Keʼe tsengijnaná tsuncheená ngai Dio

1. A thiʼin Dio kainxin thenchaun

Dio jindache kainxin chujni ke nchao sinchegundana thenchaun para ke tsuncheena ngai Ndo (Salmo 65:2). Aro jiʼi ruchruʼa, ke thiʼin Ndo, kainxin thenchaun. Biblia ndachro ke thenchauʼen naa xii ke rinauʼan chriʼi jeʼe Ndo “tsiʼan Ndo” thenchauʼen (1 Pedro 3:7). Ko are ni israelita nanao bancheʼena thi ndakuaʼa jii, Ndo Dio i bakiʼan Ndo thenchauʼena. Isaías 1:15 (TNM) nthiʼa Jehová ndachro: “maski anto sakeʼera thenchaun jaʼan tsiaʼan”. Aro, jaan thiʼin Ndo thenchauʼen tsje chujni ke juincheʼe thi jiaʼan si tedanchiana ke sinchetjañeʼen Ndo na (Detsjeʼe Hechos 3:19).

Tsjeʼe video:“A thiʼin Dio kainxin thenchaun”

2. Kexrein chunda ke sakeʼeni naa thenchaun

Are dakeʼená thenchaun yaa tenthusayeʼena Dio. Mexinxin, juʼo sakeʼená thenchaun ngai Jehová (Mateo 4:10; 6:9). Ixi guankuʼuná thi jiaʼan. Mexinxin, chunda ke sajiná Jesús ko ke ixi jeʼe danchiaxiná kain, ko jiʼi ixi jeʼe kjuengana ixi jaʼana (Juan 14:6). Jehová rinauʼan ke juʼo sunthukuanxina naa thenchaun ke ujitaxin, jeʼe rinao ke thi rundachruná sachrjexin de ansaana (Detsjeʼe Mateo 6:7 ko Filipenses 4:6, 7).

Ndo Dio thiʼin Ndo asta thi thenchaun ke dakeʼená ngai ansaana ke juʼo jaʼana nuana (1 Samuel 1:12, 13). Ko ndathjuná ke nchao sakeʼená thenchaun kainxin nchaʼun, dakao, tsukjin, are sunthena ko are tedathuná chijni (Detsjeʼe 1 Pedro 5:7 ko Mateo 15:36).

3. Kexrein tsengijnaná thi xrathe ni testigo de Jehová

Tená ngakjan chujni ke dithikauʼan thi ndachro Dio ko tjanunkana are thiʼina ke tsii nchaʼun i xruʼin chijni seʼe nthiʼi ngataʼa Nunthe. Ko jiʼi ncheʼe ke i thjeʼaná ruxrakjiuʼuná jian Dio (2 Timoteo 3:1, 4; 2 Pedro 3:3, 13). Mexinxin, rugundaana tsjiná thi xrathe ni chuuná ko jaña tsunsujiná. Ko kai ixi ni chuuná rugundeʼena ke tsengijnananá (Detsjeʼe Hebreos 10:24, 25).

Are tatuná ni dithikaun thi ndachro Dio jiʼi thengijnaná tuncheená icha ngai Ndo. Are thjiná thi xrathe ni testigo de Jehová aremée nchao tsanginá kexrein juincheʼe thi ni anto see tetangi (Detsjeʼe Romanos 1:11, 12).

4. Keʼe sekengijna sekuncheʼe ngai Dio

Nchao sencheʼe jiʼi are segariʼi sexraxaun kain thi ubekangi de Dio ngai Biblia. Degakeʼe thenchaun ko dexraxaun thi ujuincheʼe, thi tjaguaná ko thi ndachro ke sincheʼe. Jiʼi sekengijna sekinxin ke Dio anto dethjuaʼa ko ke juʼo jeʼe thi icha nuʼen (Detsjeʼe 1 Timoteo 4:15, 16).

Juʼo nchao segariʼi chiaun de Dio si denduaxin dechunthia ngai Ndo. Aro thi ruchunthiani yaa xraa naa chujni: ke rugundeʼe sine nanao, ko jiʼi tsuʼen are thjeená tsinxiná jian kedunda thi tetanginá jiʼi, thi ndua (Detsjeʼe Mateo 4:4 ko Hebreos 11:1, 6).

5. Kekaa thi jian dayeeni si tsuncheeni ngai Jehová

Jehová taxin juachjaun chujni ke dithikaun. Ko tsengijna Ndo na are setana chijni ke sincheʼe ke tsexiʼina ruxraxauna ke i tsueʼan thi tetangina ko chunthiana (Salmo 91:1, 2, 7-10). Ko tjague Ndo na keʼe sincheʼena para ke tsuniʼana ko jian tsjiʼina, ko kai kexrein icha jian sinthena (Detsjeʼe Santiago 1:25 ko 4:4, 8).