¿Juutypɨk wɨap iwatki’psyaj Jesús je’m yoomtɨwɨtam mañipɨkyaj?

1. ¿Tyi tan̈wadyiñ iga wɨaiñ tan̈watki’ps Jesús?

TSAAM taga’man̈jakpa iga je’m tsɨxtyam jikskɨy mɨjayajpa. Dya’ tan̈kuchi’iba jutsaap imɨjayaj. Pero dya’ jeempɨk naspa siiga tamɨjato’oba espiritualmente (1 Cor. 13:11; Heb. 6:1).b Iga wɨaiñ tan̈watki’ps Jesús, nasuntaap iga tanaidyiñ tuum wɨbɨk nanɨgo’oyi kun Jehová. Nasuntaptyim iga je’m iespíritu santo tayooxpa’dyiñ tanaity wɨtampɨk jaamo’oyiyaj, tan̈kuyujkaiñ tan̈wat tyikej y tanawɨtsaktaiñ para je’m tannɨgɨyo’oyijom (Prov. 1:5).

2. ¿Tyi tan̈kejaytya’mpa Génesis 1:​27, y tyi tan̈kɨ’pin̈ta’mpa yɨ’p kuyujijom?

² Jehová iwat je’m pɨɨxiñ y je’m yoomo’ (maayɨ’ Génesis 1:27).c Dya’ tumtyiyaj y kukakneyajtyim je’m ijɨɨxiyaj. Ju’uts akwiñkejo’oyi, Jehová dya’ tumtyi yooxakuy ichi’ je’m pɨɨxiñ y je’m yoomo’, iga wɨaiñ ikkupakyaj dya’ nasuntaap iga jeexpɨktyim jaamo’oyiyaj ikwiñkejyajiñ (Gén. 2:18). Yɨ’p kuyujijom tan̈kɨ’pin̈ta’mpa juutypɨk je’m yoomtɨwɨtam mañipɨkyaj wɨap iwatki’psyaj Jesús. Je’m tun̈gak kuyujijom tan̈kɨ’pin̈ta’mpa tyi wɨap iwatyaj je’m tɨwɨtam mañipɨkyaj.

NAITYƗ WƗTAMPƗK JAAMO’OYIYAJ

3, 4. ¿Juuty wɨap ipa’tyaj wɨtampɨk akwiñkejo’oyiyaj je’m yoomtɨwɨtam mañipɨkyaj iga wɨap iwatki’psyaj? (A’mɨtyim je’m imagenyaj).

³ Je’m Biblia ijɨyki’mpa ja’yan̈ yomtam iga ikuyooxayaj Jehová y ityoyyajpa idyɨk (maayɨ’ je’m an̈kejayo’oyi de jw.org «¿Qué aprendemos de las mujeres de la Biblia?»). Ju’uts nɨmpa je’m texto juuty topneta yɨ’p kuyuuji, juchixkej iwatyajpa idyɨk «juuts ixunpa Dios». Wɨapsɨ iga je’m kumunjom ity yoomtɨwɨtam iga tsaam ityoyyajpa Jehová y wɨap in̈watki’psyaj.

⁴ Siiga mimañiñam, kujɨɨsɨ weeñi yoomtɨwɨtam iga wɨap in̈watki’psyaj. Je’yukmɨ a’mɨ ju’utspɨk jaamo’oyiyaj iniityyaj y okmɨ kujɨɨsɨ juutypɨk wɨap inikwiñkej yɨ’pyaj jaamo’oyiyaj. Je’m tun̈gak párrafojyaj tan̈kɨ’pin̈ta’mpa tukuteen jaamo’oyiyaj iga iniityyajiñ je’m yoomtɨwɨtam iwatki’psyajpa’ap Jesús.

5. ¿Tyi’iga odoy nakuji’pyajtaiñ je’m yoomtɨwɨtam?

⁵ Odoy nakuji’ptaajɨ. Je’m yoomo’ dyapɨk nakuji’ptaap iniity tuum wɨbɨk nanɨgo’oyi kun Jehová y iwɨnanɨga’yba tun̈gakyaj (Sant. 4:6). Ju’uts akwiñkejo’oyi, ikupɨkpa ityam ikupin̈ne’ Jehová iga ikuixpa je’m kumun y je’m familia (1 Cor. 11:3).d

6. ¿Juutypɨk wɨap iwatki’psyaj Rebeca je’m yoomtɨwɨtam mañipɨkyaj?

