Levitiko

11 Patsogolo pake Yahova adayankhula na Mose kuti: 2 “Uzani Aizirayeli kuti: ‘Vamoyo va padziko yapasi* vomwe mungadye ni ivi: 3 Mungadye nyama iriyose yomwe inavibodo* vogawikana, vokhala na mpata pakati yomwe igaya.*

4 Koma ayi kumbadya nyama izi olo kuti zigaya komasoti zinavibodo vogawanika. Ngamila, ndawa igaya koma vibodo* vake ni vosagawanika. Nyama mwiyi ni yopsyipiziwa kwa imwepo. 5 Komasoti mbira, ndawa igaya koma vibodo vake ni vosagawanika. Ni yopsyipiziwa kwa imwepo. 6 Nchibodzibodzimbo na kalulu, ndawa agaya koma vibodo vake ni vosagawanika. Ni wopsyipiziwa kwa imwepo. 7 Komasoti nkhumba, ndawa vibodo vake ni vogawanika ndipo vinampata pakati, koma igayalini. Ni yopsyipiziwa kwa imwepo. 8 Ayi kumbadya nyama mwizi, ndipo zikafa ayi kumbazigumirira. Ni zopsyipiziwa kwa imwepo.

9 Vomwe mungadye pa vose va m’madzi ni ivi: Chirichose cha m’madzi chomwe chinamabepsu* na mamba, peno chigumanika mu nyanja panango mukamadzi mungadye. 10 Koma chirichose chogumanika mu nyanja na mukamadzi chomwe chiribe mabepsu na mamba, pa vamoyo vogumanika vizinji na pa vamoyo vinango vose va m’madzi, ni vonyantsa kwa imwepo. 11 Vinthu vimwivi vikhale vonyantsa kwa imwepo. Ayi kumbadya nyama yake iriyose, ndipo vikafa vimbakhale vonyantsa kwa imwepo. 12 Chamoyo chirichose cha m’madzi chomwe chiribe mapepsu na mamba, ni chonyantsa kwa imwepo.

13 Ivi ni vamoyo vombululuka vomwe mufunika kuviona kuti ni vonyantsa. Vifunikalini kudyewa ndawa ni vonyantsa: Mphungu, nkhwazi, muimba mpsyipa, 14 chidimba nfuwira, ntundu uliwose wa chidimba mpsyipa, 15 ntundu uliwose wa khwangwala,* 16 nthiwatiwa, kadzidzi, kakowa, ntundu uliwose wa kabawi, 17 psyololo, nyang’omba,* mantchichi, 18 tsekwe, vuwo, muimba, 19 dokowe, ntundu uliwose wa chimeza, sadzu na nyankhupiti. 20 Tulombo tose tomwe tugumanika tuzinji, twa maphaphiro na twa minyendo yanayi, ni tonyantsa kwa imwepo.

21 Pa tulombo tose tomwe tugumanika tuzinji, twa matengera komasoti tufamba na minyendo yanayi, mungadye tulombo tule tomwe tunaminyendo yawiri yataliyatali yolumphira. 22 Tulombo tomwe mungadye ni utu: mitundu yosiyanasiyana ya dzombe* yomwe ifamba misenga yataliyatali, mitundu yanango yomwe yadyewa, ntsenene na abombo. 23 Koma tulombo tunango tose tomwe tugumanika m’magulu, twamatengera komasoti tunaminyendo yanayi, ni tonyantsa kwa imwepo. 24 Vamoyo vimwevi ni vomwe vingakupsyipizeni. Aliyese wogumirira vamoyo vimwevi viri vakufa adzakhale wopsyipiziwa mpakana kumaulo. 25 Aliyese wotakula chirichose pa vamoyo vimwivi chiri chakufa, ambawatche vovala vake, ndipo ambakhale wopsyipiziwa mpakana kumaulo.

26 Nyama iriyose yomwe inachibodo chogawanika koma chinamipata yazinji, na yomwe igayalini, ni yopsyipiziwa kwa imwepo. Aliyese wophata nyama mwiyi ambakhale wopsyipiziwa. 27 Chamoyo chirichose chomwe chikhala na minyendo yomwe yanantchala pa vamoyo vose vomwe vifamba na minyendo yose yanayi, ni chopsyipiziwa kwa imwepo. Aliyese wogumirira chamoyo mwichi chiri chakufa adzakhale wopsyipiziwa mpakana kumaulo. 28 Munthu wonyamula nyama iriyose ya zimwizi iri yakufa, ambawatche vovala vake ndipo adzakhale wopsyipiziwa mpakana kumaulo. Nyama mwizi ni zopsyipiziwa kwa imwepo.

