Ju’uts ia’m Jehová je’m alcohol

JEHOVÁ tachi’iñe’ wɨtampɨk tyidyin̈kej, y je’ taa’mchiñe’ iga tampɨguiñ tanjɨɨxi juutypɨk tamaymayaiñ kun yɨ’pyaj xaajayaj. Tuum de yɨ’pyaj xaaja je’ je’m vino. Je’m Biblia nɨmpa: «Je’m pan wattaap iga tamaymaywadyiñ y je’m vino imaymaywatpa je’m tañityi» (Ecl. 10:19; Sal. 104:15). Pero wɨapsɨ iga tana’mne’ iga weeñiyaj pɨɨmi ukyajpa. Ikuwɨtyi naxyukmɨ ity jempɨk ukyajpa y tun̈gakyaj dya’, iga dya’ tumtyi jɨɨxi iniityyaj. ¿Tyi iyooxpa’tyajpa je’m cristianojyaj iga iwɨpɨkyajiñ ijɨɨxi?

Siiga tampɨkpa tanjɨɨxi iga tanukpa alcohol, wɨɨ iga tanjɨɨxiñ ju’uts ia’m Dios y dya’ jempɨk ijɨɨsyajpa tun̈gakyaj. Jesɨk, maaj tamaymayaap.

Tana’mneta’m iga ja’yan̈yaj tsaam pɨɨmi ukyajpa. Ity jempɨk iukyajpa uxan̈ jesɨk tsaam so’psneyaj. Tun̈gakyaj ukyajpa iga ikuja’amayyajto’oba ikobakpiijiyaj. Y tun̈gakyaj nan̈kejyajtato’oba iga wɨap iukyaj ja’yan̈.

Pero taɨchtyam Jehová tajɨɨxian̈chi’iba. Je’m In̈matyijom tanɨ’ma’yba tyi tannaska’aba siiga taugan̈naspa. Ju’uts akwiñkejo’oyi, Proverbios 23:​29-35 ijɨyki’mpa jempɨk ukpa y tyityam iñaska’aba.a Daniel tuum anciano itywɨ’ɨp Europa, ikujɨɨspa ju’uts idyɨk iityi wiñtyi iga tsɨ’yba ju’uts Testigo, je’ nɨmpa: «Iga tsaam aukpa idyɨk dya’ an̈wɨpɨk anjɨɨxi y je’yukmɨ pɨɨmi aya’acha».

¿Tyi tayooxpa’tpa iga tan̈wɨpɨguiñ tanjɨɨxi y odoy tanugan̈naxiñ je’m alcohol? Tanjɨɨskupakneiñ ju’uts ia’m Dios.

Tan̈kɨ’pin̈iñ tyi in̈kejpa je’m Biblia y tyi’iga weeñiyaj ukyajpa.

TYI NƗMPA JE’M BIBLIA

Je’m Dios In̈maatyi nɨmpa iga dya’ malo siiga tanukpa usan̈ alcohol. In̈kejpa iga je’m vino tamaymaywatpa, Eclesiastés 9:7 nɨmpa: «Kɨ’ɨsɨ in̈wi’kkuy kun maymayaaji y uukɨ je’m imvino kun tuum anmaj maymaypɨk». Je’m Biblia in̈matpatyim iga Jesús y tun̈gak Jehová iyooxakɨ’ɨwiñyaj a veces iukyajtyim vino (Mat. 26:​27-29; Luc. 7:34; 1 Tim. 5:23).

Mex iga wɨap tanuk uxan̈, ni keman odoy tanugan̈naxiñ. Je’m Biblia nɨmpa: «Odoy u̱quia̱taamɨ» (Efes. 5:18). Y nɨmpatyim iga «jém tsa̱mpɨc ucyajpa […] d́a tɨgɨyyajpa ju̱t́ iŋjacpa Dios» (1 Cor. 6:10). Ju’uts tana’mta’m, Jehová ijooyixpa siiga taugan̈naspa y tauukiaap. Tanteguedaiñ jempɨk ijɨɨspa Dios y dya’ jempɨk nɨmyajpa tun̈gakyaj.

Ity jempɨk nɨmyajpa: «Ɨch wɨap anuk ja’yan̈ alcohol y dya’ auukiaap». Yɨkxpɨk jɨɨxi dya’ wɨɨ. Je’m Biblia nɨmpa iga jempɨk tsaam ukyajpa —mex siiga pɨxiñtyam o yomtam— wɨap ityan̈kawatyaj y imalwadayyaj iwɨnanɨgo’oyi kun Jehová (Tito 2:3; Prov. 20:1). Jesús nɨm iga jempɨk tsaam ukyajpa dya’ ityyajpa je’m jomnaxyukmɨ (Luc. 21:​34-36). Jesɨk, ¿tyi iyooxpa’tpa tuum cristiano iwɨpɨk ijɨɨxi ju’tsan̈ alcohol iukpa iga odoy ya’achaiñ?

