Rongamwahu en Sohn
14 “Kumwail dehr nsensuwed.+ Kumwail kasalehda amwail pwoson Koht;+ kumwail pil kasalehda amwail pwoson ie. 2 Mie dehu tohto nan tehnpesen Semei. Ma sohte, I sohte pahn ndaiong kumwail. Ahpw met I pahn kohla kaunopada wasa ehu ong kumwail.+ 3 Oh ma I pahn kohkohla oh kaunopada wasa ehu ong kumwail, I pahn pwurodo oh kasamwo kumwail, pwe wasa me I kin mi ie, kumwail pahn pil mi ie.+ 4 Oh kumwail ese elen wasa me I kohkolahng ie.”
5 Tomas+ ahpw patohwanohng: “Maing Kaun, se sehse wasa me komw pahn ketilahng ie. Ia duwen at pahn kak ese ahlo?”
6 Sises ahpw mahsanihong ih: “Ngehi me ahl+ oh ngehi me mehlel+ oh ngehi me mour.+ Sohte me kak kohla rehn Sahmo ma sohte ngehi.+ 7 Ma kumwail eseieier, kumwail pil pahn ese Semei; sang met kohla kumwail eseier oh kilangehr ih.”+
8 Pilip ahpw patohwanohng: “Maing Kaun, komw ketin kasalehiong kiht Sahmo, oh se pahn itarki met.”
9 Sises ahpw mahsanihong: “Pilip, mwurin ei mihmikiher rehmwail ahnsou reirei, a ke saikinte ese ie? Mehmen me kilangieier pil kilangehr Sahmo.+ A dahme ke ndahki, ‘Komw ketin kasalehiong kiht Sahmo’? 10 Ke sohte kamehlele me I kin miniminiong Sahmo oh Sahmo kin ketin miniminiong ie?+ Soahng kan me I ndaiong kumwail I sohte kin koasoia sang pein ei madamadau,+ ahpw Sahmo me kin ketin miniminiong ie kin ketin wiewia sapwellime doadoahk kan. 11 Kumwail kamehlele ie ni ei nda me I kin miniminiong Sahmo oh Sahmo kin ketin miniminiong ie; a ma soh, kumwail kamehlele pwehki doadoahk pwukat.+ 12 I ndaiong kumwail ni mehlel, mehmen me kin kasalehda eh pwoson ie pil pahn wia doadoahk kan me I kin wia; oh e pahn wia doadoahk kan me laudsang mepwukat+ pwehki I pahn kohkohla rehn Sahmo.+ 13 Oh sohte lipilipil dahme kumwail peki ni edei, I pahn wiahda, pwe Sapwellimeo en kalinganahda Sahmo.+ 14 Ma kumwail peki mehkot ni mwarei, I pahn wiahda.
15 “Ma kumwail poakohng ie, kumwail pahn kapwaiada ei kehkehlik kan.+ 16 Oh I pahn peki rehn Sahmo oh e pahn ketikihong kumwail pil emen sounsawas* en ieiang kumwail kohkohlahte,+ 17 ngehn sarawi* me pid me mehlel,+ me sampah sohte kak ale pwehki eh sohte kilang oh sohte ese.+ Kumwail kin ese pwehki e kin ieiang kumwail oh kin mihmi loalamwail. 18 I sohte pahn mweidohng kumwail en kelekelehpw.* I pahn pwurodo rehmwail.+ 19 Mwurin ahnsou kis, sampah solahr pahn kilang ie, ahpw kumwail pahn kilang ie+ pwehki ei momour oh kumwail pahn pil momour. 20 Ni rahno, kumwail pahn ese me I kin miniminiong Semei oh kumwail kin miniminiong ie oh I kin miniminiong kumwail.+ 21 Mehmen me kin ale ei kehkehlik kan oh kapwaiada iei ih me kin poakohng ie. Sahmo pahn ketin poakohng mehmen me kin poakohng ie oh I pahn pil poakohng ih oh kasalehiong ih ni sansal pein ngehi.”
22 Sudas+ me kaidehn Iskariot ahpw patohwanohng: “Maing Kaun, dahme kahrehda komw pahn ketin kasalehiong kiht ni sansal pein komwi, a kaidehn ong sampah?”
23 Sises ahpw ketin sapeng mahsanihong: “Ma mehmen kin poakohng ie, e pahn kapwaiada ei mahsen,+ oh Semei pahn ketin poakohng ih, oh se pahn ketido reh oh e pahn mihmi reht.+ 24 Mehmen me sohte poakohng ie sohte kin kapwaiada ei mahsen kan. Mahsen me kumwail rongorong kaidehn ahi, ahpw sapwellimen Sahmo me ketin poaroneiehdo.+
25 “I ndaiongkumwailehr soahng pwukat ni ei mihmihte rehmwail. 26 Ahpw sounsawaso, ngehn sarawi* me Sahmo pahn ketin kadarodo ni mwarei, ih me pahn padahkihong kumwail soahng koaros oh katamankihong kumwail soahng koaros me I ndaiong kumwail.+ 27 I pwilikihdi rehmwail popohl; I kihong kumwail ei popohl.+ I sohte kihong kumwail ni ahl me sampah kin kihda. Kumwail dehr nsensuwed oh masak. 28 Kumwail rongehr me I ndaiong kumwail, ‘I pahn kohkohla oh I pahn pwurodo rehmwail.’ Ma kumwail poakohng ie, kumwail pahn perenkihda ei pahn patohla rehn Sahmo, pwe Sahmo ketin lapalapasang ie.+ 29 Eri ahnsou wet, I ndaiongkumwailehr mwohn eh pahn wiawi, pwe ni eh pahn wiawi, kumwail en kamehlele.+ 30 I sohte pahn koasoakoasoiaiong kumwail soahng tohto, pwe kaunen sampah+ kohkohdo oh sohte eh manaman pohi.+ 31 Ahpw pwe sampah en ese me I poakohng Sahmo, I kin wia nin duwen me Sahmo ketin kehkehlingkihong ie I en wia.+ Eri, kumwail uhda oh kitail kohkohlahsang wasaht.