PAXAGUENATAXANAXAC 4
¿Naeʼchisoʼme soʼ Jesucristo?
1. ¿Naeʼgaʼ ʼéeta daʼ ʼuo soʼ Jesús?
¿Naeʼ gaʼ lasoxoco ʼen nʼóotam siỹaxaua soʼ Jesús? (MATEO 11:29; MARCOS 10:13-16).
Soʼ Jesús caʼlioʼ netague diʼ piỹem qanaʼchi paqal caʼlioʼ maliaxa sa niỹíʼña jenʼ ʼaléua; sa ʼenáʼam jenʼ siỹaxadipi laỹi (Juan 8:23). Naqaiso soʼ ʼuáichiiñi lʼonatac ñiʼ Jehová qataxa ỹitauan daʼ ỹíʼet naʼ ỹimaquéna. Janʼ Biblia ʼen lenaxat «ʼoonolec» lecʼóxot ñiʼ Dios souáxaʼchi ʼoonolec lʼonatac chiỹoqotʼot ñiʼme Dios (Juan 1:14). Naʼchi ʼenáʼam naatetóʼnec daʼ qoỹin «Nʼaqtac» souáxaʼchi soʼme ỹʼaxátʼape naʼ lʼaqtaqa ñiʼ Letʼa. ʼAutaxaỹaxan diʼ Proverbios 8:22, 23, 30; Colosenses 1:15, 16.
2. ¿Táʼnooche daʼ necʼáchiʼña jenʼ ʼaléua soʼ Jesús?
Ñiʼ Dios namaxáʼña soʼ Lecʼóxot jenʼ ʼaléua. Dójoʼ caʼlioʼ daʼ ỹíʼet qanaʼchi namaq daʼ nachaalataxac ʼen táaue soʼ lecʼóxoqui jasoʼ María, ʼoonole ʼañole judía lase. Chiỹaqáʼa soʼ Jesús qaỹaʼte letʼa gaʼ ỹʼoqóchiỹi siỹaxaua (Lucas 1:30-35). Soʼ Jesús necʼáchiʼña jenʼ ʼaléua: 1) daʼ dapaxaguenataxanec daʼ ʼeesa lasoxoc ñiʼ Dios, 2) daʼ qoʼmi ỹapaxaguen daloqtenaxana daʼ maʼchi lasoxoc daʼ ỹíʼet daʼ ʼéetapeec ñiʼ Dios qataxa naʼchi ʼenáʼam daʼ dasoiỹeʼt naʼ sa ỹiỹamadídiñi, qataxa 3) daʼ ỹan daʼ lʼóiỹaxac nalóchiiñi náỹi daʼ necʼalaxa. ʼAutaxaỹaxan diʼ Mateo 20:28.
3. ¿Táʼnooche daʼ seuénaq daʼ qoʼmi ỹilelóoʼte soʼ Jesús?
ʼUo daʼ qoỹiuen daʼ lasoʼvi daʼ qoỹisóiỹi gaʼme ỹiset daʼ ỹileu (Éxodo 21:29, 30). Daʼ chiỹoqóchiñi ʼéetapeec caʼlioʼ ñiʼ Dios jenʼ siỹaxaua ʼuana ỹʼaxaicáchiilo qataxa ʼuana ʼuo naʼ nelouaxa. Saỹátenaq dójoʼ souáxaʼchi ñiʼ Jehová ʼenapéga soʼ ʼuáichiiñi siỹaxaua, soʼ Adán, daʼ ʼuo daʼ lesamaxataxac, qalqoxochi sa ỹalaq, qanaʼchi ỹileu. Chiỹaqáʼa mitaamaʼle daʼ qaỹaʼte lesamaxataxac qanaʼchi ʼuana ỹiset daʼ ỹileu (Génesis 2:16, 17; 5:5). Janʼ Biblia ʼenaac daʼ nelouaxa «táaue» jenʼ siỹaxadipi souáxaʼchi chiỹaqaiỹi soʼ Adán. Soʼ Adán ʼen táaue soʼ lecʼóxoʼte daʼ lesamaxataxac chiỹaqáʼa ỹiset daʼ qadeleu. Chanʼeesa seuénaq daʼ qoʼmi qonecʼalaxateguesopa daʼ nelouaxa. ʼAutaxaỹaxan diʼ Romanos 5:12; 6:23.
