Nein Seims Kisinlikou
2 Riei ko, ia duwe, kumwail kin pwoson atail Kaun lingan Sises Krais, ahpw ni ahnsowohte lipilipilki aramas?+ 2 Pwe ma ohl emen me kapwatki rihng kohl oh likou kaselel pedolong nan amwail mihting, a ohl semwehmwe men me likawih likou samin pil pedolong, 3 ia duwe, kumwail kin wauneki me kapwatki likou kaselelo oh ndaiong, “Mwohndi wasaht nan wasa kaselel wet,” a kumwail ndaiong me semwehmweo, “Kesikesihnen” de, “Mwohndi mwo limwahn nehie”?*+ 4 Ma iei, kumwail sou kin kesempwalki ehu pwihn laudsang meteio,+ oh kumwail sou wiahla sounkopwung me kin wia kopwung suwed?+
5 Riei kompoakepahi ko, kumwail rong. Koht sou kin ketin pilada irail kan me semwehmwe nin sampah wet pwe ren kepwehpwehla ni pwoson+ oh sohsohki Wehio, me e ketin inoukihong irail kan me poakohng ih?+ 6 Ahpw kumwail kin mwamwahliki me semwehmwe kan. Kaidehn me kepwehpwe kan me kin wiakauwe kumwail+ oh wurahdekihkumwailla ni mwoalen kopwung kan? 7 Irail sou kin lahlahwe ahd kaselel me kumwail kin adaneki? 8 Eri ma kumwail kin kapwaiada kosonned lap en Nanmwarkio me poahsoankihda nting sarawi me mahsanih, “Ke anahne poakohng mehn mpomw duwehte omw kin poakohng pein uhk,”+ eri kumwail kin wia me mwahu. 9 Ahpw ma kumwail kin pousehlahte lipilipilki aramas,+ eri kumwail kin wiewia dihp oh kosonnedo wiahkinkumwailla aramas en kauwe kosonned.+
10 Pwe ma emen kin peikiong audepen Kosonnedo pwon ahpw wiahda kahk sapwung ehu ni ehu kehkehlik ko, e uhwongadahr Kosonnedo pwon.+ 11 Pwe Koht me ketin mahsanih, “Ke dehr kamwahl,”+ pil ketin mahsanih, “Ke dehr kemehla aramas.”+ Eri ma ke sohte kamwahl, ahpw ke kemehla aramas, ke kauwelahr kosonned. 12 Amwail koasoi oh wiewia en kin duwehte irail kan me pahn pakadeingkihda kosonnedo me kin kasaledekihala aramas.*+ 13 Pwe mehmen me sohte kin kasalehda kadek kalahngan sohte pahn diar kadek kalahngan ni eh pahn ale kadeik.+ Kadek kalahngan kin powehdi kadeik.
14 Riei ko, dah katepehiong emen ma e kin nda me e ahneki pwoson ahpw sohte eh wiewia?+ Ia duwe, pwoson wet pahn kak doarehla ih?+ 15 Ma mie riatail ohl de lih akan me sohte ar likou* oh kanarail mwenge sohte itar ong rahn ehu, 16 emen rehmwail ahpw ndaiong, “Kohkohwei ni popohl; ke nek diar likou oh mwenge,” ahpw kumwail sohte kihong irail dahme re anahne ong paliwararail, eri ia katepen met?+ 17 Ih pil duwen ma pwosonte me mie ahpw wiewia sohte iang, e wia pwoson mehla ehu.+
18 Ahpw emen pahn nda: “Mie omw pwoson, oh mie ei wiewia. Kasalehiong ie omw pwoson me wiewia sohte iang, a I pahn kasalehiong uhk ei pwoson sang ni ei wiewia kan.” 19 Ia duwe, ke kin kamehlele me Koht mehtehmen? Eri ke kin wia me mwahu. Ahpw ngehn suwed kan pil kin kamehlele oh kin rerrerki ar masak.+ 20 Kowe aramas soh audepe, ia duwe, ke men ese me pwoson me wiewia sohte iang sohte katepe? 21 Samatail Eipraam sou pwungla rehn Koht sang ni eh wiewia kan mwurin eh meirongkihla nah pwutak Aisek pohn pei sarawio?+ 22 Ke ese me eh pwoson kin sansalkihda eh wiewia kan oh eh pwoson kin unsengkihla eh wiewia kan,+ 23 oh nting sarawio pweida me mahsanih: “Eipraam pwoson Siohwa,* oh E ketin wiahkihla ih aramas pwung men,”+ e ahpw adanekihla kompoakepahn Siohwa.*+
24 Kumwail en wehwehki me aramas emen pahn kin pwungla rehn Koht pwehki eh wiewia kan ahpw kaidehn pwehki eh pwosonte. 25 Pil duwehte, Reap lihen netiki paliwaro sou pil pwungla rehn Koht sang ni eh wiewia kan mwurin eh kasamwo meninkeder ko oh kadarirahla ni apwoat ahl tohrohr?+ 26 Ei, duwehte paliwar ehu me sohte esingek* eh mehla,+ ih pil duwen pwoson me wiewia sohte iang, e wia pwoson mehla ehu.+