KUYUUJI 25
Ancianojtam, tun̈ɨytyaʼamɨ jeʼm Gedeón iakwiñkejoʼoyi
«D́a anai̱ tiempo iga anaŋmatpa de [...] Gedeón» (HEB. 11:32).
WAAÑI 124 Siempre fieles y leales
JEʼM JƗƗXI TAN̈KUYUJKAPAʼAPa
1. Juʼuts nɨmpa 1 Pedro 5:2, ¿juʼp wɨbɨk yooxakuy iniityyaj jeʼm ancianojyaj?
JEHOVÁ ichiʼiñeʼ jeʼm ancianojyaj jeʼm yooxakuy iga ikuixayyajiñ jeʼm iovejajyaj. Jeʼeyaj iwatyajpa yɨʼp yooxakuy kun ityumpɨy ianmaj y ityeguedayajpa iga iwɨakkupakyajpa (Jer. 23:4; maayɨʼ 1 Pedro 5:2). ¡Tsaam wɨɨ iga jeʼm kumunjom ityyaj tɨwɨtam iga pɨɨmi yooxayajpa!
2. ¿Juʼptam kutɨʼɨchiyaj in̈an̈kamokyajpa weeñi ancianojyaj?
2 Jesɨk jeʼm ancianojyaj iwatyajpa yɨʼp yooxakuy, in̈an̈kamokyajpa kutɨʼɨchiyaj. Juʼuts akwiñkejoʼoyi, iga wɨaiñ ikuixyaj jeʼm kumun, pɨɨmi yooxayajpa. Tanaʼmiñ jempɨk iñaskaʼ Tony, tuum anciano itywɨʼɨp Estados Unidos. Jeʼ ikutɨʼɨyɨy iga ikwiñkejiñ idyɨk modestia jesɨk ipɨktson̈ba yooxakuyyaj jeʼm kumunjom. Tony nɨmpa: «Jesɨgam tsukum jeʼm pandemia del COVID-19, tsaam idyɨk jaʼyan̈ yooxakuy wɨtsaktaiñ para jeʼm an̈tuʼumaajiyaj y jeʼm an̈matkuy, y ampɨktson̈ba idyɨk ityumpɨy jeʼm yooxakuyyaj. Mex iga anteguedaap idyɨk iga anakkupakpa, juchixkej itypa idyɨk tun̈gak yooxakuyyaj. Maaj okmɨ ustam ustam antsak iga ammayba jeʼm Biblia, iga awɨkuyujpa anyaʼak y jeʼm an̈wejpadoʼoyiyaj». Ilir, tuum anciano itywɨʼɨp Kosovo, in̈an̈kamok tun̈gak nasɨyoʼoyi. Ity idyɨk tuum an̈eymɨ juuty naspa ixɨʼ guerra y tsaam tan̈kaʼap idyɨk ikupɨk jeʼm an̈kiʼmayoʼoyiyaj chioypaʼap jeʼm organización. Jeʼ nɨmpa: «Amats kɨɨn̈i jesɨgam jeʼm sucursal awaʼgay iga anyooxpaʼtyajiñ jeʼm tɨwɨtam ityyajwɨʼɨp jeʼm an̈eymɨ juuty tsaam malkoom. Anjɨɨs iga dyaʼ idyɨk wɨap an̈wat, y jeʼm an̈kiʼmayoʼoyiyaj chioyyajpaʼap keʼnam dyaʼ kuyooxaoyyajpa». Tuum misionero iñɨɨyipɨk Tim itywɨʼɨp Asia tsaam idyɨk tan̈kaʼ ikkupak jeʼm yooxakuyyaj iniitywɨʼɨp jeʼm kumunjom. Jeʼ nɨmpa: «A veces pɨɨmiam idyɨk asoʼpsneʼeba mentalmente». Jesɨk jeʼm ancianojyaj iñaskayajpa yɨʼɨmpɨk, ¿tyi wɨap iyooxpaʼtyaj iga wɨaiñ iyaʼachɨyyaj?
3. ¿Tyiʼiga wɨɨ iga tantumpɨytyam tanteguedataʼmiñ jeʼm Gedeón iakwiñkejoʼoyi?
