25 Sohl eri nda: “Iet me kumwail pahn ndaiong Depit, ‘Nanmwarkio sohte men ale pweipwei ehu ong nah serepeino,+ ihte kilin imwin en mehn Pilisdia kan dipwisoun kaparapar 100,+ pwehn ikih en nanmwarkio imwintihti kan.’” Pwe Sohl kin koasoakoasoane pwe mehn Pilisdia kan en kemehla Depit.

27 Depit kohla iangahki nah ohl ako oh kemehla ohl en Pilisdia 200, oh Depit eri wadohng nanmwarkio kilin imwin neirail dipwisoun kaparapar ko koaros, pwehn pwoudikihda nein nanmwarkio serepeino. Ihme kahrehda, Sohl kihong ih nah serepeino Maikal pwe en wiahla eh pwoud.+