Tsaam amaymay iga jeʼm añityijom an̈kuyooxaneʼ Jehová

JUʼUTS IDYƗK JEʼM AÑITYITYAM

Anay jeʼm amtyɨy 1934. Anjaatun̈yaj ityyaj idyɨk Suiza, pero okmɨ nɨk ityiyaj Timmins, tuum tɨgan̈juj itywɨʼɨp idyɨk Ontario (Canadá). Jeʼm amtyɨy 1939, anaapa moj imay jeʼm Totjaayi Takjoodon̈apaʼap y okmɨ mojtyim nɨki jeʼm an̈tuʼumaajiyaj iwatyajpaʼap idyɨk jeʼm Jehová itestigojyaj. An̈kusietejtam ananɨktatamtaap idyɨk. Dyaʼ maaj jaʼy anaapa chin̈.

Anjaatun̈ dyaʼ idyɨk iwɨan̈jaam iga anaapa tsɨʼyiñ juʼuts Testigo, pero jeʼ dyaʼ ijagan̈tsak Jehová. Jeʼ duroj ikuyooxa Jehová, mex iga jeʼm amtyɨy 1940 akteeñan̈jakta jeʼm an̈matkuy. Mex iga anjaatun̈ tsaam idyɨk imalmalnɨʼmaʼyba anaapa jeʼ juchixkej ityoyba idyɨk. Iga anaapa agui iyaʼachɨy yɨʼbam ayooxpaʼttaʼm iga atsɨʼytyaʼmiñ juʼuts Testigos. Tsaam amaymayataʼm iga anjaatun̈ ikak ijɨɨxi y mojom atoytyaʼm.

MOJ AN̈KUYOOXA JEHOVÁ A TIEMPO COMPLETO

Jeʼm amtyɨy 1950 aoy tuum mɨjpɨk an̈tuʼumaaji Nueva York iga inɨɨyi “Aumento de la Teocracia”. Jeem añixpɨk jaʼyan̈ tɨwɨtam iga miññeyaj tun̈gak an̈eymɨ y ammaton̈ tyityam iñaskaneyaj jeʼm tɨwɨtam jempɨk oyñeyajum jeʼm Escuela de Galaad. Yɨʼp majtyim aanmajan̈chiʼ iga akuyooxaoʼyiñ a tiempo completo. Jeʼyukmɨ jesɨk anuʼk antɨkkɨʼɨm jobity an̈kukom jeʼm solicitud iga atsɨʼyba juʼuts precursor regular. Jesɨk akutson̈ jeʼm sucursal de Canadá anɨʼmayyaj iga wiñtyi achin̈iñ. Jeʼam an̈wat jeʼm jaama 1 de octubre de 1950. Jesɨk nasneum idyɨk tuum mes atsɨʼy juʼuts precursor regular, y akutsatta iga akuyooxaoʼyiñ Kapuskasing, tuum tɨgan̈juj iga juʼumɨ idyɨk tsɨʼyba juuty ityyaj idyɨk anfamilia.

Jeʼm amtyɨy 1951, jeʼm sucursal ianmajan̈chiʼ jeʼm tɨwɨtam ijɨyyajpaʼap francés iga nɨguiñ kuyooxaoʼoyiyaj Quebec, jeem dyaʼ juʼchan̈ idyɨk Testigojyaj ityyaj. Ɨch anjɨʼyba idyɨk inglés y fránces jeʼyukmɨ akutsatta Rouyn. Juʼuts wiñtyi anan̈mat dyanam idyɨk i añixpɨkpa jeem. Pero jesɨk añixpɨk Marcel anamigoja y tsaam anawɨnanɨgaytyamta. Cuatro amtyɨy akuyooxaoy Quebec, y okmɨ atɨʼpta iga akuyooxaoʼyiñ juʼuts precursor especial.

GALAAD Y TUUM JƗƗXI IGA TAN̈KAʼA MU ANAKUPAK

Jesɨk aity idyɨk Quebec atɨʼpta iga anɨguiñ jeʼm clase 26 jeʼm Escuela de Galaad, wattawɨʼɨp South Lansing (Nueva York). Anakkuyaj jeʼm jaama 12 de febrero de 1956, okmɨ akutsatta Ghana,b en África Occidental. Wiñtyi iga anɨguiñ eybɨk aseet Canadá iga anan̈joʼkpa antoʼodan̈juj. Anjɨɨs iga dyaʼ idyɨk maaj jaʼyba.