3 Jeʼm ancianojyaj wɨap ikuyujkaayyaj jeʼm Gedeón iakwiñkejoʼoyi (Heb. 6:12; 11:32). Jeʼ ikupujpa y ikuixaʼyba idyɨk jeʼm Dios ikumun (Juec. 2:16; 1 Crón. 17:6). Juʼutstyim Gedeón, jeʼm ancianojyaj ikuixayyajpatyim jeʼm Dios ikumun yɨʼp in̈an̈pɨgam jaamayaj (Hech. 20:28; 2 Tim. 3:1). Jeʼyukmɨ wɨap ipaʼtyaj wɨtampɨk an̈kejayoʼoyiyaj jesɨk iaʼmyajpa juutypɨk Gedeón ikwiñkej modestia, humildad, kupɨgoy y iyaʼachɨy. Yɨʼp wɨbɨk akwiñkejoʼoyi tayooxpaʼttaʼmpa iga tantsoowaixtyaʼmiñ jeʼm yooxakuy iwatyajpaʼap jeʼm ancianojyaj y tan̈kupɨkyajiñ kun ityumpɨy tananmaj (Heb. 13:17).
JESƗK TAN̈KAʼ TANAKWIÑKEJ MODESTIA Y HUMILDAD
4. ¿Juutypɨk ikwiñkej Gedeón modestia y humildad?
4 Gedeón ikwiñkej modestia y humildad.b Jesɨgam tuum sɨn̈pɨɨxiñ iñɨʼmay Gedeón iga Jehová ikupin̈neʼ idyɨk iga ikɨakpudyiñ jeʼm israelitajyaj iga jeʼm madianitas sɨʼ idyɨk iyaʼachwatyaj, jeʼ nɨm yɨʼɨmpɨk: «Jeʼm anfamilia jeʼam jempɨk maaj dyaʼ juʼchan̈yaj de ityumpɨyyaj jeʼm Manasés ifamilia y ɨcham jempɨk maaj axutyu de jeʼm anjaatun̈ ityɨkkɨʼɨm» (Juec. 6:15). Ijɨɨspa idyɨk iga dyaʼ wɨap ikkupak yɨʼp yooxakuy. Pero Jehová ijoodon̈ idyɨk iga kun jeʼm iyooxpadoʼoyi Gedeón wɨap idyɨk iwat, y jeempɨgam nas.
5. ¿Juʼptam nasɨyoʼoyiyaj wɨap in̈an̈kamokyaj jeʼm ancianojyaj juuty nasuntaap iga ikwiñkejyajiñ modestia y humildad?
5 Jeʼm ancianojyaj ityeguedayajpa iga ikwiñkejyajpa modestia y humildad (Miq. 6:8; Hech. 20:18, 19). Dyaʼ nakujiʼpyajtaap por tyityam wɨap iwatyaj o tyityam iwatneyajum, y dyatyim ijɨɨskupakneyajpa jesɨk jɨɨxtyogoyyajpa o dyaʼ iwɨpudayyajpa algun tyi. Pero wɨap in̈an̈kamokyaj nasɨyoʼoyiyaj juuty nasuntaap iga ikwiñkejyajiñ modestia y humildad. Tanjɨɨxiñ yɨʼpyaj akwiñkejoʼoyiyaj. Wɨapsɨ iga tuum anciano ipɨktson̈ba jaʼyan̈ yooxakuyyaj y okmɨ iaʼmpa iga dyaʼ wɨap iwat ityumpɨy. Wɨap iga kujiʼpyajtaap jesɨk iwɨwatyajpa tuum yooxakuy o wɨaptyim iga kujɨyyajtaap jesɨk dyaʼ iwɨwatyajpa algun tyi. Jesɨk iñaskayajpa yɨʼɨmpɨk, ¿juutypɨk wɨap iyooxpaʼtyaj jeʼm Gedeón iakwiñkejoʼoyi?
Juʼutstyim Gedeón, jeʼm ancianojyaj ikwiñkejyajpaʼap modestia iwaʼkyajpa yooxpadoʼoyi, juʼuts akwiñkejoʼoyi, jesɨk iwɨtsakyajpa jeʼm an̈matkuy iga putyajpa kun jeʼm carritos. (Aʼmɨ jeʼm párrafo 6).