KUJƗƗSƗ TYI’IGA, JU’TSAN̈ Y JU’TSPƗY MIUKPA

Ju’uts tana’mta’m, tsaam tamalwada’yba siiga tan̈watpa ju’uts iwatyajpa tun̈gakyaj y dya’ tanya’ak tampɨkpa tanjɨɨxi ju’tsan̈ tanukpa. Je’yukmɨ jesɨk tampɨkpa tanjɨɨxi tyi tan̈kɨ’ɨspa o tanukpa, tan̈wadyiñ jempɨk Jehová ikusu’nɨ’yba. Je’m Biblia nɨmpa: «Siiga tawícpa o tanɨ́cpa o taŋwatpa cualquier cosa, wa̱tɨ it́u̱mpɨy iga cujípta̱iñ tanJa̱tuŋ Dios» (1 Cor. 10:31). Tan̈kɨ’pin̈iñ weeñi akwago’oyiyaj y jɨɨxian̈chio’oyiyaj iga wɨap tayooxpa’tta’m.

¿Anukpa alcohol iga tun̈gakyaj iukyajpa? Éxodo 23:2 nɨmpa: «Odoy waatɨ ju’uts iwatyajpa ja’yan̈yaj». En yɨ’p versículo, Jehová iñɨ’may je’m israelitajyaj iga odoy iwatki’psyajiñ jempɨk imalwatyajpa. Yɨ’p an̈ki’mayo’oyi tayooxpa’tpatyim taɨchtyam. Siiga tana’mchi’iba iga tun̈gakyaj takagayyajiñ tanjɨɨxi, dyam tan̈kupɨkpa je’m an̈ki’mayo’oyiyaj y tampatstogoyba je’m tan̈wɨnanɨgo’oyi kun Jehová (Rom. 12:2).

¿Anukpa alcohol iga wɨaiñ an̈wat jempɨk anjɨɨsne’? Weeñi an̈eymɨyaj dya’ i imala’mpa siiga algun i ukpa juchixkej y ja’ytyam (1 Ped. 4:3). Pero tana’mta’miñ je’m an̈ki’mayo’oyi tachi’ipa’ap 1 Corintios 16:13: «Odoy moŋtaamɨ, odoy tsactaamɨ jém Dios iŋma̱t́i. Wattaamɨ juuts tu̱m pɨ̱xiñ jém tsa̱mpɨc iwɨ̱cuyujcane jém Dios iŋma̱t́i». Wɨkejpa iga je’m alcohol dya’ iyooxpa’tpa iga iwadyiñ jempɨk ijɨɨsne’. Siiga miukpa ja’yan̈, togoyba iñjɨɨxi y mikupo’naketpa. Isaías 28:7 nɨmpa iga jempɨk uukiayajpa jɨɨxtyogoyyajpa y tsutyajpa.

Siiga tan̈watto’oba ju’uts tanjɨɨsne’, tan̈kua’miñ je’m Jehová iyooxpado’oyi y tampɨɨmchi’iñ tanfe (Sal. 18:32). Je’yukmɨ tanakuixtyaiñ y tan̈wɨpɨguiñ tanjɨɨxi iga odoy tammalwada’yiñ je’m tan̈wɨnanɨgo’oyi kun Jehová. Jeempɨgam iwat Jesús jesɨgam ja’y ityi yɨ’p Naxyukmɨ, y ja’yan̈yaj ia’myajpa idyɨk ju’uts tuum pɨɨxiñ iga iwatpa ju’uts ijɨɨsne’ y dya’ kɨɨn̈ba.

¿Anukpa alcohol iga an̈kuja’amaytyo’oba jempɨk sɨ’ annaska’? Tuum salmista iñɨ’may Jehová: «Jesɨk je’m kobakpiijiyaj an̈ya’kwatyajpa idyɨk, mich anakpo’kspa idyɨk y anakkunaja’yba anjɨɨxi» (Sal. 94:19). Siiga algun tyi pɨɨmi mikkobakpijpa, odoy uukɨ y kua’mɨ je’m Jehová iyooxpado’oyi y an̈wejpa’atɨ. Weeñiyaj iwa’gayyajpa yooxpado’oyi tun̈gak tɨwɨtam. Jesɨk algun i ukpa iga ikuja’amaytyo’oba jempɨk sɨ’ iñaska’, majtyim dya’ wɨap in̈teeñkamok je’m kutɨ’ɨchiyaj y wɨapsɨ iga imalwatpa (Os. 4:11). Daniel, jɨykimtawɨ’ɨp wiñtyi, nɨmpa: «Anjɨɨxi amo’ogɨ’yba idyɨk y tsaam idyɨk an̈ya’kpa. Je’yukmɨ aukpa idyɨk iga an̈kuja’amaytyo’oba jempɨk sɨ’ annaska’, pero majtyim amalnɨgay y ampatstogoy je’m anamigojyaj». ¿Tyi iyooxpa’t Daniel? Je’ nɨmpa: «An̈kutɨ’ɨyɨy iga maaj wɨɨ iga an̈kua’ma’yiñ je’m Jehová iyooxpado’oyi y dya’ iga aukpa. Jeempɨgam wɨa mu anan̈teeñkamok je’m kobakpiijiyaj». Odoy tan̈kuja’ama’yiñ iga Jehová juchixkej tayooxpa’tpa mex iga jempɨk sɨ’ tannaska’ tsaam tan̈ka’ (Filip. 4:​6, 7; 1 Ped. 5:7).

