Outubro

Ko imwepo nthawe zinango muganiza kuti ni voshupa kukhala wobvera? Mpfumu Davide ambaganizambo tene, ndawa ya vimwevi iye adapemphera kwa Mulungu kuti: ‘Bwezeresani mwa inepano mzimu wobvera.’ (Sal. 51:12) Davide ambakonda Yahova, olo venze tene, nthawe zinango venze voshupa kuti akhale wobvera. Ndivo vichitikirambo isepano. Ndawa chani? Choyamba, ndawa yakuti ndise wochimwa komasoti tidabadwa na ntima wosabvera. Chachiwiri, Satana ankuyesesa kuti timbachite vinthu votsutsana na Yahova ninge momwe iye aliri. (2 Akor. 11:3) Chachitatu, ndawa yakuti tirizunguliriwe na mzimu wosabvera wa dziko iyi, ‘mzimu womwe unkuphata basa kwa wana wosabvera.’ (Aef. 2:2) Isepano tichadekana kuchita khama kuti timbalimbane na maganizo yathu ya uchimo komasoti kuti tilimbane na mabvuto yomwe Satana na dziko iyi ankubweresa kuti tileke kukhala wobvera. Tingachite vimwevi mwa kubvera Yahova na wanthu womwe iye adawapasa udindo. w23.10 tsa. 6 ndi. 1

Ko tingapfunzire chani pa chodabwisa cha Yesu chosandusa madzi kukhala vinyu? Tinkupfunzira nkhani ya kudzichepesa. Yesu alibe kudzitama na chodabwisa chomwe adachita, kunena shuwa iye ambadzitamalini ne pang’ono na vomwe angachita. Mosiyana na vimwevo, Yesu wenze wodzichepesa ndipo nthawe zose ambapereka ulemerero kwa Ababa wake. (Yoh. 5:19, 30; 8:28) Tikatewedzera chitsanzo cha Yesu nkukhala na maganizo yodzichepesa, tidzazindikire kuti palibe chomwe tingakwanise kuchita pa ise tekha. (Yer. 9:23, 24) Iye ndiye wodekana ulemerero. Mukuganiza kuti tingakwanise kuchita chani palibe thandizo ya Yahov? (1 Akor. 1:26-31) Tikakhala wodzichepesa tidzafunelini kutembejewa ndawa ya vomwe tachitira anango. Kwa isepano tidzaone kuti nivokwanira kudziwa kuti Yahova awona vose vomwe tachita ndipo avilemekeza. (Linganizani na Mateyu 6:2-4; Aheb. 13:16) Nishuwadi isepano tikondweresa maninge Yahova tikambatewedzera chitsanzo cha kudzichepesa kwa Yesu.—1 Pet. 5:6. w23.04 tsa. 4 ndi. 9; tsa. 5 ndi. 11-12

Mtumi Paulo adalimbikisa Akhrisitu kuti ambaikhe vofuna va anango pa malo yoyamba. Ko tingaiphatisire tani basa mpfundo mweyi pa nthawi ya misonkhano? Timbakumbukire kuti anango afunambo kuperekera ndemanga ninge momwe isepano tinkufunira. Mukakhala kuti imwepo munkucheza na azishamwali, ko imwepo muchandokhala muchiyankhula nthawe zose osawasiya kuti ayankhulembo? Mwachidziwikire neye, imwepo mufuna kuti iwo ambayankhulembo. Nchibodzibodzimbo ku misonkhano isepano tifuna kuti abale azinji ambadawilembo. Ndipo kunena shuwa, ibodzi mwanjira yomwe tingalimbikisire abale wanthu, ni kuwapasambo mwayi kuti iwo afotokoze chikhulipiriro chomwe anacho. (1 Akor. 10:24) Njira yoyambirira yomwe tingachite ni, kupereka ndemanga zachigwato, tikachita teno anangombo angakhale na mwayi wopereka ndemanga. Podiya kuti mukufuna kupereka ndemanga zachigwato yesesani kuti osati mudawire vose vomwe viri mundime. Imwepo mukakhala kuti mwadawira mpfundo zose zomwe zili mu ndime vichitisa kuti vikhale vidikidiki vomwe wathu anango adawire. w23.04 tsa. 22-23 ndi. 11-13

Vinthu vikachinja pa moyo wathu tichadekana kuganizira maninge kuthandiza anango makamaka abale na alongo wathu mu mpingu. Mu umboni tichadekana pomwe kukhala ololera. Tikambalalikira tigumana na wanthu omwe tichasiyana nawo chikhalidwe vomwe tichakhulupirira komasoti khaindi. Mtumi Paulo ambakwanisa kuchinja ndipo isepanombo tingapfunzire vizinji pa chitsanzo chake. Yesu adamuikha Paulo kuti akhale ‘mtumi wa makhaindi yose.’ (Aro. 11:13) Paulo adalalikira kwa Ayuda kwa Agiriki, Kwa wanthu osapfunza, kwa wanthu wamaudindo na mafumu. Kuti awafike pa ntima wanthu, Paulo adakhala ‘chilichose kwa wanthu wose.’ (1 Akor. 9:19-22) Iye ambaganizira komwe wanthu wachokera na vomwe achakhulupirira. Ndawa ya vimwevi iye ambachinjachinja njira zomwe ambalalikilira. Isepanombo tingaingizire buya yathu mu umboni tikambaganizira va mabvuto yomwe wanthu ankugumana nayo nkuchinja ulaliki wathu kuti ubverane na vinthu vomwe ankugumana navo. w23.07 tsa. 23 ndi. 11-12

