Samueli woyamba
1 Penze mwamuna munango wa ku Ramatayimu-zofimu,* kudera ya mapiri ya Efuraimu dzina yake Elikana. Iye wenze mwana wa Yerohamu, mwana wa Elihu, mwana wa Tohu, mwana wa Zufi, ndipo wenze wa dzinza ya Efuraimu. 2 Elikana wenze na akazi awiri.* Nkazi munango wenze Hana ndipo munango wenze Penina. Penina wenze na wana koma Hana wenze alibe wana.* 3 Gole iriyose mwamuna muyu ambachoka muthaundi yake nkuyenda ku Silo kukatumikira* Yahova wa magulu yankhondo yakudzulu komasoti kukapereka ntsembe zake. Kumoku ni komwe Hofeni na Pinihasi wana awiri wa Eli ambatumikirira ninge antsembe wa Yahova.
4 Ntsiku inango pomwe Elikana ambapereka ntsembe, adatenga magawo ya ntsembe mwiyo nkupereka kwa nkazi wake Penina komasoti wana wake wose amuna na akazi. 5 Koma Hana adamupasa gawo yapadera ndawa ni yemwe ambamukonda maninge. Koma olo nteno, Yahova alibe kumupasa wana.* 6 Komasoti mkazi munzake wa Hana, ambamuboneresa maninge na cholinga chakuti amukalipise ndawa Yahova alibe kumupasa wana. 7 Ambachita vimwevi gole iriyose Hana akayenda ku nyumba ya Yahova. Penina ambamudzudza maninge mwakuti Hana ambalira ndipo ambadyalini. 8 Manje Elikana mwamuna wake adanena kuti: “Hana, ndawa chani unkulira ndipo ndawa chani unkudyalini? Komasoti ndawa chani ndiwe wokwinyirira teneuyu? Ko inepano niposhalini wana amuna 10 kwa iwepo?”
9 Padamaliza kudya na kumwa ku Silo, Hana adaimirira. Pamwapa nkuti Eli wantsembe ali khale pa mpando pansuwo pa kachisi* wa Yahova. 10 Hana wenze wokwinyirira maninge ndipo adayamba kupemphera kwa Yahova uku ankulira maninge. 11 Iye adapolomisa kuti: “Imwepo Yahova wa magulu yankhondo yakudzulu, mukawona kubonera kwa ine kapolo wanu nkunikumbukira komasoti mukaleka kuniyebwa inepano kapolo wanu nkunipasa mwana mwamuna, nidzamupereke kwa Yahova ntsiku zose za moyo wake ndipo leza idzapitelini munsolo mwake.”
12 Pomwe ambapemphera kwa Yahova kwa nthawe ikulu, Eli ambanyang’anisisa pakamwa pake. 13 Hana ambayankhula chamuntima. Milomo yake yambagwendezeka koma ambabulisalini mawu. Eli padawona vimwevi adaganiza kuti waledzera. 14 Ndipo adamuuza kuti: “Ko ukhale woledzera mpakana lini? Leka kumwa vinyu wako uyo.” 15 Koma Hana adadawira kuti: “Neye mbuya wangu! Munthu ine nili na nkhawa maninge. Niribe kumwa vinyu panango chakumwa chirichose choledzeresa, koma ninkufotokozera Yahova nkhawa zangu zose. 16 Ayi kuwona ninge inepano kapolo wanu ndine nkazi alibe basa, pakuti nakhala ninkuyankhula mpakana pano ndawa yokwinyirira maninge komasoti nkhawa.” 17 Pavidateno, Eli adamudawira kuti: “Yenda muntendere, ndipo Mulungu wa Aizirayeli akupase vomwe wamukumbira.” 18 Hana adadawira kuti “Pitirizani kunikomera ntima inepano kapolo wanu.” Pamwapo adachoka nkuyenda kukadya ndipo nkhope yake imbawonekalini pomwe yokwinyirira.
19 Patsogolo pake adamuka machibese ndipo padatumikira Yahova adabwerera kumuyi kwawo ku Rama. Manje Elikana adagona na nkazi wake Hana ndipo Yahova adamukumbukira.* 20 Gole ikalibe yamala, Hana adakhala na mimba nkubereka mwana mwamuna ndipo adamupasa dzina yakuti Samueli* ndawa adati: “Nidamukumbira kwa Yahova.”
21 Paidapita nthawe, Elikana adayenda na banja yake yose kukapereka kwa Yahova ntsembe yapagole na ntsembe yake ya polomisi. 22 Koma Hana alibe kuyenda nawo ndawa wenze adauza mwamuna wake kuti: “Mwana uyu akadzandosiya kuyamwa nidzayende naye. Patsogolo pake adzawonekere pamaso pa Yahova ndipo ambadzakhale kumuko.” 23 Elikana adamuuza kuti: “Chita vomwe unkuwona kuti ni vabwino kwa iwepo. Ungakhale mpakana pomwe mwana muyo adzaleke kuyamwa. Yahova akwanirise vomwe iwepo wanena.” Pamwapo Hana adapitiriza kukhala pamuyi mwapo ndipo adapitiriza kulera mwana wake muyo mpakana pomwe adasiya kuyamwa.
24 Mwana muyo padasiya kuyamwa, Hana adayenda naye ku Silo pabodzi na ng’ombe ing’ono imuna ya magole yatatu, ufa wokwana mpimo ubodzi wa efa* na mtsuko wa vinyu. Iye adangena m’nyumba ya Yahova ku Silo pabodzi na mwana muyo. 25 Patsogolo pake iwo adapha ng’ombe ing’ono imuna ire ndipo adayenda na mwana muyo kwa Eli. 26 Pamwapo adanena kuti: “Pulizi mbuya wangu muli apa.* Inepano ndine mayi ule yemwe nidabwera nkuima pamalo yano, nkumbapemphera kwa Yahova. 27 Nimbakumbira kuti anipase mwana mwamuna uyu ndipo Yahova wanipasa vomwe nidakumbira. 28 Ndipo inepano ninkumupereka kwa Yahova. Ninkumupereka kwa Yahova ntsiku zose za moyo wake.”
Patsogolo pake iye* adagwada nkutumikira Yahova.