Samueli woyamba
13 Sauli wenze na magole . . .* pomwe adakhala mpfumu, ndipo adatonga Aizirayeli kwa magole yawiri. 2 Sauli adasankhula amuna 3000 wa mu Izirayeli. Pa amuna mwawa, 2000 enze na Sauli muyo ku Mikimasi na kudera ya mapiri ya Beteli. Pomwe amuna 1000 enze na Yonatani ku Gibeya wa ku Benjamim. Wanthu anango wose wosala mwawo adawauza kuti abwerere ku matenti yawo. 3 Patsogolo pake Yonatani adapha masocha ya Afilisiti yomwe yenze ku Geba ndipo Afilisiti adabva vimwevi. Patsogolo pake Sauli adaliza lupenga ya nyanga ya nkhosa mudziko yose nkunena kuti: “Bveserani Aheberi mose!” 4 Aizirayeli wose adabva nkhani yakuti: “Sauli wapha masocha ya Afilisiti mwakuti manjeuno Afilisiti aipidwa na Aizirayeli.” Pamwapo adasonkhanisa wanthu wose kuti alondole Sauli ku Giligala.
5 Nawombo Afilisiti adasonkhana kuti amenyane na Aizirayeli. Iwo enze na ngolo za nkhondo 30 000, masocha yopakira pa makavalo 6000 na masocha yazinji yofamba pasi na mendo ninge nchenga wa mphepete mwa nyanja. Patsogolo pake adayenda ku Mikimasi nkumanga nsasa kumachibese kwa Beti-aveni. 6 Ndipo amuna wa chi Izirayeli adawona kuti vinthu vashupa ndawa enze adapanikizika maninge. Wanthu adabishala m’phako, m’madindi, m’madwale, mu vipinda vapasi na m’michera yalibe madzi. 7 Aheberi anango mpakana adayambuka Yorodano nkuyenda mu dera ya Gadi na Giliyadi. Koma Sauli wenze adakali ku Giligala ndipo wanthu wose omwe ambamutewera ambanjenjemera. 8 Sauli adapitiriza kudikhira kwa ntsiku 7 mpakana nthawe yomwe adapangana na Samueli. Koma Samueli wenze akalibe kufika ku Giligala ndipo wanthu adayamba kumwazikana nkumusiya Sauli. 9 Patsogolo pake Sauli adati: “Bweresani ntsembe yoshoka na ntsembe za mbverano.” Ndipo iye adapereka ntsembe yoshoka.
10 Koma padandomaliza kupereka ntsembe yoshoka mwiyo, Samueli adafika. Pamwapo Sauli adayenda kukamutambira ndipo adamudalisa. 11 Manje Samueli adati: “Ndicho chani wachita ichi?” Sauli adadawira kuti: “Nawona kuti wanthu akumwazikana nkunisiya nekha, ndipo imwepo mulibe kubwera pa nthawe yomwe tidabverana ire. Naona pomwe kuti Afilisiti akusonkhana ku Mikimasi. 12 Manje naganiza kuti Afilisiti mwawa abwere ku Giligala kuno adzamenyane nane, ndipo nikanati nakumbira thandizo kwa Yahova.’ Ndipomwapa nawona kuti nikufunika kupereka ntsembe yoshoka.”
13 Koma Samueli adauza Sauli kuti: “Vomwe wachita ivi nikupusa. Ulibe kubvera lamulo yomwe Yahova Mulungu wako adakupasa. Sembe wabvera, Yahova adakachitisa kuti wanthu wa m’banja yako atonge Izirayeli mpakana kalekale. 14 Koma manje ufumu wako ukhaliselini. Yahova agumane munthu wa pamoyo pake, ndipo Yahova amuikhe kukhala mtsogoleri wa wanthu wake ndawa iwepo ulibe kubvera vomwe Yahova adakulamula.”
15 Patsogolo pake Samueli adanyamuka nkuyenda ku Giligala nkuyenda ku Gibeya wa ku Benjamim. Manje Sauli adawerenga wanthu nkugumana kuti omwe adasala naye enzepo amuna wothamangira 600. 16 Sauli, mwana wake Yonatani na wanthu omwe adasala nawo wale ambakhala ku Geba wa ku Benjamim. Koma Afilisiti enze adamanga nsasa ku Mikimasi. 17 Magulu yatatu ya masocha yambabwera kuchokera mu nsasa wa Afilisiti nkumbawatengera vombo. Gulu yoyamba imbangenera ku nsewu woyenda ku Ofira, kudera ya Suwali. 18 Gulu yachiwiri imbangenera ku nsewu wa ku Beti-horoni, ndipo gulu yachitatu imbangenera ku nsewu woyenda kumalire yonyang’anana na chigwa cha Zeboyimu, mbali ya ku chipululu.
19 Mudziko yose ya Izirayeli mwenze mulibe wopfula visimbi. Vimwevi venze teno ndawa Afilisiti adati: “Ayi kuti Aheberi ambapfule vibemba panango nkondo.” 20 Pamwapo Aizirayeli wose akafuna kupfula gedjo, phaza, mbadzo, panango djeko, ambayenda kwa Afilisiti kuti akawapfulire. 21 Ndipo malipiro yopfulisira magedjo, maphaza, mafoloko ya manu yatatu, na mbadzo komasoti kukonza nshamu wosongoka* wodjinyira ng’ombe yenze pimu* ibodzi. 22 Ndipo pantsiku ya nkhondo, pa wanthu wose omwe enze na Sauli na Yonatani, penze palibe aliyese yemwe wenze na chibemba panango nkondo. Sauli yekha na mwana wake Yonatani ni omwe enze na vitsulo.
23 Gulu ya masocha ya Afilisiti idachoka ku nsasa nkuyenda kumalo yoyambukira ya ku Mikimasi.