Kukhala ofatsa kutanthauzalini kuti imwepo ndimwe ofoka, imweyi ni khalidwe ya wanthu olimba. Tichadekana mphanvu kuti tipitirize kukhala odekha pomwe tinkulimbana na mabvuto. Kufatsa ni ‘khalidwe yomwe mzimu uchena uchaonesa.’ (Agal. 5:22, 23) Mu Chigiriki mawu yakuti ‘kufatsa’ yambaphatisiwa basa pakulewa va kavalo wa m’thengo womwe ambachitalini kusungiwa. Patsogolo pakuti wasungiwa kavalo moyu ambakhala wodekha. Koma iye apitiriza kukhala wolimba. Manje tani kwa isepano, ko tingakhaletani ofatsa nthawe ibodzibodzi mweiyo nkukhala pomwe olimba? Isepano tingakwaniselini kuchita vimwevi patekha. Tichadekana kupemphera, kukumbira mzimu uchena wa Mulungu kuti utithandize kukhala na khalidwe yabwino mweyi. Panavitsanzo vizinji vomwe vinkuonesa kuti tingakwanise kukhala ofatsa. Abale na alongo azinji adapitiriza kukhala odekha podiya kuti ambakalipisiwa ndipo adasiya chitsanzo chabwino maninge kwa wale omwe ambaona vimwevi vinkuchitika.—2 Tim. 2:24, 25. w23.09 tsa. 15 ndi. 3

Tamandani Yahova. Mtumi Yohane mu masomphenya yake yopasa chidwi, adawona akulu 24 kudzulu akutumikira Yahova. Iwo ambamutamanda Mulungu nkumbalewa kuti: ‘Niwodekana kutambira ulemerero wose ulemu na mphanvu.’ (Chiv. 4:10, 11) Angelo okhulupirika iwombo anavifukwa vizinji votamandira na kupereka ulemu kwa Yahova. Iwo ali kudzulu pabodzi na Yahova ndipo amudziwa bwino maninge. Angelo mwawa abvesa bwino makhalidwe ya Yahova pa vose vomwe Iye achachita. Iwo akambawona vose vomwe Iye achachita, viwachitisa kuti amulemekeze. (Yobu 38:4-7) Isepanombo titamanda Yahova mumapemphero yathu pakufotokaza vomwe vitichitisa chidwi na kupereka ulemu. Imwepo mukambawerenga na kupfunzira baibolo, yesesani kuwona makhalidwe ya Yahova yomwe imwepo muyakonda maninge. (Yobu 37:23; Aro. 11:33) Patsogolo pake mufotokozereni Yahova ndawa yake imwepo muyakonda maninge makhalidwe mwaya. Njira inango yotamandira Yahova, ni kutembeja vomwe iye watichitira na vomwe wachitira abale wathu.—1 Sam. 2:1, 2. w23.05 tsa. 3-4 ndi. 6-7

Mu gole ya 1919, Babulo Nkulu, adaluza mphanvu yawenzenayo pa wanthu wa Mulungu. Mu gole mweyi, adaikhiwa ‘kapolo wokhulupirika na wanzeru’ kuti ambathandize wanthu kuyamba kufamba ‘mu Nsewu Wochena.’ (Mat. 24:45-47; Yes. 35:8) Ndawa ya basa yose yomwe idachitika ‘yokonza nsewu’ wochena wale omwe angafamba mu nsewu moyu angathimizira chidziwiso chawo cholewa va Yahova na volinga vake. (Miy. 4:18) Iwo adakwanisambo kuchinja kuti ambachite vinthu mobverana na mpfundo za Yahova. Yahova alibe kuwachichimiza wanthu wake kuti achinje kabodzi na kabodzi. M’malomwake iye adapfunzisa wanthu wake mwa pang’onopang’ono. Ndipo kutsogolo vidzakhale vokomedza maninge pomwe timbadzakwanise kukondweresa Yahova pa vose vomwe timbadzachite! Nsewu uliwose uchadekana kukonzewa kuti upitirize kukhala wabwino. Kundoyambira mu 1919, ‘Nsewu Wochena’ wakhala unkukonzewa pafupafupi ndipo vimwevi vachitisa kuti azinji abule mu Babulo Nkulu. w23.05 tsa. 17 ndi. 15; tsa. 19 ndi. 16

Aliyese payekha atherenambo wothandizira makomiti ya m’Bungwe Yotonga. Kuyambira manjeuno othandizira mwawa, anamaudindo yazinji ndipo ni okonzeka kuphata basa ya kusamalira nkhosa za Khrisitu. Odzodzewa omalizira akadzayenda kudzulu kumapeto kwa chisautso chikulu, atumiki wa Yahova adzapitirize kumutumikira mokhulupirika. Ndawa yotsogolerewa na Yesu Khrisitu, isepano tidzalekelini kutumikira Yahova. Ni shuwadi kuti nthawe mweyi tidzadzudziwe na Gogui wa Kudziko ya Magogui yemwe ni m’bverano wa mabungwe yose. (Ezek. 38:18-20) Chisautso chimwechi chidzamalelini nthawe ikulu, ndipo adzakwaniriselini vofuna vawo. Adzakwaniselini kukangisa wanthu wa Yahova kumutumikira. Mosakayika Yahova adzatipulumuse. Mtumi Yohane adawona ‘gulu ya wanthu’ wa nkhosa zinango wa Khrisitu. Ndipo Yohane adazindikira kuti gulu ikulu mweyi ndiwo omwe ‘abula mu chisautso chikulu.’ (Chiv. 7:9, 14) Mosakayika Yahova adzatipulumuse! w24.02 tsa. 5-6 ndi. 13-14