⁶ Tan̈kɨ’pin̈ta’miñ je’m Rebeca iakwiñkejo’oyi. Je’ tsaam iniity idyɨk joodon̈o’oyi y iwɨpɨk ijɨɨxi, ijoodon̈ idyɨk juuty y juchix iwatpa algun tyi (Gén. 24:58; 27:​5-17). Ikwiñkejtyim respeto y kupɨgoy (Gén. 24:​17, 18, 65). Siiga dya’ minikuji’ptaap, in̈kupɨkpa jempɨk Jehová ichi’iñe’ tuum teguedɨ’ɨyi ju’uts iwat Rebeca, y iñyooxpa’tpa je’m iñfamilia y je’m kumun.

7. ¿Juutypɨk wɨap iwatki’psyaj Ester je’m yoomtɨwɨtam mañipɨkyaj?

⁷ Modestia. Je’m Biblia nɨmpa iga «jempɨk ijoodon̈yaj tyityam wɨap iwatyaj iniityyaj joodon̈o’oyi» (Prov. 11:2). Ester iniity idyɨk yɨkxpɨk jɨɨxi y iwɨkuyooxa Dios. Ju’uts akwiñkejo’oyi, jesɨgam tsakta ju’uts reina, dya’ nakuji’pta. Ikumaton̈ y ikupɨk je’m an̈ki’mayo’oyi ichi’iwɨ’ɨp je’m iprimo Mardoqueo (Est. 2:​10, 20, 22). Mich wɨap in̈watki’ps jesɨk in̈kupɨkpa je’m an̈ki’mayo’oyiyaj michi’ityapa’ap (Tito 2:​3-5).

8. ¿Juutypɨk je’m yoomtɨwɨtam ikupɨkyajpa je’m an̈ki’mayo’oyi itywɨ’ɨp en 1 Timoteo 2:​9, 10?

⁸ Tana’miñ juutypɨknam Ester ikwiñkej modestia. Je’ tsaam wɨɨ idyɨk ikeeji, pero dya nakuji’pta (Est. 2:​7, 15). ¿Juutypɨk wɨap in̈watki’ps? Tuum manera je’ jempɨk nɨmpa 1 Timoteo 2:​9, 10 (maayɨ’). Yɨ’ɨm je’m apóstol Pablo iñɨ’may je’m yoomtɨwɨtam iga iwɨpɨkyajiñ ijɨɨxi ju’utspɨk pu’ktuuku ikka’myajpa. Je’m an̈maatyi griega iga je’ ipɨk nɨmto’oba iga je’m yomtam wɨnapu’ktugɨyyajtaiñ y ijɨɨskupakneyajiñ tun̈gakyaj. ¡Tsaam tamaymaytyam iga je’m yoomtɨwɨtam iwɨpɨkyajpa ijɨɨxi juutypɨk napu’ktugɨyyajtaap!

9. ¿Tyi tan̈keja’yba je’m Abigaíl iakwiñkejo’oyi?

⁹ Je’m kutɨ’ɨyɨyo’oyi. Yɨ’p wɨbɨk jɨɨxi tayooxpa’tpa tana’m jempɨk wɨɨ y jempɨk dya’ wɨɨ tan̈wat. Tana’mta’miñ je’m Abigaíl iakwiñkejo’oyi. Je’m iwɨdyaaya dya’ iwɨpɨk ijɨɨxi, y Abigaíl ikutɨ’ɨyɨy iga ityumpɨyyaj wɨap ikka’ayajta idyɨk. Je’yukmɨ iwɨjɨɨs tyi iwatpa y ikɨakput ja’yan̈yaj (1 Sam. 25:​14-23, 32-35). Je’m kutɨ’ɨyɨyo’oyi tayooxpa’tpatyim tanjɨɨs juchix wɨɨ iga tajɨ’yiñ y juchix dya’, jeempɨktyim tan̈wadyiñ jesɨk tanyooxpa’tyajto’oba tun̈gakyaj (1 Tes. 4:11).

KUYUJKAƗ’ IN̈WAT TYIKEJ

10, 11. ¿Juutypɨk miyooxpa’tpa siiga in̈kuyujka’aba iñjay y iñtyotmay? (A’mɨtyim je’m imagen).

¹⁰ Wɨɨ iga je’m yoomtɨwɨtam ikuyujkayajiñ iwatyaj tyikej. Weeñi yooxakuyyaj iga in̈kuyujka’aba dende iñxutyujom miyooxpa’tpa je’m iñityijom. Tana’miñ weeñi akwiñkejo’oyiyaj.

