Kupakpa jempɨk sɨ’ inin̈jo’k

1. ¿Tyi’iga wɨap tannɨm iga jempɨk jɨykamaytya Abrahán kupakpa idyɨk?

JEHOVÁ ijɨykamay iamigo Abrahán iga iniitypa imaanɨk y je’am ikuyukmɨ kumayketyajtaap ityumpɨy jempɨk ityyaj yɨ’p Naxyukmɨ (Gén. 15:5; 22:18). Iga iniity idyɨk ja’yan̈ fe, iwɨkupɨk iga kupakpa ju’uts nɨ’maytya. Pero jesɨk Abrahán iniity 100 iamtyɨy y iyoomo’ 90, dyanam iniityyaj idyɨk ni tuum imaanɨk (Gén. 21:​1-7). Je’m Biblia nɨmpa iga Abrahán «icupɨc iga Dios wɨa̱p iwat, […] iga tsɨ́ypa juuts ja̱tuŋpɨc para icuwɨ̱t́i yɨ́p naxyucmɨ juuts iñɨ́máy» (Rom. 4:18). Y jempɨk sɨ’ in̈jo’k idyɨk kupak: iniity tuum imaanɨk, Isaac. ¿Tyi’iga iwɨkupɨk iga Jehová ikkupakpa jempɨk ijɨykamay?

2. ¿Tyi’iga Abrahán iwɨkupɨkne’ idyɨk iga kupakpa ju’uts Jehová ijɨykamay?

² Iga Abrahán iwɨixpɨkpa idyɨk Jehová, iwɨkupɨk iga kupakpa jempɨk jɨykamaytya (Rom. 4:21). Tsaam iniity idyɨk fe, je’yukmɨ Jehová ia’m ju’uts tuum wɨbɨk pɨɨxiñ (Sant. 2:23). Ju’uts nɨmpa Romanos 4:​18, Abrahán dya’ numaaj ikupɨk, in̈jo’k jempɨk jɨykamaytya. Tan̈kɨ’pin̈ta’miñ je’m capítulo 5 de Romanos juuty je’m apóstol Pablo ijɨyki’m je’m an̈jogo’oyi.

3. ¿Tyi in̈mat Pablo jesɨgam ijɨyki’m je’m an̈jogo’oyi?

³ Pablo in̈matpa tyi’iga wɨap tan̈kupɨk iga kupakpa jempɨk sɨ’ tanan̈jo’k (Rom. 5:5). Iganam tan̈kɨ’pin̈ta’mpa Romanos 5:​1-5, kujɨɨsɨ juutypɨk je’m inin̈jogo’oyi majtyim pɨɨmiane’. Miyooxpa’tpatyim juutypɨk wɨap impɨɨmchi’. Wiñtyi, tanan̈matta’mpa tuum wɨbɨk an̈jogo’oyi jempɨk Pablo nɨm iga kupakpa y dya’ tan̈ya’kwatpa.

TUUM WƗBƗK AN̈JOGO’OYI

4. ¿Tyi in̈matpa Romanos 5:​1, 2?

⁴ (Maayɨ’ Romanos 5:​1, 2). Pablo ija’yay yɨ’pyaj an̈matyiyaj je’m tɨwɨtam ityyajwɨ’ɨp idyɨk Roma. Je’eyaj ikwiñkejyaj fe jesɨk iixpɨkyaj Jehová y Jesús, y tsɨ’yyaj ju’uts cristianojyaj. Je’yukmɨ Dios ia’m ju’uts pɨxiñtyam y yomtam «d́apɨc táŋcaɨ́y» y ikupin̈ kun espíritu santo. Dende jesɨgam, moj iniityyaj tuum wɨbɨk an̈jogo’oyi.

5. ¿Ju’p an̈jogo’oyi iniityyaj je’m kupin̈neyajtawɨ’ɨp?

