Ekisodo

31 Yahova adapitiriza kuyankhula na Mose kuti: 2 “Inepano nasankhula* Bezaleli mwana mwamuna wa Uri, mwana wa Hura wa dzinza ya Yuda. 3 Nidzamupase mzimu wa Mulungu kuti akhale wanzeru, wozindikira komasoti wodziwa kukonza vinthu mwaluso pa basa iriyose, 4 kukonza mapulani na momwe angakonzere vinthu mwaluso, kukonza vinthu vagolide, vasiliva na vakobre, 5 waluso yosema minyala na kukonza voikhapo minyala komasoti wodziwa kukonza chirichose chamatabwa. 6 Kuingizira pamwapa inepano naikha Oholiabu mwana mwamuna wa Ahisama wa dzinza ya Dani kuti athandize Bezaleli. Komasoti naikha nzeru muntima mwa wanthu wose omwe analuso,* kuti akonze vose vomwe nakulamula ivi: 7 Chihema chogumanako, likasa ya Umboni, chobwinikirira chomwe chiri padzulu pake na vipangizo vose va muchihema. 8 Kuti akonze pomwe meza na vipangizo vake, choikhapo kandyero chagolide wosefeka bwino na vipangizo vake vose, guwa yantsembe zofukiza, 9 guwa yantsembe zoshoka na vipangizo vake vose, basiya na choikhapo chake, 10 vovala volukiwa bwino, vovala vopatulika va Aroni wantsembe, vovala va wana wake vakuti ambavale pakutumikira ninge antsembe, 11 mafuta yodzodzera na vofukiza vonunkhira va pamalo yopatulika. Iwo adzakonze vose vomwe nakulamula.”

12 Yahova adauza pomwe Mose kuti: 13 “Uuze Aizirayeli kuti: ‘Muwonesese kuti mukusunga ntsiku zangu za satade. Chimwichi ni chizindikiro pakati pa inepano na imwepo m’mibadwo yanu yose, kuti mudziwe kuti inepano Yahova nakusankhulani kuti mukhale opatulika. 14 Mumbasunge Satade ndawa ni yopatulika kwa imwepo. Aliyese yemwe asungalini lamulo ya satade ambaphewe. Aliyese yemwe waphata basa pantsiku mweyi afunika kuphewa kuti osati akhale pomwe pakati pa wanthu wa khaindi yake. 15 Mumbaphate basa ntsiku 6, koma ntsiku yachi 7 ikhale satade yopumula pa basa zanu zose. Imweyi ni ntsiku yopatulika kwa Yahova. Aliyese wophata basa pantsiku ya Satade afunika kuphewa. 16 Aizirayeli ambasunge Satade ndipo ambachite vimwevi m’mibadwo yawo yose. Mweyi ni pangano mpakana kalekale. 17 Chimwichi ni chizindikiro pakati pa inepano na Aizirayeli mpakana kalekale, ndawa kwa ntsiku 6, Yahova adakonza kudzulu na dziko yapasi, koma pa ntsiku yachi 7 adapumula pa basa yake ndipo adakondwa.’”

18 Manje padamaliza kuyankhula naye paphiri ya Sinai, adapasa Mose minyala yosema ya Umboni, minyala yonembewa na chala* cha Mulungu.