Esekiel

37 Limen Siohwa ketiket pohi, oh sang ni sapwellime ngehn sarawi,* Siohwa ketin waiehla oh pwilikiniehdi nanwerengen wasa patapat en wahwo,+ oh wasao diren tih. 2 Ih eri ketin wiahiong ie I en aluseli nanwerengen tih ko koaros, oh I kilang me uhdahn tohto tih wie wonohnseli nan wasa patapat en wahwo, oh tih ko me inenen madekeng.+ 3 Ih eri ketin keinemwe rehi: “Nein-aramas, ia duwe, tih pwukat kak mourda?” Ngehi eri sapeng patohwan: “Maing Kaun Wasa Lapalahpie Siohwa, komwi me ketin mwahngih.”+ 4 Ih eri ketin mahsanihong ie: “Kohpada duwen tih pwukat, oh ndaiong irail, ‘Kumwail tih madekeng kan, kumwail rong mahsen en Siohwa:

5 “‘Iet me Kaun Wasa Lapalahpie Siohwa ketin mahsanihong tih pwukat: “I pahn kahrehiong angin esingek en kohlong rehmwail, oh kumwail pahn mourda.+ 6 I pahn kihong kumwail sahl kan* oh uduk, oh I pahn kidimkinkumwailpene kihl oh kihong kumwail angin esingek, oh kumwail pahn mourda; oh kumwail pahn anahne ese me ngehi me Siohwa.”’”

7 Ngehi eri kohpada duwehte kehkehlik me I alehdio. Nindoken ei wiewia kokohp, mie ngihl ehu pa kohda, ngilen tih ko loiloipene, oh tih ko ahpw tepida ospene, tih ong tih. 8 Ngehi eri kilangada sahl oh uduk kan ar pwarapwarada pohn tih ko, oh kihl kan kidimpene tih ko. Ahpw saikinte mie angin esingek rehrail.

9 Ih eri ketin mahsanihong ie: “Wia kokohp ong kisiniengo. Nein-aramas, wia kokohp, oh ndaiong kisiniengo, ‘Iet me Kaun Wasa Lapalahpie Siohwa ketin mahsanih: “Kisinieng,* kohdo sang ni pali pahieu kan* oh ipidohng pohn aramas pwukat me kamakamala, pwe ren mourda.”’”

10 Ngehi eri kohpada duwehte me e ketin kehkehlingkihong ie, oh angin esingek* ahpw kohlong rehrail, oh irail tepida mourda oh kesihnenda.+ Irail wia lapalahn karis en sounpei ehu.

11 Ih eri ketin mahsanihong ie: “Nein-aramas, tih pwukat iei aramas en Israel kan pwon.+ Re kin ndinda, ‘At tih kan madekeng, oh at koapworopwor sohralahr.+ Se uhdahn mwomwlahr.’ 12 Eri wia kokohp oh ndaiong irail, ‘Iet me Kaun Wasa Lapalahpie Siohwa ketin mahsanih: “Nei aramas akan, I pahn kasarapeseng amwail sousou kan+ oh kapwourkumwailda sang amwail sousou kan, oh waikumwaillahng nan sapwen Israel.+ 13 Oh nei aramas akan, kumwail pahn anahne ese me ngehi me Siohwa ni ei kasarapeseng amwail sousou kan oh ni ei kapwourkumwailda sang amwail sousou kan.”’+ 14 ‘I pahn kihdiong ei ngehn sarawi* loalamwail oh kumwail pahn mourda,+ oh I pahn koasoaneikumwaildi nan sapwamwailo; oh kumwail pahn anahne ese me ngehi, Siohwa, me mahsaniher oh kapwaiadahr met,’ Siohwa me ketin mahmahsen.”

15 Siohwa ketin pwurehng mahsanihong ie: 16 “Oh kowe, nein-aramas, ale kisin lepin tuhke ehu oh ntingihedi powe, ‘Ong Suda oh ong aramas en Israel kan me mi reh.’*+ Mwuri pil ale ehu kisin lepin tuhke oh ntingihedi powe, ‘Ong Sosep, kisin lepin tuhkehn Epraim, oh aramas en Israel koaros me mi reh.’*+ 17 Kowe eri kolpene kisin lepin tuhke pwukat pwe ira en wiahla kisin lepin tuhke ehu nan pehmwen.+ 18 Ni omw aramas akan* ar ndaiong uhk, ‘Ke sohte pahn ndaiong kiht ia wehwehn mepwukat?’ 19 ndaiong irail, ‘Iet me Kaun Wasa Lapalahpie Siohwa ketin mahsanih: “I pahn ale kisin lepin tuhkehn Sosep, me mi nan pehn Epraim, oh keinek en Israel kan me mi reh, oh I pahn kapatahiong irail ni kisin lepin tuhkehn Suda; oh I pahn wiahiong ira en wiahla kisin lepin tuhke ehu,+ oh ira pahn wiahla ehu nan limeiet.”’ 20 Kolada kisin lepin tuhke ko me ke ntingih powe pwe ren kilang.

21 “Kowe eri ndaiong irail, ‘Iet me Kaun Wasa Lapalahpie Siohwa ketin mahsanih: “I pahn ale mehn Israel kan sang nan wehi kan me re kohla ie, oh I pahn I kihirailpene sang wasa koaros oh wairaildo nan sapwarailo.+ 22 I pahn wiahiong irail ren wiahla wehi tehieu nan sahpwo,+ pohn nahna kan en Israel, oh emen nanmwarki pahn kaunda irail koaros,+ oh irail sohla pahn wia tohnwehi riau; de re pil sohla pahn tohrohrpeseng ni wehi riau.+ 23 Re sohla pahn kasaminehkihla pein irail arail dikedik kasaut kan* oh arail wiewia kasaut kan oh arail kauwehla kosonned kan koaros.+ I pahn doareirailsang arail salelepek koaros me kahrehiong ar dipada, oh I pahn kamwakeleirailda. Re pahn wiahla nei aramas, oh I pahn wiahla ar Koht.+

24 “‘“Ei ladu Depit pahn wiahla ar nanmwarki,+ oh irail koaros pahn ahneki silepe tehmen.+ Irail pahn keid nan ei kosonned kan oh kapwaiada ei koasoandi kan ni keneinei.+ 25 Re pahn kousoan nan sahpw me I kihong ei ladu Seikop, wasa me samamwail mehn mahs ako kousoan ie,+ oh re pahn kousoan powe kohkohlahte,+ irail oh neirail seri kan* oh kadaudokarail kan;+ oh ei ladu Depit pahn wia ar kaun kohkohlahte.+

26 “‘“Oh I pahn wiahda inou lap en popohl ehu rehrail;+ e pahn wia inou lap poatopoat ehu ong irail. I pahn koasoaneiraildi oh kangedereirailla+ oh kihdi ei wasa sarawio nanpwungarail kohkohlahte. 27 Ei impwalo* pahn mihmi rehrail,* oh I pahn wiahla ar Koht, oh re pahn wiahla nei aramas.+ 28 Oh wehi kan pahn anahne ese me ngehi, Siohwa, me kasarawihala Israel ni ei wasa sarawio eh mihmi nanpwungarail kohkohlahte.”’”+