Mika
7 Tsoka kwa inepano, ndawa niri ninge munthu yemwe,
Nthawe yokolola vipaso va nchisalo* payamala,
Komasoti payamala nthawe yochita mashanga m’munda womwe akololamo uva,
Alibe kugumanamo uva wakuti adye.
Komasoti nkhuyu zoyambirira zomwe ankuzifunisisa.
2 Wanthu okhulupirika amala padziko yapasi.
Pakati pa wanthu palibe munthu wachilungamo.
Wose abishalira anzawo kuti awaphe.
Aliyese asodza m’bale wake na kombe.*
3 Manja yawo yachita voipa ndipo yavichita bwino maninge.
Mtsogoleri ayankhula kuti amupase mphaso,
Woweruza auza wanthu kuti amupase bobobo,*
Munthu wobvekera auza wanthu vomwe ankufunisisa,
Ndipo wose mwawa akonzera pabodzi chiwembu.
4 Munthu yemwe iwo anena kuti ni wabwino maninge ali ninge minga,
Ndipo munthu yemwe anena kuti ni wachilungamo maninge, ni woipa kuposha mpanda wa miti ya minga.
Ntsiku yomwe magwarda yawo yadanena komasoti yomwe adzaweruziwe idzafike shuwa.
Pantsiku mweyo iwo adzasowe chochita.
5 Ayi kumbakhulupirira anzanu.
Ayi kumbathemba munzanu wapamoyo.
Mumbasamale na vomwe muuza yemwe mugona naye pafupi.
6 Ndawa mwana mwamuna ankunyoza ababa wake.
Mwana nkazi ankutsutsana na amayi wake,
Ndipo nkazi wolowodwa ankutsutsana na apongozi wake akazi.
Azondi wake wa munthu ni wanthu wa m’banja yake.
7 Koma inepano nidzadikhirire Yahova.
Nidzadikhirire modekha Mulungu wa chipulumuso changu.
Mulungu wangu adzanibvere.
8 Iwepo mzondi* wangu, ayi kukondwa ndawa ya vomwe vanichitikira.
Olo kuti nagwa, nidzamuke.
Olo kuti niri mumdima, Yahova adzakhale kugwerewera kwangu.
9 Nidzapirire ukali wa Yahova,
Ndawa namuchimwira.
Nidzaupirire mpakana adzaweruze mulandu wangu, nkunichitira chilungamo.
Iye adzaniyendese pamalo yogwerewera,
Ndipo nidzaone chilungamo chake.
10 Mzondi wangu adzawone pomwe vimwevi,
Ndipo adzachite manyazi* omwe ambaninena kuti:
“Yahova Mulungu wako ali kuponi?”
Maso yangu yadzamunyang’ane.
Iye adzapondewepondewe ninge matope ya munsewu.
11 Idzakhale ntsiku yomanga mpanda wako wa minyala.
Pantsiku mweyo malire yadzakulisiwe.*
12 Pantsiku mweyo wanthu adzabwere kwa iwepo,
Ochokera ku dziko ya Asuri na kumathaundi ya ku Iguputo.
Ochokera ku Iguputo mpakana ku Kamadzi.*
Komasoti ochokera kunyanja inango mpakana kunyanja inango komasoti kuphiri inango mpakana kuphiri inango pomwe.
13 Dziko mweyi idzakhale matongwe ndawa ya wanthu wokhala momu,
Ndawa ya vomwe achita.*
14 Busa wanthu wako na mpsyimbo yako, gulu ya nkhosa zomwe ni chuma chako cha banja,
Zomwe zidakhala zokhazokha muthengo yokosa maninge* komasoti pakati pa miti ya vipaso.
Uzibvumize kuti zikadyere ku Basana na ku Giliyadi ninge momwe zimbachitira kalekale.
15 Nidzakuwoneseni vinthu vodabwisa,
Ninge momwe nidachitira panthawe yomwe mumbachokera ku Iguputo.
16 Wanthu wa makhaindi yanango adzawone vodabwisa vimwevo ndipo adzachite manyazi olo kuti ni wamphanvu.
Iwo adzaphate pakamwa,
Ndipo matu yawo yadzaleke kubva.
17 Adzanyangute pfumbi ninge nyoka.
Ninge nyama zokwawa, adzabule ankunjenjemera m’malo yawo yobishalamo.
Adzabwere kwa Yahova Mulungu ankuchita mantha,
Ndipo adzayambe kukugopani.”
18 Ko pali Mulungu munango pomwe wolingana na imwepo,
Yemwe akhululukira vophonya na machimo ya wanthu wake wosala omwe ni chuma chake?
Imwepo mudzapitirizelini kukhala wokalipa mpakana kalekale,
Ndawa mukonda chikondi chokhulupirika.
19 Imwepo mudzatichitire pomwe chifundo ndipo mudzawine* vophonya vathu.
Machimo yathu yose mudzayaponye m’nyanja pamalo yonoka.
20 Yakobo mudzamuwonese kukhulupirika.
Abulahamu mudzamuwonese chikondi chokhulupirika,
Ninge momwe mudalumbirira kwa azibereki wathu, kalekale.