Iaʼmyaj juutypɨk akwiñkejayyajta toyoʼoyi

YOMARA, Marcelo e Hiver ityyaj en tuum xutyu tɨgan̈juj itywɨʼɨp Guatemala, pero kaʼchtyiyaj. Yomara moj ikuyujkaʼ jeʼm Biblia kun jeʼm Testigojyaj, y okmɨ jeʼm ityɨwɨtam mojtyim kuyuujiyaj. Pero dyaʼ idyɨk wɨap imayyaj braille. Jeʼyukmɨ jeʼm ikkuyujyajpaʼap imayba idyɨk jeʼm párrafojyaj y jeʼm textos.

Tsaam idyɨk tan̈kaʼ iñɨkyaj jeʼm an̈tuʼumaajiyaj, jeʼm An̈tuʼumayoʼytyɨk maaj toomipɨk ichɨʼyayyajpa idyɨk 40 minuto, y jeʼeyaj dyaʼ idyɨk wɨap iñɨkyaj ikutyum. Jeʼyukmɨ jeʼm tɨwɨtam ityyajwɨʼɨp jeʼm kumunjom ininɨkyajpa idyɨk jeʼm an̈tuʼumaajiyaj. Y, jesɨk mojom iknasyaj asignación en jeʼm an̈tuʼumaaji de entre semana, jeʼm tɨwɨtam iyooxpaʼtyajpa idyɨk iga ijɨɨsaktsɨʼyyajiñ tyi nɨmyajpa.

En mayo de 2019, moj iwatta jeʼm an̈tuʼumaajiyaj jeʼm an̈eymɨ juuty ityyaj, y tuum an̈komɨʼɨyi iga kuyooxaoyyajpa idyɨk juʼuts precursores regulares nɨk ityiyaj peʼm an̈eymɨ. Yɨʼp an̈komɨʼɨyi ipɨkyaj ijɨɨxi iga in̈kejayyajpa yɨʼp tukuteen tɨwɨtam iga imayyajiñ y ijayyajiñ braille, pero dyaʼ idyɨk ijoodon̈yaj juutypɨk in̈kejayyajpa. Jeʼyukmɨ oyyaj en tuum biblioteca iga wɨaiñ ikuyujkayaj braille y wɨaiñ in̈kejyaj.

Dyaʼ waatyña meses nas y yɨʼpyaj tɨwɨtam wɨabam idyɨk imayyaj braille, yɨʼp iyooxpaʼtyaj iga mɨjayajiñ espiritualmente.a Yomara, Marcelo e Hiver sɨɨ kuyooxaoyyajpa juʼuts precursores regulares, y Marcelo kuyooxaoʼyba juʼuts siervo ministerial. Tumtum semana putyajpa jeʼm an̈matkuy y nɨkyajpa jeʼm an̈tuʼumaajiyaj, y tsaam maymayyaj jesɨk iwatyajpa yɨʼɨmpɨk.

Yɨʼp tukuteen tɨwɨtam tsaam maymayyaj por ityumpɨy jeʼm yooxpadoʼoyi y jeʼm toyoʼoyi iga akwiñkejayñeyajta. Yomara nɨmpa: «Dendepam añixpɨktaʼm jeʼm tɨwɨtam, akwiñkejayñetaʼm nuntapɨk toyoʼoyi». Y Marcelo nɨmpa: «Anaitytyaʼm wɨtampɨk amigojyaj jeʼm kumunjom y tuum familia iga ity ikuwɨtyi naxyukmɨ y tsaam nakwiñkejayyajtaap toyoʼoyi». Yomara y jeʼm ityɨwɨtam tsaam sɨʼ in̈joʼkyaj jeʼm jaama iga wɨap iaʼmyaj jesɨk yɨʼp Nas tsɨʼyba juʼuts tuum paraíso (Sal. 37:10, 11; Is. 35:5).