Pero anan̈joʼk siete meses jemɨk Toronto iga pudyiñ jeʼm antoʼodan̈juj. Iganam sɨʼ idyɨk anan̈joʼk, jaʼy aityi kun jeʼm familia Cripps. Iniityyaj idyɨk tuum iyommaanɨk iga iñɨɨyi Sheila, y anakusuʼnɨytyamta. Jesɨk anjɨɨs iga an̈koʼmɨytyaʼmpam nuʼkum jeʼm antoʼodan̈juj. Anan̈wejpaʼttaʼm Jehová y ampɨktaʼm jeʼm jɨɨxi iga ɨch nɨkpa akuyooxaoʼoyi pero seguido anakutsadaytyamtaap cartas iga maaj okmɨ wɨaiñ an̈koʼmɨytyaʼm. Mex iga tan̈kaʼa, okmɨ anaʼmtaʼm iga ampɨknetaʼm idyɨk tuum wɨbɨk jɨɨxi.

Ananɨgay tuum mes iga wɨaiñ annuʼk jeʼm capital de Ghana. Iga atsɨʼy juʼuts superintendente de distrito, nɨkpa idyɨk anjooyay Ghana, Costa de Marfil y Togolandia (sɨɨ ixpɨktaap juʼuts Togo). Jeʼm sucursal ayooxpaʼt iga wɨaiñ anakkupak anyooxakuy. Watykɨy asɨʼɨba idyɨk an̈kutyum pero amaymay iga nɨkpa anjooyay jeʼm tɨwɨtam.

Jesɨk wattaap idyɨk jeʼm mɨjpɨk an̈tuʼumaaji ayooxpadoʼybatyim iga dyaʼ idyɨk anaitytyaʼm juuty an̈tuʼumataʼmpa y iga odoy anoʼotaʼmiñ jeʼm jaama, jeʼm tɨwɨtam ipɨkyaj ojwiñ y suuyat. Iga dyaʼ juuty anakkaytyaʼmpa idyɨk jeʼm wiʼkkuy jeʼm tɨwɨtam ininɨkyajpa animatyaj y jemɨgam ikkaʼayajpa idyɨk.

Tsaam idyɨk xikyajpa kun tyityam naspa jeem. Anjɨɨspa jesɨk jeʼm tɨɨwɨ Herb Jennings,c sɨʼ idyɨk iñajɨʼyoy, kuwijay tuum xix y nas an̈kukjom juuty ityyaj idyɨk jeʼm tɨwɨtam, jeʼm tɨɨwɨ numaaj aʼman̈jak jesɨk imatsyaj jeʼm xix, jempɨk ityyaj idyɨk jeem tsaam pɨɨmi kɨan̈tojyaj.

Tumtum semana in̈kejpa idyɨk jeʼm película La Sociedad del Nuevo Mundo en acción. ¡Jempɨk iaʼmyajpa idyɨk tsaam pɨɨmi ikusuʼnɨyyajpa iga ni keman dyaʼ idyɨk oyñeʼ iaʼmyaj! Tsaam maymayayaj y kɨan̈tojyaj jesɨk iaʼmyaj iga weeñi chin̈yajpam idyɨk ixɨʼyaj. Yɨʼp video iyooxpaʼtyaj iaʼmyaj iga tumtyi jɨɨxi tanaitytyaʼm.

Wɨsna amtyɨy okmɨ iga aity idyɨk África, aoy jeʼm mɨjpɨk an̈tuʼumaaji iga watta en Nueva York jeʼm amtyɨy 1958. ¡Tsaam amaymaya iga eybɨk anaʼm Sheila! Jeʼ sɨʼ idyɨk ikuyooxaoy en Quebec y nɨknetyim idyɨk jeʼm mɨjpɨk an̈tuʼumaaji. Anakutsadaytyamtaap idyɨk cartas y sɨʼ eybɨktyim anaixtyamta, annɨʼmay iga an̈koʼmɨytyaʼmiñam. Anakwaʼk jeʼm tɨɨwɨ Knorrd siiga Sheila wɨap iñɨk Galaad y okmɨ kutsattaiñ África, y jeʼ anɨʼmay iga wɨap. Jesɨk Sheila nuʼk Ghana, an̈koʼmɨytyaʼm en Accra jeʼm jaama 3 de octubre de 1959. Iga duroj an̈kuyooxataʼm Jehová anaʼmtaʼm juutypɨk akumaykettaʼm.

AWAGAKUYOOXAOYTAʼMPA JEMƗK CAMERÚN

Jeʼm amtyɨy 1961 akutsattamta jemɨk Camerún, anɨʼmaytya iga ayooxpadoʼyiñ iga idyiñ tuum joomipɨk sucursal. Iga atsakta juʼuts encargado de peʼm sucursal anaity idyɨk jaʼyan̈ yooxakuy y an̈kuyujkaiñ idyɨk tyidyin̈kej. Jeʼm amtyɨy 1965 anjoodon̈a iga Sheila maanɨk tsɨʼyñeum idyɨk, uxan̈ tan̈kaʼa ampɨktson̈taʼm iga amanɨgɨytyaʼmum idyɨk. Jesɨk sɨʼbam idyɨk an̈kujɨɨstaʼm juutypɨk anakmɨjataʼmpa jeʼm ammanɨktam, pɨɨmi ammalnaskataʼm.