Ko nchani chomwe tingachite kuti titambire mzimu uchena? Tingambapemphere kukumbira mzimu umoyu, kupfunzira mawu ya Mulungu komasoti kuchita vinthu mobverana na gulu yake yotsogolerewa na mzimu moyu. Vimwevi vidzatichitise kuti tikulise ‘vipatso va mzimu uchena.’ (Agal. 5:22, 23) Mulungu achasiya kuti mzimu wake uphate basa kwawale omwe anamaganizo yochena namakhalidwe yochena. Iye angatipaselini mzimu wake uchena peno tinamaganizo yoipa panango tinkuchita vinthu voipa. (1 Ates. 4:7, 8) Kuti tipitirize kutambira mzimu uchena ‘tifunikalini kumbanyozera maulosi ya m’Baibolo.’ (1 Ates. 5:20) ‘Maulosi’ mwaya yankutanthauza mawu yokonzewa na mzimu uchena wa Mulungu, komasoti yofotokoza va ntsiku ya Yahova na ntsiku zomwe tinkukhala zino. Ayi kumbakumbuka kuti Armagedo ichitikelini inepano nidakanamoyo. M’malo mwake, mumbakumbukire vantsiku mweyi muli namaganizo yabwino, komasoti munkuchita vowonesa kuti ‘ndimwe odzipereka kwa Mulungu.’—2 Pet. 3:11, 12. w23.06 tsa. 12 ndi. 13-14

Ko nchani chomwe isepano tingachite ninge akhrisitu peno foto panango chilichose cholaula chabwera pa foni yathu? Tifunika kuchichoseratu mwakankulumize. Tingakwanise kuchita vimwevi tikaganizira kuti chinthu chomwe ni chodekana maninge kwa isepano ni ushamwali wathu na Yahova. Kunena shuwa mafoto yanango yangaoneke ninge niyosalaula koma yangakhale yodzonga. Ndawa chani tingadekane kuvipewa? Ndawa tifunalini kuchita chilichose chomwe chingatichitise kuti tichite chigololo mu ntima mwathu. (Mat. 5:28, 29) Nkulu munango wa ku Thailand dzina yake David adati: “Nthawe zinango nidzibvunza kuti: ‘Podiya kuti foto niyosalaula koma ko vimwevi vingakondwerese Yahova nikakhala kuti ninkupitiriza kuvinyang’ana?’ Kukumbuka kwa khaindi mweyi ni kothandiza maninge, vinithandiza kuti nimbachite vinthu mwanzeru.” Tithandiziwa kuti timbachite vinthu mwanzeru na kuyesesa kugopa kukalipisa Yahova. Kugopa Mulungu ‘ndicho chiyambi’ cha ‘nzeru.’ w23.06 tsa. 23 ndi. 12-13

‘Vipinda’ vingatanthauze Nyumba zathu za ufumu. Pa nthawe ya chisauso chikulu isepano tidzatetezewe na Yahova peno tidzakhale wobverana na abale wathu. Ndawa ya vimwevi manjeuno tichadekana kuchita khama osati kundowadziwa chabe abale na alongo wathu koma kuwakonda. Ntsiku ya Yahova idzakhale yoshupa kwa wanthu wose.’ (Zef. 1:14, 15) Wanthu wa Yahova chaiwo adzabonerembo. Koma peno isepano tingayambe manjeuno kukonzekera tidzakhale osagunduzika na kuthandiza anango. Tidzakwanise kupirira mabvuto yaliose yomwe yadzabwere. Abale wathu akambabonera naboni tichite vose vomwe tingakwanise pakuwapasa thandizo yomwe iwo ankudekana pa kuonesa chifundo. Ndipo naboni tipitirize kukhala nawo paushamwali abale na alongo mwawa pakuonesa kuti tiwakonda. Yahova adzatidalise na moyo wosapera mu dziko yomwe mabvuto na matsoka yachilengedwe vidzakhale kulibe.—Yes. 65:17. w23.07 tsa. 7 ndi. 16-17

Baibolo inena kawirikawiri va amuna okhulupirika wakumbuyo kuti enze wamphanvu komasoti olimba. Koma wale omwe enze olimba maninge, ambadzibvalini tene. Mwakulinganiza, pa vochitika vinango Mpfumu Davide ambadzibva ‘wolimba maninge ninge phiri,’ koma nthawe zinango iye ‘ambakhala wamantha.’ (Sal. 30:7) Pa nkhani ya Samisoni iye wenze na mphanvu maninge ndawa ambathandiziwa na mzimu uchena wa Mulungu, olo viri teno, iye ambadziwa kuti kusowa thandizo ya Yahova iye ‘adakaluza mphanvu zake ndipo adakakhalambo ninge munthu aliyese.’ (Ower. 14:5, 6; 16:17) Amuna mwawa enze wamphanvu ndawa yakuti Yahova ambawapasa mphanvu. Mtumi Paulo ambadziwambo kuti iye ambadekana mphanvu za Yahova. (2 Akor 12:9, 10) Iye ambalimbana na mabvuto yazinji ya thanzi. (Agal. 4:13, 14) Ndipo nthawe zinango iye angadekana kuchita khama kuti achite vinthu vabwino. (Aro. 7:18, 19) Nthawe zinango iye ambakhala na mantha na vinthu vomwe vidakamuchitikira. (2 Akor. 1:8, 9) Olo nteno Paulo pomwe wenze wofoka iye ambadzibva wolimba. Viri tene ndawa yakuti Yahova ambamupasa mphanvu zomwe iye angadekana kuti akwanise kulimbana na mabvuto yake. w23.10 tsa. 12 ndi. 1-2

