Genezesi
3 Manje nyoka yenze yochenjera maninge kuposha nyama zose za kuthengo zomwe Yahova Mulungu adakonza. Ndipo nyoka mwiyo idabvunza nkazi muyo kuti: “Ni shuwadi kuti Mulungu adanena kuti ayi kudya vipaso vose va m’munda umu?” 2 Nkazi muyo adadawira nyoka mwiyo kuti: “Adatiuza kuti tingadye vipaso va miti ya m’munda umu. 3 Koma vipaso va muti womwe uli pakati pa munda, Mulungu adanena kuti: ‘Ayi kudya vipaso vake, ndipo ayi kuyesa kuugumirira, ndawa mukateno mudzafe.’” 4 Pamwapo nyoka mwiyo idauza nkazi muyo kuti: “Nkunama kwake, mudzafelini neye. 5 Olo iye Mulungu ankudziwa kuti ntsiku yomwe mudzadye chipaso cha muti muyu, shuwa, maso yanu yadzafunguke ndipo mudzalingane na Mulungu. Mudzadziwe vabwino na voipa.”
6 Nkazi muyo padabva vimwevo, adayamba kuwona kuti vipaso va muti muyo vingakome kudya, adayamba kuvikhumbira na kuwona kuti ni vowoneka bwino. Pamwapo adathyola chipaso cha muti muyo nkudya. Patsogolo pake adatenga vinango nkukapasa mwamuna wake panthawe yomwe enze pabodzi, ndipo nayembo adadya. 7 Padachita teno, wose maso yawo yadafunguka ndipo adazindikira kuti ali pezi. Pamwapo adasona masamba ya nkuyu nkuyamangirira nchiuno mwawo.
8 Patsogolo pake, iwo adabva mawu ya Yahova Mulungu pomwe iye ambafambafamba m’munda mumo panthawe yomwe kamphepo kozizirira kambakuntha. Mwamuna na nkazi muyo padabva, adabishala pakati pa miti ya m’munda mumo kuti Yahova Mulungu osati awawone. 9 Koma Yahova Mulungu adapitiriza kuchemera mwamuna muyo kuti: “Ko uli kuponi? 10 Patsogolo pake mwamuna muyo adadawira kuti: “Nabva kuchemera kwanu m’munda muno, koma nachita mantha pakuwona kuti niri pezi. Ndipomwapa nenze nabishala.” 11 Manje Mulungu adati: “Nimbani wakuuza kuti uli pezi? Ko wadya chipaso cha muti ule womwe nidakulamula kuti ayi kudya?” 12 Mwamuna muyo adadawira kuti: “Nkazi yemwe mudanipasa uyu ndiye wanipasa chipaso cha muti muyu, ndipo inepano nadya.” 13 Pamwapo Yahova Mulungu adabvunza nkazi muyo kuti: “Nchani chawachita?” Nkazi muyo adadawira kuti: “Nyoka ndiyo yanipumpsa, ndipo inepano nadya.”
14 Pavidateno Yahova Mulungu adauza nyoka mwiyo kuti: “Ndawa ya vomwe wachita ivi, ukhale wotembererewa pa nyama zose zoweta na zakuthengo. Udzakwawe na mimba yako ndipo umbadzadye pfumbi ntsiku zose za moyo wako. 15 Nidzaikhe chizondo pakati pa iwepo na nkazi muyo, na pakati pa mbadwa* yako na mbadwa yake. Mbadwa ya nkazi muyo idzaphwanye nsolo wako, ndipo iwepo udzaidzonge katendeni.”
16 Patsogolo pake Mulungu adauza nkazi muyo kuti: “Nidzaingizire maninge kushupika kwako panthawe yomwe unamimba. Ndipo pobereka wana umbadzabve kuwawa. Umbadzafunisise kukhala na mwamuna wako, ndipo iye ambadzakutonge.”
17 Patsogolo pake Mulungu adauza Adamu* kuti: “Pakuti wabvera mawu ya nkazi wako, ndipo wadya chipaso cha muti womwe nidakulamula kuti: ‘Ayi kudzadya vipaso vake,’ dothi ikhale yotembererewa ndawa ya vomwe wachita ivi. Umbadzashupike kulima dothi mwiyo ntsiku zose za moyo wako kuti ugumane chakudya. 18 Minga na vitsamba volasa vidzamere pasi, ndipo chakudya chako chidzakhale vomera pasi. 19 Umbadzachite kuchoka kaluma kuti ugumane chakudya, mpakana udzabwerere ku dothi, ndawa ndiko komwe udatengewa. Pakuti ndiwe pfumbi, udzabwerere kupfumbi muko.”
20 Patsogolo pa vimwevi, Adamu adapasa nkazi wake dzina yakuti Hava,* ndawa wenze wakuti adzakhale mayi wa wanthu wose. 21 Patsogolo pake Yahova Mulungu adakonzera Adamu na nkazi wake vovala vitalivitali vachikumba, nkuwavazika. 22 Pamwapo Yahova Mulungu adati: “Manje munthu wakhala ninge isepano ndawa wadziwa vabwino na voipa. Ndipomwapa kuti aleke kuthyola pomwe na kudya chipaso cha muti wa moyo, nkukhala na moyo mpakana kalekale,—”* 23 Padateno Yahova Mulungu adabulisa munthu muyo m’munda wa Edeni, kuti akalime dothi yomwe adaphatisa basa pakumukonza. 24 Pamwapo adathamangisa munthu muyo m’munda mumo, nkuikha akerubi kumachibese kwa munda wa Edeni muyo. Adaikha pomwe chibemba chogaka moto, chomwe chimbazungulira nthawe zose, kutchingiriza njira yoyenda ku muti wa moyo.