PAXAGUENATAXANAXAC 7
¿Naeʼgaʼme noqoʼ gaʼ Lʼonataxanaxac ñiʼ Dios?
1. ¿Naeʼgaʼme noqoʼ gaʼ Lʼonataxanaxac ñiʼ Dios?
¿Nóoʼchi daʼ qoỹítapega nʼóotam Netʼa soʼ Jesús? (MARCOS 1:40-42).
Daʼ dójoʼ nʼonataxanaxac netague diʼ piỹem ỹíʼet qomle daʼ ʼéetapeec ñiʼ Dios ỹima jenʼ ʼaléua ʼenáʼam jenaʼme huetʼot diʼ piỹem. Jenʼ siỹaxadipi ỹiuen dójoʼ nʼonataxanaxac. Sóxote jenaa ỹipolguéegue ỹima naʼ netʼalpi siỹaxadipi qataxa ʼen necoñáxatetʼaʼt ỹima jenʼ netalégue jenʼ ʼaléua. Náajoiʼ ʼónaxaiqa nipíʼic ¿ʼeesa? ʼAutaxaỹaxan diʼ Daniel 2:44; Mateo 6:9, 10; 24:14.
Ñiʼ Jehová Dios ỹaconéega soʼ Lecʼóxot Jesucristo, ʼen Netʼa daʼ Lʼonataxanaxac. ʼAutaxaỹaxan diʼ Apocalipsis 11:15.
ʼAucʼaten naʼ necʼatenec ¿Naeʼ gaʼme noqoʼ gaʼ Lʼonataxanaxac ñiʼ Dios?
2. Ñiʼ Jesús ¿táʼnooche daʼ qaỹaʼte ʼenáʼam Netʼa?
Ñiʼ Dios Lecʼóxot ỹáche qaỹaʼte ʼenáʼam daʼ netʼa souáxaʼchi choxodénataxanaxaic qataxa naʼchi ʼeetaʼt daʼ ỹíʼet daʼ ỹiỹamqáchiiñi (Mateo 11:28-30). Qataxa ʼuo daʼ lichic daʼ ỹitauan jenʼ siỹaxadipi, dójoʼ dʼonataxana qomle daʼ ỹivíta daʼ ỹiloʼolégue jenʼ ʼaléua ʼme nétaseʼma diʼ piỹem. Daʼ qonecʼalaxadiséguem, soʼ Jesús qanaʼchi taiỹi daʼ piỹem ʼme huáʼña daʼ ỹiuatétʼa ñiʼ Dios netague daʼ ỹaỹáten ỹataqtelégue daʼ ỹivíta daʼ naqatec daʼ nʼonataxanaxac (Hebreos 10:12, 13). Ỹim qanaʼchi ñiʼ Dios sóxote ỹanem daʼ dójoʼ. ʼAutaxaỹaxan diʼ Lucas 1:32, 33.
3. ¿Qoʼ ʼuo gaʼ lʼonataxanaxaʼupi ñiʼ Jesús?
Janʼ Biblia ʼenaac ñiʼ Jesús ʼuo jegaa lʼonataxanaxaʼupi sa lamaiʼ lelatacpi ñiʼ Dios. Diʼ Daniel 7:27 qoỹin lenaxat nodénaxaic. Soʼ ʼuáichiiñi ỹiquetelóote ñiʼ Dios daʼ sétaaque nodénaxaicpi naqaiso soʼ napóstolpi soʼ Jesús. Ñiʼ Jehová quéta daʼ ʼuo jenʼ ỹiquetelégue ỹivídita naʼ qanolóxoʼte daʼ lʼimdipi qataxa ỹauodipi pʼiỹáxaicpi daʼ ỹiset ỹivíta daʼ nodénaxaic. ʼEnáʼam soʼ Jesús jénjoʼ siỹaxadipi taiỹi daʼ piỹem daʼ ỹim daʼ ỹileu qataxa naqatec daʼ lʼóiỹaxac ʼme paqal. ʼAutaxaỹaxan diʼ Juan 14:1-3; 1 Corintios 15:42-44.
