Eklesiasdes

10 Duwehte loahng mehla kan ar kin kapwohsuwedihala oh kauwehla leh pwohmwahu, ih duwen kisin pweipwei eh kin kauwehla adamwahu en aramas loalokong oh wahu.+

2 Mohngiong en aramas loalokong men kin kahluwalahng ih nan ahl pwung,* ahpw mohngiong en aramas pweipwei men kin kahluwalahng ih nan ahl sapwung.*+ 3 Sohte lipilipil mehnia ahl me aramas pweipwei men kin keid ie, e sohte ahneki lamalam mwahu,*+ oh e kin kasalehiong aramas koaros me ih pweipwei men.+

4 Ma kaun emen pahn lingeringerda pahmw, ke dehr kohkohlahsang nan dewomw,+ pwe meleilei kin katikala dihp laud.+

5 Mie soahng kansensuwed ehu me I kilangehr nin sampah,* soangen sapwung ehu me irail akan me ahneki manaman wiadahr:+ 6 Me pweipwei kin kesepwilda nan dehu ileile tohto, ahpw me kepwehpwe* kin mihmihte nan dehu tikitik kan.

7 I kilangehr ladu kan ar dak oahs a kaun akan alialu duwehte ladu kei.+

8 Aramas me kin weirada pwoahr ehu kakete pwupwudiong loale;+ oh aramas me kin koupwoarepeseng kehl takai ehu kakete ngelingeldi pahn sineik.

9 Aramas me kin par takai kakete ohkihla takai kan, oh aramas me kin pwaik tuhke kakete lelohng nan keper.*

10 Ma sile pwoat kons oh aramas sohte edehda ni keile kan, e pahn anahne doadoahk laudki. Ahpw erpit kin sewese aramas en pweida.

11 Ma sineiko keikei mwohn eh kamandala, sohla katepen sounkamand sineik koahieko.

12 Lokaia kan me kin kohsang nan ewen aramas loalokong men kin kansenamwahu,+ ahpw kilin ewen me pweipwei men kin kauwehla pein ih.+ 13 Tepin koasoi kan me kohsang nan ewe me pweipwei,+ oh kaimwiseklahn eh koasoi kan kin iahk douluhl. 14 Ahpw me pweipwei kin usehlahte koasoakoasoi.+

Aramas sohte kin ese dahme pahn wiawi; ihs me pahn kak ndaiong ih dahme pahn wiawi mwurin eh sohla mie?+

15 Doadoahk laud en me pweipwei men kin kahrehiong pein ih en pwangada, pwe e pil sehse elen kolahng kahnimwo.

16 Ia uwen apwal ong sahpw ehu ma nanmwarkio wia kisin pwutak kis+ oh kaun akan kin tapiada arail kamadipw nimenseng! 17 Ia uwen kaperen ong sahpwo ma nanmwarkio wia nein me lapalap akan oh kaun akan kin tungoal ni ahnsou me konehng pwe ren kehlail a kaidehn ren sakaula!+

18 Ma aramas emen uhdahn pohnkahke, lohlohn imweo pahn pwupwudi, oh ma peh kan sohte kin wia mehkot, imweo pahn imwpwi.+

19 Mwenge kin wiawihda pwehn wahdo nsenamwahu,* oh wain kin kahrehiong mour en kaperen;+ ahpw mwohni kin kaitarala anahn koaros.+

20 Ke dehr keria nanmwarki,+ mehnda ma pil nan omw madamadau,* oh ke dehr keria* me kepwehpwe sang nan omw pere; pwe menpihr men* kakete wahla ngilomw;* e kakete pwurehng ndahla dahme ke ndao.