شاید تُسی اپنے گھر والیاں دی مخالفت دا سامنا کر رہے او۔ یاں شاید تُسی خدا دی بادشاہی نُوں اپنی زندگی چ سب توں زیادہ اہمیت دین لئی زیادہ پیسے کمان دے موقعیاں تے اسائشاں نُوں قربان کر دِتا اے۔ ‎(‏متی 6:‏33‏)‎‏ جے تُسی اِنج کیتا اے تے تُسی پورا یقین رکھ سکدے او کہ یہوواہ تواڈیاں ایہناں قربانیاں دی بڑی قدر کردا اے۔ ‎(‏عبرانیوں 6:‏10‏)‎‏ شاید تُسی وی یسوع دی ایس گل دا تجربہ کیتا ہوئے:‏ ”‏جنہے وی میری خاطر تے خوش‌خبری دی خاطر گھر یاں زمیناں یاں بھراواں یاں بھیناں یاں ماں یاں پیو یاں بچیاں نُوں چھڈیا اے اوہنوں ایس زمانے چ سو گُنا زیادہ ملے گا۔ اوہنوں گھر، بھرا، بھیناں، مانواں، بچے تے زمیناں مِلن گیاں۔ پر ایہدے نال نال اوہدے تے ظلم وی ہوئے گا۔ نالے آن والے زمانے چ اوہنوں ہمیشاں دی زندگی ملے گی۔“‏ ‎(‏مرقس 10:‏29، 30‏)‎‏ یقیناً تُسی جیہڑیاں قربانیاں دِتیاں نیں، اوہناں دے بدلے توانوں کِتے زیادہ برکتاں وی مِلیاں نیں۔—‏زبور 37:‏4۔ م24.‏03 ص.‏ 9 پ.‏ 5

جدوں یہودیہ چ رہن والے مسیحیاں نُوں سخت کال دا سامنا کرنا پیا تے انطاکیہ دی کلیسیا دے بھین بھراواں نے ایہہ فیصلہ کیتا کہ اوہ اپنی مالی حیثیت دے مطابق کجھ نہ کجھ دین گے تاکہ یہودیہ چ رہن والے بھراواں لئی اِمداد بھیجی جائے۔ ‎(‏اعمال 11:‏27-‏30‏)‎‏ انطاکیہ دے مسیحی یہودیہ دے مسیحیاں توں کافی دُور رہندے سن۔ پر فیر وی اوہناں نے اپنے بھین بھراواں دی مدد کرن لئی قدم چُکیا۔ ‎(‏1-‏یوحنا 3:‏17، 18‏)‎‏ اَسی وی اوہناں بھین بھراواں لئی ہمدردی وکھا سکنے آں جنہاں نُوں کسے آفت دا سامنا کرنا پیندا اے۔ اِنج کرن لئی اَسی بزرگاں کولوں پچھ سکنے آں کہ کیہہ اَسی اِمدادی کم چ اوہناں دی کوئی مدد کر سکنے آں۔ ایہدے علاوہ اَسی عطیات دے سکنے آں یاں آفت دا سامنا کرن والے بھین بھراواں لئی دُعا کر سکنے آں۔ شاید ساڈے بھین بھراواں نُوں اپنیاں بنیادی ضرورتاں نُوں پورا کرن لئی وی ساڈی مدد دی لوڑ ہووے۔ اَسی چاہنے آں کہ جدوں ساڈا بادشاہ یسوع مسیح عدالت کرن لئی آئے تے اوہ سانوں اپنے بھین بھراواں لئی ہمدردی ظاہر کردے ہوئیاں ویکھے تے سانوں کہوے کہ ”‏بادشاہی نُوں حاصل کرو۔“‏—‏متی 25:‏34-‏40‏۔ م23.‏07 ص.‏ 4 پ.‏ 9، 10؛‏ ص.‏ 6 پ.‏ 12

یسوع نے یہوواہ وانگوں لچکداری ظاہر کیتی۔ زمین تے یسوع ”‏اِسرائیل دے گھرانے دِیاں گواچیاں ہوئیاں بھیڈاں“‏ چ مُنادی کرن آیا سی۔ پر اپنی ایس ذمے‌دار ی نُوں پورا کردے ہوئیاں اوہنے لچکداری ظاہر کیتی۔ مثال لئی، اِک وار یسوع کول اِک ایہو جہی عورت آئی جیہڑی غیرقوم توں سی۔ اوہنے یسوع کولوں درخاست کیتی کہ اوہ اوہدی دھی نُوں ٹھیک کر دَوے جنہوں اِک باغی فرشتہ چِمبڑیا ہویا سی۔ یسوع نے ہمدردی دی وجہ توں اوس عورت دی دھی نُوں ٹھیک کر دِتا۔ ‎(‏متی 15:‏21-‏28‏)‎‏ ذرا اِک ہور مثال تے غور کرو۔ جدوں یسوع نے زمین تے یہوواہ دی خدمت کرنی شروع کیتی تے اوہنے کہیا:‏ ”‏جیہڑا میرا شاگرد ہون توں اِنکار کردا اے، مَیں وی اوہنوں قبول کرن توں اِنکار کراں گا۔“‏ ‎(‏متی 10:‏33‏)‎‏ پر جدوں پطرس نے تِن وار یسوع دا اِنکار کیتا تے کیہہ یسوع نے اوہدے توں مُونہہ موڑ لیا؟ جی نئیں۔ یسوع جان‌دا سی کہ پطرس اپنی غلطی تے بوہت شرمندہ اے تے اوہ اِک وفادار انسان اے۔ جدوں یسوع زندہ ہویا تے اوہ پطرس نُوں ملیا تے ہوسکدا اے کہ اوہنے پطرس نُوں ایس گل دا یقین دَوایا ہووے کہ اوہنے اوہنوں معاف کر دِتا اے تے اوہ ہُن وی اوہدے نال پیار کردا اے۔ ‎(‏لُوقا 24:‏33، 34‏)‎‏ یہوواہ خدا تے یسوع مسیح لچک‌دار نیں۔ پر ساڈے بارے کیہہ؟ یہوواہ چاہندا اے کہ اَسی وی لچک‌دار ہوئیے۔ م23.‏07 ص.‏ 21 پ.‏ 6، 7