LECCIÓN 26
Unda ixi jii thi jiaʼan ko anto tsje thi tángi dutana
Are tuʼen naa thi jiaʼan chujni danchangina: “Unda”. Aro jaʼana chrjuin tunuana ixi Biblia datheʼe jiʼi.
1. Keʼe juincheʼe Xi jiaʼan para xranxiʼin thi jiaʼan ngataʼa nunthe
Xi jiaʼan o Inchijin kjantaʼa Ndo Dio. Ixi jeʼe juinao ruketueʼen ni icha, juincheyeʼe ni binthe saʼo -Adán ko Eva- para ke ni teʼi i rugithikauʼana Ndo Dio. Ko jaan juincheʼe jiʼi are juincheyeʼe Eva (Génesis 3:1-5). Juincheʼe ke Eva xráxaun ke Jehová jithemeʼe Ndo naa thi anto chrjuin ko ke yaa nchauʼa beʼe. Thi juinao ndachro yaa ke chujni rugundeʼana sithikauna Ndo Dio para ke jian tsjiʼina. Are Xi jiaʼan ndache Eva ke ruge̱ʼan, yaa kuexinxin níchja thi nduaʼa. Mexinxin Biblia ndachro ke jeʼe “nichja thi nduaʼa ko jeʼe Ndudee thi nduaʼa” (Juan 8:44).
2. Keʼe juincheʼe Adán ko Eva
Jehová bajun Ndo kain ngai Adán ko Eva. Ndache Ndo na ke nchao rujinena tuchjuin ke beʼe ngai jardín de Edén aro, juʼo de naa ntha naʼi (Génesis 2:15-17). Maski jaña, juinena thuchjuiin ntha jiʼi. Eva “kuaa naa thuchjuin ko kuexiʼin juine”. Kuthejan, chjee Adán “ko kai juine tho” (Génesis 3:6). Jeʼena i bithikauʼana Ndo Dio. Ixi Adán ko Eva xruʼin thi jiaʼan binthechundana nchao runcheʼena juʼo thi jian. Aro, are i bithikauʼana Ndo Dio, ixi jeʼena juinauna, juincheʼena naa thi jiaʼan ko kjuaguna ko juinauʼana ke Ndo Dio ruketuʼena. Thi juincheʼena jiʼi anto tsje thi jiaʼan juiauʼena (Génesis 3:16-19).
3. Keʼe thi tángi juiauʼaná thi juincheʼe Adán ko Eva
Are Adán ko Eva i bithikauʼana, takjana chujni ke chunda thi jiaʼan, ko jiʼi juincheʼe ke kainxin xeʼena guankaʼo xan thi jiaʼan. Are nichja de Adán, Biblia ndachro jiʼi: “Ixi nakua xii, bixiʼin thi jiaʼan ngai Nunthe ko thi jiaʼan juiaʼo thi tade̱ʼeni, mexinxin kainxin chujni tade̱ʼena” (Romanos 5:12).
Anche remee, unda ixi dathuná tsje thi tángi. Te bee ixi jaʼana ndakuaʼa thincheʼená. Kai, ixi thi ndakuaʼa ncheʼe inchi chujni. Ko te bee dutana thi tángi ixi jiʼi tuenkjiun (tsjeʼe Eclesiastés 9:11).
TANGI ICHA
Rutsjeʼená unda ixi chruʼa sunthukaxina Dio ixi kainxin thi tángi dutana ko kain thi jiaʼan ke jii ngataʼa Nunthe, ko rutsjeʼená kexrein tunuʼen jeʼe Ndo are tedathuná thi tángi.
4. Kensen kasuexin dutana thi tángi
Tsje chujni xraxauna ke Dio thi thetuʼan ngataʼa Nunthe. Aro a ndua jiʼi. Tsjeʼera VIDEO.
Tsjeʼera Santiago 1:13 ko 1 Juan 5:19, ko tjaura de jiʼi:
A kasuexin Ndo Dio jixin anto tsje thi jiaʼan ko dathuná tsje thi tángi.