6. ¿Juutypɨk jeʼm ancianojyaj wɨap ikwiñkejyaj modestia juʼutstyim iwat Gedeón? (Aʼmɨtyim jeʼm imagen).
6 Waʼktaʼamɨ yooxpadoʼoyi. Jempɨk ikwiñkejpa modestia ijoodon̈ iga dyaʼ wɨap iwat ityumpɨy. Iga Gedeón ikwiñkej modestia, iwaʼk iga yooxpaʼttaiñ (Juec. 6:27, 35; 7:24). Jeʼm ancianojyaj iwɨpɨkyajpaʼap ijɨɨxi jeempɨktyim iwatyajpa. Tony, jɨykimtawɨʼɨp jeʼm párrafo 2, nɨmpa: «Dende anxutyujom an̈kejaytya iga ampɨktson̈iñ jeʼm yooxakuyyaj, jeʼyukmɨ moj an̈wat jeempɨk mex iga dyam idyɨk wɨap anakkupak. Jeʼyukmɨ, en jeʼm kuyuuji en familia anan̈mattaʼm de jeʼm modestia y anakwaʼk anyoomoʼ juʼuts idyɨk iaʼm. An̈kɨʼpin̈tyim tuum video iga ity en jw.org iñɨɨyipɨk Tal como Jesús, capacitemos a otros y confiemos en ellos». Tony moj iwaʼk yooxpadoʼoyi, y jeʼ in̈matpa juʼuts iñɨgay: «Ityumpɨy jeʼm yooxakuy itywɨʼɨp jeʼm kumunjom wɨwatneta, y sɨɨ anaity maaj tiempo iga ampɨɨmchiʼiba jeʼm an̈wɨnanɨgoʼoyi kun Jehová».
7. ¿Juutypɨk jeʼm ancianojyaj wɨap iwatkiʼpsyaj Gedeón jesɨk kujɨyyajtaap? (Santiago 3:13).
7 Odoy joʼykaɨʼ siiga mikujɨytyaap. Tun̈gak kutɨʼɨchi iga wɨap in̈an̈kamokyaj jeʼm ancianojyaj jeʼ jesɨk kujɨyyajtaap. Pero jeʼm Gedeón iakwiñkejoʼoyi wɨap iyooxpaʼtyaj. Jeʼ ijoodon̈ idyɨk iga tan̈kaɨy, jeʼyukmɨ jesɨgam jeʼm pɨxiñtyam de Efraín ikujɨyyaj, jeʼ iwɨjɨʼyay (Juec. 8:1-3). Dyaʼ ijoʼykaʼ, ikwiñkej humildad jesɨgam ikumaton̈ jempɨk jɨyba idyɨk ixɨʼyaj, iga jeʼ iwɨjɨʼyay dyaʼ tsukum tuum an̈aaji. Jeʼm ancianojyaj iniityyajwɨʼɨp joodon̈oʼoyi jeexyajtyim juʼuts Gedeón. Jesɨk algun i ikujɨyyajpa, iwɨkumaton̈yajpa y dyaʼ imalkutson̈yajpa (maayɨʼ Santiago 3:13). Jeempɨgam yooxpadoyyajpa iga idyiñ paz jeʼm kumunjom.
8. ¿Tyi iwatyajiñ jeʼm ancianojyaj jesɨk kujiʼpyajtaap? An̈maatɨ tuum akwiñkejoʼoyi.