29 Ivi ni vamoyo va padziko yapasi vomwe ni vopsyipiziwa kwa imwepo: Mpfuko, mbewa na ntundu uliwose wa buluzi.* 30 Komasoti nalimata, buluzi nkulu, dududu, buluzi wa munchenga na zavi. 31 Vamoyo mwivi vomwe vigumanika m’magulu, ni vopsyipiziwa kwa imwepo. Aliyese wovigumirira viri vakufa adzakhale wopsyipiziwa mpakana kumaulo.

32 Manje chirichose pa vamoyo vimwevi chikafa nkugwera pa chinthu chirichose, chinthu mwicho chidzakhale chopsyipiziwa, peno chombo cha muti, chovala, chikumba panango chisakha. Chombo chirichose chomwe chiphatisiwa basa chimbavuwikiwe m’madzi, ndipo chimbakhale chopsyipiziwa mpakana kumaulo, patsogolo pake chidzakhale chochena. 33 Peno chamoyo mwicho chagwera muchombo cha dongo, mumbachiphwanye, ndipo chirichose chomwe chenze mumo chimbakhale chopsyipiziwa. 34 Madzi ya muchombo mwicho yakagwera pa chakudya chirichose, chakudya mwicho chimbakhale chopsyipiziwa. Ndipo chakumwa chirichose chomwe chiri muchombo mwicho, chidzakhale chopsyipiziwa. 35 Chirichose pa vamoyo mwivi chikafa nkugwera pa chinthu chirichose, peno ni uvuni panango mbaula, chinthu mwicho chidzakhale chopsyipiziwa ndipo mumbachiphwanye. Vinthu mwivi vapsyipiziwa ndipo vidzapitirize kukhala vopsyipiziwa kwa imwepo. 36 Pomwe patapiwa madzi na thanki yosungiramo madzi ndivo vokha vomwe vidzapitirize kukhala vochena, koma aliyese wogumirira chinthu chakufa mwicho adzakhale wopsyipiziwa. 37 Peno chinthu chakufa mwicho chagwera pa mbewu yomwe mukufuna kubzala, mbewu mwiyo imbapitirize kukhala yochena. 38 Koma mbewu mwiyo ikhathiriwa madzi ndipo mbali iriyose ya nyama yakufa mwiyo nkugwerapo, mbewu mwiyo imbakhale yopsyipiziwa kwa imwepo.

39 Nyama iriyose yomwe mwabvumiziwa kudya ikagumanika yakufa, aliyese wogumirira nyama yakufa mwiyo ambakhale wopsyipiziwa mpakana kumaulo. 40 Aliyese yemwe angadye nyama yakufa mwiyo ambawatche vovala vake, ndipo ambakhale wopsyipiziwa mpakana kumaulo. Aliyese yemwe angatakule nyama yakufa mwiyo ambawatche vovala vake, ndipo ambakhale wopsyipiziwa mpakana kumaulo. 41 Vamoyo vose vomwe vigumanika vizinji padziko yapasi ni vonyantsa. Mufunikalini kudya vinthu mwivi. 42 Ayi kudya chamoyo chirichose chokwawa, chamoyo chirichose chomwe chifamba na minyendo yanayi panango vamoyo vose vomwe vigumanika vizinji padziko yapasi, vokhala na minyendo yazinji, ndawa vimwivi ni vonyantsa. 43 Ayi kumbadziipisa na vamoyo virivose vomwe vigumanika vizinji ndipo ayi kumbadzipsyipiza navo nkukhala wopsyipiziwa. 44 Inepano ndine Yahova Mulungu wanu. Mudzipatule na kukhala wochena, ndawa inepano ndine wochena. Ndipomwapa osati mumbadzipsyipize na chamoyo chirichose chofamba padziko yapasi. 45 Inepano ndine Yahova yemwe nidakubulisani mudziko ya Iguputo kuti nikuwoneseni kuti ndine Mulungu. Mumbakhale wochena, ndawa inepano ndine wochena.

46 Mwiyi ni lamulo yonena va nyama, vamoyo vombululuka, vamoyo vose va m’madzi na vamoyo vose vakuntunthu, 47 kuti mumbasiyanise chopsyipiziwa na chochena komasoti vamoyo vomwe mufunika kudya na vomwe mufunikalini kudya.’”