LECCIÓN 50
Kexrein ruxrakauni tachrjuin ni nchianduʼeni (parte 2)
Chjan yaa naa juajni ke bajun Jehová ko jeʼe Ndo chuʼen Ndo ke ni ndudaʼa sayakuʼena jian juajni jiʼi, mexinxin tjague Ndo na kexrein sincheʼena jiʼi, ko kai chjan xrague xan keʼe sincheʼe xan para ke chrjuin sinthena ngai nchia.
1. Keʼe tjague Jehová ni ndudaʼa
Jehová chuʼen ke ni ndudaʼa ko ni janaʼa ruthjueʼena xeʼena ko santsjendana tiempo para jeʼe xan. Kai rinao ke sayakuʼena xan de kexeʼo naa thi tángi ko ke tsjaguena xan jaña xraa ndachro ngaa Biblia (Proverbios 1:8). Dio ndache thi ni uchunda chjan: “Nchekueʼenra xan [...] ínchi tjago Jehová” (tsjeʼe Efesios 6:4). Jehová nchexruxiʼin dikun ke ni ndudaʼa dayakuʼena xeʼena ko ncheʼena jaña inchi dituʼena ko thinthueʼana xrá jiʼi ngaa raa ijeena.
2. Keʼe tjague Jehová chjan
Jehová thetuʼen chjan “dithikaunra thi tsetuʼanra ni nduira” (tsjeʼe Colosenses 3:20). Si chjan sincherespetaa xan ko sithikaun xan ni nduʼa xan sincheʼe xan ke anto ruchee ni nduʼa xan ko kai Jehová (Proverbios 23:22-25). Are nchiin beʼe, Jesús kjuago kexrein chunda ke sincheʼe chjan; maski xruʼin thi jiaʼan guankaʼo, bithikaun ko bancherespetaa ni nduʼa, maski ni teʼi jaan guankaʼuna thi jiaʼan (Lucas 2:51, 52).
3. Keʼe nchao sincheʼe ngui familia para ke chiaun sinthena de Jehová
Si rechunda chjan, ndaa ke dejinao ke sinao xan Jehová xraa dethjuexin Ndo suixin. Kexrein nchao sekengijna xan. Si sencheʼe thi ndachro ngaa Biblia: “Chunda ke tsjaguʼe xan [thi ndachro Jehová] ko tsekiʼin xan jiʼi are tariʼi nchiandui, ko are dachrjekuʼo xan” (Deuteronomio 6:7). Jiʼi ruchro ke chunda ke sinchekueʼeni xan nanaun. Ko menxun suixin denuʼan jian ke chunda ke tsje bee sendache xan naa thi anto renthe para ke nchao tsenthexin ñao xan. Mexinxin thi ruchro texto jiʼi yaa ke suixin chunda ke segantsjenda tiempo para senichjeʼentha xaʼantha de Jehová kainxin nchaʼun. Kai rugunda ke ngui familia santsjenda de tiempoe naa nchaʼun ixi semana para sinchesayeʼena Jehová kaina. Ko maski xruʼin chjan rechunda, si sekinthueʼa de senchelee Biblia kainxin nchaʼun jiʼi anto sekengijna.
TANGI ICHA
Rutsjeʼená keʼe tsengijna naa familia para ke tachrjuin tsunuʼena ko rucheena.
4. Tachrjuin denchekueʼen xaʼan
Sinchekueʼeni naa chjan jiʼi naa thi tángi. Kexrein sekengijna Biblia. Tsjeʼera Santiago 1:19, 20 ko tjaura de jiʼi:
Kexrein tsjago ni ndudaʼa ke thjueʼena xeʼena are nichjeena xan.
Unda ixi nchauʼa jii ke naa ndudaʼa sinchesatheʼe xeʼen are jiduñaun.a
5. Degayakuʼen xaʼantha
Para segayakuʼen xaʼantha anto rugunda ke senichjeʼentha xan de sexualidad. Ko menxun jiʼi naa thi tángi sekunuʼan sekjao xan. Tsjeʼera VIDEO ko tjaura de jiʼi:
Unda anto tángi para inchi ni ndudaʼa tjauna xeʼena de sexo.
Keʼe thengijna inchi ni ndudaʼa para ke nchao tjauna xeʼena de tema jiʼi.
Jaña ínchi ubajina, ngai nuntheʼe Xi jiaʼan jii chujni ke icha jiaʼan tekjana. Tsjeʼera 2 Timoteo 3:1, 13 ko tjaura de jiʼi:
Inchi de thi chujni ke nichja versículo 13 yaa thi ni kathe ko dinthejuakaʼo xan nchinchinchjan. Anche, unda anto rugunda ke ni ndudaʼa runichjeena xeʼena de sexualidad. Keʼe nchao sincheʼena para sayakuʼena xeʼena de chujni ke rinao sinchekao xan naa thi jiaʼan.