¹¹ Kuyujkaɨ’ in̈wɨjay y in̈wɨmay. Weeñi an̈eymɨyaj ijɨɨsyajpa iga je’m yomtam dya’ nasuntaap iga kuyujyajiñ. Pero je’m cristianojyaj wɨɨ iga ikuyujkayajiñ ijayyaj y ityotmayyaj (1 Tim. 4:13).e Je’yukmɨ teguedaajɨ iga wɨaiñ iñjay y iñtyotmay. ¿Juutypɨk miyooxpa’tpa? Yɨ’ɨmpɨgam wɨap impa’t y iniity tuum yooxakuy iga wɨaiñ inimatspakta. Wɨap in̈wɨkuyujka’ je’m Dios In̈maatyi y in̈wɨan̈kejay tun̈gakyaj. Y jesɨk immayba je’m Biblia y in̈kujɨɨspa jempɨk nɨmpa, impɨɨmchi’iba je’m in̈wɨnanɨgo’oyi kun Jehová (Jos. 1:8; 1 Tim. 4:15).

12. ¿Tyi min̈keja’yba Proverbios 31:26?

¹² Kuyujkaɨ’ in̈wɨkumaton̈ y in̈wɨjɨ’yay tun̈gakyaj. Ityumpɨy je’m cristianojyaj wɨɨ iga iwatyajiñ yɨ’ɨmpɨk. Santiago chio’y yɨ’p an̈ki’mayo’oyi: «Tait́t́ámiñ listo iga tamatóŋoyt́ámpa. Odoy jicscɨy» tajɨ’yiñ (Sant. 1:19). Jesɨk in̈wɨkumaton̈ba jempɨk jɨyba ixɨ’, inikwiñkejpa iga iñtyeguet (1 Ped. 3:8). Siiga dya’ in̈wɨkutɨ’ɨyɨ’yba ju’uts in̈jaam o jempɨk sɨ’ miñɨ’may, wada’ayɨ akwago’oyiyaj kun respeto. Y okmɨ wɨkujɨɨsɨ tyi iññɨ’ma’yba (Prov. 15:​28, nota). Nakwa’ktaajɨ: «¿Dya’ je’ mɨgo’oyi jempɨk anan̈matpa? ¿Anmajan̈chio’yba? ¿Ikwiñkejpa respeto y ya’achan̈jamo’oyi?». Kujɨɨsɨ je’m yoomtɨwɨtam iwatyajpa’ap yɨ’ɨmpɨk y watki’psɨ (maayɨ’ Proverbios 31:26).f A’mɨ juutypɨk jɨyyajpa y tyityam in̈matyajpa. Kuyujkaɨ’ in̈wat yɨ’ɨmpɨk, jesɨk maaj in̈wɨnanɨgayyajpa tun̈gakyaj.

13. ¿Iapa’ap wɨap min̈kejay iga in̈wadyiñ je’m yooxakuy nasuntapa’ap iñtyɨkkɨ’ɨm? (A’mɨtyim je’m imagen).

¹³ Kuyujkaɨ’ iñyooxa iñtyɨkkɨ’ɨm. Ja’yan̈ an̈eymɨyaj, je’m yomtam iwatyajpa je’m yooxakuy nasuntapa’ap tɨkkɨ’ɨm. Wɨapsɨ iga iñaapa o tuum yoomtɨwɨ wɨap min̈kejay. Tuum yoomtɨwɨ iñɨɨyipɨk Cindy nɨmpa: «Tsaam antsoowaixpa iga anaapa an̈kejay iga jesɨk tawɨyooxaap, tamaymayaap. Iga an̈kuyujka’ juutypɨk awi’kkuywatpa, an̈kujicha’yba tɨk, anu’nba y juutypɨk ampɨguiñ je’m tumiñ, ayooxpa’t iga majnam an̈wɨkuyooxaiñ Jehová. Anaapa an̈keja’ytyim iga an̈wɨpɨktson̈yajiñ je’m tɨwɨtam, je’yukmɨ añixpɨk ja’yan̈yaj jempɨk wɨap an̈watki’psyaj» (Prov. 31:​15, 21, 22). Je’m yomtam yooxayajpa’ap, iwɨpɨktson̈yajpa’ap tun̈gakyaj y iwɨkuixyajpa ityɨk, iyooxpa’tyajpa je’m ifamilia y je’m kumun (Prov. 31:​13, 17, 27; Hech. 16:15).

14. ¿Tyi min̈keja’yba je’m Crystal iakwiñkejo’oyi?