Peno imwepo nthawe zinango mudzibva kuti ndimwe osafunika, kumbukirani kuti ni Yahova chaiye osati munthu munango yemwe adakusalulani kuti mumutumikire. (Yoh. 6:44) Yahova awona vinthu vabwino kwa munthu aliyese. Iye adziwa bwino ntima wathu. Momwe ationera ndimolini momwe isepano tidziwonera. (2 Mbiri 6:30) Manje tingatsimikize kuti Yahova akuwonani kuti ndimwe odekana maninge. (1 Yoh. 3:19, 20) Tikanati tapfunzira chonadi anango wa isepano tenze tidachita vinthu vomwe vitichitisa kuti manjeuno timbadziyimbe mulandu. (1 Pet. 4:3) Ndipo anango omwe akhala ankutumikira Yahova mokhulupirika kwa nthawe ikulu, angambalimbanembo na vofoka vinango. Manje tani imwepo? Nthawe zinango mungambaganize kuti Yahova alibe kukhululuka. Peno nteno, ni vabwino kukumbukira kuti olo atumiki wa Yahova wakalekale ambalimbanambo na maganizo yoipa mwaya. Mwakulinganiza, mtumi Paulo akambaganizira va vophonya vake ambadzibva wosafunika. (Aro. 7:24) Ni shuwadi kuti Paulo adalapa machimo yake ndipo adabatiziwa, olo nteno iye ambadziona kuti ‘ni wosafunika pakulinganiza na atumi ose’ ndipo ambadziona kuti ni wochimwa ‘maninge.’—1 Akor. 15:9; 1 Tim. 1:15. w24.03 tsa. 27 ndi. 5-6

Chinthu chibodzi chomwe tingapfunzire pa voipa vomwe Mpfumu Yehoasi adachita, ni kusalula azishamwali womwe angatithandize kuchita vinthu vabwino. Azishamwali omwe akonda Yahova na kumukondweresa. Azishamwali wathu angakhale wamisinkhu yosiyanasiyana. Kumbukirani kuti Yehoasi wenze mulumbwana maninge pakumulinganiza na shamwali wake Yehoyada. Pakulewa va azishamwali wanu dzibvunzeni kuti: ‘Ko iwo anithandiza kulimbisa chikhulupiriro changu kwa Yahova? Ko iwo anilimbikisa kuti nimbachite vinthu mobverana na mpfundo za Mulungu? Ko iwo achachita vinthu pa kundofuna kunikondweresa basi? Panango ni olimba ntima kuti anganipase malangizo na thandizo?’ (Miy. 27:5, 6, 17) Koma chaivo ni vakuti peno azishamwali wanu akondalini Yahova imwepo mungadekanelini kukhala shamwali wawo. Koma peno imwepo mu na azishamwali omwe akonda Yahova pitirizani kubverananawo, ni amwawaletu omwe adzakuthandizeni nthawe zose!—Miy. 13:20. w23.09 tsa. 9-10 ndi. 6-7

Mawu yakuti Alefa ni letra yoyambirira mu maletra Yachigiriki. Ndipo Omega ni letra yomalizira. Pakunena kuti ‘ine ndine Alefa na Omega,’ Yahova ankuwonesa kuti akachiyamba chinthu achimalizisa mpaka mapeto. Pomwe Yahova adalenga Adamu na Hava, adawadalisa ndipo adawauza kuti ‘mubalane, muwande ndipo mudzadze dziko yapasi. (Gen. 1:28) Pomwe Yahova adanena va cholinga chake viri ninge wanena kuti ‘Alefa.’ Cholinga cha Yahova chidzakwanirisike pomwe wana wobvera wa Adamu na Hava adzakhale wa ungwiro, akadzadzaza dziko yapasi na kuikonza kukhala paradaiso. Vimwevi vikadzachitika vidzakhale ninge Yahova wanena kuti ‘Omega.’ Pomwe Yahova adamaliza kulenga ‘kudzulu na dziko yapasi na vose vomwe viripo,’ iye adapereka chitsimikizo. Vimwevi vinkuonesa kuti cholinga chokhudza wanthu na dziko yapasi chidzakwarisike kumapeto kwa ntsiku 7.—Gen. 2:1-3. w23.11 tsa. 5 ndi. 13-14

