Iwɨkutson̈yaj weeñi panijyaj iga jo’yñeyaj idyɨk

Artur, tuum superintendente de circuito itywɨ’ɨp Armenia, sɨ’ idyɨk ijooyay tuum kumun de je’m Jehová itestigojyaj. Ijoodon̈a iga dyanam idyɨk putnɨɨmpa je’m an̈matkuy juuty agui nasnɨɨmpa, iga ikka’myajpa je’m carritos kun je’m totjaayiyaj. Iga ianmajan̈chi’ityo’oba idyɨk je’m tɨwɨtam iga putyajiñ je’m an̈matkuyjom kun je’m carrito, Artur y je’m iyoomo’, Ana, y tumnam Testigo iga iñɨɨyi Yiraír ikka’myaj tuum carrito tuum an̈eymɨ juuty ity tuum xutyu tɨgan̈juj. Ikupin̈yaj juuty agui nasnɨɨmpa.

Weeñi jempɨk nasyaj jeem ityeguedayaj y moj ipɨkyaj je’m totjaayiyaj. Pero dya’ ityumpɨyyaj ikusu’nɨyyaj jesɨk ia’myaj. Wɨsteen panijyaj ikunu’kyaj je’m carrito, y tuum de je’eyaj iñebakpak. Okmɨ Artur chi’itya tuum tooji’ iaakpakyuk y pakka’aytya ilente naxyukmɨ. Artur, Ana y Yiraír iñuumnamuruyajtɨ’p je’m panijyaj, pero dya’ imaton̈an̈ta’ayayaj. Je’m panijyaj iñepnepyajyaj je’m carrito, y ipukuyaj je’m totjaayiyaj. Y wiñtyi iga nɨkyajpa, malnɨ’mayyajta y otyɨ’mayyajta je’m Testigojyaj.

Artur, Ana y Yiraír oy kejajwatyiyaj an̈jago’oyikɨ’ɨm. In̈matyaj jempɨk nasne’ idyɨk y inimuruyaj de je’m Dios In̈maatyi weeñi policías y teguedɨ’ɨyiyaj iga yooxayajpa jeem. Okmɨ nanɨkyajta juuty ity je’m oficina del jefe de policía, ijoodon̈ato’oba idyɨk tyi nasne’. Jesɨk ijoodon̈a iga Artur, tuum pɨɨxiñ iga mɨjɨy, dya’ kɨ’an̈seet jesɨgam tojaytya iakpak, dyam akwa’goy tyiñam maaj nasne’ y moj akwago’oyi tyi ikupɨkyajpa je’m Testigojyaj. Okmɨ iga muruyaj cuatro horas, je’m policía nɨm: «¡Agui wɨɨ je’m iñreligión, atɨgɨyku’mto’obatyim!».

Ikukejaama, Artur eybɨktyim put je’m an̈matkuy kun je’m carrito. Nu’k tuum pɨɨxiñ iga ia’mne’ idyɨk ityumpɨy jempɨk nas y imaymayan̈chi’ je’m tɨɨwɨ iga dya’ ijo’yka’ y dya’ inin̈a je’m panijyaj. Nɨmtyim iga ipatstogoy je’m respeto iga iniidyay idyɨk je’m panijyaj.

Jesɨk kutsu’uya, je’m jefe de policía in̈wejay Artur iga nɨkgaguiñ eybɨk. Pero dyam ikwa’k tyiñam maaj nas, ixunba idyɨk iga an̈madaytyaiñ tyiñam maaj inkejpa je’m Biblia. Pero sɨɨ, ikumaton̈yajtyim tun̈gaknam wɨsteen policías.

Ikukejaama, Artur eybɨktyim nɨk ia’m je’m jefe de policía y in̈kejay weeñi videos iga in̈kejpa de je’m Biblia, y je’ in̈wejay tun̈gaknam policías iga ia’myajiñtyim je’m videos.

Iga je’m panijyaj ikwiñkejyaj ijo’oya’, ja’yan̈ policías wɨa mu ikumaton̈yaj tyi in̈kejpa je’m Biblia y ia’myaj iga je’m Jehová itestigojyaj iwɨwatyajpa.