Rongamwahu en Luk
18 Ih eri doula mahsanihong irail karasaras pwoat duwen ar anahne kapakap ahnsou koaros oh dehr nan kapehd tikitikla,+ 2 mahsanih: “Mie sounkopwung men nan kahnimw ehu me sohte kin lemmwiki Koht oh sohte wauneki aramas. 3 Pil mie liohdi men nan kahnimwo me kin pwurepwure ih oh ndinda, ‘Kilang pwe I en alehdi koasoandi pwung oh pahrek ni repenpwung ong pelieio.’ 4 Eri, erein ahnsou ehu sounkopwungo sohte men wia met, ahpw mwuhr e ndaiong pein ih, ‘Mendahki ei sohte lemmwiki Koht de wauneki aramas, 5 a pwehki liohdi menet kin kedirepwe ie, I pahn sewese pwe en ale pwung pahrek pwe en dehr kin pwurepwure ie oh kapwangahkin ie eh pekipek.’”+ 6 Kauno eri mahsanih: “Kumwail rong dahme sounkopwungo nda mendahki aramas suwed men ih! 7 Ia duwe, Koht sou pahn ketin kapwaiada pwung pahrek ong sapwellime kan me pilipildahr me kin likweriong ih ni rahn oh nipwong,+ mehnda ma e kin ketin kanengamahiong irail?+ 8 I ndaiong kumwail, e pahn mwadang ketin kapwaiada pwung pahrek ong irail. Ahpw ni ahnsou me Nein-aramas pahn ketido, ia duwe, e uhdahn pahn ketin diar pwoson wet* nin sampah?”
9 E pil mahsanih karasaras pwoatet ong ekei me kin kamehlele me irail me pwung oh kin medewe me meteikan sohte katepe: 10 “Ohl riemen kohdalahng tehnpas sarawio pwe ira en kapakap, Parisi men oh sounrik daksis men. 11 Parisio kesihnen oh tepida kapakapki mepwukat nan kapehde, ‘Maing Koht, I kin kalahngankihong komwi ei sohte kin duwehte aramas teikan—me kin loallap, me kin wia me suwed, me kin kamwahl—de pil duwehte sounrik daksis menet. 12 I kin kaisihsol pak riau nan wihk ehu; I kin kihda eisek kis ehun soahng koaros me I alehdi.’+ 13 Ahpw sounrik daksiso uh ekis dohsang oh sohte pil kilengdalahng nanleng ahpw pikipikir nan mwaremware, ndinda, ‘Maing Koht, komw ketin kupwure ie,* ngehi me dipan men.’+ 14 I ndaiong kumwail, ohl menet kasalehda me e pwung sang Parisio ni eh kohdihla ni imweo.+ Pwehki mehmen me kin kasapwilada pein ih pahn tikitikla, ahpw mehmen me kin aktikitikla pahn lapalapala.”+
15 Aramas akan pil patohwandohng ih neirail kisin seri kan* pwe en ketin doahke irail, ahpw ni tohnpadahk ko ar kilang met, re tepida lipwoare irail.+ 16 Sises ahpw malipehdo kisin seri ko oh mahsanih: “Kumwail mweidohng kisin seri kan ren kohdo rehi oh dehr kapweiek irail, pwe Wehin Koht iei wehin soangen aramas pwukat.+ 17 I ndaiong kumwail ni mehlel, mehmen me sohte kin kasamwo Wehin Koht duwehte kisin seri men, e sohte mwahn pahn pedolong loale.”+