Ulendo wochokera ku Babulo kuyenda ku izirayeli udakatenga kuthamangira minyezi yanayi, koma Yahova adapolomisa kuti vopinga vilivose vomwe vimbawoneka ninge vinkukangisa kubwerera kwawo vidzachosewe. Kwa Ayuda okhulupirika madaliso yomwe adakatambira ndawa yobwerera ku Izirayeli, yadakakhala yazinji kuposha khama iliyose yomwe adakachita. Pamadaliso yose yomwe adakatambira ikulu yenze kutumikira Yahova. Koma kumouko ku Babulo Aizirayeli enze alibe olo kachisi m’bodzi kuti atumikirireko Yahova olo guwa yakuti aperekereko nsembe zomwe zimbafunika mobverana na Chilamulo cha Mose. Wenze alibe pomwe gulu yolinganiziwa kuti ambapereke nsembe zimwezi. Kuingizira mwapo wanthu wa Yahova wenze adazunguliriwa na wanthu omwe ambalemekezalini malamulo ya Yahova ne pang’ono. Ndipo mwapa Ayuda azinji okhulupirika ambafunisisa kubwerera kudziko yawo kuti akabwezerese kupemphera kochena. w23.05 tsa. 14-15 ndi. 3-4

Peno tinkufuna kupitiriza kufamba ninge ‘wana wa kugwerewera,’ isepano tichadekana thandizo ya mzimu uchena. Ndawa chani? Ndawa yakuti ni voshupa kupitiriza kukhala ochena m’makhalidwe mu dziko yoipa yomwe tinkukhala ino. (1 Ates. 4:3-5, 7, 8) Mzimu uchena udzathandize kuti tilimbane na maganizo ya dziko yomwe yankuphatanidzapo maganizo ya wanthu yomwe yabveranalini na vomwe Yahova achafuna. Mzimu uchena ungatithandize pomwe kuchita vinthu vomwe ni ‘vabwino vachilungamo komasoti va chonadi.’ (Aef. 5:9) Njira inango yomwe tingatambirire mzimu uchena ni pemphero. Yesu adalewa kuti Yahova “adzapereke mzimu uchena kwa omwe amukumbira.” (Luka 11:13) Kuingizira pamwapa tikambatamanda Yahova pa misonkhano, tichatambira pomwe mzimu uchena. (Aef. 5:19, 20) Makhalidwe yabwino yomwe mzimu uchena utipasa ni yomwe yadzatithandize kuchita vinthu vomwe vikondweresa Yahova. w24.03 tsa. 23-24 ndi. 13-15

Ko munkufuna kukhala wodekha? Peno nteno pempherani. Kudekha ni khalidwe ya vipaso va mzimu. (Agal. 5:22, 23) Ndipomwapa tichadekana kupemphera kwa Yahova kukumbira mzimu uchena kuti utithandize kuti tikwanise kukhala na makhalidwe mwaya yomwe yachachita mbali ya vipatso va mzimu. Tikakhala kuti tagumana na bvuto yomwe ingayese khalidwe yathu ya kudekha, tichadekana ‘kupitiriza kukumbira’ mzimu uchena kuti utithandize kupitiriza kukhala odekha. (Luka 11:13) Kuingizira mwapa, tichadekana kukumbira Yahova kuti atithandize kuona vinthu ninge momwe iye achaonera. Kuingizira pa kupemphera tichadeka kuchita vomwe tingakwanise kuti tikhale odekha ntsiku iliyose. Tikambapemphera kukumbira kuti tikhale odekha na kuchitambo vomwe tingakwanise pa mbali yathu, khalidwe mweyi idzazike mizu muntima mwathu na kukhala mbali ya umunthu wathu. Vithandiza pomwe kuti mumbaganizire. vitsanzo va m’Baibolo. Baibolo ifotokoza vitsanzo va wanthu azinji omwe wenze odekha. Tikambaganira vitsanzo mwevi, tingapfunzire njira zomwe tingaonesere kudekha. w23.08 tsa. 22 ndi. 10-11

Yesu adamutsimikizira Petulo kuti Yahova adzamusamalire. Pambuyo pakuti Yesu wamukisiwa adachitisa Petulo na atumi anango kuti aphepomwe ntsomba zizinji modabwisa. (Yoh. 21:4-6) Mosakayika chodabwisa mwechi chidachitisapomwe kuti Petulo abvesese kuti Yahova angamupase mosashupa vinthu vakuthupi vomwe iye angadekana. Panango Petulo adakumbukira mawu ya Yesu yomwe iye adanena kuti: Yahova adzasamalire ose omwe ‘aikha Ufumu wa Mulungu pa malo yoyamba.’ (Mat. 6:33) Vose vimwevi vidathandiza Petulo kuti ambayikhe basa ya kulalikira pa malo ya kuyamba osati pa bizi yake ya ntsomba. Iye wenze wolimba moyo ndipo adalalikira mu Pentekosite 33 Yesu wayenda kale kudzulu. Adathandiza wanthu mamidyau yazinji kubvuma ntontholo wabwino. (Mac. 2:14, 37-41) Patsogolo pake adathandiza Asamariya na wanthu wa makhaindi yanango. (Mac. 8:14-17; 10:44-48) Mosakayika, Yahova adaphatisa basa Petulo modabwisa kuti adzathandize wanthu wa makhaindi yose kukhala Akhrisitu. w23.09 tsa. 20 ndi. 1; tsa. 23 ndi. 11

