Eklesiasdes
9 Ngehi eri katengehdi mepwukat koaros nan mohngiong oh esehda me aramas pwung oh loalokong, iangahki ar doadoahk kan koaros kin mi nin limen Koht mehlelo.+ Aramas sohte ese limpoak oh kailok me kin wiawi mwohn ar ipwidi. 2 Imwilahn aramas koaros uhdahn duwepenehte,+ me pwung oh me suwed,+ me mwahu oh me mwakelekel oh me samin, irail akan me kin wiahda meirong oh irail akan me sohte kin wiahda meirong. Aramas mwahu men kin duwehte me dipan men; me kin kahukihla inou kin duwehte me kin pweieksang* kahukihla inou. 3 Met wia mehkot kansensuwed ehu me kin wiawi nin sampah:* Pwehki aramas koaros kin imwilateieu,+ mohngiong en aramas akan me diren suwed; oh ar madamadau kin iahk erein ar mour, oh mwuri re kin mehla!*
4 Mie koapworopwor ong aramas me momour, pwehki kidi men me momour mwahusang laion emen me melahr.+ 5 Pwe me momour kan ese* me re pahn mehla,+ ahpw me melahr akan sohte mwahn ese mehkot,+ re pil sohte kin ale ketingparail,* pwehki katamanparail koaros manokonoklahr.+ 6 Oh arail limpoak, kailok oh luwak pil sohralahr, oh re solahr pahn iang wia mehkot nin sampah.*+
7 Eri, kohwei tungoale konomw mwenge kan ni peren oh nim nimomw wain ni mohngiong peren,+ pwe Koht mehlelo ketin kupwurperenkidahr omw doadoahk kan.+ 8 Omw likou kan en kin pwetepwet* oh keiehki moangomwen leh ahnsou koaros.+ 9 Pereperenki mour rehn omw pwoud lih me ke poakohng+ erein omw mour soh katepe kan, me E ketikihong uhk nin sampah, omw rahn soh katepe kan koaros, pwe ih pwaisomwen met nan mour oh ketingpen omw doadoahk laud me ke koadoahkihada pahn ketipin.+ 10 Sohte lipilipil dahme ke kak wia,* wia ni uwen omw kak koaros, pwe e sohte pahn mie doadoahk de lamalam* de loalokong de erpit nan Sousou,*+ wasa me ke pahn kohla ie.
11 I kilangehr pil ehu mehkot nin sampah,* kaidehkin me marahrahn tang kan me kin kana ni weirentang ahnsou koaros, kaidehkin me kehlail kan me kin kana nan mahwen,+ kaidehkin me koahiek kan me kin diarada kanarail mwenge ahnsou koaros, kaidehkin me marain kan me kin kepwehpwehla ahnsou koaros,+ kaidehkin me loalokong kan me kin pweida ahnsou koaros,+ pwehki ahnsou apwal oh mwekid soh kasikpe kan kin lelohng irail koaros. 12 Pwe aramas sehse eh ahnsou.+ Duwehte mwahmw akan ar kin lohdiong nan uhk oh menpihr kan ar kin lohdiong nan nsar ehu, ih duwen aramas akan ar kin lohdi nan ahnsou apwal, ni eh kin wiahkintehieu lelohng irail.
13 I pil kilangehr met duwen erpit nin sampah*—oh I pwuriamweikihla: 14 Mie kisin kahnimw tikitik ehu me aramas malaulau keite mi loale; oh nanmwarki kehlail men ahpw kohdo mahweniong kahnimwo oh kapilpene oh kauwada lapalahn kehl ehu pidakihpene kahnimwo. 15 Mie aramas semwehmwe men ahpw loalokong nan kahnimwo, oh e doarekihla kahnimwo eh erpit. Ahpw sohte me tamataman aramas semwehmweo.+ 16 Oh I ndaiong pein ngehi: ‘Erpit kin mwahusang kehlail;+ ahpw en aramas semwehmweo erpit mwamwahlla, oh sohte me kin rong eh lokaia kan.’+
17 Rong ngihl tikitik en aramas loalokong men mwahusang rong weriwer en aramas me kakaun me pweipwei kan.
18 Erpit kin mwahusang tehtehn mahwen kan, ahpw me dipan emente kak kauwehla soahng mwahu tohto.+