Sheila aʼy jeʼm imaanɨk. Jeʼm doctor anɨʼmaytyaʼm iga jeʼ idyɨk tuum jaychɨɨxiʼ. Mex iga nasneum 50 amtyɨy dyaʼ wɨap an̈kujaʼamaytyaʼm jempɨk annaskataʼm. Mex iga pɨɨmi an̈yaʼkwattaʼm jempɨk annaskataʼm seguido anakkupaktaʼm jeʼm anyooxakuytyam achiʼiñetamtawɨʼɨp.

Jeʼm tɨwɨtam ityyajwɨʼɨp idyɨk Camerún tsaam yaʼachwatyajta iga dyaʼ tɨgɨykuʼmyaj jeʼm política y maaj tan̈kayaj jeʼm iityiyaj jesɨk tsukum iga kupɨn̈taap i tsɨʼyba juʼuts an̈jagoʼoyi. Jeʼm jaama 13 de mayo de 1970 jeʼm an̈jagoʼoyiyaj dyam iaʼmchiyaj iga jeʼm Jehová itestigojyaj in̈matyajiñ jeʼm Dios In̈maatyi. Akkaʼyaytyamta jeʼm sucursal juuty aitytyaʼm idyɨk, dyamtyim aaʼmchiʼityamta iga aitytyaʼmiñ jeem y numaaj jaʼy aityityam cinco meses. Iga pɨɨmi antoytyaʼmpa jeʼm tɨwɨtam tan̈kaʼa mu antsaktaʼm . Dyaʼ idyɨk anjoodon̈tam tyi wɨap iñaskayaj.

Seis meses jaʼy aityityam jeʼm sucursal de Francia, dende jemɨgam idyɨk anyooxpaʼtyajpa jeʼm tɨwɨtam ityyajwɨʼɨp idyɨk Camerún. Diciembre jeʼtyim amtyɨy akutsattamta jeʼm sucursal de Nigeria, dende jemɨk jeʼm tɨwɨtam moj iyooxpaʼtyaj jeʼm sucursal de Camerún. Agui amaymayataʼm iga akuyooxaoytyaʼm Nigeria y jeʼm tɨwɨtam tsaam awɨpɨktson̈taʼm.

TAN̈KAʼA MU AMPƗKTAʼM ANJƗƗXI

En 1973 tan̈kaʼa mu ampɨktaʼm anjɨɨxi. Sheila tsaam pɨɨmi mɨmneaktɨn̈neʼ idyɨk. Iganam aitytyaʼm idyɨk Nueva York para tuum mɨjpɨk an̈tuʼumaaji, moj weeji y anɨʼmay: «Dyam wɨap anyaʼachɨy. Agui asoʼpsneʼ, juchixkej amɨmneʼeba». 14 amtyɨyam idyɨk akuyooxaoyñetaʼm en África Occidental. Pɨɨmi idyɨk amaymaytyam iga an̈wagakuyooxanetaʼm Jehová, pero sɨʼ nasuntaap iga an̈kukaktaʼmiñ añityi. Jesɨk yaj amurujityam anan̈wejpaʼttaʼm Jehová iga ayooxpaʼttaʼmiñ y ampɨktaʼm anjɨɨxi iga aseettaʼmpa Canadá, juuty wɨap idyɨk antsoʼyɨy anyoomoʼ. Tsaam tan̈kaʼa y an̈yaʼktaʼm iga dyam wɨa mu an̈kuyooxaoytyaʼm a tiempo completo.

Jesɨk anuʼk Canadá tuum amigo achiʼ yooxakuy iga imaʼyba idyɨk carro tuum an̈eymɨ itywɨʼɨp Toronto. An̈wadaytyaʼm renta tuum cuarto, anjuytyaʼm jempɨk atogoyaytyaʼm idyɨk y dyaʼ ajaʼtstaʼm. Iga an̈kuyooxatamtoʼoba idyɨk Jehová a tiempo completo anakuixtyaʼmta iga odoy anjuytyaʼmiñ tyidin̈kejyaj. Y dyaʼ maaj jaʼy kupak jempɨk anjɨɨsnetaʼm idyɨk.

Moj akuyooxaoʼoyi tumtum sábado jesɨk moj iwatta tuum An̈tuʼumayoʼytyɨk para jeʼm mɨjtampɨk an̈tuʼumaajiyaj en Norval (Ontario). Maaj okmɨ, jeʼmtyim awaʼgaytya iga akuyooxaoʼyiñ juʼuts superintendente. Iga Sheila majtyim idyɨk wɨam in̈jaam anjɨɨstaʼm iga wɨabam ampɨktson̈taʼm idyɨk yɨʼp joomipɨk yooxakuy. En Junio de 1974 anɨktaʼm juuty akuyooxaoytyaʼmpa idyɨk. Tsaam amaymaytyaʼm iga eybɨktyim idyɨk akuyooxaoytyaʼmpa a tiempo completo.