Magole yawiri patsogolo pakuti Ababulo adzonga Yerusalemu. Mpfumu Nebukadinezara idalota maloto yachifano chitali chomwe chimbamupasa mantha. Iye wenze adatsimikiza kupha amuna wose wanzeru kuphatanidzapo Danieli, adakakangira kutsumbudzulira maloto yake. (Dan. 2:3-5) Danieli ambafunika kuchita vinthu mwakankulumize ndawa yakuti amuna azinji adakaphewa. Iye ‘adayenda kukaonekera kwa mpfumu ndipo adakumbira kuti amupase nthawe kuti akwanise kutsumbudzulira maloto yake.’ (Dan. 2:16) Kuti akwanise kuchita vimwevi ambafunika kukhala wolimba ntima na wokhulupirika. Baibolo ifotokozalini kuti iye wenze adatsumbudzulirako kale maloto kumbuyo. Iye ‘adakumbira Mulungu wakudzulu kuti awachitire chifundo nakuti awaululire chintsintsi mwechi.’ (Dan. 2:18) Yahova adadawira mapemphero mwaya. Na thandizo ya Yahova Danieli adakwanisa kutsumbudzulira maloto ya Nebukadinezara. Danieli na anzake komasoti amuna anango wanzeru alibe kuphewa. w23.08 tsa. 3 ndi. 4

Ganizirani maphindu yomwe tingagumane ndawa yokhala odekha. Munthu wodekha achakhala wokondwa. Kuingizira mwapa, kungathandizepomwe thanzi yathu na maganizo yathu. Tikakhala odekha tichakhala na azishamwali wabwino komasoti tichakhala pantendere na anzathu ndipo mpingu wathu uchakhala wobverana maninge. Isepano tipewa kuchita vinthu vomwe vingachitise vinthu kufika poipa. (Sal. 37:8; Miy. 14:29) Ndipo chodekana maninge tikhala kuti tinkutewezera Ababa wathu wakudzulu ndipo tilimbisa ushamwali wathu na iye. Mosakaika kudekha nikhalidwe yabwino maninge yomwe itiphindulisa tose. Nishuwadi kuti ni nthawe zoselini pomwe vikhala vosashupa kuti tikhale odekha. Koma na thandizo ya Yahova, tingakwanise kupitiriza kukulisa khalidwe mweyi. Pomwe tinkudikhira modekha dziko inyowani, tichadekana kukhala otsimikiza kuti ‘maso ya Yahova yachaona ose omwe amugopa, omwe ankudikhira chikondi chake chokhulupirika.’ (Sal. 33:18) Manjeuno kuposha kale tichadekana kutsimikiza kupitiriza kukhala odekha. w23.08 tsa. 22 ndi. 7; tsa. 25 ndi. 16-17

Yakobo adafotokoza va munthu yemwe ambadzinena kuti anachikhulupiriro koma vomwe ambachita vimbasiyana na vomwe ambanena. (Yak. 2:1-5, 9) Yakobo adanena va ‘m’bale panango mulongo yemwe alibe vovala na vakudya vokwana,’ koma munthu yemwe anavo neye kumuthandiza. Munthu moyu podiya anene kuti anachikhulupiriro koma vochita vake viwonesa kuti iye alibe chikhulupiriro. (Yak. 2:14-16) Yakobo adafotokoza va Rahabi kuti ni chitsanzo chabwino cha chikhulupiriro chomwe chidawonesewa na basa zake. (Yak 2:25, 26) Rahabi wenze adabva va Yahova ndipo ambadziwa kuti iye ankuthandiza Aizirayeli. (Yos. 2:9-11) Ndipomwapa iye adawonesa chikhulupiriro chake mwa basa zake pakuteteza azondi awiri wa Aizirayeli omwe moyo wawo wenze pa ngozi. Ndawa ya vimwevi, nkazi wochimwa moyu yemwe wenzelini Muyizirayeli adawonewa wolungama ninge momwe Yahova adawonera Abulahamu. Chitsanzo cha Rahabi chitipfunzisa kuti chikhulupiriro chathu chichadekana kuwonesewa na basa zake. w23.12 tsa. 5-6 ndi. 12-13

Ninge Akhrisitu, isepano tichadekanalini kundodziwa mpfundo zoyambirira za m’Baibolo. Na thandizo ya mzimu uchena wa Mulungu isepano tikhala na chifuno chopfunzira ‘vinthu vozama va m’Mawu ya Mulungu.’ (1 Akor. 2:9, 10) Tani kuyamba pfunziro ya pamwekha kuti mumufenderere maninge Yahova? Mwakulinganiza, imwepo mungaone momwe Yahova adawonesera chikondi chake kwa atumiki wake wokhulupirika wakumbuyo na momwe achaonesera pomwe kuti achakukondani. Mungapfunzire pomwe va momwe dongosolo ya kupemphera chaiko yenzere mu nthawe ya Aizirayeli na momwe iye ankufunira kuti timbamutumikirire manjeuno. Panango mungapfunzire pomwe va mapolomisi yomwe Yesu adakwanirisa pomwe wenze pano padziko yapasi. Imwepo mungaphatise basa Índice das publicações da torre de vigia panango Bukhu yofagira ya Mboni za Yahova. Imwepo mudzaone kuti kuphatisa basa vinthu vimwevi, kudzachitise kuti pfunziro yanu ikhale yokomedza maninge. Kupfunzira mpfundo zozama zimwezi za m’Baibolo kudzakuthandizeni imwepo kulimbisa chikhulupiriro chanu na ‘kudziwa maganizo ya Mulungu.’—Miy. 2:4, 5. w23.10 tsa. 18-19 ndi. 3-5

