Melkahka kan
En Depit melkahka.
103 I en kapinga Siohwa;
Soahng koaros loaleiet en kapinga mware sarawi.
2 I en kapinga Siohwa;
I en dehr manokehla mehkoaros me e ketin wiadahr.+
3 E kin ketin mahkohng omw sapwung kan koaros+
Oh kin ketin kamwahwihala omw soumwahu kan koaros;+
4 E kin ketin doarehsang omw mour nan sousou*+
Oh kamwarehkin uhk sapwellime limpoak loalopwoat oh kadek kalahngan.+
5 E kin ketin kadirehkinuhkala soahng mwahu kan+ erein omw mour,
Pwe ken wie pwulopwulte oh kehkehlailte duwehte ikel men.+
8 Siohwa iei Koht emen me kin kadek kalahngan oh kupwurkalahngan,+
Me sohte kin mwadang engiengda oh diren limpoak loalopwoat.*+
10 E sohte kin ketin kalokei kitail nin duwen dipatail kan,+
De pil dupungkihong kitail dahme konehng atail sapwung kan.+
11 Pwe duwehte nanleng eh ileilehsang sampah,
Ih uwen laud en sapwellime limpoak loalopwoat ong irail akan me kin lemmwiki ih.+
12 Duwehte dakadahn ketipin eh uhdahn dohsang kihrlahn ketipin,
Ih duwen eh kin ketin kadohwaneweisang kitail dipatail kan.+
13 Duwehte pahpa men eh kin kasalehiong nah seri kan kadek kalahngan,
Siohwa kin ketin kasalehiong irail akan me kin lemmwiki ih kadek kalahngan.+
14 Pwe e uhdahn ketin mwahngih mwomwen atail wiawihda,+
Oh e kin ketin tamataman me kitail wiahte pwehl.+
16 Ahpw ni kisinieng eh kin ipido, e kin sohla mie,
Duwehte ma e sohte mwahn mi wasao.
17 Ahpw sapwellimen Siohwa limpoak loalopwoat me poatopoat
Kin kohwong irail akan me kin lemmwiki ih,+
Oh sapwellime pwung kin kohwong nein neirail seri kan,+
18 Ong irail akan me kin kapwaiada sapwellime inou lapo+
Oh irail akan me kin peikiong sapwellime kehkehlik kan ni keneinei.
19 Siohwa ketin koasoanedier teng mwoale nanleng;+
Oh nin duwen nanmwarki, e kin ketin kaunda mehkoaros.+
20 Kumwail kapinga Siohwa, kumwail sapwellime tohnleng kan koaros+ me manaman kehlail,
21 Kumwail kapinga Siohwa, kumwail sapwellime karis kan koaros,+
Sapwellime sounpapah kan me kin wia kupwure.+
22 Kumwail sapwellime kepikipik kan koaros, kumwail kapinga Siohwa
Nan wasa koaros me e kin ketin kakaun.
I en kapinga Siohwa nan ei mohngiong unsek.