Siiga a veces iñukpa alcohol, nakwa’ktaajɨ. «¿Anɨ’mayñe’ tuum anfamiliar o tuum anamigo iga tsaam ja’ytyam alcohol sɨ’ anuk?». Yɨ’p miyooxpa’tpa in̈kutɨ’ɨyɨy siiga sɨɨ majtyim in̈kusu’nɨ’yba iñuk. «¿Majtyim aukpa?». Siiga je’am naspa ixɨ’ wɨapsɨ iga sɨ’bam impɨk vicio. «¿Tumtum jaama aukto’oba?». Yɨ’p nɨmto’oba iga pɨɨmiam in̈kusu’nɨ’yba iñuk y mityogoya’yum yooxpado’oyi iga wɨaiñ iñchak.

Weeñi tɨwɨtam ipɨkneyaj ijɨɨxi iga dya’ iukyajpa ni uxan̈ alcohol iga dya’ iniityyajto’oba yɨkxpɨk kobakpiijiyaj. Tun̈gakyaj dya’ ikusu’nɨyyajpa. Siiga algun i ipɨkne’ ijɨɨxi iga dya’ iukpa ni uxan̈, odoy tan̈kujɨ’yiñ.

Tun̈gakyaj iwɨjɨɨsneyajum tyi iwatyajpa o ju’tsan̈ iukyajpa. Wɨapsɨ iga ijɨɨsneyajtyim iga iukyajpa uxan̈ jesɨk wi’kyajpa o en tuum semana numaaj tun̈kɨy. O ju’utspɨk alcohol iukyajpa y ju’utspɨk dya’. Ju’uts akwiñkejo’oyi, ity jempɨk iukyajpa uxan̈ vino o cerveza, pero dya’ iukyajpa tun̈gak iga maaj agukiao’yba, ni en cocteles y dyatyim imotyajpa. Siiga tanjɨɨsneum ju’tsan̈ tanukpa, dya’ taugan̈naspa. Tuum cristiano iga ipɨkpa yɨkxpɨk ijɨɨxi y iwatpa yɨ’ɨmpɨk, dya’ sɨ’ imalwat.

Pero tanjɨɨskupakneiñ ju’uts in̈jaam tun̈gakyaj. Romanos 14:21 nɨmpa: «Wɨ̱ iga d́a taŋcɨɨspa jém ma̱yi y d́a tánucpa jém vino o taŋwatpa tuŋgac cosa iga inicmalwatpa jém iñt́ɨ̱wɨ». Yɨ’p nɨmto’oba iga tanjɨɨskupakneyajiñ y tanakwiñkejayyajiñ toyo’oyi. Siiga tuum tɨɨwɨ dya’ iwɨa’mpa iga tanukpa alcohol, maaj wɨɨ iga odoy tan̈wadyiñ. Yɨ’ɨmpɨgam tanakwiñkeja’yba respeto tyi ijɨɨsyajpa y dya’ iga tanawɨwadaytyaap tanya’ak (1 Cor. 10:24).

Je’m cristianojyaj ikupɨkyajpatyim je’m An̈jago’oyiyaj jesɨk chioyyajpa an̈ki’mayo’oyiyaj juuty tɨgɨyku’mpa je’m alcohol. Ju’uts akwiñkejo’oyi, jempɨk dyanam ka’psneyaj 18 iamtyɨy o jempɨk ikwityyajpa carro o tun̈gak máquinas dya’ wɨɨ iga ukyajiñ (Rom. 13:​1-5).

Jehová taa’mchiñe’ iga tanya’ak tampɨguiñ tanjɨɨxi juutypɨk tamaymayaiñ kun je’m xaajayaj tachi’iñewɨ’ɨp. Je’yukmɨ tantumpɨytyam wɨap tampɨkta’m tanjɨɨxi tyi tan̈kɨ’ɨsta’mpa y tyi tanukta’mpa. Tan̈wɨpɨguiñ tanjɨɨxi y tanakwiñkeja’yiñ je’m tanJaatun̈ sɨn̈yukmɨpɨk iga tsaam tantoyba.