¿Naeʼgaʼ ʼéeta gaʼ taiỹi daʼ piỹem? Janʼ Biblia ỹʼaxat gaʼ lapotʼaʼt ʼuo jedaa táʼña, ʼme soʼ Jesús ʼen lenaxat «neloise ʼme sa léca» (Lucas 12:32, NWT). Daʼ táʼña jenʼ lʼonataxanaxaʼupi ñiʼ Jesús dʼonataxalégue jenʼ ʼaléua ʼeetʼoi 144.000. ʼAutaxaỹaxan diʼ Apocalipsis 14:1.
4. ¿Naeʼgaʼ ʼéeta caʼlioʼ daʼ soʼ Jesús dʼonataxan?
Soʼ Jesús chiỹaqáʼña daʼ dʼonataxan soʼ 1914a qanaʼchi soʼ ỹiʼuáuaxaichiiñi daʼ ỹíʼet diʼ piỹem ỹichiỹódapegue soʼ Satanás, qataxa soʼ nedemoniopi qanaʼchi nasaxádiña jenʼ ʼaléua. Ỹáche ʼuo daʼ lalemataic soʼ Diablo ỹaʼuo daʼ saniỹamaxa ỹima jenʼ ʼaléua (Apocalipsis 12:7-10, 12). Chiỹoqóchiỹi daʼ lasoxoc jenʼ siỹaxadipi daʼ samaʼle sa nóʼin. Daʼ laataxac qataxa daʼ nedáxa, naʼ napiteʼnádi, daʼ noqouáxa ỹipaquíchiỹi naʼ profecía daʼ ỹiquétapega daʼ Lʼonataxanaxac ñiʼ Dios sóxote jenaa daʼ ỹilolégue ỹima jenʼ ʼaléua. ʼAutaxaỹaxan diʼ Lucas 21:7, 10, 11, 31.
5. ¿Naeʼgaʼ ỹíʼetac daʼ Lʼonataxanaxac ñiʼ Dios naỹi, qataxa naeʼgaʼ ỹíʼet qomle?
Chiỹoqotouet daʼ nʼonataxanaxac naʼ qoỹʼaxat daʼ nʼaqtac ỹima jenʼ ʼaléua daʼ Lʼonataxanaxac ñiʼ Dios sóxote lapóotapegaʼt naʼ «siỹaxadipi sa lecʼóxotolec» naʼ ỹodapecachi siỹaxadipi. Sanalóta naʼ lʼimdipi qataxa janʼ ỹauodipi ʼme ʼónaxai janʼ liquidiaqte ỹivíta daʼ ʼequegue qataxa ỹalaxaguet soʼ Jesús. Jénjoʼ necʼalétaiỹi qomle daʼ Lʼonataxanaxac ñiʼ Dios noláxachiñi jénjoʼ siỹaxadipi qalhuaxaicpi. Chiỹaqáʼa daʼ sétaaque ñaqataxac gaʼ ỹíʼet qomle daʼ Lʼonataxanaxac ñiʼ Dios, qanaʼchi ñapaxaguenaxa daʼ salaxasoxoguet qoʼmi soʼ Jesús. ʼAutaxaỹaxan diʼ Apocalipsis 7:9, 14, 16, 17.
Gaʼ mil ʼuóidi, gaʼ Lʼonataxanaxac ñiʼ Dios ʼen diʼỹoq soʼ ʼuáichiiñi ʼéetapeec ñiʼ Dios jenʼ siỹaxadipi. Ỹima jenʼ huáʼa ʼónaxaic nʼacháqaʼ. Ỹinoxonéegue, qanaʼchi ñiʼ Jesús ỹʼiỹílaxatot daʼ Nʼonataxanaxac ñiʼme Letʼa (1 Corintios 15:24-26). ¿Qoʼ ʼanoqopita daʼ ʼuo gaʼ ʼauʼaxátem daʼ dójoʼ Lʼonataxanaxac ñiʼ Dios? ʼAutaxaỹaxan diʼ Salmo 37:10, 11, 29.
a Daʼ ỹitaxa nichígueegue daʼ ʼadanómaxac naʼ profecía bíblica ʼme ỹiquéta soʼ huóʼe 1914, ʼaucʼaten naʼ nepágina 215 táʼña 218 naʼ necʼatena ¿Qué nos enseña la Biblia? (jenʼ qóse léʼec lʼaqtaqa).