⁵ Maaj okmɨ, Pablo in̈maday ju’p an̈jogo’oyi iniityyaj je’m cristianojyaj kupin̈neyajtawɨ’ɨp de Éfeso. In̈maday iga ipɨktson̈yajpa tuum «herencia» (Efes. 1:18). Y jempɨk ityyaj Colosas an̈madayyajta juuty ipɨktson̈yajpa jempɨk sɨ’ in̈jo’kyaj idyɨk. Nɨ’mayyajta: «Tsa̱m iniŋjóctámpa iga michiiba Dios jém wɨ̱tampɨc cosa jém miccáyayñewɨɨp sɨŋyucmɨ» (Col. 1:​4, 5). Je’yukmɨ jempɨk kupin̈neyajta iniityyaj je’m an̈jogo’oyi iga nɨkyajpa sɨn̈yukmɨ y tsɨ’yyajpa ju’uts an̈jago’oyi kun Cristo (1 Tes. 4:​13-17; Apoc. 20:6).

6. ¿Tyi nɨm de je’m ian̈jogo’oyi tuum tɨɨwɨ kupin̈netawɨ’ɨp?

⁶ Je’m kupin̈neyajtawɨ’ɨp tsaam ichoowaixyajpa je’m an̈jogo’oyi iniityyajwɨ’ɨp. Ju’uts akwiñkejo’oyi, en 1991 je’m tɨɨwɨ Frederick Franz nɨm yɨ’ɨmpɨk: «Je’m tanan̈jogo’oyi kupakpa, y tumtum de taɨchtyam, je’m 144,000 tampɨktson̈ta’mpa jempɨk Dios tajɨykamayñe’, yɨkxpɨk an̈jogo’oyi pɨɨmi wɨɨ». ¿Ju’uts in̈jaam idyɨk iga ja’yan̈ amtyɨyam ikuyooxane’ Dios? Je’ nɨm: «Dya’ tantsakpa iga tantsoowaixtya’mpa je’m an̈jogo’oyi. Dya’ tyi ijoo ju’tsan̈ tiempo tanan̈jo’kta’mpa. Seguido tanan̈jo’kta’miñ mex siiga nasuntaap tuum millón de amtyɨy. Sɨɨ majtyim antsoowaixpa».

7, 8. ¿Ju’p an̈jogo’oyi iniityyaj ja’yan̈yaj jempɨk ikuyooxayajpa Dios? (Romanos 8:​20, 21).

⁷ Yɨ’p jaama ja’yan̈yaj jempɨk ikuyooxayajpa Jehová iniityyaj tun̈gak an̈jogo’oyi. ¿Ju’ppɨk? Jempɨk sɨ’ in̈jo’k idyɨk Abrahán: tuum ityi dyapɨk kuyajpa yɨ’p Naxyukmɨ (Heb. 11:​8-10, 13). Pablo ijɨyki’mtyim yɨ’p wɨbɨk an̈jogo’oyi (maayɨ’ Romanos 8:​20, 21). Jesɨk mich in̈kuyujka’ Bibliajom jempɨk naspa tannɨgɨyo’oyijom, ¿tyi jempɨk maaj in̈kusu’nɨy? ¿Mimaymaya jesɨk iñjoodon̈a iga nu’kpa je’m jaama jesɨk dyam mityan̈kaɨ’yba? ¿Mimaymaya jesɨk iñjoodon̈a iga aktsukumyajtaap je’m ka’aneyajwɨ’ɨp y ityyajpa en je’m Paraíso? Iga Dios in̈matne’ tyi iwatpa tannɨgɨyo’oyijom, mich iniity tuum wɨbɨk an̈jogo’oyi.

⁸ Tantumpɨytyam tanaitytya’m tuum wɨbɨk an̈jogo’oyi iga tamaymaywatpa, dya’ tyi ijoo siiga tanɨkpa sɨn̈yukmɨ o taitypa yɨ’p Naxyukmɨ. Tumtum jaama majnam wɨap tampɨɨmchi’ je’m tanan̈jogo’oyi. ¿Juutypɨk? Tan̈kɨ’pin̈ta’miñ jempɨk ijaykunu’k Pablo. Jempɨk nɨm, tayooxpa’tpa tan̈kupɨk iga jempɨk sɨ’ tanan̈jo’k kupakpa.

