¿Juutypɨk wɨap iwatki’psyaj Jesús je’m tɨwɨtam mañipɨkyaj?

1. ¿Tyi iwatyajiñ je’m tɨwɨtam iga iwɨnɨgayyajiñ?

JE’M an̈jago’oyi David iñɨ’may Salomón: «Naityɨ pɨɨmi y waatɨ ju’uts tuum pɨɨxiñ» (1 Rey. 2:​1-3). Ityumpɨy je’m tɨwɨtam mañipɨkyaj iga iwatki’psyajto’oba Jesús iyooxpa’tyajpatyim yɨ’p an̈ki’mayo’oyi. Siiga ikupɨkyajpa je’m Jehová ian̈ki’mayo’oyiyaj y je’m jɨɨxian̈chio’oyiyaj itywɨ’ɨp Bibliajom, iwɨnɨgayyajpa (Luc. 2:52). ¿Tyi’iga je’m tɨwɨtam mañipɨkyaj iwatki’psyajiñ Jesús?

2, 3. ¿Tyi’iga nasuntaap iga je’m tɨwɨtam mañipɨkyaj iwatki’psyajiñ Jesús?

² Je’m tɨwɨtam iniityyaj ja’yan̈ yooxakuy je’m ifamiliajom y je’m kumunjom. Siiga mimañiñam, wɨapsɨ iga iñjɨɨsneum ju’ptam yooxakuy wɨap iniity okmɨ. Wɨap iga michɨ’ytyo’oba ju’uts precursor, siervo ministerial y maaj okmɨ ju’uts anciano. Wɨapsɨ iga miyo’omɨytyo’oba y iniitytyo’oba immanɨktam (Efes. 6:4; 1 Tim. 3:1). Siiga inikkupakto’oba yɨ’pyaj metas y iñxunba iga miwɨnɨga’yiñ, watki’psɨ Jesús.b

³ ¿Tyi miyooxpa’tpa iga wɨaiñ in̈watki’ps Jesús? ¿Tyityam nasuntaap iga in̈kuyujkaiñ? Y ¿juutypɨk wɨap miniwɨtsakta iga wɨaiñ inikkupak je’m yooxakuyyaj iniitypa’ap iññɨgɨyo’oyijom? Tana’miñ.

TYI MIYOOXPA’TPA IGA WƗAIÑ IN̈WATKI’PS JESÚS

4. ¿Juuty wɨap impa’t wɨtampɨk akwiñkejo’oyiyaj? (A’mɨtyim je’m imagenyaj).

⁴ Kupin̈ɨ ityam in̈watki’pspa. Je’m Biblia ijɨyki’mpa ja’yan̈ pɨxiñtyam iga ityoyyajpa idyɨk Dios y ikuixayyaj je’m ikumun. Wɨapsɨ iga je’m iñfamiliajom y je’m kumunjom itytyim algun i iga wɨap in̈watki’ps (Heb. 13:7). Wɨaptyim in̈watki’ps Jesús (1 Ped. 2:21). Jesɨk in̈kɨ’pin̈ba yɨ’pyaj akwiñkejo’oyiyaj, kujɨɨsɨ ju’ptam jaamo’oyiyaj in̈kusu’nɨy (Heb. 12:​1, 2). Okmɨ kujɨɨsɨ juutypɨk wɨap in̈watki’ps.

5. ¿Tyi miyooxpa’tpa iga in̈wɨkujɨɨxiñ tyi in̈watpa, y tyi’iga in̈wadyiñ jeempɨk? (Salmo 119:9).

⁵ Kuiixɨ’ je’m joodon̈o’oyi y kujɨɨsɨ tyityam in̈watpa (Prov. 3:21). Jempɨk iwɨjɨɨspa tyi iwatpa, dya’ jobity ipɨkpa ijɨɨxi. Je’yukmɨ teguedaajɨ iga iniidyiñ yɨ’p wɨbɨk jɨɨxi. ¿Tyi’iga? Iga yɨ’p jaama je’m traytyipɨxiñtyam iya’ak ipɨkyajpa ijɨɨxi y dya’ ikujɨɨsyajpa tyi iwatyajpa (Prov. 7:7; 29:11). Y je’m televisión, je’m películas, je’m internet y je’m redes sociales wɨap mikagayyaj iñjɨɨxi. Jesɨk, ¿tyi miyooxpa’tpa iga in̈wɨjɨɨxiñ tyi in̈watpa? Wiñtyipɨk, kuyujkaɨ’ je’m Jehová ijɨɨxian̈chio’oyiyaj y kujɨɨsɨ juutypɨk miwɨwada’yba jesɨk in̈kupɨkpa. Okmɨ, jempɨk in̈kuyujkane’ miyooxpa’tpa in̈wɨpɨk iñjɨɨxi (maayɨ’ Salmo 119:9).c Jesɨk in̈wɨkujɨɨspa tyi in̈watpa miyooxpa’tpa in̈watki’ps Jesús (Prov. 2:​11, 12; Heb. 5:14). Tana’mta’miñ juutypɨk je’m wɨbɨk jɨɨxi miyooxpa’tpa iña’m 1) ju’utspɨk trato iñchi’iyajpa je’m yoomtɨwɨtam y 2) juutypɨk minipu’ktugɨytyaiñ.