Mawu yomwe Ntumi Petulo adaphatisa basa yakuti ‘chaicho’ yatanthauza “kupfuthuka.” Mbali yachiwiri inkufotokoza vomwe tingachite kwa anzathu peno tinachikondi chaicho. Chikondi chaicho chidzafuchire panango kuti kunyalanyaza vophonya va abale na alongo. Isepano tingaganizire ivi: Viri ninge kuphata chikondi chathu ninge kantsalu komwe kachanyituka, komwe tingakafuthule mpakana kubisa osati chimo ibodzi panango yawiri koma ‘machimo yazinji.’ Mwanjira mweyi kufuchira kutanthauza pomwe kukhululuka. Ninge momwe kantsalu kangabisire uchilema panango chilonda, chikondi chathu chingafuchire vofoka na vophonya va abale na alongo wathu. Chikondi chathu chichadekana kukhala cholimba, chomwe chingatithandize kukhululukira abale na alongo wathu podiya pa nthawe yomwe kuchita vimwevi ni koshupa. (Akol. 3:13.) Tikambakhululukira anango tiwonesa kuti chikondi chathu ni cholimba ndipo tikondweresa Yahova. w23.11 tsa. 11-12 ndi. 13-15

Pomwe Mpfumu Yosiya wenze na magole 26, iye adayamba kukonzapomwe kachisi. Ni pamwapa pomwe adagumana ‘bukhu yamalamulo ya Yahova yomwe yenze idaperekewa na Mose.’ Pomwe mpfumu idabva vomwe bukhu mweyi imbanena, iye adachita vinthu mwakankulumize kuti atewedze va bukhu mweire. (2 Mbiri 34:14, 19-21) Ko imwepo mudayesakokale kuwerenga Baibolo ntsiku iliyose? Peno munkuchita teno vinkufamba bwino? Ko imwepo munemba mavesi yanango yomwe yangakuthandizeni? Pomwe Yosiya wenze na magole 39 iye adachita chimo yomwe idamuphesa. M’malo mwakuti athembe Yahova kuti amutsogolere iye adadzithemba. (2 Mbiri 35:20-25) Mweyi ni pfunziro kwa isepano. Viribe basa nsinkhu wathu panango nthawe yomwe takhala tinkutumikira Yahova, tichadeka kupitiriza kumufenderera. Kuti vimwevi vikwanisike tichadekana nthawe zose kupemphera kwa Yahova, kumukumbira kuti atitsogolere, kupfunzira Baibolo na kubvera malangizo ya Akhrisitu wachikulire. Kuchita vimwevi vidzakuthandizeni imwepo kuti muleke kumbaphonyesa vinthu kawirikawiri ndipo mudzakhale okondwa nthawe zose.—Yak. 1:25. w23.09 tsa. 12 ndi. 15-16

Baibolo ifotokoza va akazi azinji okhulupirika omwe ambakonda Yahova na kumutumikira. iwo enze ‘osanyanyira mu vochita’ na ‘okhulupirika mu vinthu vose.’ (1 Tim. 3:11) Koma ntsiku zino mumpingu muna alongo azinji okhuma mwauzimu, omwe alongo wachitsikana angatewedzerembo chitsanzo chawo. Alongo wachitsikana, tani kunyang’ana alongo okhuma mwauzimu nkutewedzera chitsanzo chawo? Onani makhalidwe yomwe iwo ali nayo ndipo pamwapo ganizirani momwe mungatewedzerere makhalidwe yawo. Khalidwe yodekana maninge kwa Mkhrisitu wokhuma mwauzimu ni kudzichepesa. Nkazi akakhala wodzichepesa iye adzakhale pa ushamwali wolimba na Yahova ndipo adzakhale wobverana na anango. Mwakulinganiza, nkazi wodzichepesa yemwe akonda Yahova, achabvera lamulo yomwe Yahova adakhazikisa yakuti mwamuna ni msolo wa banja. (1 Akor. 11:3) Mpfundo mweyi inkufotokoza va munthu yemwe Yahova adamusalula kuti asamalire mpingu komasoti banja. w23.12 tsa. 18-19 ndi. 3-5

Yahova achafuna kuti amuna ambakonde akazi wawo na kuwasamalira mwakuthupi, m’maganizo komasoti mwauzimu. kukhala ozindikira, kuwonesa ulemu kwa akazi na kukhala wothembeka kudzakuthandizeni imwepo kukhala mwamuna wabwino. Pambuyo pakuti imwepo mwalowola mungakhale baba. Ko nchani chomwe mungapfunzire kwa Yahova kuti mukhale baba wabwino? (Aef. 6:4) Yahova wenze alibe manyanzi kuuza mwana wake Yesu kuti amukonda nakuti akondwa naye. (Mat. 3:17) Imwepo mukakhala baba, ayi kuyebwa kumutsimikizira mwana wanu kuti mumukonda ndipo nthawe zose mbatembejani mwana wanu akachita vinthu vabwino. Azibereki omwe atewedza chitsanzo cha Yahova, athandizambo wana wawo kuti akhale Akhrisitu okhuma mwauzimu. Imwepo mungapfunzire kukhala baba wabwino manjeuno pa kusamalira mwachikondi banja yanu na abale na alongo mumpingu na kuwauza kuti muwakonda nakuti mukondwa nawo.—Yoh. 15:9. w23.12 tsa. 28-29 ndi. 17-18