¹⁴ Kuyujkaɨ’ juutypɨk minimatspaktaap. Ityumpɨy je’m cristianojyaj ikuyujkayajiñ inimatspakyajta iya’ak y maymayayajiñ kun tyityam iniityyaj (Filip. 4:11). Tuum yoomtɨwɨ iñɨɨyipɨk Crystal nɨmpa: «Jesɨk akuyuj secundaria wɨap idyɨk an̈kupin̈ tyityam an̈kuyujka’aba, y anjaatun̈yaj ajɨɨxian̈chi’iyaj. Ju’uts akwiñkejo’oyi, anjaatun̈ anɨ’may iga an̈kuyujkaiñ contabilidad, y yɨ’p tsaam ayooxpa’t». Dya’ numaaj in̈kuyujkaiñ in̈kooñwɨy je’m tumiñ, wɨɨ iga in̈kuyujkaiñ juutypɨk in̈wɨpɨguiñ (Prov. 31:​16, 18). Siiga dya’ iñja’tspa tyikej y mimaymayaap kun tyityam iniity, maaj in̈wɨkuyooxaap Jehová (1 Tim. 6:8).

NAWƗTSAKTAAJƗ PARA JE’M IÑÑƗGƗYO’OYI

15, 16. ¿Tyi’iga tsaam toyyajtaap je’m yoomtɨwɨtam dyapɨknam ja’ayɨyñeyaj? (Marcos 10:​29, 30).

¹⁵ Siiga iniitypa jaamo’oyiyaj iga ikusu’nɨ’yba Jehová y in̈kuyujka’aba in̈wat tyikej, miyooxpa’tpa je’m iññɨgɨyo’oyijom. Tana’miñ tyi wɨap in̈wat.

¹⁶ Wɨap impɨk iñjɨɨxi siiga dyanam mija’ayɨ’yba. Ju’uts nɨm Jesús, weeñiyaj ipɨkneyaj ijɨɨxi iga dya’ an̈ko’mɨyyajpa mex iga juuty ityyaj dya’ i iwɨa’mpa (Mat. 19:​10-12). Tun̈gakyaj dya’ wɨane’ in̈ko’mɨyyaj. Siiga dya’ min̈ko’mɨyñe’, odoy jɨɨsɨ iga Jehová y Jesús dya’ mityoyyajpa. Je’m yoomtɨwɨtam dyapɨknam ja’ayɨyñeyaj tsaam yooxpadoyyajpa je’m kumunjom. Iga tsaam toyoyyajpa y ityeguedayajpa tun̈gakyaj, je’m tɨwɨtam ia’myajpa ju’uts iyoomtɨwɨtam y iaapayaj espirituales (maayɨ’ Marcos 10:​29, 30; 1 Tim. 5:2).

17. ¿Tyi iyooxpa’tyajpa je’m yoomtɨwɨtam mañipɨkyaj iga wɨaiñ ikuyooxaoyyaj a tiempo completo?

¹⁷ Wɨap in̈kuyooxa Jehová a tiempo completo. Ikuwɨtyi naxyukmɨ, jempɨk maaj putyajpa je’m an̈matkuyjom je’ je’m yoomtɨwɨtam (Sal. 68:11). ¿Wɨap impɨk iñjɨɨxi iga mikuyooxao’yba a tiempo completo? Wɨap iñchɨ’y ju’uts precursora, miyooxpado’yba construcción o ju’uts betelita. ¿Tyi miyooxpa’tpa iga wɨaiñ inikkupak jempɨk iñjɨɨsne’? An̈wejpa’atɨ Jehová, namuruujɨ jempɨk sɨ’bam ikuyooxaoyyaj a tiempo completo y a’mɨ tyityam nasuntaap. Okmɨ jaykunu’ukɨ y kujɨɨsɨ juutypɨk wɨap inikkupak. Siiga mikuyooxao’yba a tiempo completo, majnam in̈wɨkuyooxaap Jehová.

18. ¿Tyi’iga iwɨpɨguiñ ijɨɨxi tuum yoomtɨwɨ siiga ja’ayɨ’yba? (A’mɨtyim je’m imagen).