6. ¿Juutypɨk tuum tɨɨwɨ mañipɨk ikwiñkejpa iga iwɨpɨkpa ijɨɨxi?

⁶ Jesɨk in̈wɨjɨɨspa tyi in̈watpa wɨap inikwiñkejay respeto je’m yomtam. Ju’uts akwiñkejo’oyi, wɨapsɨ iga tuum tɨɨwɨ ikusu’nɨyñe’ tuum yoomtɨwɨ y maaj iwɨixpɨkto’oba. Dya’ tyi naspa siiga iwatpa jeempɨk. Pero siiga dya’ ipɨkto’oba, dya’ nɨmpa o iwatpa algun tyi iga ikkutɨ’ɨyɨ’yiñ je’m yoomtɨwɨ iga ikusu’nɨyñe’, yɨ’ɨmpɨgam ikwiñkejpa iga iwɨpɨkpa ijɨɨxi (1 Tim. 5:​1, 2). Y siiga sɨ’bam iniixpɨkyajta, dya’ ityyajpa numaaj ikwɨstɨkyaj siiga dya’ ixunba iga kujɨytyaiñ je’m yoomtɨwɨ (1 Cor. 6:18).

7. ¿Tyi iyooxpa’tpa tuum tɨɨwɨ mañipɨk iga iwɨpɨguiñ ijɨɨxi juutypɨk napu’ktugɨytyaap y juutypɨk kujetspa?

⁷ Tun̈gak manera iga ikwiñkejpa iga iwɨpɨkpa ijɨɨxi, je’ jesɨk ikupin̈ba ju’utspɨk pu’ktuuku ikka’mpa y juutypɨk kujetspa. Jempɨk pu’ktuk watyajpa dya’ ikwiñkejayyajpa respeto Jehová. Je’yukmɨ je’m pu’ktuuku iwatyajpa’ap tsaam wayaytyam y jempɨk wattaap para je’m pɨxiñtyam jeextyim ikeeji ju’uts je’m yomtampɨk. Tuum tɨɨwɨ mañipɨk iwatki’pspa Jesús jesɨk ikupɨkpa je’m jɨɨxian̈chio’oyiyaj itywɨ’ɨp Bibliajom y iwɨkupin̈ba ju’utspɨk pu’ktuuku ikka’mpa o juutypɨk kujetspa. Nakwa’ktaajɨ: «¿Anakwiñkejpa iga an̈wɨpɨkpa anjɨɨxi y anjɨɨskupakne’eba tun̈gakyaj? Juutypɨk anapu’ktugɨytyaap, ¿anakwiñkejpa iga an̈kuyooxaap Dios?» (1 Cor. 10:​31-33; Tito 2:6). Jehová y je’m tɨwɨtam tsaam ityoyyajpa je’m mañipɨkyaj jesɨk iwɨpɨkyajpa ijɨɨxi.

8. ¿Juutypɨk ikwiñkejpa tuum tɨɨwɨ mañipɨk iga wɨyooxaap?

⁸ Akwiñkeejɨ iga miwɨyooxaap. Yɨ’p nɨmto’oba iga iñtyeguedaiñ in̈wɨakkupak iñyooxakuy (Luc. 16:10). Kujɨɨsɨ je’m Jesús iakwiñkejo’oyi, je’ juchixkej iwɨakkupak iyooxakuy. Iwat jempɨk Jehová iñɨ’may mex iga tan̈ka’ idyɨk. Ityoy je’m ikuyujkɨ’ɨwiñyaj y tun̈gakyaj, y ikɨan̈kot je’m iityi por je’eyaj (Juan 13:1). Ju’utstyim iwat Jesús, teguedaajɨ inikkupak je’m yooxakuy michi’ityapa’ap. Siiga dya’ iñjoodon̈ juutypɨk in̈watpa, nɨ’ma’ayɨ tuum tɨɨwɨ iga miyooxpa’dyiñ. Akwiñkeejɨ iga majnam wɨap iñyooxpadoy (Rom. 12:11). Pero waatɨ iñyooxakuy ju’uts ixunba Jehová «d́a je pɨ̱xiñ iŋcuyo̱xa̱p» (Col. 3:23). Odoy kuja’ama’ayɨ iga dya’ ityumpɨy miwɨpuda’yba, je’yukmɨ wɨpɨktson̈ɨ jesɨk min̈ki’mtaap (Prov. 11:2).

