Kexrein rinao Dio ke sigeʼe Nunthe

1. Unda juinchechjian Dio Nunthe

Jehová juinchechjian Nunthe para ke jaʼana sunthechuna nthiʼi. Are juinchechjian Adán ko Eva, thi ni saʼo kunchjian, bitueʼana ke ruchundana chjan kuthejan sarukji xan ngajni. Ixi ni ángeles kunchjiana para sinthena nthiʼa ngajni (Job 38:4, 7). Ngai nthajie Edén, nthiʼa thi bakeʼe Jehová Adán para ke nthiʼa ruginthena (Génesis 2:15-17). Kai ndache Ndo, ke jeʼe ko kainxin chjan ruchundana ruge̱ʼana. Salmo 37:29 (TNM) ndachro: “ni sithikaun ni mée ni sinthe ngataʼa nunthe, ko ni teʼi ni sinthechun ko i se̱ʼan” (Detsjeʼe Hechos 17:26).

Aro, nthajie Edén juʼo ngai riuka Nunthe beʼe. Adán ko Eva rugechundana chjan ko jaña runchekauna Nunthe ko thinga yao tarukjan naa nthajie nguixin ngataʼa Nunthe (Génesis 1:28). Nunthe kunchjian para ke nthiʼi sinthe chujni. Mexinxin, ruxantheʼa Nunthe (Detsjeʼe Mateo 5:5).

Tsjeʼe video:“Unda juinchechjian Dio Nunthe”

2. Unda ixi jai Nunthe i jiʼa naa nthajie

Ixi Adán ko Eva i bithikauʼana Dio. Mexinxin, tabachrjexina de Edén. Mexinxin, nthajie Edén tabitjaan, ko i kjaʼan kunchjian. Biblia ndachro ke ngaa raa chujni jiaʼan jii Nunthe jiʼi (Job 9:24; Génesis 3:23, 24).

Anchee, a ruchro jiʼi ke Jehová tatjañeʼe thi ndachro ke runcheʼe ixi chujni. Naʼi, jeʼe naa Dio anto tsanga ko mexinxin jaan sincheʼe kainxin thi ndachro (Isaías 45:18). Ko ngai thi nchaʼun nandaʼa tsii, Dio sincheʼe ke chujni sinthechuna jaña ínchi jeʼe juinao are nakuexinxun (Detsjeʼe Romanos 8:21).

3. Kexrein rukjan tsunchjian nthajie

Ixi Jesús, ujithetuʼan ngai Nchixiʼin Dio. Mexinxin, nchao sinchekjan Nunthe naa nthajie. Jeʼe ko ni ángeles, tasuena kain ni dingakuʼen Dio ngai Armagedón. Ko kai tatsiaxiʼin Xi Jiaʼan naa jino de náno, thi ángel jiaʼan ke juincheʼe ke Adán ko Eva i bithikauʼana Dio. Aro ni dithikaun Dio xruʼin tsuʼena are sikuʼen kain jiʼi, ixi Jesús tsengijnana ko sayakuʼena, ko jaña ni teʼi sinthena ngai naa nthajie ko i se̱ʼana (Detsjeʼe Apocalipsis 20:1-3 ko 21:3, 4).

4. Kesa tatsjexin kain thi jiaʼan ke dathuná

Kesa sincheʼe Dio ke tasitjaan kain thi jiaʼan. Jesús ndachro “keʼe tsuʼen” are tsii nchaʼun yaa. Ko kain thi dukuna jai, jincheʼe ke chujni tedetana tsje thi tangi, ko jiʼi jitjago ke i seʼa ditjaan ko utsii nchaʼun “are undatsjexin nunthe” (Detsjeʼe Mateo 24:3, 7-14, 21, 22).

Ngai thi naa jino de náno ke tsetuʼan Jesús ngai Nunthe desde ngajni, tsexiʼin sinthjian kain thi jiaʼan ke datho chujni (Isaías 9:6, 7; 11:9). Aro jiʼa juʼo rukjan naa xi nchixin, kai seʼe de daana. Mexinxin, nchao tasinthjian thi jiaʼan ke guankaʼo chujni ke dithikaun Dio. Ko jaña, ixi Jesús, Dio tasinthjian chi̱n, thi tatujuuni ko thi tade̱ʼeni. Isaías 33:24 (TNM) ndachro: “Ko i xruʼin chujni rundachro nina” (Detsjeʼe 1 Corintios 15:26).

5. Kexeʼe ni sinthechun ngai nthajie

Chujni ke dithikaun Dio nchao sinthechuna ngai naa nthajie (1 Juan 2:17). Jesús kuetuʼen ni ruee ke tsjeena chujni ke xra rinao tsangi de Dio para ke jaña sinchenchaun Ndo kai ni teʼi. Jai nchauana, Jehová jitjague tsje millón de chujni para ke ni teʼi nchao sinthechuna ngai nthajie tsiaʼo Ndo (Sofonías 2:3). Ngai Nchia Xrathexin ni testigo de Jehová thji –ni ndudaʼa ko xeʼena ixi nthiʼa nchesayeʼena Dio- kai nthiʼa tangina dayakuʼena chriʼina ko xeʼena icha jian ko tangina de thi juajna jian ke ndachro Biblia (Detsjeʼe Apocalipsis 15:4).