PAXAGUENATAXANAXAC 3
¿Naeʼ gaʼ ʼéeta daʼ qonesedíseguem daʼ ʼeesa chiỹaqalégue janʼ Biblia?
Ñiʼ Paxaguenaxaicpi janʼ Biblia soʼ ʼuóidi 1870
ʼUáichiiñi liiñi janʼ La Atalaya (1879)
La Atalaya naa noloxoʼte
Janʼ Biblia ỹʼaxátʼaguet daʼ ỹim daʼ lelouaxa soʼ Cristo, ʼuo jenaa sa ỹataxalégue paxaguénataxanaxaic quétaaue naʼ ʼuáichiiñi tamnaxaicpi qataxa nʼáxat daʼ ʼeesa Lʼaqtac ñiʼ Dios (Hechos 20:29, 30). Naqaida daʼ diʼỹoq. Sa ỹataxalégue paxaguénataxanaxaicpi ỹalectenaʼt naa lapaxaguénataxanaco soʼ Jesús naaʼme neenataxaco sa ỹataxaloʼte, qanaʼchi qoỹadénaxat naʼ tamnaxaic (2 Timoteo 4:3, 4). Sójoʼ qadecʼatenaxanaxac, ¿táʼnooqoʼchi daʼ ỹáche saỹátenaq daʼ qadaatetonaxanaxac naa paxaguénataxanaco chiỹoqodalégue janʼ Biblia ỹáche ỹátaqchidiiñi?
Ỹivíta soʼ noloʼ daʼ ỹaloxon daʼ ʼeesa ñiʼ Jehová. Ñiʼ Dios ỹʼaxátetaguet daʼ ỹinoxotraiỹi naʼ noloxoʼte qanaʼchi «daʼ ỹataqtelégue naatetonaxanaxac ỹáche ʼuo» (Daniel 12:4). Soʼ 1870, soʼ qapíi lapootʼaʼt ʼme ỹilótaaque daʼ ʼeesa ỹitaden daʼ qodapaxaguénataxatapeec naa tamnaxaco ʼuana chiỹoqodalégue janʼ Biblia. Naqaida daʼ ỹauéga daʼ nimitáaque daʼ naa ʼuáichidiiñi lapaxaguénataxanaco naʼ Nidiiʼs, qanaʼchi ñiʼ Jehová huáʼa daʼ ỹichoxodénec daʼ laỹátenaxanaxac ʼme chiỹoqoʼot.
Siỹaxaʼu ʼme ʼuo daʼ liquidiaqtéỹaxac nodietregue daʼ napaxagueeta janʼ Biblia. Jesoʼme ʼuáichiiñi paxaguenaxaiqa janʼ Biblia, soʼ sachíỹoxosqalóote, dʼonataxata daʼ lasoxoc ʼme naa noloxoʼte naʼchi ʼenáʼam sʼonataxanaxa: qodetaxaỹapíỹi gaʼme paxaguénataxanaxac. Daʼ ʼuo naa ỹisómaguet naa qalaqalégue texto, qanaʼchi ỹilódaaque jenʼ texto laỹi ʼme ỹiset daʼ ỹitauan daʼ demachíỹa. Noqoʼ daʼ ỹivíta daʼ ỹimat daʼ táteguet naa laỹi naʼ nedétrañi, qanaʼchi ỹidídiñi. ʼÉeta daʼ ỹimachítra daʼ janʼ Biblia maiʼchi daqtaxan, nesedídiseguem daʼ ʼeesa daʼme lenaxat qataxa daʼ Lʼonataxanaxac ñiʼ Dios, jenʼme ʼéetapeec naa siỹaxadipi qataxa jenʼ ʼaléua, daʼ huétʼa jenʼ napaʼl qataxa jenʼme necʼaliséguem qomle. Daʼ limítaxanaxac ỹiỹolóxote jalcote naa nʼamaqténaxanaxaco qataxa nasoxoco sa ỹiỹamaxadídiñi (Juan 8:31, 32).
Daʼ 1879 demachíta daʼ nóviʼ soʼ noloʼ daʼ qoỹʼaxat daʼme ʼeesa tátʼeelo naa cuatro laỹaʼchi ladíco. Naʼchiso soʼ huóʼe, chiỹaqáʼña daʼ qoỹíʼet janʼ necʼatena ʼme maliaxa quéta daʼ qoỹʼaxátetapegueegue ỹivídeta naʼ noloʼ La Atalaya. Anunciando el Reino de Jehová. Naỹi sʼaxátaỹi naa ʼeesoda chiỹoqodalégue janʼ Biblia naa 240 ʼaleʼupi qataxa jenʼ ỹágueegue daʼ 750 ỹodapecachi nʼaqtacpi. ¡ʼUáatʼa canaʼle daʼ ỹivíta gaʼ caỹaʼague daʼ ʼeesa!
¿Naeʼ gaʼ ʼéeta daʼ ỹataqtelégue huetalégue janʼ Biblia daʼ ỹim daʼ ỹileu soʼ Cristo?
¿Naeʼ gaʼ ʼéeta daʼ sañoxotaq daʼ ñisedáxaseguem daʼ ʼeesa Lʼaqtac ñiʼ Dios?