JUUTYPƗK TAMPƗƗMCHI’IBA JE’M TANAN̈JOGO’OYI

9, 10. Ju’utstyim Pablo, ¿tyityam tannaskata’mpa? (Romanos 5:3; a’mɨtyim je’m imagenyaj).

⁹ (Maayɨ’ Romanos 5:3). Pablo nɨm iga jesɨk taya’achaap tayooxpa’tpa tampɨɨmchi’ je’m tanan̈jogo’oyi. Tantumpɨytyam tanjoodon̈tam iga taya’achata’mpa. Tan̈kɨ’pin̈ta’miñ jempɨk Pablo iñɨ’may je’m cristianojyaj ityyajwɨ’ɨp idyɨk Tesalónica: «Cuando ait́t́a con mimicht́am, manaŋmadáy iga tayaachwattamta̱p. Nu̱ma je̱mpam iññascaneta» (1 Tes. 3:4). Y jempɨk ityyaj Corinto nɨ’mayyajta: «Ansunpa iga iñjo̱dóŋa̱támiñ iga tsa̱m pɨ̱mi ayaachwattamta̱ [ . . . ]. Ɨch anjɨ̱stámpa id́ɨc iga jemum accaatamta̱p» (2 Cor. 1:8; 11:​23-27).

¹⁰ Yɨ’p jaama tannaskata’mpatyim ya’achaajiyaj (2 Tim. 3:12). ¿Tyityam iññaskane’ dende moj in̈kupɨk y iñtyun̈ɨy Jesús? Wɨapsɨ iga iñamigojyaj o iñfamiliaryaj mikuxikkayajpa o miya’achwatneyaj. ¿Inin̈teeñkamokne’ kobakpiiji juuty miyooxaap iga juchixkej in̈wɨwatpa? (Heb. 13:18). ¿Sɨ’ miya’achwat je’m An̈jago’oyi iga inin̈madayyajpa tun̈gakyaj je’m an̈jogo’oyi iniitywɨ’ɨp? Dya’ tyi ijoo ju’ptam kobakpiijiyaj tanan̈teeñkamokta’mpa, Pablo nɨm iga tamaymayata’miñ. ¿Tyi’iga?

11. ¿Tyi’iga tanya’achɨytya’miñ je’m kutɨ’ɨchiyaj?

¹¹ Tamaymayaap jesɨk tanan̈teeñkamokpa kutɨ’ɨchiyaj iga yɨ’p tayooxpa’tpa tanaity tuum wɨbɨk jɨɨxi. Romanos 5:3 nɨmpa: «Cuando tayaachwatta̱p, jesɨc tanaŋyujpa más iga tanyaachɨ́yiñ». Tantumpɨytyam taya’achata’mpa, pero wɨɨ iga tanya’achɨytya’miñ. Yɨ’ɨmpɨgam wɨap tampɨktson̈ta’m jempɨk sɨ’ tanan̈jo’kta’m. Dya’ tatsɨ’ytyo’oba ju’uts weeñiyaj iga jeexyaj ju’uts je’m pak ijɨykimwɨ’ɨp Jesús iga aktɨn̈yaj je’m tsa’an̈jom. Ipɨktson̈yajpa kun maymayaaji je’m «wɨbɨc aŋma̱t́i», pero jesɨk «cutɨ́tsta̱p [ . . . ] ichacpa jém wɨbɨc tuŋ» (Mat. 13:​5, 6, 20, 21). Dya’ tan̈kusu’nɨytya’mpa tanya’achata’m, pero jesɨk tanya’achɨytya’mpa tawɨwada’yba. Tana’mta’miñ tyi’iga.

12. ¿Juutypɨk tayooxpa’tpa jesɨk tanya’achɨ’yba?