¿Naeʼgaʼ ỹiset daʼ qoʼmi qonecʼalaxateguesopa daʼ nesamataxac qataxa daʼ nelouaxa? Daʼ qadeleu, qanaʼchi seseeténaq ỹisamaq naʼ maiʼchi qadesamaxataxac. Qaỹaʼte siỹaxaua nalóchiiñi ỹiset daʼ ỹiseeten naʼ lesamaxataxaco gaʼ siỹaxaua laqáỹa. ʼAutaxaỹaxan diʼ Salmo 49:7-9.
4. ¿Táʼnooche daʼ ỹileu soʼ Jesús?
Sa qoʼmi ʼenáʼama, soʼ Jesús ỹáche nalóchiiñi qataxa ʼuana ʼuo daʼ lesamaxataxac. Chiỹaqáʼa daʼ ỹileu ʼuana ỹileelégue daʼ maiʼchi lesamaxataxac, ỹisamaq daʼ ỹiseeten naʼ lesamaxataxac jenʼ siỹaxadipi laỹi. Daʼ namaq soʼ Lecʼóxot daʼ qoʼmi ỹileelóoʼte ñiʼ Dios ỹaloxon daʼ tʼádaic lauotaqtaxanaxac ʼme ʼuo jenʼ siỹaxadipi. Soʼ Jesús naʼchi ʼenáʼam ỹaloxon daʼ qoʼmi ỹauoteque daʼ ỹalaxaguet ñiʼ Letʼa qataxa ỹan daʼ lʼóiỹaxac souáxaʼchi qoʼmi necʼalaxateguesopa daʼ nesamaxataxac qataxa daʼ nelouaxa. ʼAutaxaỹaxan diʼ Juan 3:16; Romanos 5:18, 19.
ʼAucʼaten naʼ necʼatenec ¿Táʼnooqoʼchi daʼ ỹileu soʼ Jesús?
5. ¿Naeʼgaʼ ỹʼétetac soʼ Jesús naỹi?
Caʼlioʼ huétaña jenʼ ʼaléua, soʼ Jesús nataden jenʼ léuaxaicpi, necʼalaxatéegue jenʼ sóxote ỹileu qataxa ỹitauan naʼ ʼuo daʼ lachoxodec. Dójoʼ ỹaloxon qomle daʼ ʼéetec jenʼ Dios lamaxasecpi nepeʼeʼte (Mateo 15:30, 31; Juan 5:28). Caʼlioʼ daʼ ỹileu soʼ Jesús, qanaʼchi ñiʼ Dios necʼalaxatéegue qataxa ỹʼiỹílaxatot daʼ lʼóiỹaxac ʼme paqal diʼ piỹem (1 Pedro 3:18). Ỹim qanaʼchi soʼ Jesús huétasop ñiʼ Letʼa, netague jenʼ ỹaỹáten, ỹiuatétʼa daʼ qoỹanem daʼ loiquiaxac qanaʼchi ỹilolégue jenʼ ʼaléua (Hebreos 10:12, 13). Naỹi soʼ Jesús sóxote damaxasóxotac diʼ piỹem, qataxa naʼ lamaxasecpi ỹʼaxatac naʼ ʼónaxaic nipíʼic ỹima jenʼ ʼaléua. ʼAutaxaỹaxan diʼ Daniel 7:13, 14; Marcos 13:10.
Sóxote jenaa daʼ dʼonataxana daʼ loiquiaxac ñiʼ Jesús ʼme Netʼa qanaʼchi ỹima ʼen qaỹa naʼ nachoxodec qataxa naʼ siỹaxadipi qalhuaxaicpi. Ỹima naʼ ỹaloxon naʼ lepéʼe soʼ Jesús qataxa ỹalaxaguet ñiʼme, qanaʼchi mátaac netalégue jenʼ ʼaléua ʼme taỹa daʼ ʼónaxaic nʼacháqaʼ. ʼAutaxaỹaxan diʼ Salmo 37:9-11.