KUYUJKAƗ’ IN̈WAT TYIKEJ

9. ¿Tyi’iga tuum tɨɨwɨ mañipɨk ikuyujkaiñ iwat tyikej?

⁹ Iga wɨaiñ in̈watki’ps Jesús, wɨɨ iga in̈kuyujkaiñ in̈wat tyikej. Yɨ’p miyooxpa’tpa in̈wɨkuyooxaoy je’m kumunjom, wɨap impa’t y iniity tuum yooxakuy iga wɨaiñ minimatspakta, iñyooxpa’t iñfamilia y in̈wɨnanɨga’yiñ tun̈gakyaj. Tan̈kɨ’pin̈iñ ju’ptam.

10, 11. ¿Juutypɨk iyooxpa’tpa je’m kumun jesɨk tuum tɨɨwɨ mañipɨk wɨap ijay y ityotmay? (Salmo 1:​1-3; a’mɨtyim je’m imagen).

¹⁰ Kuyujkaɨ’ in̈wɨjay y in̈wɨmay. Je’m Biblia nɨmpa iga tsaam maymay y iwɨnɨga’yba jempɨk imayba y ikujɨɨspa je’m Dios In̈maatyi (maayɨ’ Salmo 1:​1-3).d Yɨ’ɨmpɨgam iixpɨkpa ju’uts je’m Jehová ijɨɨxi, y iwatki’pspa je’m iityijom jempɨk ikuyujkane’ (Prov. 1:​3, 4). Yɨkxpɨgam tɨwɨtam nasuntaap je’m kumunjom. ¿Tyi’iga?

¹¹ Je’m kumunjom nasuntaap tɨwɨtam iga wɨaiñ ijɨɨxian̈chioyyaj y in̈kejyaj jempɨk nɨmpa je’m Biblia (Tito 1:9). Siiga iñjoodon̈ in̈wɨjay y iñtyotmay, wɨap iniknas najɨ’yo’oyiyaj y iñchio’y kutson̈o’oyiyaj iga ipɨɨmchia’yba tun̈gakyaj ife. Y jesɨk in̈kumaton̈ba najɨ’yo’oyiyaj je’m an̈tu’umaajijom y je’m mɨjtampɨk an̈tu’umaajiyaj wɨap iñjaykunu’k jempɨk ipɨɨmchi’iba iñfe y wɨaiñ iñanmajan̈chi’ tun̈gakyaj.

12. ¿Tyi miyooxpa’tpa in̈wɨkumaton̈ y in̈wɨjɨ’yay tun̈gakyaj?

¹² Kuyujkaɨ’ in̈wɨkumaton̈ y in̈wɨjɨ’yay tun̈gakyaj. Ityumpɨy je’m tɨwɨtam wɨɨ iga iwatyajiñ yɨ’ɨmpɨk. Yɨ’p nɨmto’oba iga in̈kumaton̈iñ y in̈kutɨ’ɨyɨ’yiñ ju’uts in̈jaam tun̈gakyaj (Prov. 20:5). Wɨap iñjoodon̈a ju’uts in̈jaam algun i jesɨk iña’mpa juutypɨk jɨyba, tyityam iwatpa y ju’uts ia’mo’oyi. Siiga numaaj in̈kutsatpa correo electrónico y mensajes, maaj tan̈ka’ap iñixpɨkyaj y dya’ iñjoodon̈aap ju’uts in̈jaamyaj, je’yukmɨ me’etsɨ juutypɨk wɨap inimuruyaj (2 Juan 12).

13. ¿Tyiñam ikuyujkaiñ iwat tuum tɨɨwɨ mañipɨk? (1 Timoteo 5:8; a’mɨtyim je’m imagen).