Wɨsna amtyɨy okmɨ awaʼgaytya iga akuyooxaoʼyiñ juʼuts superintendente de circuito, iga Sheila majtyim idyɨk wɨam in̈jaam ampɨktson̈taʼm yɨʼp yooxakuy. Anjooyaytyaʼmpa idyɨk tuum an̈eymɨ iga iñɨɨyi Manitoba, juuty pɨɨmi idyɨk suksugaap. Tsaam idyɨk amaymaytyam iga anjooyaytyaʼmpa jeʼm tɨwɨtam. Dyaʼ tyi ijoo juuty an̈kuyooxataʼmpa Jehová, maaj anteguedataʼmpa iga an̈wɨkuyooxataʼmiñ.

AN̈KEJAYTYA TUUM WƗBƗK JƗƗXI

Sɨʼbam idyɨk akuyooxaoy juʼuts superintendente de circuito waatyi amtyɨy, pero jeʼm amtyɨy 1978 atɨʼptamta iga nɨguiñ akuyooxaoʼoyityam en Betel de Canadá. Maaj okmɨ an̈kejaytya tuum jɨɨxi iga pɨɨmi antoʼyan̈jaam. Anɨʼmaytya iga anaknaxiñ tuum najɨʼyoʼoyi jeʼm an̈matyiimɨ francés iga jaʼyba idyɨk tuum hora y media jemɨk Montreal, pero dyaʼ awɨpuday. Jeʼyukmɨ tuum tɨɨwɨ de jeʼm Departamento de Servicio anamuru. Peʼm tiempo dyaʼ anaʼmneʼ idyɨk iga dyaʼ jaya wɨap anaknas najɨʼyoʼoyi, jeʼyukmɨ jesɨk jeʼm tɨɨwɨ an̈jɨyjak dyaʼ an̈wɨpɨktson̈. Anjɨɨspa idyɨk iga dyaʼ tumtyi jɨɨxi anaitytyaʼm. Tsaam sɨʼ ikujɨy jeʼm najɨʼyoʼoyi anaknaswɨʼɨp, dyaʼ an̈wɨpɨktson̈ jempɨk anɨʼmaytya iga maaj antegueda jempɨk sɨʼ idyɨk anjaam y dyaʼ jeʼm an̈kiʼmayoʼoyi achiʼityawɨʼɨp.

Dyaʼ maaj jaʼy tuum tɨɨwɨ jempɨk kuyooxaoʼyba jeʼm Comité de Sucursal anamuru. Annɨʼmay iga dyaʼ an̈wɨpɨktson̈ jeʼm an̈kiʼmayoʼoyi achiʼityawɨʼɨp y tsaam antoʼyan̈jaampa. Jeʼyukmɨ anamuru jeʼm tɨɨwɨ jempɨk achiʼ jeʼm an̈kiʼmayoʼoyi y annɨʼmay iga awadaʼyiñ perdón, y jeʼ iwɨpɨktson̈. Dyaʼ keman an̈kujaʼamaʼyba jempɨk annaskaʼ, wɨɨ iga juchixkej an̈wɨpɨktson̈iñ jeʼm an̈kiʼmayoʼoyiyaj achiʼityapaʼap (Prov. 16:18). An̈waʼgayñeʼ Jehová iga awadaʼyiñ perdón jesɨgam ajɨɨxtyogoy, ampɨkneʼ anjɨɨxi iga jesɨk an̈jɨyjaktaap odoy anjoʼykaiñ y akupɨgoʼyiñ.

40 amtyɨyam akuyooxaoyñeʼ jeʼm Betel de Canadá y dende jeʼm amtyɨy 1985 akuyooxaoyñeʼ en jeʼm Comité de Sucursal. En febrero de 2021, kaʼ anyoomoʼ Sheila, y pɨɨmi anjɨɨspa. Ɨch agui amɨmneaktɨn̈neʼ, iga pɨɨmi an̈wɨkuyooxaneʼ Jehová dyaʼ anjaampa jutsaap iñas jeʼm jaama (Ecl. 5:​20, nota). Mex iga annaskaneʼ yaʼachaajiyaj amaymay iga Jehová pɨɨmi akumayketneʼ. Tsaam amaymayaap iga 70 amtyɨy an̈kuyooxa Jehová a tiempo completo. An̈waʼgayñeʼ Jehová iga jempɨk mañiyajnam iwɨkuyooxayajiñtyim, an̈wɨkupɨkneʼ iga jeempɨgam wɨap iniityyaj tuum ityi maymaypɨk.