8 Kujiʼptaʼamɨ Jehová. Jesɨk Gedeón kujiʼpta iga ikooñwɨy jeʼm madianitas, jeʼ iyooxpaʼt jeʼm israelitajyaj iga ikujiʼpyajiñ Jehová (Juec. 8:22, 23). ¿Juutypɨk jeʼm ancianojyaj wɨap iwatkiʼpsyaj Gedeón? Ikujiʼpyajiñ Jehová jesɨk iwɨwatyajpa tuum yooxakuy (1 Cor. 4:6, 7). Juʼuts akwiñkejoʼoyi jesɨk tuum ancianoj kujiʼptaap iga wɨan̈kejayoʼyba, jeʼ wɨap iñɨm iga ityumpɨy jempɨk in̈kejpa ity jeʼm Dios In̈matyijom y tantumpɨytyam tan̈kuyujkataʼmpa kun jeʼm an̈kejayoʼoyi chioypaʼap jeʼm Jehová iorganización. Jeʼyukmɨ jeʼm ancianojyaj nakwaʼkyajtaiñ siiga juutypɨk an̈kejayoyyajpa ikujiʼppa Jehová o sɨʼ inikujiʼpyajta iyaʼak. Tan̈kujɨɨstaʼmiñ tyi iñaskaʼ tuum tɨɨwɨ iñɨɨyipɨk Timothy. Jesɨk moj kuyooxaoʼoyi juʼuts anciano tsaam idyɨk ikusuʼnɨʼyba iknas najɨʼyoʼoyiyaj. Jeʼ nɨmpa: «Jesɨk an̈wɨtsakpa tuum najɨʼyoʼoyi anaktsukumpa kun wɨtampɨk an̈matyiyaj y ampɨkpa idyɨk wɨtampɨk akwiñkejoʼoyiyaj, jeʼyukmɨ jeʼm tɨwɨtam tsaam ikusuʼnɨyyajpa. Pero jeʼeyaj sɨʼ idyɨk akujiʼpyaj aɨch, y dyaʼ Jehová ni jeʼm Biblia». Timothy ikutɨʼɨyɨy iga iwadyiñ idyɨk kukakiyaj juutypɨk an̈kejayoʼyba iga odoy numaaj kujiʼptaiñ jeʼ (Prov. 27:21). ¿Juʼuts iñɨgay? Jeʼ nɨmpa: «Sɨɨ weeñi tɨwɨtam an̈madayyajpa iga jeʼm najɨʼyoʼoyi anaknaspaʼap iyooxpaʼtyajpa in̈an̈kamokyaj tuum kobakpiiji, iyaʼachɨyyajiñ tuum kutɨʼɨchi o iyooxpaʼtyajpatyim iga majnam ikunuʼkyajiñ Jehová. Yɨʼpyaj an̈matyiyaj tsaam amaymaywatpa iga sɨʼ ikujiʼpyaj Jehová y dyaʼ aɨch».
JESƗK TAN̈KAʼAP TAN̈KUPƗGOY Y TAN̈KAʼAP TANAKWIÑKEJ IGA DYAʼ TAKƗƗN̈BA
Gedeón kupɨgoy y dyam waatyi soldados initsɨʼy, numaaj 300 pɨxiñtyam initsɨʼy (aʼmɨ jeʼm párrafo 9).
9. ¿Juutypɨk ikwiñkejiñ idyɨk Gedeón iga dyaʼ kɨɨn̈ba y kupɨgoʼyba? (Aʼmɨ jeʼm dibujo itywɨʼɨp yɨʼp totjaayi iwiñjom).
9 Okmɨ iga Jehová iñɨʼmay Gedeón iga tsɨʼyiñ juʼuts juez, ikwiñkejiñ idyɨk iga dyaʼ kɨɨn̈ba y kupɨgoʼyba. Jeʼ ipɨktson̈ tuum tan̈kapɨk yooxakuy: imɨswadaʼyiñ jeʼm Baal ialtar iniitywɨʼɨp idyɨk ijaatun̈ (Juec. 6:25, 26). Maaj okmɨ Gedeón in̈tuʼumawat tuum mɨjpɨk ejército, y Jehová wɨskɨy iñɨʼmay iga ikkuseedaʼyiñ usan̈ jeʼm soldados iga tsaam jaʼyan̈yaj idyɨk (Juec. 7:2-7). Okmɨ Jehová iñɨʼmay iga ikutɨgɨyiñ jeʼm ienemigo icampamento kugaptsuʼ (Juec. 7:9-11).
10. ¿Juchix ikwiñkejiñ tuum anciano iga kupɨgoʼyba?