A benuʼan
Ni testigo de Jehová dantsjena tsje thi nchao sundeʼe ni ndudaʼa para tsjaguexina xeʼena de sexualidad ko sayakuʼena xan de thi ni rinao sinchekao xan thi jiaʼan. Ínchi jiʼi:
6. Ncherespetaara ni nduira
Kainxin xan nchinchin, xaxii ko xanchrii chunda ke tsjago xan ke ncherespetaa xan ni nduʼa xan, ko jiʼi xraguxin are kexrein nichjeexan na. Tsjeʼera VIDEO ko tjaura de jiʼi:
Unda anto renthe ke chjan ndakua runichjee xan ni nduʼa xan.
Kexrein naa xaxii nchao tsjago xan respeto ngai ni nduʼa xan.
Tsjeʼera Proverbios 1:8 ko tjaura de jiʼi:
Kexrein chunda ke satheʼe naa chjan are ndudee xan o janee xan tsetuʼen xan keʼe sincheʼe xan.
7. Nchesayeʼera Dio ngai nchia
Ni testigo de Jehová dantsjendana tiempo kainxin semana para nchesayeʼena Dio ngai nchia. Ko kexrein ncheʼena yaa. Tsjeʼera VIDEO ko tjaura de jiʼi:
Kexrein nchao sunthuʼuna para ke ninaa bee sunthutjangiʼana are nthusayeʼena Dio ngai nchia.
Kexrein sincheʼe ni ndudaʼa para ke are sinchesayeʼena Dio ngai nchia kaina chrjuin tsunuʼena ko tsengijnana (Detsjeʼe foto jii thi thexinxin lección jiʼi).
Mee suixin, a jii chrujan thi sincheʼe ke i chruʼa sinchesayeʼentha Dio ngai nchia. Ínchi keʼe.
Are saʼo, Jehová kuetuʼan ke kainxin familia israelita rukjauna de thi ndachro ngai Thee Ndo. Tsjeʼera Deuteronomio 6:6, 7 ko tjaura de jiʼi:
Kexrein nchao ruencheʼe thi ndachro nthiʼi.
Kekaa nchao sincheʼera para sinchesayeʼera Dio ngai nchia:
Duanra preparado para are ruxrathená.
Ncheleera ko ndachrura thi kuangira de naa thi thekin Biblia ke nthaxruxiʼanra.
Si chundara xan nchinchin, ncheganiara o nche imprimiira naa de thi tununxin ngai jw.org para xan nchinchin.
Si techundara xaxii o xanchrii, thincheʼera naa artículo ke jii para jeʼe xan ngai jw.org.
Nche escenificaara chrujan thi thekin Biblia.
Tsjeʼera ko ndachrura thi tangira de naa video de jw.org.
THI XRAXAUN INCHINA: “Biblia jiʼa para xan nchinchin”.
Keʼe dexraxaun suixin.
THI KUANGINÁ
Jehová rinao ke ni ndudaʼa ruthjueʼena xeʼena, tsjaguena xan ko sayakuʼena xan; ko ke chjan sincherespetaa xan ko sithikaun xan ni nduʼa xan ko ke ngui familia sinchesayeʼena Ndo.
A xraxaun thi kuangi
Kexrein nchao ni ndudaʼa tsjaguena ko sayakuʼena xeʼena.
Kexrein nchao chjan tsjago xan ke ncherespetaa xan ni nduʼa xan.
Kekaa thi jian tsiaʼo si santsjendana tiempo kainxin semana para sinchesayeʼena Dio ngai nchia.
THJEE ICHA
Kekaa nchao tsengijna xaʼantha are sangi xan.
“6 lecciones imprescindibles para sus hijos” (¡Despertad!, núm. 2 2019)
Denchelee keʼe thengijna inchi ni tedayakuʼen ni ujunchjan.
“¿Espera Dios que cuidemos a los padres cuando se hacen mayores?” (Artículo de jw.org)
Detsjeʼe kexrein naa tatita ke binueʼan kexrein runcheangi xeʼen takjan naa jian ndudaʼa.
Detsjeʼe kexrein naa ndudaʼa nchao ruxrakao icha jian xeʼen.
“¿Qué puede hacer un padre para no distanciarse de su hijo?” (La Atalaya, 1 de noviembre de 2011)
a Are Biblia nichja de disciplina, yaa ruchro tsjagueni xan sincheʼe xan thi nchao jii, chundaʼa ke sikun thi tsjayani ni tsuyautheni xan (Proverbios 4:1).