5. Kain thi jituʼen ixi Xi jiaʼan jithetuʼan
Tsjeʼera Génesis 3:1-6 ko tjaura de jiʼi:
Keʼe thi nduaʼa ndachro Xi jiaʼan (Tsjeʼera versículo 4 ko 5).
Kexrein juinao rukjago Xi jiaʼan ke Jehová jithemeʼe chujni naa thi anto chrjuin.
Ínchi ndachro Xi jiaʼan, a rugundeʼe chujni ke Jehová tsetuʼena para ke jian tsjiʼina.
Tsjeʼera Eclesiastés 8:9 ko tjaura de jiʼi:
Desde ke kuexiʼin Xi jiaʼan kuetuʼan ngataʼa Nunthe, kexrein jithjiʼi chujni.
Adán ko Eva xruʼin thi jiaʼan binthechundana ko binthena ngai naa nthajie, aro icha jian bithikauna thi ndachro Xi jiaʼan ko takjantaʼana Jehová.
Desde nchaʼun mee, thi jiaʼan bixiʼin ngataʼa Nunthe, thi tángi dathuni ko thi tade̱ʼeni.
Jehová tasinthjian thi jiaʼan duankaʼuni, thi tángi detani ko thi tade̱ʼeni. Ko kainxin chujni i sinthechundaʼana thi jiaʼan ko sinthechuna ngai naa Nthajie.
6. Jehová thiin are dutana thi tángi
A ta Ndo Dio juachjaun ixi thi tuana. Detsjeʼe thi kji̱n xi nchixin David ko apóstol Pedro. Tsjeʼera Salmo 31:7 ko 1 Pedro 5:7, ko tjaura de jiʼi:
Kexrein dekunuʼan ixi denuʼan ke Jehová taxin juachjaun ixi suixin are degetan thi tángi.
7. Dio tasinthjian kainxin thi tángi ke datho chujni
Tsjeʼera Isaías 65:17 ko Apocalipsis 21:3, 4, ko tjaura de jiʼi:
Jehová ndachro ke utuin tasinthjian Ndo kainxin thi tángi ke detan chujni ko ke sasengixin Ndo kain jiʼi. A chrjuin dekunuʼan dekiʼin jiʼi. Unda.
A benuʼan
Are Xi jiaʼan níchja thi nduaʼa de Jehová, juinchechimeko nombree Ndo, juinao ke rukinxini ke chruʼa tsetuʼan Ndo ko ke chrjuiʼan nuʼen Ndo. Aro, i seʼa ditjan, ko Jehová tasinthjian kainxin chijni ke detan chujni ko sincherua nombree. Kunixin jiʼi Dio tsjago ke rugundaana de jeʼe Ndo, ko thi tsurua nombree Ndo jiʼi naa thi icha renthe de nguixin sasendajni (Mateo 6:9, 10).
THI XRAXAUN INCHINA: “Ndo Dio thi nthagathuná thi tángi”.
Keʼe dexraxaun suixin.
THI KUANGINÁ
Xi jiaʼan, Adan ko Eva, kasuexin ni teʼi anto tsje thi jiaʼan jii ngataʼa Nunthe ko anto tángi dathuná. Jehová anto ncheniʼi are dikun thi tángi dathuná ko mexinxin ndachro Ndo ke utuin tasinthjian Ndo kain jiʼi.
A xraxaun thi kuangi
Kexrein juincheyexin Xi jiaʼan Eva.
Kekaa thi tángi juiaʼo thi juincheʼe Adán ko Eva.
Kexrein nuanxina ke Jehová thiin are dikun Ndo kain thi tuana.
THJEE ICHA
Detsjeʼe keʼe ruchro ngaa Biblia are ndachruni pecado.
Denchelee icha de thi juiaʼo thi nduaʼa ke níchja Xi jiaʼan ngai jardín de Edén.
“¿Por qué permite Dios el sufrimiento?” (La Atalaya, 1 de enero de 2014)
Detsjeʼe naa thi ncheʼe ke nthasujiná ko ke kai datheʼe naa thi xranchangi anto tángi.
“¿Por qué sucedió el Holocausto judío? ¿Por qué Dios no lo impidió?” (Artículo de jw.org)
Detsjeʼe keʼe kuangi naa thi xii ke betan anto tsje thi tángi.