Podiya kuti ndise atumiki wa Yahova okhulupirika, isepano tigumana na mabvuto yathanzi ninge wanthu ose. Kuingizira pamwapa, vingachitikepomwe kuti tinkulimbana na kutsutsiwa panango kudzudziwa na wanthu omwe achazonda atumiki wa Yahova. Nthawe zinango Yahova atitetezalini pa mabvuto yose mwaya. Koma iye adapolomisa kuti nthawe zose adzatithandize. (Yes. 41:10) Na thandizo yake isepano tingakwanise kukhala na moyo wokondwa kuti tikwanise kuchita vosalula vabwino na kupitiriza kukhala okhulupirika kwa iye podiya kuti tinkugumana na mabvuto yoshupa. Yahova adapolomisa kutipasa vomwe Baibolo ichanena kuti ‘ntendere wa Mulungu.’ (Afil. 4:6, 7) Ntendere moyu ni ntendere wa muntima womwe wanthu omwe achatumikira Yahova okha ndiwo angawugumane. Ntendere moyu ‘uchaposha kuganiza kulikose kozama’ ndipo ntendere moyu ni wamphanvu maninge kuposha momwe tinkuganizira. Ko imwepo mudakhalakokale na ntendere moyu pambuyo pakuti mwapemphera kuchokera pasi pa ntima kwa Yahova? Peno nteno imwepo mudabva ‘ntendere wa Mulungu.’ w24.01 tsa. 20 ndi. 2; tsa. 21 ndi. 4

Kukonda dzina ya Mulungu kuchitisa kuti wanthu okhulupirika ambafune kumulemekeza. Mpfumu Davide adanemba kuti: ‘Moyo wangu ulemekeze Yahova na vose vomwe ninavo vilemekeze dzina yanu yochena.’ Davide adabvesa kuti kulemekeza dzina ya Yahova ni kulemekeza Yahova chaiye. Dzina ya Yahova inkuphatanidzapo mbiri yake. Vimwevi vitikumbusa makhalidwe yabwino yomwe iye anayo na vinthu vabwino vomwe iye anchita. Davide ambafuna kulemekeza dzina ya Ababa wake ndawa yakuti iye ni wochena. Davide ambafuna kuchita vimwevi na ‘vose vomwe wenze navo.’ Mwevi vinkutanthauza na moyo wake wose. Mwanjira ibodzibodzi mweyi Alevi enze patsogolo pa nkhani yolemekeza Yahova. Iwo adabvuma modzichepesa kuti mawu yawo yenze yosakwanira pakupereka ulemu womwe dzina ya Yahova imbadekana. (Neh. 9:5) Mosakayika kudzichepesa kumoku kudakondweresa maninge ntima wa Yahova. w24.02 tsa. 9 ndi. 6

Peno imwepo mukwanisalini kukwanirisa cholinga chanu, pambuyo pakuti mwaiganizira bwino nkhani mweyo, Yahova adzakuwonenirini kuti ndimwe wokangira. (2 Akor. 8:12) Ganizirani vomwe mwakwanirisako kale. Baibolo ichalewa kuti: ‘Mulungu ni wolungama angayebwelini basa zanu.’ (Aheb. 6:10) Ndipomwapa, chitanimbo chibodzibodzi mbaganizirani vomwe mwakwanirisa kale. Mwakulinganiza, kukhala pa ushamwali na Yahova, kuuzako anango va iye panango kubatizika. Ninge momwe mudakwanirisira volinga va uzimu kumbuyo, imwepo mungakwanise kukwanirisa volinga vomwe munavo manjeuno. Nathandizo ya Yahova imwepo mungakwanirise volinga vanu. Kumbukirani kuti muchadekana kupfunzirapo kanthu pa ulendo muyo, panango kuti mukambayesesa kuchita khama pakukwanirisa volinga vanu mbakodwani na kuwona momwe Yahova ankukuthandizirani pakukwanirisa volinga vanu. (2 Akor. 4:7) Imwepo mukaleka kusiya kukwanirisa volinga vanu, dziwani kuti mudzatambire madaliso yakulu maninge.—Agal. 6:9. w23.05 tsa. 31 ndi. 16-18

Nthawe zose Yahova anyang’ana njira yowonesera atumiki wake kuti awakonda nakuti ni wokondwa maninge na vomwe iwo achachita. Baibolo ifotokoza va vochitika viwiri pomwe Yahova adauza Yesu kuti iye ni mwana wake wokondewa na wobvumizika. (Mat. 3:17; 17:5) Ko imwepo munkufunambo kuti Yahova ambakuwoneni tene? Ntsiku zino Yahova ayankhulalini na wanthu maso na maso. Koma iye ayankhula pakuphatisa basa Baibolo. Tingakwanise ‘kubva’ mawu ya Yahova yakuti ndise obvumizika kwa iye tikambawerenga mawu ya Yesu ya ntontholo wabwino. Yesu adatewedzera mosaphonyesa makhalidwe ya Ababa wake. Manje tikambawerenga mawu yachifundo ya Yesu, yomwe iye adanena kwa wanthu ochimwa tingakwanise kudziwa kuti ni Yahova chaiye yemwe ankuyankhula mawu mwaya kwa isepano. (Yoh. 15:9, 15) Koma tikambagumana na mabvuto vinkutanthauzalini kuti tasiya kukhala obvumizika kwa Yahova. Ni vosiyana maninge, moyu ni mwayi wowonesa chikondi chathu kwa Mulungu na chikhulupiriro chathu kwa iye.—Yak. 1:12. w24.03 tsa. 28 ndi. 10-11