¿Naeʼgaʼ ʼéeta daʼ sétaaque mátaac naʼ necʼóqoʼtepi?

1. Daʼ nʼonáxac ¿táʼnooche daʼ lasoʼvi daʼ ʼuo gaʼ lemalate?

Jehová, ñiʼ Dios ʼme huétʼot daʼ naỹamaxac ʼme chiỹoqoʼot naʼ sa naloteʼ naʼ ʼónaxaiqa qadipíʼic, Ñiʼme sétaaque mátaac naʼ necʼóqoʼtepi (1 Timoteo 1:11). Naqaiñi ñiʼme ỹíʼet daʼ nʼonáxac. Daʼ ʼaviỹamaxatétec daʼ ʼadʼonáxac qanaʼchi ʼauachíỹoxotaiỹi daʼ ʼónaxaic daʼ ʼadapaxaguénataxanaxaquii naʼ ʼacʼóqoʼtepi qataxa chiỹaqáʼña daʼ mátaac naʼme. Naʼ tamnaxaicpi ỹalaxaguet naʼ nedétrañi qataxa ỹíʼet naʼ lʼonáxalate naʼ nóuaʼ. ʼAutaxaỹaxan diʼ Lucas 2:1, 4, 5.

Daʼ nʼonáxac ñiʼ Dios ʼen naʼchi ʼeetaʼt daʼ necoñaxatetʼaʼt jenʼ léʼem qataxa janʼ ỹauo. Ñiʼ Jehová sétaaque jenʼ noua qataxa janʼ ỹauo sétaaque ỹalemqaʼte (Hebreos 13:4). Ñiʼme niquiỹáʼa daʼ nañiimáxac (Malaquías 2:16). Qaláxasa, ỹʼatelégue gaʼ siỹaxaua daʼ díimaxan qataxa ỹitaxa huóʼon daʼ jagaʼ loua ỹisamaxataʼaguet daʼ nichíuaxac. ʼAutaxaỹaxan diʼ Mateo 19:3-6, 9.

2. ¿Naeʼgaʼ sétaaque ʼeetʼe naʼ nóuaʼ?

Ñiʼ Jehová ỹíʼet soʼ siỹaxaua qataxa janʼ ỹauo qáʼa sétaaque netauanaʼt daʼ nouáỹaxac (Génesis 2:18). Jenʼ noua léʼem naqáina jenʼ naqaic, chiỹaqáʼa chiỹaqaỹi daʼ ỹiláaque gaʼ nalic qataxa ỹapaxaguenec ñiʼ Dios naʼ lecʼóqoʼtepi. Naʼchi ʼenáʼam ỹiset daʼ nesapatetelégue daʼ nañaatelégue qáʼa noqopita jagaʼ loua. Naʼ nóuaʼ sétaaque ỹodiáquen qataxa noqopidaʼt. Qalóʼo ỹiméda sa nalóchiiñi, naʼchi ʼenáʼam nechoxodenaʼt qáʼa sétaaque madetʼape. ʼAutaxaỹaxan diʼ Efesios 4:31, 32; 5:22-25, 33; 1 Pedro 3:7.

3. Daʼ sa ʼauen maʼaguet gaʼ ʼadoua ¿qoʼ nʼóota daʼ ʼocáʼai?

Daʼ ʼuo daʼ necótaxac naʼ nóuaʼ, qaláxasa ỹiméda ỹaʼuótec daʼ nʼañaxataʼj daʼ nodiitapegaʼt (1 Corintios 13:4, 5). Daʼ Lʼaqtac ñiʼ Dios ʼuana ỹitauaxalégue daʼ nañiimaxac daʼ segaʼme chiỹaqaỹi daʼ chimaxaỹi gaʼ cotaxac ʼme ỹiset daʼ naseeʼmot naʼ nóuaʼ. ʼAutaxaỹaxan diʼ 1 Corintios 7:10-13.

4. ¿Naeʼgaʼ ỹilótaaque ñiʼ Dios daʼ ʼami necʼóqoʼte?

Ñiʼ Jehová sétaaque máchiiñi naʼ necʼóqoʼte. Chiỹaqáʼa ỹapaxaguenec daʼ ʼónaxaic lasoxoc daʼ nemeetetaʼt daʼ ʼanesóqoỹaxac. Naʼchi ʼenáʼam sétaaque ʼaualiónapiỹi daʼ laỹátenaxanaxac qataxa daʼ laatetonaxanaxac naʼ ʼadetʼal (Colosenses 3:20). Naʼchi ʼenáʼam nesétaaque daʼ qoʼmi madetʼape daʼ sʼeqatac jenʼ qoʼmi ỹamaxalóoʼte Jiñiʼme —Qanʼétoqoʼt— qataxa soʼ Lecʼóxot. ʼAutaxaỹaxan diʼ Eclesiastés 11:9-12:1; Mateo 19:13-15; 21:15, 16.

5. ʼAmi netʼal ¿naeʼgaʼ ʼéeta daʼ naqatec gaʼ namaic gaʼ ʼacʼóqoʼte?

Naʼ netʼal ỹauótee jenʼ lʼemec, loxot qataxa jenʼ jaloq (1 Timoteo 5:8). Qaláxasa ʼuana ỹisamaq dójoʼ. Nataʼen ỹapaxaguenec daʼ ỹauotec qataxa daʼ ỹaateton ñiʼme Dios (Efesios 6:4, NWT). Gaʼ netʼal daʼ nalóqtenaxanaqaʼte daʼ lauotaxadic ñiʼ Dios naqaida daʼ ỹiset daʼ quetegue gaʼ lecʼóxot. Daʼ paxaguenaxac chiỹaqalégue jenʼ Lʼaqtac ñiʼ Dios ỹiset daʼ ʼen ʼonaxaic daʼ leenataxac. ʼAutaxaỹaxan diʼ Deuteronomio 6:4-7; 2 Timoteo 3:15.

Naʼ necʼóxot ỹiuen daʼ qoỹʼañaqtet qataxa qoʼenapáʼa daʼ ỹíʼet naʼ nʼóota. ʼUo diʼ naʼchi ʼenáʼam ỹiuen daʼ qoỹichematégue qataxa qoỹapaxaguenque, qáʼa naqaida daʼ ỹivitáʼa daʼ ʼuo gaʼ nʼáxat (Proverbios 22:15). Qaláxasa daʼ nachimáqtaxanaxac ʼuana qoỹidolégue daʼ naqaleuaxa. ʼAutaxaỹaxan diʼ Colosenses 3:21.

Naʼ testigopi ñiʼ Jehová janʼ lʼonata necʼatena ỹilotelégue naʼ netʼal qataxa necʼóqoʼte. Ỹima jánjoʼ chiỹaqalégue janʼ Biblia. ʼAutaxaỹaxan diʼ Salmo 19:7, 11.