10 Jeʼm ancianojyaj ityeguedayajiñ iga kupɨgoyyajiñ (Sant. 3:17). Jesɨk tuum anciano kupɨgoʼyba, ityun̈ɨʼyba jeʼm an̈kiʼmayoʼoyi itywɨʼɨp jeʼm Dios In̈matyijom y jempɨk chioʼyba jeʼm iorganización, y jeempɨgam tsɨʼyyajpa juʼuts tuum wɨbɨk akwiñkejoʼoyi para jeʼm tun̈gakyaj. Pero wɨapsɨ iga oyba tan̈kaʼ ikupɨgoyyaj. Y tan̈kaʼap ipɨktson̈yaj jeʼm jɨɨxian̈chioʼoyiyaj. Wɨapsɨ iga nakwaʼkneyajta siiga jeʼm an̈kiʼmayoʼoyi chiʼiñeyajtawɨʼɨp yooxpadoʼyba o dyaʼ. O wɨaptyim iga waʼgayyajtaap iga iwatyajiñ algun tyi juuty wɨap iga matsyajtaap. Jesɨk iñaskayajpa yɨʼpyaj nasɨyoʼoyiyaj, ¿juutypɨk wɨap ikupɨgoyyaj juʼutstyim iwat Gedeón?
11. ¿Tyi wɨap iyooxpaʼtyaj jeʼm ancianojyaj iga kupɨgoyyajiñ?
11 Teguedataʼamɨ jeʼm jɨɨxian̈chioʼoyi y kupɨktaʼamɨ. Dios iñɨʼmay Gedeón juutypɨk imɨswadaʼyiñ idyɨk jeʼm ijaatun̈ ialtar, juuty iwadyiñ tuum altar para Jehová y juʼutspɨk animat ikɨan̈kodyiñ. Gedeón dyaʼ nɨm iga dyaʼ idyɨk iwatpa, jobity kupɨgoy. Yɨʼp jaama jeʼm ancianojyaj ipɨktson̈yajpatyim jɨɨxian̈chioʼoyiyaj ikuyukmɨ jeʼm Jehová iorganización jesɨk kutsadayyajtaap cartas, anuncios y pautas. Yɨʼbam iyooxpaʼtyajpa iga takuixyajiñ física y espiritualmente. Tsaam tantoyyajpa jeʼm ancianojyaj iga ikupɨkyajpa jeʼm jɨɨxian̈chioʼoyiyaj chioypaʼap jeʼm Jehová iorganización. Iga kupɨgoyyajpa, tsaam iwɨwadayñeʼ jeʼm kumun (Sal. 119:112).
12. ¿Juutypɨk jeʼm ancianojyaj wɨap ikupɨkyaj Hebreos 13:17 jesɨk jeʼm Jehová iorganización iwatpa tuum kukaki?
12 An̈yujtaʼamɨ jeʼm kukakiyaj. Tan̈kujɨɨstaʼmiñ iga Jehová iñɨʼmay Gedeón iga odoy waatyi soldado initsɨʼyiñ (Juec. 7:8). Wɨapsɨ iga ijɨɨs: «¿Nasuntaap iga an̈wadyiñ yɨʼp kukaki? ¿Wɨapsɨ an̈kooñwɨytyaʼm?». Pero Gedeón kupɨgoy. ¿Juutypɨk jeʼm ancianojyaj wɨap iwatkiʼpsyaj? Jesɨk iwatyajpa jeʼm kukakiyaj nɨmpaʼap jeʼm Jehová iorganización (maayɨʼ Hebreos 13:17). Juʼuts akwiñkejoʼoyi, jeʼm amtyɨy 2014, jeʼm Kumun Nayooxaoyyajpaʼap ikukagayyaj juutypɨk yojtaiñ jeʼm An̈tuʼumayoʼytyɨkyaj y jeʼm Mɨjtampɨk An̈tuʼumaaji iAn̈tuʼumayoʼytyɨkyaj (2 Cor. 8:12-14). Pekaʼ jeʼm kumunyaj aknuʼksyajtaap idyɨk tumiñ iga wɨaiñ iwatyaj An̈tuʼumayoʼytyɨkyaj, y okmɨ ikseetyajiñ jeʼm tumiñ. Pero sɨɨ jeʼm organización ipɨkpa usan̈ jeʼm tumiñ ityuʼmyajpaʼap jeʼm kumunyaj ikuwɨtyi yɨʼp naxyukmɨ iga wɨaiñ iwatyajta An̈tuʼumayoʼytyɨkyaj juuty maaj nasunyajtaap, y dyaʼ tyi ijoo juʼtsan̈ tumiñ ityuʼmyajpa jeʼm kumunyaj. Jesɨk tuum anciano iñɨɨyipɨk José ijoodon̈a, tan̈kaʼa mu ikupɨk yɨʼp kukaki. Ijɨɨs: «Yɨʼp jɨɨxi iyooxpaʼtpa tun̈gak kumunyaj pero yɨʼɨm dyaʼ yooxpadoʼyba. Dyaʼ wattaap ni tuum An̈tuʼumayoʼytyɨk». Mex iga ijɨɨs yɨʼɨmpɨk jeʼ kupɨgoy. ¿Tyiʼiga? Jeʼ nɨmpa: «Anjɨɨs jempɨk nɨmpa Proverbios 3:5, 6, iga an̈kupɨguiñ Jehová. Yɨʼp jɨɨxi tsaam yooxpadoyñeʼ. Dyaʼ numaaj tan̈watnetaʼm An̈tuʼumayoʼytyɨkyaj, tayooxpadoyñetaʼm iga tun̈gakyaj iniityyajiñ tyityam ityogoyayyaj».
