Nein Seims Kisinlikou
3 Riei ko, me tohto rehmwail en dehr wiahla sounpadahk, pwehki kumwail ese me kitail pahn ale kadeik laudsang meteikan.+ 2 Pwe kitail koaros kin sapwungala* pak tohto.+ Ma emen sohte kin sapwungala ni lokaia, ih aramas unsek men oh pil kak kaunda paliwere pwon. 3 Ma kitail kihong mete* nan ewen oahs kan pwe en kahrehiong ren kin peikiong kitail, kitail kak kahreiraillahng wasa kan me kitail men kohla ie. 4 Kumwail pil medewe duwen sohp akan: Mendahki re uhdahn laud oh kin mwekidki kisinieng kehlail, mehn ilihl tikitik kis me kin kaweid sohpo en tangalahng wasa koaros me kaunen sohpo men kohla ie.
5 Eri ih pil duwen lowen aramas me kisehn paliwar me tikitik ahpw kin suwei laud. Kisin mpwul en kisiniei kis sou kak isikada wahl kalaimwun ehu? 6 Lowen aramas kin rasehng kisiniei.+ Nanpwungen kisehn paliwaratail kan koaros, lowen aramas kin diren suwed pwe e kin kasaminehla paliwar pwon+ oh isikala elen mour pwon oh mwasingkihla kisiniei en Kiehna.* 7 Pwe soangen mahn lawalo koaros oh menpihr koaros oh sineik oh kieil* koaros oh mahn en nansed koaros kin kak mandala oh aramas kamandalahr soangen mahn pwukat. 8 Ahpw sohte aramas emen kak kamandahla lowe. E me ketihwo oh kin kauwehla wasa oh diren pwoisin me aramas kin mehkihla.+ 9 Kitail kin kapingahki Siohwa* Sahmo lowatail, ahpw kitail pil kin keriahkihla aramas me wiawihda “rasehng Koht”+ lowatail. 10 Kaping oh keria kin kohsang nan au tehieu.
Riei ko, e sohte pwung soahng wet en kin wiawi.+ 11 Ia duwe, pihl iou oh pihl katik kin pwilisang utuhnpihl tehieu? 12 Riei ko, ia duwe, tuhke pik kak wa olip, de tuhke kreip kak wa pik?+ Pwarer rensed ehu pil sohte kak kihda pihl iou.
13 Ihs me ahneki erpit oh koahiek en wehwehki nanpwungamwail? Eri, en kasalehda met sang ni eh wiewia mwahu oh wia soahng koaros ni mpahi me kohsang erpit. 14 Ahpw ma peirin laud+ oh akamai*+ mi nan amwail mohngiong, kumwail dehr suwei+ oh koasoi likamwki me mehlelo. 15 Met kaidehn erpit me kohdihdo sang powe, ahpw kisehn sampah wet,+ me duwehte mahn oh kohsang ngehn suwed kan. 16 Pwe sohte lipilipil wasa me mie peirin oh akamai,* e pil pahn mie pingiping oh soahng suwed koaros.+
17 Ahpw erpit sang powe, mwohn mehkoaros me mwakelekel,+ a mwuri popohl,+ toupahrek,+ kin men peik, diren kadek kalahngan oh wiewia mwahu,*+ sohte kin lipilipilki aramas+ oh sohte kin mwalaun.+ 18 Patehng met, irail kan me kin wiahda popohl+ pahn kamwarak nan irair en popohl+ oh dolung wahn pwung.