¹⁸ Wɨap impɨk iñjɨɨxi iga mija’ayɨ’yba. Siiga in̈kupɨkpa je’m jɨɨxian̈chio’oyiyaj tan̈kɨ’pin̈netamwɨ’ɨp miyooxpa’tpa je’m inin̈ko’mɨyo’oyijom. Siiga mija’ayɨ’yba, wɨpɨɨkɨ iñjɨɨxi kun i min̈ko’mɨ’yba. Kujɨɨsɨ iga je’am tsɨ’yba ju’uts kobakpɨk de familia (Rom. 7:2; Efes. 5:​23, 33). Je’yukmɨ nakwa’ktaajɨ: «¿Sɨ’ iwatki’ps Jesús? ¿Maaj ityeguedaap iga ikuyooxaap Jehová? ¿Ipɨkpa wɨtampɨk jɨɨxiyaj? ¿Ipɨktson̈ba jesɨk nɨ’maytyaap iga jɨɨxtyogoyñe’? ¿Ikwiñkeja’yba respeto je’m yomtam? ¿Wɨap ayooxpa’t anaity tuum wɨbɨk nanɨgo’oyi kun Jehová, wɨap amatspak y ichɨ’y ju’uts tuum wɨbɨk anamigo? ¿Iwɨwatpa iyooxakuy? Ju’uts akwiñkejo’oyi, ¿ju’ptam yooxakuy iniity je’m kumunjom, y juutypɨk ikkupakpa?» (Luc. 16:10; 1 Tim. 5:8). Siiga min̈ko’mɨytyo’oba kun algun i iga iwɨkuyooxaiñ Jehová, teguedaajɨ mex mimich iga in̈wɨkuyooxaiñ.

19. Jesɨk tuum yoomo’ iyooxpa’tpa iwɨdyaaya, ¿nɨmto’oba iga dya’ tyi kumeskuy jempɨk je’ iwatpa?

¹⁹ Je’m Biblia nɨmpa iga je’m yoomo’ iyooxpa’tpa je’m iwɨdyaaya y ikka’psa’yba je’m iyooxakuy (Gén. 2:18). ¿Nɨmto’oba iga dya’ tyi kumeskuy jempɨk je’eyaj iwatyajpa? Dya’ jesane’, tan̈kujɨɨxiñ iga je’m Biblia watykɨy ijɨyki’mpa iga Jehová yooxpado’yba (Éx. 18:4; Heb. 13:6). Jesɨk tuum yoomo’ iyooxpa’tpa iwɨdyaaya, ikupɨkpa je’m jɨɨxi ipɨknewɨ’ɨp iga iwɨnɨga’yiñ je’m ifamilia. Iga ityoyba Jehová, yooxpado’yba iga tun̈gakyaj ia’mayyajiñ je’m wɨtampɨk jaamo’oyiyaj iniitywɨ’ɨp iwɨdyaaya (Prov. 31:​11, 12; 1 Tim. 3:11). Siiga iñjɨɨsne’ iga mija’ayɨ’yba, dende sɨɨ pɨɨmchiɨ’ je’m in̈wɨnanɨgo’oyi kun Jehová y yooxpa’atɨ iñfamilia, y je’m kumun.

20. ¿Juutypɨk tuum aapa wɨap iyooxpa’t ifamilia?

²⁰ Wɨapsɨ iga iniitypa immanɨktam. Siiga mija’ayɨ’yba wɨapsɨ iga iniitytya’mpa immanɨktam (Sal. 127:3). Je’yukmɨ kujɨɨsɨ tyi nasuntaap iga wɨaiñ in̈wɨakmɨjayaj. Je’m jɨɨxian̈chio’oyiyaj tan̈kɨ’pin̈netamwɨ’ɨp wɨap miyooxpa’tyaj. Jesɨk inikwiñkejpa toyo’oyi, ya’achan̈jamo’oyi y dya’ jobity mijo’yba, iñyooxpa’tpa iñfamilia iga maymayaiñ y je’m immanɨktam ijaamyajpa iga sɨ’ in̈kuixyaj y iñtyoyyajpa (Prov. 24:3).

21. ¿Ju’tspɨy iñchoowaixpa je’m yoomtɨwɨtam, y tyi’iga? (A’mɨ je’m imagenyaj itywɨ’ɨp yɨ’p totjaayi iwiñjom).

²¹ Yoomtɨwɨtam mimañityampɨk, tsaam mantoytya’mpa iga in̈kuyooxata’mpa Jehová y miyooxpadoytya’mpa je’m kumunjom (Heb. 6:10). Tsaam iñtyeguedata’mpa iga iniitytya’mpa wɨtampɨk jaamo’oyiyaj, in̈kuyujkata’mpa in̈watta’m tyikej iga miwɨwadaytya’mpa mimichtyam y tun̈gakyaj y miniwɨtsaktamtaap para je’m iññɨgɨyo’oyijom. ¡In̈watta’mpa tuum wɨbɨk yooxakuy en je’m Jehová iorganización!