Ezara

10 Pomwe Ezara angapemphera komasoti kudawikiza machimo, vomwe ambachita ankulira komasoti ali gone patsogolo pa nyumba ya Mulungu chaiye, gulu ikulu ya Aizirayeli idamuzungulira. Penze amuna, akazi na wana ndipo ambalira maninge. 2 Patsogolo pake Sekaniya mwana wa Yehiela yemwe wenze mwana wa Elamu adauza Ezara kuti: “Isepano tachita vophonyeka kwa Mulungu wathu ndawa tidalowola akazi wachilendo kuchokera kwa wanthu wa makhaindi yanango. Olo viri teno, Aizirayeli ali nacho chidikhiro. 3 Manje naboni tichite pangano na Mulungu wathu, kuti tisiye akazi wose mwawa komasoti wana wawo mobverana na lamulo ya Yahova na wanthu omwe alemekeza* lamulo ya Mulungu. Naboni tichite vinthu mobverana na Chilamulo. 4 Manje muka, ndawa nkhani mweyi iri m’manja mwako ndipo isepano tiri nawe. Uchite vinthu mwamphanvu.”

5 Pamwapo Ezara adanyamuka nkuuza atsogoleri wa antsembe, wa Alevi na wa Aizirayeli wose kuti alumbire na kuchita mobverana na vomwe adanena ndipo adalumbiradi. 6 Patsogolo pake Ezara adachoka panyumba ya Mulungu chaiye nkuyenda ku chipinda chodyera cha Yehohanani mwana wa Eliyasibu. Olo kuti adayenda kumuko, alibe kudya chakudya panango kumwa madzi, pakuti ambalira ndawa ya kuleka kukhulupirika kwa wanthu omwe adachoka ku ukapolo wale.

7 Manje adalengeza ku Yuda na ku Yerusalemu kose kuti wanthu wose omwe adachokera ku ukapolo wale asonkhane ku Yerusalemu, 8 ndipo mobverana na lamulo ya atsogoleri na akulu, aliyese yemwe abwerelini pakapita ntsiku zitatu, katundu wake wose atengewe ndipo iye achosewe pagulu ya wanthu omwe adachokera ku ukapolo. 9 Zikanati kumala ntsiku zitatu, amuna wose wa dzinza ya Yuda na ya Benjamim adasonkhana ku Yerusalemu. Vimwevi vidachitika pa ntsiku ya 20 ya mwezi wa 9. Wanthu wose mwawo adakhala panyumba ya Mulungu chaiye, ankunjenjemera ndawa ya nkhani mwiyo komasoti ndawa kumbagwa nvula izinji.

10 Patsogolo pake wantsembe Ezara adaimirira nkuuza wanthu mwawo kuti: “Imwepo mwachita vosakhulupirika ndawa mwatenga akazi wachilendo ndipo mwaingizira machimo ya Izirayeli. 11 Ndipomwapa dawikizani machimo yanu kwa Yahova Mulungu wa azibereki wanu ndipo chitani vomukondweresa. Musiye kubverana na wanthu wa makhaindi yanango komasoti akazi wachilendo mwawa.” 12 Gulu yose mwiyo idadawira kuti: “Tichite ndendende mobverana na vomwe mwanena. 13 Koma tilipo wanthu azinji ndipo ino ni nthawe ya nvula, ndipomwapa ni vosakwanisika kuima panja. Komasoti nkhani mweyi itengelini ntsiku ibodzi panango ziwiri ndawa tachimwa maninge. 14 Ndipomwapa bvumani kuti atsogoleri wathu aimire wanthu wose ndipo aliyese m’mathaundi yathu, yemwe walowola nkazi wachilendo abwere panthawe yomwe ikhazikisiwe. Abwere pabodzi na akulu wa thaundi iliyose na oweruza wake, mpakana tibweze ukali wa Mulungu wathu yemwe ni wokalipa maninge ndawa ya nkhani mweyi.”

15 Koma Yonatani mwana wa Asaheli na Yahazeya mwana wa Tikiva alibe kubverana navo vimwevi, ndipo Mesulamu na Sabetai, omwe enze Alevi, enzembo kumbali yawo. 16 Wanthu omwe adachokera ku ukapolo mwawo adachita vomwe adabverana. Pamwapo wantsembe Ezara na amuna wose omwe enze atsogoleri wa nyumba za azibereki wawo, omwe adachita kuwatomola madzina yawo, adachoka pakati pa wanthu mwawo nkukakhala pasi kuti afagefage nkhani mweyo. Adachita vimwevi pantsiku yoyamba ya mwezi wa 10. 17 Pakufika ntsiku yoyamba ya mwezi woyamba, adamalisa nkhani zose za amuna omwe adatenga akazi wachilendo. 18 Iwo adagumana kuti wana anango wa antsembe adalowola akazi wachilendo. Kuchokera pa wana wa Yesuwa mwana wa Yehozadaki na abale wake, penze Maaseya, Eliezere, Yaribu na Gedaliya. 19 Iwo adapolomisa* kuti asiye akazi wawo komasoti ndawa yakuti adachimwa, apereke nkhosa imuna ndawa ya chimo yawo.

20 Pa wana wa Imeri penze Haneni na Zebadiya. 21 Pa wana wa Harimu penze Maaseya, Eliya, Semaya, Yehiela na Uziya. 22 Pa wana wa Pasuri penze Elioenai, Maaseya Isimaeli, Netaneli, Yozabadi na Eleasa. 23 Pa Alevi penze Yozabadi, Simeyi, Kelaya (panango kuti Kelita), Petahiya, Yuda na Eliezere. 24 Pa oimba penze Eliyasibu. Pa magwarda ya mpanda penze Salumu, Telemu na Uri.

25 Kuchokera pa Aizirayeli, pa wana wa Parosi penze Ramiya, Iziya, Malikiya, Miyamini, Eliezara, Malikiya na Benaya. 26 Pa wana wa Elamu penze Mataniya, Zekariya, Yehiela, Abidi, Yeremoti na Eliya. 27 Pa wana wa Zatu penze Elioenai, Eliyasibu, Mataniya, Yeremoti, Zabadi na Aziza. 28 Pa wana wa Bebai penze Yehohanani, Hananiya, Zabai na Atilai. 29 Pa wana wa Bani penze Mesulamu, Maluki, Adaya, Yasubi, Seali na Yeremoti. 30 Pa wana wa Pahati-mowabu penze Adena, Kelai, Benaya, Maaseya, Mataniya, Bezaleli, Binui na Manase. 31 Pa wana wa Harimu penze Eliezere, Isihiya, Malikiya, Semaya, Simeoni, 32 Benjamim, Maluki na Samariya. 33 Pa wana wa Hasumu penze Matenai, Mateta, Zabadi, Elifeleti, Yeremai, Manase na Simeyi. 34 Pa wana wa Bani penze Maadai, Amuramu, Ueli, 35 Benaya, Bedeya, Kelui, 36 Vaniya, Meremoti, Eliyasibu, 37 Mataniya, Matenai na Yaasu. 38 Pa wana wa Binui penze Simeyi, 39 Selemiya, Natani, Adaya, 40 Makinadebai, Sasai, Sarayi, 41 Azareli, Selemiya, Semariya, 42 Salumu, Amariya na Yosefe. 43 Pa wana wa Nebo penze Yeyeli, Matitiya, Zabadi, Zebina, Yadai, Yoweli na Benaya. 44 Wose mwawa enze adatenga akazi wachilendo ndipo akazi mwawo na wana wawo adawatumiza kwawo.