7 Ni eh ketin kaimwisekala dahme e ketin anahne mahsanihong aramas ako, e ahpw ketilong nan Kapernaum. 2 Eri nein kaunen sounpei* men ladu me e kin kesempwalki soumwahu laud oh kereniongehr mehla.+ 3 Ni eh rongada duwen Sises, e ahpw kadaralahng ekei ohl mah en mehn Suhs ko pwe ren peki reh en ketidohng kamwahwihala nah laduwo. 4 Re ahpw patohdo rehn Sises oh tepida peki reh ni ngidingid, patohwan: “E warohng komwi en ketin kapwaiong ih met, 5 pwe e kin poakohng tohn atail wehi oh pein ih kauwada atail sinakoke.” 6 Sises eri ketin iangihrala. Ahpw ni eh ketin kerenlahng ihmwo, kaunen sounpeio kadaralahngehr kompoakepah kei en patohwanohng: “Maing, komw dehr kupwurohki ketido, pwe I sohte warohng komwi en ketilong nan imweio.+ 7 Ihme kahrehda I medewe me I sohte warohng patohwei rehmwi. Ahpw komw mahsente, a ei laduwo pahn mwahula. 8 Pwe ngehi pil mi pahn manaman, oh mie nei sounpei kan, oh ni ei kin ndaiong emen ‘Kohla!’ a e kin kohla, oh pil ong emen, ‘Kohdo!’ a e kin kohdo. Oh ni ei ndaiong ei ladu, ‘Wia met!’ a e kin wia.” 9 Ni Sises eh karongehda mepwukat, e ketin pwuriamweikihla, e ahpw ketin sohpeiong pokono me ideidawehn oh mahsanih: “I ndaiong kumwail, I sohte diarada soangen pwoson laud me uwe met,+ pil nan Israel.”