Levitiko

19 Yahova adapitiriza kuyankhula na Mose kuti: 2 “Uza gulu yose ya Aizirayeli kuti: ‘Mukhale wochena, ndawa inepano Yahova Mulungu wanu ndine wochena.

3 Aliyese wa imwepo ambalemekeze* ababa wake na amayi wake, ndipo mumbasunge masatade yangu. Inepano ndine Yahova Mulungu wanu. 4 Ayi kumbalondola milungu yalibe na basa panango kudzikonzera milungu yachisimbi chosungunula. Inepano ndine Yahova Mulungu wanu.

5 Mukambapereka ntsembe yachibverano kwa Yahova, mumbaipereke munjira yakuti Mulungu ambakondwe namwe. 6 Mumbadye nyama yoperekewa ntsembe mwiyo pantsiku yomwe mwaipereka na mangwana yake, koma yosala mpakana pantsiku yachitatu mumbaishoke pamoto. 7 Peno munthu wadya nyama mwiyo pantsiku yachitatu, wadya nyama yonyantsa. Mulungu adzatambirelini ntsembe mwiyo. 8 Munthu yemwe wadya nyama mwiyo ambadawire mulandu wa kuphonya kwake muko ndawa waipisa chinthu chopatulika cha Yahova. Munthu watene ambaphewe kuti osati akhale pomwe pakati pa wanthu wa ntundu wake.

9 Mukakolola vinthu va m’munda mwanu, ayi kumbachoseratu vose mphepete mwa munda muyo, ndipo ayi kumbachitamo mashanga.* 10 Komasoti, ayi kumbathyola uva wosalira wa m’munda mwanu panango kulokota uva womwe wamwazika m’munda mwanu. Mumbasiyire munthu wosauka* na mulendo wokhala pakati panu. Inepano ndine Yahova Mulungu wanu.

11 Ayi kumbaba, ayi kumbagong’a anzanu komasoti ayi kumbachitirana vinthu viribe chilungamo. 12 Ayi kumbalumbira vabodza mu dzina yangu nkuipisa dzina ya Mulungu wanu. Inepano ndine Yahova. 13 Ayi kumbapumpsa* anzanu kuti muwabere ndipo ayi kumbapamba vinthu va munthu aliyese. Malipiro ya munthu waganyu osati yambagone m’nyumba mwanu mpakana machibese.

14 Ayi kumbatemberera* gonthi ndipo munthu yemwe ni lombe ayi kumbamuikhira chinthu chomwe chingamupinge. Mumbagope Mulungu wanu. Inepano ndine Yahova.

15 Ayi kumbakondera pakutonga milandu. Ayi kumbakondera munthu wosauka panango wolemera. Ndipo mumbatonge mwachilungamo.

16 Ayi kumbafambafamba pakati pa wanthu wa ntundu wako nkumbachita magunkha. Ayi kumbachita chinthu chirichose kuti uphese munzako.* Inepano ndine Yahova.

17 Ayi kumbazondana na m’bale wako muntima mwako, koma umbamutsumule kuti iwepo osati ukhalembo wochimwa ninge iye.

18 Ayi kumbabwezera choipa panango kusungira chakuntima wanthu wa ntundu wako. Umbakonde munzako ninge momwe udzikondera wekha. Inepano ndine Yahova.

19 Mumbasunge malamulo yangu aya: Ayi kumbachitisa kuti vipfuwo vanu va mitundu yosiyana vikwirane. Pakubzala mbewu m’munda mwanu ayi kumbasanganisa makhaindi yawiri yosiyana. Ndipo ayi kumbavala chovala cha makhaindi yawiri yosanganisa.*

20 Mwamuna akagona na kapolo nkazi yemwe bwana wake adamupolomisa kuti adzamupereke kwa mwamuna munango, koma nkazi muyo alibe kuwombolewa panango kupasiwa ufulu, pambakhale chilango. Koma iwo osati aphewe ndawa nkazi muyo wenze akali kapolo. 21 Mwamuna muyo ambabwerese kwa Yahova nkhosa imuna ya ntsembe ya kupalamula pansuwo wa chihema chogumanako. 22 Manje wantsembe ambapsyimphirize chimo yomwe munthu muyo wachita. Ambachite vimwivi pakupereka kwa Yahova nkhosa imuna ya ntsembe ya kupalamula ire ndipo munthu muyo adzakhululukiriwe chimo yake mwiyo.

23 Mukafika mudziko yomwe mukuyenda nkubzala muti uliwose wa vipaso, vipaso vake vimbakhale vopsyipiziwa kwa imwepo ndipo muti muyo ayi kumbamufenderera. Ayi kumbafenderera muti muyo kwa magole yatatu ndipo ayi kumbadya vipaso vake. 24 Koma mugole yachinayi, vipaso vake vose vimbakhale vochena ndipo mumbavipereke kwa Yahova mokondwa. 25 Manje mu gole yachishanu, mungambathyole vipaso vake ninge momwe muchitira na mbewu zinango zose na kudya vipaso va muti muyo. Inepano ndine Yahova Mulungu wanu.

26 Ayi kumbadya chirichose chomwe chinamagazi.

Ayi kumbawombeza panango kuchita vamatsenga.

27 Ayi kumbagera makukundebvu* panango kugwata ntsonga za ndebvu zanu.*

28 Ayi kumbadzichekacheka ndawa ya munthu wakufa, ndipo ayi kumbadzinemba vizindikiro pathupi yanu. Inepano ndine Yahova.

29 Ayi kumbanyoza mwana wanu nkazi pakumuchitisa kuti akhale hule, kuchitira kuti dziko ingachite uhule nkudzala na makhalidwe yoipa.

30 Mumbasunge masatade yangu ndipo mumbalemekeze* malo yangu yopatulika. Inepano ndine Yahova.

31 Ayi kumbakumbira wanthu woyankhula na mizimu kuti akuthandizeni ndipo ayi kumbabvunzira malangizo kwa wanthu oneneratu vakutsogolo nkukuchitisani kukhala wopsyipiziwa. Inepano ndine Yahova Mulungu wanu.

32 Wanthu wa invi umbawagwadire, munthu wachikulire umbamupase ulemu ndipo umbagope Mulungu wako. Inepano ndine Yahova.

33 Peno munthu akukhala mudziko yanu ninge mulendo, ayi kumbamuchitira voipa. 34 Mulendo wokhala pakati panu mumbamuwone ninge mbadwa. Mumbamukonde ninge momwe mudzikondera mwekha, ndawa imwepo mwenzembo alendo mudziko ya Iguputo. Inepano ndine Yahova Mulungu wanu.

35 Ayi kumbachita vinthu viribe chilungamo pakupima kutalimpha kwa chinthu, kulemera kwa chinthu panango pakupima kuwanda kwa vinthu. 36 Mumbakhale na makilo chaiyo, minyala chaiyo yopimira kulemera kwa vinthu na mipimo chaiyo.* Inepano ndine Yahova Mulungu wanu, yemwe nidakubulisani mudziko ya Iguputo. 37 Mumbasunge malamulo yangu yose na vigemulo vangu vose, ndipo mumbavitewedze. Inepano ndine Yahova.’”