Genezesi
12 Yahova adauza Abulamu kuti: “Fuluka mudziko yako na kuchoka pakati pa azibale wako ndipo usiye nyumba ya ababa wako. Uyende kudziko yomwe nidzakuonese. 2 Nidzakuchitise kuti ukhale ntundu ukulu. Nidzakudalise ndipo nidzachitise kuti dzina yako ibvekere. Ndipo wanthu anango adzadalisiwe ndawa ya iwepo. 3 Omwe adzakudalise inembo nidzawadalise, ndipo yemwe adzakutemberere inembo nidzamutemberere. Mabanja yose ya padziko yapasi yadzadalisiwe* kupitira mwa iwepo.”
4 Pamwapo Abulamu adanyamuka ninge momwe Yahova adamuuzira, ndipo Loti adanyamuka naye pabodzi. Pambachoka ku Harana, Abulamu wenze na magole 75. 5 Abulamu adatenga nkazi wake Sarai, Loti mwana wa m’bale wake na chuma chawo chose komasoti akapolo wose omwe adawagumana kudziko ya Harana. Iwo adanyamuka ulendo woyenda kudziko ya Kanani. Padafika ku Kanani, 6 Abulamu adapita na mudziko mwiyo mpakana kukafika ku Sekemu, pafupi na miti yakuluyakulu ya ku More. Panthawe mwiyo Akanani ambakhala mudziko mumo. 7 Patsogolo pake Yahova adaonekera kwa Abulamu nkumuuza kuti: “Nidzapereke dziko mwiyi kwa mbadwa* zako.” Pamwapo Abulamu adamanga guwa ya ntsembe pamalo yomwe Yahova adaonekera kwa iye. 8 Paidapita nthawe, adafuluka pamalo mwapo nkuyenda kudera ya mapiri, kumachibese kwa Beteli. Kumuko iye adakhoma tenti yake. Beteli wenze kumaulo kwake ndipo Ai wenze kumachibese kwake. Pamwapo adamangira Yahova guwa ya ntsembe nkuyamba kuchemera padzina ya Yahova. 9 Patsogolo pake Abulamu adafulusa tenti yake kumuko. Kundoyambira nthawe mwiyi, iye ambandokhalira kukhoma na kufulusa nsasa, nkuyendera cha ku Negebu.
10 Manje mudziko mwiyo mwenze njala, ndipo Abulamu adanyamuka kuyenda ku Iguputo ndipo adakhala kumuko kwa kanthawe,* ndawa njala mwiyo yenze idafika poipa maninge mudziko mwiyo. 11 Padasala pang’ono kungena mudziko ya Iguputo adauza nkazi wake Sarai kuti: “Ninkudziwa kuti ndiwe nkazi wokhuza. 12 Ninashuwa kuti Aiguputo akandokuwona, anene kuti: ‘Moyu ni nkazi wake.’ Ndipo aniphe koma iwepo akusiye na moyo. 13 Manje pulizi, unene kuti ndiwe mulongosi wangu kuti vinifambire bwino. Ukachita teno unipulumuse.”
14 Abulamu padandongena mu Iguputo, Aiguputo mwawo adaonadi kuti nkazi muyo wenze wokhuza maninge. 15 Nawombo akuluakulu othandizira Farao kutonga adamuwona ndipo adauza Farao kuti nkazi muyo ni wokhuza. Pamwapo nkazi muyo adatengewa nkuyendesewa kunyumba ya Farao. 16 Farao adamusamalira bwino Abulamu ndawa ya nkazi wake, mwakuti adamupasa nkhosa, ng’ombe, abulu amuna na abulu akazi, azinyabasa wachimuna na wachikazi na ngamila. 17 Pamwapo Yahova adagwesera Farao na wam’banja mwake miliri yopasa mantha ndawa ya Sarai, nkazi wa Abulamu. 18 Manje Farao padaona vimwevi adachemera Abulamu nkumubvunza kuti: “Nchani chawachita? Ndawa chani ulibe kuniuza kuti ni nkazi wako? 19 Ndawa chani wanena kuti: ‘Ni mulongosi wangu,’ mwakuti nenze nakhala pang’ono kumutenga kuti akhale nkazi wangu? Ane nkazi wako uyu. Mutenge umbayende!” 20 Pamwapo Farao adalamula alumbwana wake kuti aperekeze Abulamu na nkazi wake, pabodzi na vose vomwe enze navo.