Wɨap tanakwiñkejtaʼm iga dyaʼ takɨɨn̈ba jesɨk tanan̈matpa jeʼm Dios In̈maatyi juuty dyaʼ aʼmchioyñɨɨmpa iga koosteñaytyaiñ Dios. (Aʼmɨ jeʼm párrafo 13).
13. a) ¿Tyi iwɨkupɨkneʼ idyɨk Gedeón? b) ¿Tyi wɨap iwatyaj jeʼm ancianojyaj iga wɨaiñ iwatkiʼpsyaj Gedeón? (Aʼmɨtyim jeʼm imagen).
13 Odoy kɨɨn̈ɨ in̈wattaʼm jempɨk Jehová ixunba. Gedeón ikupɨk Jehová mex iga wɨap idyɨk ikkaʼata (Juec. 9:17). Okmɨ iga Jehová iñɨʼmay iga dyaʼ ichakpa ikutyum, Gedeón iwɨkupɨk iga Dios iyooxpaʼtpa idyɨk ikupujay jeʼm ikumun. Jeʼm ancianojyaj iga ityyaj jeʼm an̈eymɨ juuty dyaʼ aʼmchioyñɨɨmpa iga koosteñaytyaiñ Dios jeexyajtyim juʼuts Gedeón. Ikwiñkejyajpa iga dyaʼ kɨɨn̈yajpa jesɨk iwatyajpa jeʼm an̈tuʼumaajiyaj y putyajpa jeʼm an̈matkuyjom mex iga wɨap imatsyajta, aktsakyajtaap iyooxakuyyaj o wɨapsɨ iga koʼtsyajtaap.c Jesɨk nuʼkpa jeʼm mɨjpɨk yaʼachaaji, ikwiñkejyajpa iga dyaʼ kɨɨn̈yajpa jesɨk ikupɨkyajpa jeʼm jɨɨxian̈chioʼoyiyaj mex iga itypa en peligro jeʼm iityiyaj. Wɨapsɨ iga nɨʼmayyajtaap iga nɨguiñ tanan̈mat jeʼm an̈matyiyaj iga jeexyaj juʼuts jeʼm ɨkxtyuj, yɨʼp nɨmtoʼoba jempɨk iñaskayajpa jeʼm malojpɨkyaj. O wɨaptyim iga nɨʼmayyajtaap tyityam tan̈wattaʼmiñ iga wɨaiñ tanyaʼachɨytyaʼm jesɨk Gog de Magog tan̈teeñkamoktaʼmpa (Ezeq. 38:18; Apoc. 16:21).
JESƗK TAN̈KAʼ TANYAʼACHƗY
14. ¿Juchix ikwiñkejiñ idyɨk Gedeón jeʼm yaʼachɨyoʼoyi?