¹² Santiago in̈mat ju’tspɨy tawɨwada’yba jesɨk tanya’achɨ’yba. Nɨm: «Yaachɨɨyɨ más y más cuando micutɨ́tsta̱p, jesɨc quejpa iga capsum iŋcupɨc parejo. Wɨa̱p iŋwat juuts ixunpa Dios. Jesɨc d́a t́i mit́ogóyáy» (Sant. 1:​2-4). Santiago nɨm iga jesɨk tanya’achɨ’yba tawɨwada’yba. ¿Juutypɨk? Tayooxpa’tpa iga majtyim tanan̈jo’guiñ, tanaidyiñ fe y tanaidya’yiñ confianza Dios. Tana’mta’miñ juutypɨknam tayooxpa’tpa.

13, 14. ¿Tyi naspa jesɨk tanya’achɨ’yba, y juutypɨk tawɨwada’yba? (Romanos 5:4).

¹³ (Maayɨ’ Romanos 5:4). Pablo nɨm iga jesɨk «tanyaachɨ́ypa cuando tacutɨ́tsta̱p […], jesɨc Dios tsa̱m tawɨ̱ixpa» (Rom. 5:4). Jehová dya’ maymay jesɨk taya’achaap, pero jesɨk takupɨgo’yba y tanya’achɨ’yba je’ maymayaap (Sal. 5:12).

¹⁴ Tan̈kujɨɨsta’miñ Abrahán. Jehová tsaam iwɨix iga iya’achɨy je’m kutɨ’ɨchiyaj, iamigoja y ia’m ju’uts tuum wɨbɨk pɨɨxiñ (Gén. 15:6; Rom. 4:​13, 22). Jeempɨktyim naspa kun taɨchtyam siiga takupɨgo’yba y tanya’achɨ’yba. Tantumpɨytyam wɨap tan̈watta’m yɨ’ɨmpɨk, dya’ tyi ijoo ju’p yooxakuy tanaity je’m kumunjom, ju’tsan̈ tanamtyɨy, tyi sɨ’ tannaska’ o siiga tan̈kutɨ’ɨyɨ’yba tan̈wat tyidyin̈kej. ¿Sɨ’ inin̈teeñkamok kutɨ’ɨchiyaj? Jɨɨskupakneɨ’ iga Dios tsaam maymayaap jesɨk iñya’achɨ’yba, y yɨ’p ipɨɨmchi’iba je’m inin̈jogo’oyi.

MAJTYIM TAN̈KUPƗKPA JEMPƗK SƗ’ TANAN̈JO’K

15. ¿Tyiñam nɨm Pablo, y tyi wɨap iga tanakwa’ktaap?

¹⁵ Ju’uts tan̈kɨ’pin̈neta’m, Pablo nɨm iga Dios tawɨixpa jesɨk tanya’achɨ’yba. Tana’mta’miñ tyiñam nɨm: «Siiga Dios tsa̱m tawɨ̱ixpa, jesɨc mást́im tanjo̱doŋ iga tanJa̱tuŋ Dios iccupacpa juuts tajɨycámayñe. [ . . . ] Jesɨc d́a nunca taŋyácpa» (Rom. 5:​4, 5). Wiñtyi, en Romanos 5:2 Pablo nɨm iga je’m cristianojyaj ityyajwɨ’ɨp idyɨk Roma nu’kpa jaama iga nɨkpa ityiyaj «jém wɨ̱co̱m ju̱t́ it́ Dios». Wɨapsɨ iga tanakwa’ktaap: «Siiga Pablo ijɨykimneum idyɨk je’m an̈jogo’oyi, ¿tyi’iga eybɨk ijɨyki’m?».