18 Emen kaun ako ahpw idek reh patohwan: “Maing Sounpadahk mwahu, dahme I anahne wia pwe I en sohsohki mour soutuk?”+ 19 Sises ahpw mahsanihong ih: “Dahme kahrehda ke ekerkin ie mwahu? Sohte emen me mwahu, pwe Kohtete.+ 20 Ke ese kehkehlik kan: ‘Dehr kamwahl,+ dehr kemehla aramas,+ dehr pirap,+ dehr wiahda kadehde likamw,+ kahkahki semomw oh inomw.’”+ 21 Ih eri patohwan: “I kin kapwaiada mepwukat koaros sang ni ei pwulopwul.” 22 Mwurin Sises eh karonge met, e mahsanihong ih, “Mie mehkot me ke pil anahne wia: Netikihla omw dipwisou koaros oh nehkpeseng pweine kan ong aramas semwehmwe kan, ke ahpw pahn ahneki pai en nanleng; oh kohdo idawehniehla.”+ 23 Ni eh rongada met, e uhdahn pahtoula, pwe ih aramas kepwehpwe men.+
24 Sises eri ketin kilenglahng oh mahsanih: “Ia uwen eh pahn apwal ong irail kan me naineki mwohni ren pedolong nan Wehin Koht!+ 25 Ni mehlel, e mengeiong kamel men en dil nan pwoaren dikek ehu sang aramas kepwehpwe men en pedolong nan Wehin Koht.”+ 26 Irail ko me rong met ahpw patohwan: “Ihs me pahn kak komourla?”+ 27 E mahsanih: “Mehkan me sohte kak pweida rehn aramas kak pweida rehn Koht.”+ 28 Ahpw Piter patohwan: “Kilang! Se pwilikidier dahme se ahneki oh ideidawehn komwi.”+ 29 E mahsanihong irail: “I ndaiong kumwail ni mehlel, mehmen me pwilikihdi imwe de eh pwoud de rie kan de seme oh ine de nah seri kan pwehki Wehin Koht+ 30 pahn ale pak tohto nan ahnsou pwukat, a ni koasoandi en mwehi me kohkohdo,* mour soutuk.”+
31 Ih eri ketin katohrehla meh Ehk Riemeno oh mahsanihong irail: “Kilang! Kitail kohkohdalahng Serusalem oh soahng koaros me soukohp ako ntingihedi duwen Nein-aramas pahn pweida.*+ 32 Karasepe, e pahn pengpengla rehn mehn liki kan+ oh re pahn kapailoke+ oh wiakauwe oh kendipih.+ 33 Oh mwurin ar pahn wokih, re pahn kemehla,+ ahpw ni kesiluhwen rahn e pahn iasada.”+ 34 Ahpw, re sohte wehwehki mepwukat pwehki wehwehn mahsen pwukat ekieklahr sang irail.
35 Eri ni Sises eh ketin kerenlahng Seriko, ohl maskun men mwomwohd ni keilen ahlo oh wie pekipek.+ 36 Pwehki eh rongada pokon ehu me kekeid wasao, e ahpw tepida idihdek dahme wiawi. 37 Irail ahpw ndaiong ih: “Sises mehn Nasaret me ketiket kohla wasaht!” 38 E ahpw ngihl laudida patohwan: “Maing Sises, Nein Depit, komw kupwure ie!” 39 Oh irail me mi mwowe ko ahpw tepida lipwoarehda ih oh ndaiong en nennenla, a e ahpwte kalaudehla eh weriwer, patopatohwan: “Maing Nein Depit, komw kupwure ie!” 40 Sises eri ketin uhdi oh ruwese ohlo en wisikdo reh. Mwurin eh keiong mpen Sises, e ahpw keinemwe reh: 41 “Dahme ke men I en wiahiong uhk?” E ahpw patohwan: “Maing Kaun, mweidohng ie I en pwurehng patohwan wasa.” 42 Sises eri mahsanihong: “Nna, pwurehng kilangada wasa; omw pwoson me kamwahwihiukala.”+ 43 Oh ni ahnsowohte e pwurehng kilangada wasa oh tepida idawehnla ih+ oh kalikalingana Koht. Oh ni ar kilangada met, aramas ako koaros ahpw kapinga Koht.+