14 Iga Gedeón jeʼ idyɨk tuum juez en Israel, pɨɨmi yooxa. Jesɨgam jeʼm madianitas poyyaj iga an̈aayajpa idyɨk ixɨʼyaj tsuʼukɨʼɨm, jeʼ ikpoy dende jeʼm Jezreel ikunon̈jom hasta jeʼm río Jordán, wɨapsɨ iga in̈naakyuk agui ity apitykuyyaj (Juec. 7:22). ¿Tyi iwat? ¿Dyam maaj ikpoy? ¡Dyaʼ jesaneʼ! Mex iga jeʼ y jeʼm 300 pɨxiñtyam tsaam idyɨk soʼpsneyajum, nasyaj jeʼm río Jordán y seguido ikpoyyaj jeʼm madianitas. Jesɨk iktsɨʼyyaj ikkukaʼayyaj (Juec. 8:4-12).
15. ¿Juchix ikwiñkejiñ tuum anciano jeʼm yaʼachɨyoʼoyi?
15 Jesɨk tuum anciano ikuixpa jeʼm kumun y jeʼm ifamilia wɨap iga soʼpspa física, mental o emocionalmente. ¿Juutypɨk wɨap iwatkiʼpsayyaj jeʼm Gedeón iakwiñkejoʼoyi jesɨk ijaamyajpa jeempɨk?
Jeʼm ancianojyaj ipɨɨmchiyajpa kun toyoʼoyi jempɨk ityogoyayyaj yooxpadoʼoyi. (Aʼmɨ jeʼm párrafojyaj 16 y 17).
16, 17. a) ¿Tyi iyooxpaʼt Gedeón iga wɨaiñ iyaʼachɨy? b) ¿Tyi ikupɨkneyajiñ jem ancianojyaj? (Isaías 40:28-31; aʼmɨtyim jeʼm foto).
16 Kupɨktaʼamɨ iga Jehová miyooxpaʼttaʼmpa. Jeʼam iwat Gedeón, y Jehová iyooxpaʼt (Juec. 6:14, 34). Tun̈kɨy, Gedeón y jeʼm pɨxiñtyam ikpoyyaj puymɨ wɨsteen an̈jagoʼoyiyaj madianitas y jeʼeyaj nɨkiyaj idyɨk camellojyuk (Juec. 8:12, 21). Pero kun jeʼm Jehová iyooxpadoʼoyi, yɨʼpyaj israelitajyaj iktsɨʼyyaj y ikkaʼayaj. Yɨʼp jaama jeʼm ancianojyaj wɨaptyim ikupɨkyaj iga Jehová iyooxpaʼtyajpa, jeʼ tuum Dios iga «dyaʼ keman soʼpspa». Juchixkej michiʼiba jeʼm pɨɨmi mityogoyaywɨʼɨp (maayɨʼ Isaías 40:28-31).d
17 Tanaʼmiñ jempɨk iñaskaʼ Matthew, jeʼ yooxpadoʼyba kun jeʼm Comité de Enlace con los Hospitales. ¿Tyi iyooxpaʼtneʼ iga iyaʼachɨʼyiñ? Jeʼ nɨmpa: «Anaʼmneʼ juutypɨk kupakpa jempɨk nɨmpa Filipenses 4:13. Watykɨy jesɨk pɨɨmi asoʼpsneʼeba y anjaampa iga dyam wɨap anyaʼachɨy, pɨɨmi anan̈wejpaʼtpa Jehová y an̈waʼgaʼyba iga achiʼiñ jeʼm pɨɨmi atogoyaywɨʼɨp iga wɨaiñ anyooxpaʼtyaj jeʼm tɨwɨtam. Y anjaampa juutypɨk Jehová achiʼiba jeʼm pɨɨmi iga wɨaiñ anyaʼachɨy». Juʼutstyim Gedeón, jeʼm ancianojyaj pɨɨmi yooxayajpa iga ikuixayyajpa kun toyoʼoyi jeʼm Jehová ikumun mex iga in̈an̈kamokyajpa kutɨʼɨchiyaj. Pero ikwiñkejyajiñ modestia y ikutɨʼɨyɨyyajiñ iga dyaʼ juchixkej wɨap iyooxpaʼtyaj jeʼm tɨwɨtam juʼtspɨyam iwatyajtoʼoba. Jeʼm ancianojyaj ikupɨkyajpa iga Jehová ikumaton̈ba jeʼm ian̈wejpadoʼoyiyaj y iga chiʼiyajtaap jeʼm pɨɨmi iga wɨaiñ iyaʼachɨyyaj (Sal. 116:1; Filip. 2:13).