16. An̈maatɨ tyi tayooxpa’tpa tan̈kupɨk iga jempɨk nɨmpa je’m Biblia kupakpa. (A’mɨtyim je’m imagenyaj).

¹⁶ Wɨap tan̈kutɨ’ɨyɨy tyi nɨmto’oba idyɨk Pablo siiga tanjɨɨskupakne’eba iga wɨap tampɨɨmchi’ je’m tanan̈jogo’oyi. Ju’uts akwiñkejo’oyi, kujɨɨsɨ jesɨk min̈madaytya iga wɨap iñity juchixkej yɨ’p Naxyukmɨ en tuum paraíso. Mex iga wɨɨ mu in̈kumaton̈, wɨapsɨ iga dya’ jobity in̈kupɨk iga kupakpa. Pero jesɨk maaj iñixpɨk Jehová y tyityam in̈kejpa je’m Biblia, majtyim in̈kupɨk.

17. ¿Tyiñam miyooxpa’tne’ iga majnam in̈kupɨguiñ jempɨk sɨ’ inin̈jo’k?

¹⁷ Okmɨ iga michin̈, seguido in̈kuyujkane’ je’m Biblia y mimɨjane’ espiritualmente, yɨ’p miyooxpa’tne’ iga majnam impɨɨmchi’iñ inin̈jogo’oyi (Heb. 5:​13–6:1). Wɨapsɨ iga iññaskane’ ju’uts nɨmpa Romanos 5:​2-4, inin̈an̈kamokne’ kutɨ’ɨchiyaj y iña’mne’ juutypɨk Jehová miyooxpa’tne’. Iñjoodon̈ iga mityoyba, je’yukmɨ in̈kupɨkpa iga kupakpa jempɨk ijɨykamne’. Y sɨɨ je’m inin̈jogo’oyi dyam jeex ju’uts wiñtyi. Jeempɨgam inikwiñkejpa iñityijom jesɨk in̈wɨpɨkpa iñjɨɨxi, ju’utspɨk trato iñchi’iba iñfamilia y juutypɨk impɨkpa intiempo.

18. ¿Tyi’iga wɨap tan̈kupɨk iga Jehová ikkupakpa jempɨk ijɨykamne’?

¹⁸ Pablo nɨm iga jesɨk tawɨixpa Dios tanaitypa tuum an̈jogo’oyi y yɨ’p tayooxpa’tpa tan̈kupɨk iga kupakpa jempɨk ijɨykamne’. Je’yukmɨ Pablo iñɨ’may je’m cristianojyaj: «Siiga tanjɨ̱spa iga jém tanJa̱tuŋ Dios agui wɨa̱p, jesɨc d́a nunca taŋyácpa; y Dios [iespíritu], jém tachiiñewɨɨp jém [tananmajom], tsa̱m tayo̱xpátpa iga wɨa̱iñ taŋcutɨɨyɨ́y iga tsa̱m pɨ̱mi tatoypa» (Rom. 5:5). Mich wɨaptyim in̈kupɨk iga kupakpa jempɨk sɨ’ inin̈jo’k.

19. ¿Tyi tan̈kupɨkneta’m?

¹⁹ Odoy kuja’ama’ayɨ jempɨk Jehová ijɨykamay Abrahán. Je’ tsaam iwɨix y ia’m ju’uts iamigo. Y jempɨk sɨ’ in̈jo’k idyɨk, kupak. Je’m Biblia nɨmpa: «Tsa̱m iyaachɨ́ypa, iŋjócpa hasta que ipɨctsoŋpa t́it́am ijɨycámayñe Dios» (Heb. 6:15; 11:​9, 18; Rom. 4:​20-22). Siiga takupɨgo’yba y tanya’achɨ’yba ju’utstyim iwat Abrahán, tampɨktson̈ba jempɨk sɨ’ tanan̈jo’k. Yɨ’p an̈jogo’oyi tsaam tamaymaywatpa (Rom. 12:12). Pablo nɨm: «Ɨch ansunpa iga Dios mimaymaywad́iñ iga d́a t́i iŋcɨ̱ŋpa [ . . . ]. Dios [iespíritu] miyo̱xpáttámiñ iga más y más iñjɨ̱stámpa jém ja̱ma cuando cupacpa it́u̱mpɨy cosa juuts tajɨycámayñe Dios» (Rom. 15:13).