66 Nindoken Piter eh mihmi pah nan wasa kelpeneo, a nein samworo lapalapo lidu serepein men ahpw kohdo.+ 67 Ni eh kilang Piter eh wie rengireng, e ahpw kangkakil ih oh ndahng: “Kowe me pil iang Sises menet, mehn Nasareto.” 68 Ahpw e kahmahmki oh nda: “I sehse ihs ih oh I pil sohte wehwehki dahme ke ndindahn,” ih eri kohieila likio wasa me karanih ewen kehlo. 69 Lidu serepeino kilangada ih wasao oh pwurehng ndaiong irail ko me kesikesihnen mwo: “Emen irail met.” 70 E pil pwurehng kahmahmkihla. A mwurin ahnsou kis, irail me kesikesihnen wasao pil pwurehng ndaiong Piter: “Uhdahn kowe emen irail, pwe ni mehlel, mehn Kalili men kowe.” 71 E ahpw tepida keria pein ih oh kahula, nda: “I sehse ihs ohl menet me kumwail ndindahn!” 72 Ni ahnsowohte malek men pa kakorot keriapak,+ oh Piter tamanda dahme Sises mahsanihong ih: “Mwohn malek eh pahn kakorot pak riau, ke pahn kahmahmkin ie pahn pak silipak.”+ Ih eri uhdahn nsensuwedla oh tepida sengiseng.

54 Irail eri salihedi oh kahreieila+ oh walahng ni imwen samworo lapalapo; a Piter ideidawehn ih, ahpw ekis dohlahsang.+ 55 Ni arail saunda kisiniei nanwerengen wasa me kelpeneo, re ahpw mwohdpene, Piter mwomwohd nanpwungarail.+ 56 Ahpw lidu serepein men kilang eh wie mwomwohd ni marain en kisinieio, e ahpw kangkakil oh nda: “Ohl menet pil kin iang ih.” 57 Ahpw e kahmahmki oh nda: “Lih, I sehse ihs ih.” 58 Mwurin ahnsou kis, emen pil kilangada ih oh nda: “Kowe pil emen irail.” Piter ahpw nda: “Soh, kaidehn ngehi emen irail.”+ 59 A mwurin mpen awa ehu, pil emen ohl tepida ngihtehtehki ni kehlail: “Uhdahn ohl menet pil kin iang ih, pwe ni mehlel, ih mehn Kalili men!” 60 Piter ahpw nda: “I sehse dahme ke ndindahn.” A ni ahnsowohte, nindoken eh koasoakoasoi, malek men pa kakorot. 61 Kauno ahpw ketin pirekek oh sohpeidohng Piter, oh Piter tamanda mahsen en Kauno ni eh mahsanihong ih: “Mwohn malek eh pahn kakorot rahnwet, ke pahn kahmahmkin ie pahn pak silipak.”+ 62 E ahpw kohieila likio oh sengiseng kowahlap.

15 Eri Saimon Piter oh pil emen tohnpadahk ahpw ideidawehn Sises.+ Samworo lapalapo ese tohnpadahk menet, me kahrehda e iang Sises pedolong nan wasa kelpeneo ni imwen samworo lapalapo, 16 Piter ahpw kesikesihnen likin wenihmwo. Eri, tohnpadahk teio me samworo lapalapo ese ahpw kohieila oh koasoiong silepen wenihmwo oh kahluwalong Piter loale. 17 Lidu serepein men me wia silepen wenihmwo ahpw ndaiong Piter: “Kaidehn kowe pil emen nein ohl menet tohnpadahk ko?” E ahpw nda: “Kaidehn.”+