Ezara

1 Mugole yoyamba ya Koresi mpfumu ya Perisiya, pakukwanirisa mawu ya Yahova yomwe adayankhula kupitira mwa Yeremiya, Yahova adalimbikisa Koresi mpfumu ya Perisiya kuti alengeze mu ufumu wake wose, vomwe iye adanemba m’makalata, kuti:

2 “Koresi mpfumu ya Perisiya wanena kuti: ‘Yahova Mulungu wakudzulu wanipasa maufumu yose ya padziko yapasi. Iye wanituma kuti nimumangire nyumba ku Yerusalemu mudziko ya Yuda. 3 Aliyese yemwe ali pakati panu, pa wanthu wose omwe amutumikira, Mulungu wake akhale naye ndipo ayende ku Yerusalemu mudziko ya Yuda kukamanga pomwe nyumba ya Yahova Mulungu wa Izirayeli. Iye ni Mulungu chaiye ndipo nyumba yake yenze ku Yerusalemu.* 4 Aliyese yemwe akukhala ninge mulendo kulikose, wanthu omwe akhala naye pafupi amuthandize pakumupasa siliva, golide, katundu, vipfuwo, pabodzi na ntsembe yaufulu ya nyumba ya Mulungu chaiye, yomwe yenze ku Yerusalemu.’”

5 Manje atsogoleri wa mabanja ya dzinza ya Yuda, ya Benjamim, antsembe, Alevi na aliyese yemwe Mulungu chaiye adalimbikisa ntima wake, adakonzeka kuti ayende kukamanga pomwe nyumba ya Yahova, yomwe yenze ku Yerusalemu. 6 Wanthu wose omwe ambakhala nawo pafupi adawathandiza* pa kuwapasa vombo va siliva, va golide, vipfuwo na vinthu vinango vodula komasoti katundu wosiyanasiyana, kuingizira pa vose vomwe vidaperekewa mwaufulu.

7 Mpfumu Koresi idabweresa pomwe vombo va m’nyumba ya Yahova. Vombo vimwivo ni vomwe Nebukadinezara adavitenga ku Yerusalemu nkukaviikha mu kachisi wa mulungu wake. 8 Koresi mpfumu ya Perisiya adatuma nsungachuma Mitiredati kuti abwerese vombo vimwevo nkuviwerenga. Padateno adavipereka kwa Sezibazara* mtsogoleri wa Ayuda.

9 Vombo vimwevo venze vizinji tene: Vombo 30 va golide vowoneka ninge masesto, vombo 1000 va siliva vowoneka ninge masesto na vombo 29 voyingizira. 10 Penze pomwe mbale 30 zing’onozing’ono zonoka za golide, mbale 410 zing’onozing’ono zonoka za siliva zophatisira basa zinango na vombo vinango 1000. 11 Vombo vose va golide na va siliva venzepo 5400. Sezibazara adatenga vinthu vose vimwevi pomwe wanthu omwe enze adaphatiwa nkuyendesewa ku ukapolo ambachoka ku Babulo nkuyenda ku Yerusalemu.