¹³ Kuyujkaɨ’ juutypɨk minimatspaktaap. Tuum tɨɨwɨ iwatki’pspa’ap Jesús ikuyujkaiñ inimatspakta iya’ak y imatspak ifamilia (maayɨ’ 1 Timoteo 5:8). En weeñi países, je’m mañipɨkyaj ikuyujkayajpa iwatyaj je’m yooxakuy iwatyajpa’ap ijaatun̈, pero tun̈gak an̈eymɨ ikuyujkayajpa iwatyaj tyikej iganam kuyujpa ixɨ’yaj. Je’yukmɨ wɨɨ iga in̈kuyujkaiñ in̈wat ju’ptyin̈kej yooxakuy, yɨ’p miyooxpa’tpa iga wɨaiñ minimatspakta (Hech. 18:​2, 3; 20:34; Efes. 4:28). Juchixkej wɨyooxaajɨ y akkupaakɨ, siiga in̈watpa yɨ’ɨmpɨk dya’ impatstogoyba iñyooxakuy. Ityumpɨy jempɨk tan̈kɨ’pin̈neta’m, miyooxpa’tpa iga wɨaiñ inikkupak yooxakuyyaj iniitypa’ap iññɨgɨyo’oyijom. Tana’miñ ju’ptam.

NAWƗTSAKTAAJƗ PARA JE’M IÑÑƗGƗYO’OYI

14. ¿Tyi iyooxpa’tpa tuum tɨɨwɨ mañipɨk iga ikuyooxaiñ Jehová a tiempo completo?

¹⁴ Wɨap in̈kuyooxa Jehová a tiempo completo. Ja’yan̈ tɨwɨtam moj kuyooxao’oyiyaj ju’uts precursor jesɨk mañiyajnam, yɨ’p iyooxpa’tyaj iga iwatki’psyajiñ Jesús. Siiga michɨ’yba ju’uts precursor, in̈kuyujka’aba juutypɨk wɨap in̈waganayooxa tun̈gakyaj y in̈wɨpɨk je’m tumiñ (Filip. 4:​11-13). ¿Tyi’iga dya’ iniktsukumpa je’m precursorado auxiliar? Yɨ’bam iyooxpa’tyaj tun̈gakyaj iga kuyooxaoyyajiñ ju’uts precursor regular. Y yɨ’p wɨap miyooxpa’t iga mikuyooxao’yiñ a tiempo completo, ju’uts siervo de construcción o betelita.

15, 16. ¿Tyi iwadyiñ tuum tɨɨwɨ mañipɨk iga wɨaiñ ikuyooxaoy ju’uts siervo ministerial o anciano?

¹⁵ Wɨap in̈kuyooxaoy ju’uts siervo ministerial o anciano. Ityumpɨy je’m tɨwɨtam ityeguedayajiñ ikkupakyaj tyityam nasuntaap iga wɨaiñ ikuyooxaoyyaj ju’uts anciano. Je’m Biblia nɨmpa iga jempɨk iwatpa yɨ’ɨmpɨk «imétspa tu̱m wɨbɨc yo̱xacuy» (1 Tim. 3:1). Iga algun i tsɨ’yiñ ju’uts anciano, wiñtyi kuyooxao’yiñ ju’uts siervo ministerial. Je’m siervos ministeriales iyooxpa’tyajpa je’m ancianojyaj ikuixyaj je’m tɨwɨtam ityyajwɨ’ɨp je’m kumunjom y kun maymayaaji putyajpatyim je’m an̈matkuyjom. Tuum tɨɨwɨ wɨap ikkupak tyityam nasuntaap iga tsɨ’yiñ ju’uts siervo ministerial mex iga ke’nam traytyiñam ikeeji. Y wɨap ichɨ’y ju’uts anciano mex siiga yaguiñ ka’psne’ 20 iamtyɨy.

¹⁶ Je’m Bibliajom impa’tpa an̈ki’mayo’oyiyaj iga miyooxpa’tpa in̈kuyooxaoy ju’uts siervo ministerial y anciano. Yɨ’ɨm tɨgɨyku’mpa je’m toyo’oyi iniidyaywɨ’ɨp Jehová, iñfamilia y je’m tɨwɨtam (1 Tim. 3:​1-13; Tito 1:​6-9; 1 Ped. 5:​2, 3). Waatɨ ju’tspɨyam miwɨap iga in̈kutɨ’ɨyɨ’yiñ tumtum an̈ki’mayo’oyiyaj y wa’ga’ayɨ Jehová iga miyooxpa’dyiñ inikkupak.e

17. ¿Tyi iwadyiñ dende sɨɨ tuum tɨɨwɨ mañipɨk siiga ijɨɨsne’ iga yo’omɨ’yba? (A’mɨtyim je’m imagen).

