Levitiko

20 Yahova adapitiriza kuyankhula na Mose kuti: 2 “Uza Aizirayeli kuti: ‘Munthu aliyese wa Chiizirayeli na munthu aliyese wokhala mu Izirayeli yemwe wapereka mwana wake kwa Moleki, ambaphewe. Nzika za m’dziko yanu zimbamuphe na minyala. 3 Inepano nidzamulambe munthu muyo ndipo nidzamuphe kuti osati akhale pomwe pakati pa wanthu wa ntundu wake, ndawa wapereka mwana wake kwa Moleki ndipo wapsyipiza malo yangu yochena komasoti waipisa dzina yangu yochena. 4 Koma nzika mwizo zikanyalanyazira dala vomwe munthu muyo wachita pakupereka mwana wake kwa Moleki ndipo iwo osamupha, 5 inepano nidzamuzonde munthu muyo pabodzi na wanthu wake. Nidzaphe munthu muyo pabodzi na wose obverana naye pochita uhule na Moleki, kuti osati akhale pomwe pakati pa wanthu wawo.

6 Munthu yemwe wachita vosakhulupirika* pakuthemba wanthu woyankhula na mizimu na woneneratu vakutsogolo, nidzazondane naye ndipo nidzamuphe kuti osati akhale pomwe pakati pa wanthu wa ntundu wake.

7 Manje mudzipatule ndipo mukhale ochena, ndawa inepano ndine Yahova Mulungu wanu. 8 Mumbasunge malamulo yangu ndipo mumbayatewedze. Inepano ndine Yahova yemwe ninkukupatulani kuti mukhale ochena.

9 Munthu akatemberera* ababa wake panango amayi wake, ambaphewe. Mulandu wa magazi yake umbakhale pa iye ndawa watemberera ababa wake panango amayi wake.

10 Iyi ni lamulo yonena va munthu yemwe wachita chigololo na nkazi wa munthu munango: Mwamuna yemwe wachita chigololo na nkazi wa munikachiro ambaphewe. Mwamuna na nkazi omwe achita chigololo, wose ambaphewe. 11 Mwamuna yemwe wagona na nkazi wa ababa wake, wachitisa manyazi* ababa wake mwawo. Mwamuna na nkazi muyo ambaphewe. Mulandu wa magazi yawo umbakhale pa iwo. 12 Mwamuna akagona na mulowola wake, wose awiri ambaphewe. Iwo achita vinthu vosabverana na chibadwa. Mulandu wa magazi yawo umbakhale pa iwo.

13 Mwamuna akagona na mwamuna munzake ninge momwe mwamuna agonera na nkazi, wose awiri achita chinthu chonyantsa. Iwo ambaphewe. Mulandu wa magazi yawo umbakhale pa iwo.

14 Mwamuna akalowola nkazi nkugona pomwe na amayi wa nkazi muyo, mwiyi ni khalidwe yonyantsa.* Mwamuna muyo na akazi wose* mwawo ambaphewe ndipo patsogolo pake ambashokewe kuti wanthu osati apitirize kuchita khalidwe yonyantsa mwiyo.

15 Mwamuna akagona na nyama, ambaphewe ndipo mumbaphe pomwe nyama mwiyo. 16 Nkazi akadzipereka kwa nyama kuti agone nayo, mumbaphe nkazi muyo na nyama mwiyo. Wanthu ochita vimwevi ambaphewe. Mulandu wa magazi yawo umbakhale pa iwo.

17 Mwamuna akagona na mulongosi wake, mwana nkazi wa ababa wake panango mwana nkazi wa amayi wake, chimwichi ni chinthu chopasa manyazi. Pamwapo wose awiri ambaphewe pamaso pa wanthu wa ntundu wawo. Iye wachitisa manyazi* mulongosi wake ndipo ambadawire mulandu wa kuphonya kwake muko.

18 Mwamuna akagona na nkazi yemwe ali kumwezi, wose awiri alibe kulemekeza magazi ya nkazi muyo. Wose awiri ambaphewe kuti osati akhale pomwe pakati pa wanthu wa ntundu wawo.

19 Ayi kugona na m’bale wa amayi wako nkazi panango mulongosi wa ababa wako, ndawa kuchita vimwevi nkuchitisa manyazi m’bale wako. Iwo ambadawire mulandu wa kuphonya kwawo. 20 Ndipo mwamuna yemwe wagona na nkazi wa m’bale wa ababa wake, wachitisa manyazi m’bale* wa ababa wake mwawo. Mwamuna na nkazi muyo ambadawire mulandu wa chimo yawo mwiyo. Iwo afunika kufa kuti osati abereke wana. 21 Mwamuna akalowola nkazi wa m’bale wake, wachita chinthu chonyantsa. Iye wachitisa manyazi* m’bale wake. Mwamuna na nkazi muyo afunika kufa kuti osati abereke wana.

22 Mumbasunge malamulo yangu yose na vigamulo vangu vose, kuti dziko yomwe ninkukungenesani kuti mukakhalemo osati idzakulavuleni. 23 Ayi kumbatewedza malamulo ya makhaindi yomwe nikuyathamangisa pakati panu, ndawa iwo achita vose mwivi ndipo aninyantsa. 24 Ndipomwapa ninkukuuzani kuti: “Imwepo mudzatenge dziko mwiyo ndipo inepano nidzaipereke m’manja mwanu kuti ikhale yanu, dziko yomwe iyerera nkaka na uchi. Inepano ndine Yahova Mulungu wanu, yemwe nidakupatulani kwa wanthu wa makhaindi yanango.” 25 Mumbasiyanise nyama yochena na yopsyipiziwa, mbalani yopsyipiziwa na yochena. Ayi kumbadziipisa na nyama, mbalani panango chirichose chokwawa padziko yapasi chomwe nanena kuti ni chopsyipiziwa. 26 Mukhale ochena kwa ine ndawa inepano Yahova ndine wochena. Inepano ninkukusiyanisani na wanthu wa makhaindi yanango kuti mukhale wanthu wangu.

27 Mwamuna panango nkazi aliyese yemwe ayankhula na mizimu panango kuneneratu vakutsogolo* ambaphewe. Ambaphewe pakuchita kumupha na minyala. Mulandu wa magazi yawo umbakhale pa iwo.’”