Ekisodo
3 Mose adakhala nyakabusa wa vipfuwo va Yatero apongozi wake, wantsembe wa ku Midiyani. Pomwe angabusa vipfuwo mwivo cha kumaulo kwa chipululu, adafika ku phiri ya Mulungu chaiye, ku Horebe. 2 Patsogolo pake mngelo wa Yahova adaonekera kwa iye pakati pa chitsamba chaminga chomwe chimbagaka moto. Padachinyang’anisisa adaona kuti chitsamba chaminga mwicho chikugaka, koma chimbanyekalini. 3 Pamwapo Mose adati: “Lekani niyende nikawonesese vodabwisa vimwevi. Nikaone kuti ndawa chani chitsamba mwichi chikugaka koma chikunyekalini.” 4 Yahova padaona kuti Mose wayenda kuti akawonesese, Mulungu adamuchemera kuchokera pachitsamba mwicho kuti: “Mose! Mose!” Ndipo iye adadawira kuti: “Ine mbuya wangu.” 5 Pamwapo Mulungu adati: Ayi kufendera kuno. Vula ntsapato zako ndawa malo yawaimirira mwayo ni malo yachena.”
6 Iye adanena pomwe kuti: “Ndine Mulungu wa azibereki wako, Mulungu wa Abulahamu, Mulungu wa Isaki na Mulungu wa Yakobo.” Padateno, Mose adafunikiza nkhope yake ndawa ambachita mantha kunyang’ana Mulungu chaiye. 7 Yahova adaingizira kunena kuti: “Nawona momwe wanthu wangu omwe ali ku Iguputo akubonerera, ndipo nabva kulira kwawo ndawa ya momwe akuwaphatisira basa mwankhanza. Nikumudziwa bwino ululu omwe akubva. 8 Ndipomwapa niyende kuti nikawapulumuse m’manja mwa Aiguputo na kuwachosa mudziko mwiyo nkuwangenesa mudziko yabwino komasoti ikulu, dziko yoyerera nkaka na uchi. Niwangenese mudziko ya Akanani, Ahiti, Aamori, Aperezi, Ahivi na Ayebusi. 9 Ona, nabva kulira kwa Aizirayeli komasoti nawona nkhanza zomwe Aiguputo akuwachitira pa kuwaboneresa. 10 Manje bvera, nikukutuma kuti uyende kwa Farao kuti ukabulise wanthu wangu Aizirayeli ku Iguputo.”
11 Koma Mose adadawira Mulungu chaiye kuti: “Ndinembo mbani ine kuti niyende kwa Farao nkubulisa Aizirayeli ku Iguputo?” 12 Pamwapo Mulungu adati: “Nidzakhale nawe, ndipo chizindikiro chowonesa kuti inepano ndine yemwe nakutuma ni ichi: Patsogolo pakubulisa wanthu wangu ku Iguputo, wanthu imwe mudzatumikire Mulungu chaiye pa phiri ino.”
13 Koma Mose adabvunza Mulungu chaiye kuti: “Nichiti nayenda kwa Aizirayeli nkuwauza kuti: ‘Mulungu wa azibereki wanu wanituma kwa imwepo,’ iwo nkunibvunza kuti: ‘Dzina yake ni mbani?’ Nikawadawire kuti tani?” 14 Mulungu adadawira Mose kuti: “Nidzakhale Yemwe Ninkufuna Kukhala.” Ndipo adaingizira pomwe kuti: “Aizirayeli ukawauze kuti: ‘Nidzakhale Yemwe Nikufuna Kukhala ndiye wanituma kwa imwepo.’” 15 Patsogolo pake Mulungu adauza Mose kuti:
“Aizirayeli ukawauze kuti: ‘Yahova Mulungu wa azibereki wanu, Mulungu wa Abulahamu, Mulungu wa Isaki na Mulungu wa Yakobo, wanituma kwa imwepo.’ Dzina yangu ni mwiyi mpakana kalekale, ndipo mibadwo yose yambadzanikumbukire na dzina mweyi. 16 Manje yenda ukasonkhanise akulu wa Izirayeli nkuwauza kuti: ‘Yahova Mulungu wa azibereki wanu, Mulungu wa Abulahamu, Isaki na Yakobo, waonekera kwa inepano nkuniuza kuti: “Shuwadi, naona vomwe ankukuchitirani komasoti naona vomwe ankukuchitirani ku Iguputo. 17 Ndipomwapa nikupolomisa kuti: Nidzakupulumuseni m’manja mwa Aiguputo omwe ankukudzudzani nkukungenesani mu dziko ya Akanani, Ahiti, Aamori, Aperezi, Ahivi na Ayebusi, dziko yoyerera nkaka na uchi.”’
18 Shuwadi iwo adzabvere mawu yako ndipo iwepo na akulu wa Izirayeli mudzayende kwa mpfumu ya Iguputo nkuiuza kuti: ‘Yahova Mulungu wa Aheberi wayankhula nase. Manje pulizi mutibvumize kuti tiyende ulendo wa ntsiku zitatu kuti tiyende kuchipululu, kuti tikapereke ntsembe kwa Yahova Mulungu wathu.’ 19 Koma inepano nikudziwa bwino kuti mpfumu ya Iguputo ikakubvumizenilini kuyenda, mpakana djanja yangu yamphanvu ikaichichimize kuchita vimwivi. 20 Manje nidzapfuthule djanja yangu nkulanga Aiguputo na basa zangu zose zodabwisa zomwe nidzachite mudziko mwiyo. Ndipo nikadzachita vimwevi, adzakubvumizeni kuchoka. 21 Patsogolo pake nidzachitise kuti Aiguputo akomere ntima wanthu wangu, mwakuti mudzachokelini mulibe kanthu.* 22 Nkazi aliyese adzakumbire vinthu va siliva, va golide na vovala kwa munthu yemwe akhala naye pafupi na kwa nkazi yemwe akukhala nyumba mwake. Vinthu vimwevi mudzavazike wana wanu amuna na akazi, ndipo mudzatenge vinthu vizinji va Aiguputo.”