¹⁷ Wɨap iñyo’omɨy y michɨ’yba ju’uts kobakpɨk de familia. Ju’uts nɨm Jesús, weeñi ipɨkneyaj ijɨɨxi iga dyanam an̈ko’mɨyyajpa (Mat. 19:12). Pero, siiga impɨkpa iñjɨɨxi iga miyo’omɨ’yba, michɨ’yba ju’uts kobakpɨk de familia (1 Cor. 11:3). Jehová in̈jo’kpa iga je’m pɨɨxiñ ityo’yiñ iyoomo’ y ikuixiñ espiritualmente, imatspaguiñ y tsɨ’yiñ ju’uts tuum wɨbɨk iamigo (Efes. 5:​28, 29). Yɨ’p kuyujijom tan̈kɨ’pin̈neta’m iga in̈kuyujkaiñ in̈wat tyikej, in̈wɨkujɨɨxiñ tyi in̈watpa, iniidya’yiñ respeto je’m yoomtɨwɨtam y inikwiñkejiñ iga miwɨyooxaap. Siiga in̈watpa yɨ’ɨmpɨk miyooxpa’tpa inikkupak iñyooxakuy ju’uts wɨdyaaya y kobakpɨk de familia.

18. ¿Tyi iwadyiñ dende sɨɨ tuum tɨɨwɨ mañipɨk iga wɨaiñ ikkupak iyooxakuy siiga iniitypa imanɨktam?

¹⁸ Wɨapsɨ iga iniitypa immanɨktam. Siiga miyo’omɨ’yba, wɨapsɨ iga iniitypa immanɨktam. Je’m Jehová iakwiñkejo’oyi wɨap miyooxpa’t iga in̈wɨakkupaguiñ iñyooxakuy ju’uts jaatun̈ (Efes. 6:4). Je’ juchixkej iñɨ’may je’m iMaanɨk Jesús iga ityoyba y maymay kun je’ (Mar. 1:11). Siiga iniitypa immanɨktam juchixkej nɨ’mayyaajɨ iga iñtyoyyajpa y iga mimaymay jesɨk kupɨgoyyajpa. Je’m jaatun̈yaj jempɨk ityun̈ɨyyajpa je’m Jehová iakwiñkejo’oyi iyooxpa’tyajpa je’m imanɨktam iga iwatki’psyajiñ Jesús. ¿Tyi in̈wadyiñ dende sɨɨ iga wɨaiñ in̈wɨakmɨjayaj? Akwiñkeja’ayɨ toyo’oyi je’m iñfamilia y je’m tɨwɨtam, y juchixkej nɨ’mayyaajɨ ju’utspɨy iñtyoyyajpa (Juan 15:9). Yɨ’p dya’ numaaj miyooxpa’tpa siiga miyo’omɨ’yba y iniitypa immanɨktam, iwɨwada’yba iñfamilia, je’m kumun y Jehová tsaam ichoowaixpa jempɨk in̈watpa.

¿IÑJƗƗSNEUM TYI IN̈WATPA?

19, 20. ¿Tyi iwadyiñ tuum tɨɨwɨ mañipɨk iga wɨaiñ iwatki’ps Jesús? (A’mɨ je’m imagenyaj itywɨ’ɨp yɨ’p totjaayi iwiñjom).

¹⁹ Siiga mimañiñam y in̈watki’psto’oba Jesús, kujɨɨsɨ tyityam miyooxpa’tpa. Kupin̈ɨ wɨtampɨk akwiñkejo’oyiyaj, wɨkujɨɨsɨ tyi in̈watpa, akwiñkeejɨ iga in̈wɨakkupakpa iñyooxakuy, kuyujkaɨ’ in̈wat tyikej y nawɨtsaktaajɨ para je’m iññɨgɨyo’oyijom.

²⁰ Jesɨk in̈kujɨɨspa ityumpɨy je’m yooxakuy iga in̈watpa, wɨapsɨ iñjɨɨs iga usan̈ tan̈ka’. Pero odoy an̈ya’akɨ, ¡mich wɨap inikkupak! Odoy kuja’ama’ayɨ iga Jehová tsaam miyooxpa’tto’oba (Is. 41:​10, 13). Y je’m tɨwɨtam y yoomtɨwɨtam miyooxpa’tyajpatyim. Jesɨk in̈watpa jempɨk Jehová ixunba, mimaymayaap iñityijom. Tsaam mantoytya’mpa y ansunta’mpa iga Jehová mikumayketta’miñ iga sɨ’ in̈watki’psta’m Jesús (Prov. 22:4).