuadilondelego. Hene yala muene watunyishile tundongo tuene ha gungina ha fundo akhalele mutshita wano wenji wa ulo. Esue nji tudi naye gudilondega muabonga ha gunengena uu nu tangua Yesu mbawuza mushiya mavu awa abola. Mu gifezegeselo gia Yesu gia talanta, tuazuelela enya mudimo mbadi agujinginyina, anyi adihanele muavula mu mudimo. Akalegele mudimo wakola mukunda nu fumu wawo, gishina giene fumu wawo wasuangulugile nawo. Uvi gasuangulugilego nu muenya mudimo wa gimonya. Longo ditshi tuajiya guzula? Tudi naye gudihana muavula mu mudimo wa Yehowa uu nu tangua gisugishilo mbagiza. Gu gisugishilo, tuamonyi luholo Aklisto anyi ambiwe gale maji mu nyuma adi naye gumonesa gutema hagula Yesu ‘mbaazangule’ ha guahana gishimbigo giawo mu dilu. Ana nengena nu mutshima zagu-zagu lufuto luawo mbaaheta tangua ‘mbaadibungisa hamoshi’ nu Yesu mu dilu. Gungima dia ita ya Alemagedona, Aklisto ene mbaakhala gifua mukaji’a Yesu gu ulo wa Mun’a Gimeme.—2 Tes. 2:1; Gumo. 19:9.
20. Itshi Yehowa mbawukalagala mukunda nu athu anyi adi mutegelela malongo a ifezegeselo ya Yesu?
20 Gualeha ndo Yesu umuza musophesa athu, uvi esue tuajiyilego guvua woma. Gula tuasala yagujinginyina, Yehowa Tata wetu wa guzumba mbawutuhana “ngolo jiabalega ngolo jia athu” hagula tuajiya “gumagana gutuama dia Mun’a muthu.” (2 Kol. 4:7; Luka 21:36) Hene, ikhale tudi nu felela dia gujinga ha mavu nga mu dilu, mbatusuanguluisa Yehowa gula tuategelela muabonga malongo adi mu ifezegeselo yahanele Yesu. Yehowa ‘mbawusonega majina etu mu mukanda’ wa monyo handaga udi Nzambi wazala pha nu khenda.—Dan. 12:1; Gumo. 3:5.
LUNGIMBO 26 “C’est à moi que vous l’avez fait”
a Tala longo didi muzuela egi: “Itshi Tudi Naye Gujiya mu Luholo Yehowa Mbawusophesa Athu mu Masugu adi Muza?” mu Inzo Yaleha ya Mutaledi ya Mai 2024.
b Ha gujiya ndaga jiavula, tala longo didi muzuela egi: “Veilleras-tu”? mu Inzo Yaleha ya Mutaledi ya 15 Mars 2015 ya français.
c Tala Inzo Yaleha ya Mutaledi ya Janvier 2020 diyiji 29-30 par. 11-14.
d UKOTELESHI WA IFUANESA: Phangi mumoshi wa mukhetu wambiwe maji mu nyuma udi mulongesa mukhetu mumoshi Biblia.