18. Juʼuts tan̈kɨʼpin̈netaʼm, ¿juutypɨk jeʼm ancianojyaj wɨap iwatkiʼpsyaj Gedeón?
18 Juʼuts tan̈kɨʼpin̈netaʼm jeʼm ancianojyaj wɨap iwatkiʼpsyaj Gedeón. Ikwiñkejyajiñ modestia y humildad jesɨk ipɨktson̈yajpa yooxakuyyaj jeʼm kumunjom y jesɨk kujiʼpyajtaap o kujɨyyajtaap. Kupɨgoyyajiñ y ikwiñkejyajiñtyim iga dyaʼ kɨɨn̈yajpa, y maaj sɨɨ iga toomianeum jeʼm aktogoyoʼoyi. Y iwɨkupɨkyajiñ iga naxiñ tyi naspa Jehová iyooxpaʼtyajpa iyaʼachɨyyaj. Tantsoowaixtyaʼmiñ y tantoyyajiñ yɨʼpyaj ancianojyaj iga pɨɨmi yooxayajpa (Filip. 2:29).
WAAÑI 120 Seamos apacibles y humildes como Cristo
a Jehová ikupin̈ Gedeón iga ikuixiñ y ikupujiñ jeʼm tɨgan̈juj Israel jesɨgam sɨʼ idyɨk iyaʼachayaj. Jeʼ ikkupak yɨʼp yooxakuy tuumtsam 40 amtyɨy mex iga in̈an̈kamok kutɨʼɨchiyaj. Yɨʼp kuyujijom tan̈kɨʼpin̈taʼmpa juutypɨk jeʼm ancianojyaj wɨap iwatkiʼpsayyaj iakwiñkejoʼoyi jesɨk in̈an̈kamokyajpa kutɨʼɨchiyaj.
b Jeʼm modestia y jeʼm humildad toomi jeexpɨktyim jɨɨxi in̈kejyajpa. Jempɨk ikwiñkejpa modestia wɨnaixpɨktaap iyaʼak y ijoodon̈ tyityam dyaʼ wɨap iwat. Jempɨk ikwiñkejpa humildad iniidyaʼyba respeto tun̈gakyaj y dyaʼ ijɨɨspa iga maaj wɨap iwat algun tyi (Filip. 2:3). Jeʼyukmɨ, jempɨk ikwiñkejpa modestia ikwiñkejpatyim humildad.
c Aʼmɨ jeʼm an̈kejayoʼoyi «Sigamos sirviendo a Jehová en medio de la proscripción», iga impaʼtpa en jeʼm Totjaayi Takjoodon̈apaʼap de julio de 2019, páginas 10 y 11, párrafos 10 a 13, en español.
d Isaías 40:28-31: 28 ¿Dyaʼ iñjoodon̈? ¿Dyaʼ oyñeʼ in̈kumaton̈? Jehová, iwatneʼ ityumpɨy jempɨk ity yɨʼp naxyukmɨ, jeʼ tuum Dios iga juchixkej ityñeʼ. Jeʼ dyaʼ keman soʼpspa. Dyaʼ i wɨap ikutɨʼɨyɨyay jeʼm ijoodon̈oʼoyi. 29 Jeʼ ipɨɨmchiʼiba jempɨk soʼpsneʼ y ipɨɨmchiʼibatyim jempɨk kupoʼnaketneʼ. 30 Jempɨk mañiyajnam soʼpsyajpa y jempɨk dyanam jaʼamoyñeyaj kupoʼnaketyajpatyim. 31 Pero jempɨk ikupɨkyajpa jeʼm an̈jogoʼoyi chioypaʼap Jehová eybɨktyim pɨɨmiɨyyajpa. Kekyajpa keʼnam jesɨk iniidyayyaj jeʼm águila ixaj. Nɨkyajpa poyjiimɨ y dyaʼ kupoʼnaayyajpa; wityyajpa y dyaʼ soʼpsyajpa.